uLuuka 10

UYeesu akuvhasonteelezya avhasundikwa 72

1Pisinda, uMwene uYeesu ahasevha avhasundikwa avhamwavho 72.#10:1 72: IBiibiliya intanzi zye zisimviilwe mu njango iya Shiyunaani nyinji. Zimo mu liizyo zikuti 70. Ahavhasonteelezya vhavhili vhavhili, inga vhalongolele mu nkaaya na mu mbazu zyonti mwe ahasiivhaga kusogola. 2UYeesu ahavhavhuuzya ahati, “Nalyoli iviyavho ivwinji vweleeye, ileelo avhahavuna vhali vhansi. Ishi mumulaavhe uMwene umuhaata viyavho, avhatume avhahavuna avha viyavho vwakwe. 3Ishi sogolaaji, yeenyi, nkuvhatumiilizya ngati tugonzi pahati pa mpumpi! 4Mutahaapaye impiiya, poosye imbuguulu, poosye ivilyatu ivwa kugalulanya. Havhili mutatezyaje ahavhaliilizyo mwi idala kuzya kulamunkana.

5“Inyumba yonti ye vhavhaposheela, muvhalamuhaje avhahaaya suuti, mutinji, ‘UMulungu aavhape uvhutehamu mu nyumba ino.’ 6Inga uwa nyumba avhaposheela ku vhutehamu, pe inyumba iyo kwe yivhanje nu vhutehamu. Ileelo inga atavhaposheela, pe uvhutehamu kwe vhusyalaje niimwe. 7Mutasaamaje-saamaje, inyumba ye vhavhaposheela mutendamaje munuumwo, mumwelaje nu kulya ishaakulya she vhakuuvhapa, mwe pe umuvhomvi akwanzilwa kuposheela amalipilo kufuma mu mbombo yaakwe.

8“Mu nkaaya yonti ye mwinjila, na vhahaaya vhavhaposheela ku luseshelo, ishaakulya shonti she vhaavhapa, mulyanje. 9Muvhaponiaje avhavhinu vhe vhali mu nkaaya iyo. Muvhavhuzyaje avhantu vhonti kuuti, ‘Uvhumwene uvhwa Mulungu vhupalamiiye kuli imwe!’ 10Ileelo mu nkaaya yonti ye mwinjila na vhahaaya vhatavhaposheela, mwepaje mwenemwo. Lwe mukutuuha mu madala gaakwe, mutinji, 11‘Poosye ulusuuto ulwa mu nkaaya yiinyu lwe luli mu vinama vwitu, tukupuupula, inga vhuvhe vhwe vhwahoome uvhwa kuvhasoha.#10:11 Kuvhomba isho kwe kulolesya kuuti, uMulungu avhahaanile avhantu avha mu nkaaya iyo, mwe pe vhavhahaanile avhasundikwa vhaakwe. Ileelo mumanye kuuti uvhumwene uvhwa Mulungu vhupalamiiye!’ 12Nalyoli nkuvhavhuuzya kuuti, isiku ilya vhulonzi, avhantu avha mu nkaaya iyo vhaliposheela isunde ipiti kuluusya avhantu avha mu nkaaya iya Sodooma!#10:12 ISodooma: UMulungu áyilonzile inkaaya iya Sodooma kuzya vhutalamalandu vhwakwe. Vhaazya uVhwandilo 19:24-29.”

UYeesu akuvhasoha avhantu avha mu nkaaya zye zikuhaana kumwitiha

(uMataayi 11:20-24)

13Ahayanga ahati, “Mwasheela imwe mwe vhantu avha mu nkaaya iya Kolaziini ni ya Betisaayida!#10:13 IKolaziini ni Betisaayida zyáli nkaaya izya Vhayuuda. Avhantu avha mu nkaaya izyo vhahayilolaga kuuti vhagolosu kuluusya avhantu avha nkaaya izinji inza iya Tiilo ni ya Siidoni. Vhahayilolaga isho, mwe pe vháamile Vhayuuda havhili vhantu vha Mulungu. Yeenya, amafindango ge mbomvile kuli imwe, inga apele gavhombehaje mwe mu nkaaya iya Tiilo ni ya Siidoni, avhantu avha mu nkaaya izyo, nkandi vházwaye amagunila nu kuyipaha ilota kulolesya kutonta uvhutalamalandu vhwavho. 14Nalyoli isiku ilya vhulonzi, imwe muliposheela isunde ipiti kuluusya avhantu avha mu nkaaya iya Tiilo ni ya Siidoni! 15Niimwe mwe vhantu avha mu nkaaya iya Kapelanawuumu, vhuli, mukusiivha kuuti muliizuvha kufishila ku mwanya? Ndaali! Te yihaavhe vhwevhulo, mulisumbwa pansi kufishila ku vhuzimu!”

16UYeesu ahavhavhuuzya avhasundikwa vhaakwe ahati, “Umuntu we akuvhiivwa imwe, akuniivwa neene, woope we akuvhahaana imwe, akunkaana neene. Havhili we akunkaana ine, akumuhaana ula we antumiliziizye.”

Avhasundikwa 72 vhakugaluha kwa Yeesu ku luseshelo

17Pisinda, avhasundikwa avha Yeesu 72 vhahagaluha kwa Yeesu uku vhakuseshela, vhahamuvhuuzya vhahati, “We Mwene, zyope impepo inkandamanu zyatushindihaga, lwe tukuzishimbizya kwi izina lyaho!” 18UYeesu ahavhavhuuzya ahati, “Namulolaga uSeetano akugwa ngati lumesyo ulwa mvula intalala kufuma ku mwanya.#10:18 uYisaayi 14:12 19Yeenya, mbapiiye amaha aga kumupoota umulugu mu zyonti. Ku maha igo kuuti muhanyaje injoha ni nkoonya, havhili shitaliipo ishintu isha kuvhavwalazya. 20Ileelo inga mukuseshela, mwe pe impepo inkandamanu zikuvhashindiha, muleshe kuseshela kuli izyo vhweleele, nkandi museshelaje, mwe pe amazina giinyu gasimviilwe nu Mulungu ku mwanya.”

UYeesu akuseshela

(uMataayi 11:25-27; 13:16-17)

21Ahavhaliilizyo hanaaho, uMupepo uMufinjile ahaamupa uYeesu kuseshela nkaani, ahati, “We Taata, MWENE wa ku mwanya na pa nsi, nkukusalifwa. Nkukusalifwa, mwe pe imbombo izi uvhazyisile avhantu vhe vhakuyilola kuuti vhali nu vhushindamu uvhwa njeele nu kuuti vhasambiilile, ileelo uvhalolesiizye apazelu vhe vhakuyiisya inza avhaana avhansi. Nalyoli Taata, isho vwe usungwilwe.” 22Havhili ahati, “UTaata waane ampiiye ivintu vwonti. Ataliipo we amumanyile uMwana, nkandi we Taata weeka. Havhili, ataliipo we amumanyile uTaata, nkandi we Mwana weeka, nu muntu wonti we uMwana asungwilwe kumulolesezya.”

23Pe uYeesu ahagalunkana, ahavheenya avhasundikwa vhaakwe, ahavhavhuuzya ahati, “Mulosiitwe imwe mwe mukuzilola izi! 24Nalyoli nkuvhavhuuzya kuuti, vháliipo avhakuvhwi avhinji na vhamwene vhe vhahanzaga kuzilola zye mukuzilola imwe, ileelo vhatázivhwenyi. Havhili vhahanzaga kuzyivwa zye mukuzyivwa imwe, ileelo vhatázyivuuye.”

Ishiholanyo isha Musamaliya umwinza

25Isiku limo, umusambiilizi wumo uwa ndajizyo ásogooye kwa Yeesu. Umusambiilizi uyo ahanzaga kumulinga uYeesu, pe ahamuvhuziilizya ahati, “We Musambiilizi, imbombe ishooni, inga nkaposheele uvhulanzi uvhwa shiima?” 26UYeesu ahamwamula ahati, “Indajizyo izya Moose zikuti vhuli? Vhuli, umanyile zye zikuyangwa muumwo?” 27Ahamwamula ahati, “Zikuti, ‘Umukundaje uMWENE waaho uMulungu ku mwoyo waaho wonti, na ku vhulanzi vhwaho vhwonti, na ku maha gaaho gonti, na ku njeele zyaho zyonti.’#10:27 iNkumbushizyo izya Ndajizyo 6:5 Havhili, ‘Umukundaje umupalamani waaho inza vwe ukuyikunda weneewe.’#10:27 aVhalaawi 19:18” 28UYeesu ahati, “Waamula ahinza! Uvhombaje vhwevhulo, pe kuuti uvhe nu vhulanzi uvhwa shiima.”

29Ileelo umusambiilizi uwa ndajizyo uyo ahanzaga kuyivhiiha kuuti mugolosu pilongolela ilya Mulungu, pe ahamuvhuziilizya havhili uYeesu ahati, “Ishi, umupalamani waane wu naanu?” 30UYeesu ahamwamula ku shiholanyo ahati, “Páali umuntu wumo, we áfumile ku Yelusaleemu, ahasogolaga mu nkaaya iya Yeeliko. Ileelo mwi idala, ahalemwa na vhapumula vintu, vhahamuzuula amenda nu kumuhoma nkaani, vhahamuleha asyaye hansi kufwa. 31Yihafumila, umupuuti#10:31 Umupuuti: Uno áamile Muyuuda uwamwavho we akusuuvhilwa kuuti we angamwavwa, havhili, mwe pe áamile mulongozi uwa shipuuto, ahasuvhilwaga kuvha muntu we akuvhakunda nu kuvhaavwa avhanji. wumo ahajendaga mwi idala liniilyo, lwe amulola umuntu uyo, ahamupambata, ahatuuha ku luvhazu. 32Woope uMulaawi#10:32 UMulaawi: AVhalaawi vháamile vhavhomba mbombo mu Nyumba iMfinjile. Vhaazya iMbaazyo 3:1-13. ahafiha paala, lwe amulola umuntu uyo, ahamupambata, ahatuuha ku luvhazu. 33Pisinda, ahinza uMusamaliya#10:33 UMusamaliya: AVhayuuda vhahavhasufwaga nkaani aVhasamaliya, mwe pe aVhasamaliya vhápafwilwe kufumiilana na vhantanda aVhayuuda na vhanaavuli vhe te Vhayuuda. Izi zyávhombesile ahavhaliilizyo he aVhayuuda vhágomwilwe nu kuvhatwala ku Babeeli kuvha vhazya. Avhantanda vhe vhatágomwilwe vhahapwanwa na vhanaavuli vhe te Vhayuuda. Havhili aVhasamaliya vhahamupuutaga uMulungu kwi idala lye lyásangiine nu kuvhapuuta avhalungu vhaavho. Kuli izyo, avhantu kufuma mu nsi zivhili izyo vhatahivwanaga. wumo, we ahashuulaga kutuushila mwi idala liniilyo. Ileelo uweene lwe amulola umuntu uyo, ahamufwila uvhwila, 34ahamupalamila, ahamupaha idivaayi na mafuta mu malonda gaakwe, pe ahamupinya genego. Ahamulimbizya pa mfwalaasi yaakwe, ahamutwala mu nyumba iya vhajeni, mwe ahavha akumuvhinia.

35“Lwe kwasha, ahafumwa idinaali zivhili,#10:35 Idinaali zivhili: Idinaali yooka gáamile malipilo aga isiku lyoka kwa muvhomvi. Kuli izyo, idinaali zivhili zyáli zya malipilo aga nsiku zivhili kwa muvhomvi. ahaamupa umwimiilizi uwa nyumba iyo, ahamuvhuuzya ahati, ‘Umuvhinie umuntu uno. Inga impiiya izi zyasila, waafumwa izyaho kumwavwa, lwe nagaluha, ndikulipa zye wonjezya.’” 36Pe uYeesu ahamuvhuziilizya umusambiilizi uwa ndajizyo ula ahati, “Vhuli, ishi muli ivha vhatatu, wu naanu we ukusiivha kuuti áali mupalamani uwa nalyoli uwa ula we avhapumula vintu vhámulemile?” 37Ahaamula ahati, “We wula we ámufwiliiye uvhwila.” UYeesu ahamuvhuuzya ahati, “Niiwe sogoola uvhombaje inza vhwevhulo!”

UYeesu mu nyumba ya Maalita nu Maliiya

38UYeesu na vhasundikwa vhaakwe lwe vhali mwi idala kusogola ku Yelusaleemu, vhahafiha mu lutala lumo. Umwo umwantanda wumo, we vhahatinji uMaalita, ahamukalibisya uYeesu mu nyumba yaakwe. 39UMaalita áamile nu munine waakwe we vhahatinji uMaliiya. Ahavhaliilizyo he uYeesu áali mu nyumba yaavho, uMaliiya átendiime pa luvhazu pa vinama ivwa Mwene uYeesu, ahatejelezyaga insambiilizyo zyakwe. 40Ileelo uMaalita ahapwungaga ni mbombo inyinji izya kumutetela uYeesu. Pe ahamuvhuuzya uYeesu ahati, “We Mwene, utakulola kuuti havhiivhi lwe umunine waane andesheeye imbombo zyonti neeka? Muvhuuzye anaavwe!”

41UMwene uYeesu ahamwamula ahati, “Maalita, shooni she ukupwunga nu kuyimba ni nyinji? 42Ileelo shikwanzilwa ishintu shooka vhweleele she shinza, isho she uMaliiya asavhuuye, naawumo we angasheefwa ku kwakwe.”

Actualmente seleccionado:

uLuuka 10: nih

Destacar

Copiar