uLuuka 11

Insambiilizyo izya kumulaavha uMulungu

(uMataayi 6:9-13; 7:7-11)

1Isiku limo, uYeesu áali kumo kumulaavha uMulungu. Lwe aamala, umusundikwa waakwe wumo ahati, “Mwene, utusambiilizye kumulaavha uMulungu, inza vwe uYoohani ávhasambiliziizye avhasundikwa vhaakwe.”

2UYeesu ahavhavhuuzya ahati, “Lwe mukumulaavha uMulungu, mutinji:

Taata wiitu uwa ku mwanya,#11:2 Wiitu uwa ku mwanya: IBiibiliya intanzi zye zisimviilwe mu njango iya Shiyunaani nyinji. Zimo muli izyo zitali na mazwi iga. Zyope iBiibiliya zimo izya manda iga zikugaleha amazwi iga ishisita kusimba. izina lyaho lishindikwaje.

Uvhumwene vhwaho vhwinze.

Zye ukasiime, zivhombeshe mu nsi umu,

inza vwe zikuvhombeha ku mwanya ukwo.#11:2 Zye ukasiime, zivhombeshe mu nsi umu, inza vwe zikuvhombeha ku mwanya ukwo: IBiibiliya intanzi zye zisimviilwe mu njango iya Shiyunaani nyinji. Zimo muli izyo zitali na mazwi iga. Zyope iBiibiliya zimo izya manda iga zikugaleha amazwi iga ishisita kusimba.

3Utupanje ishaakulya shiitu insiku zyonti.

4Utuswile uvhutalamalandu vhwitu,

mwe pe niiswe tukuvhaswila vhonti

vhe vhakutuvhombela uvhutalamalandu.

Utulongole inga tutahinjile mu ndingo,

havhili utuposhe nu Muvhiivhi ula.#11:4 Havhili utuposhe nu Muvhiivhi ula: IBiibiliya intanzi zye zisimviilwe mu njango iya Shiyunaani nyinji. Zimo muli izyo zitali na mazwi iga. Zyope iBiibiliya zimo izya manda iga zikugaleha amazwi iga ishisita kusimba. ”

5Pe ahavhavhuuzya ishiholanyo ahati, “Twivwe sivhiliili, muli imwe umuntu wumo akusogola kwa mumanyani waakwe pa vhusiku pahati nu kumuvhuuzya kuuti, ‘We mumanyani, nkulaavha umpavhile amakaati gatatu, 6mwe pe umumanyani waane anshuliiye, ileelo ntali ni shaakulya isha kuumupa.’ 7Woope umumanyani uyo akumwamula akuti, ‘Leha kunjimvwa! Ngaliiye umulyango, havhili ine na vhaana vhaane tukaasite. Intangavhuuha kuuti nkupe!’ 8Inga umuntu uyo akujendeelela kulaavha ku vhujimbiilizu, nalyoli nkuvhavhuuzya kuuti, umumanyani waakwe akuvhuuha nu kuumupa vwe akwanza. Te kuuti akuumupa, mwe pe mumanyani waakwe, akuumupa, mwe pe atakuleha kumulaavha.

9“Ishi nkuvhavhuuzya kuuti, mumulaavhaje uMulungu, pe woope kwe avhapanje, havhili mulondolaje, pe niimwe kwe muvwagaje, havhili muhonyonsyaje, pe niimwe kwe mwigulilwaje. 10Nkuvhavhuuzya vhwevhulo, mwe pe umuntu wonti we akulaavha, akuposheela, woope we akulondola, akuvwaga, woope we akuhonyonsya, akwigulilwa. 11Vhuli, wu naanu muli imwe we inga umwana waakwe amulaavha ikaati, angaamupa ivhwe?#11:11 Amulaavha ikaati, angaamupa ivhwe: IBiibiliya intanzi zye zisimviilwe mu njango iya Shiyunaani nyinji. Zimo muli izyo zitali na mazwi iga. Zyope iBiibiliya zimo izya manda iga zikugaleha amazwi iga ishisita kusimba. Poosye inga amulaavha inswi, angaamupa injoha? 12Poosye inga amulaavha iji, angaamupa inkoonya? 13Pe ishi, inga imwe mwe vhatalamalandu mumanyile kuuvhapa avhaana vhiinyu ivintu ivwinza, pe uTaata wiitu uwa ku mwanya aliivhapa uMupepo uMufinjile vhaala vhe vhakumulaavha!”

UYeesu ali na maha kuluusya amaha aga Belizabuuli

(uMataayi 12:22-30; uMaaliko 3:20-27)

14Isiku limo, uYeesu ahayishimbizyaga impepo inkandamanu mwa muntu wumo. Impepo iyo yámuvhiisile umuntu uyo kuvha wu shinuunu, lwe yaafuma, umuntu uyo ahanda kuyanga. Ivhungaana ilya vhantu vhe vháamile paala, lihasukumila nkaani. 15Ileelo vhamo muli vhuuvho, vhahati, “Akushimbizya impepo inkandamanu ku maha aga Belizabuuli,#11:15 Belizabuuli: lizina ilyamwavho ilya Seetano we mupiti uwa mpepo inkandamanu. Izina ili lyáfumiliine ni izina ilya Baali-Zebuubu. Izina ilyo lizina ilya mpepo yimo ye insi impalamani na Vhaisilayeeli vhahayipuutaga fwe wu mulungu waavho. umupiti uwa mpepo inkandamanu!” 16Vhamo vhahamulinga, vhahati, avhalolesye ishilolesyo isha kuhomeshezya kuuti afumile kwa Mulungu. 17Ileelo uYeesu ahamanya insiivho zyavho. Pe ahavhavhuuzya ahati, “Inga avhantu avha vhumwene vhwoka vhakulwa, uvhumwene uvhwo vhukunanjiha. Vhoope avhantu avha mu nyumba yooka inga vhanda kulwa vhuuvho vheeka, inyumba iyo yikunanjiha. 18Vwe zili, woope uSeetano inga akulwa nu Seetano, uvhumwene vhwakwe vhukunanjiha. Pe ishi, uvhumwene vhwakwe vhungajendeelela vhuli? Nkuyanga vhwevhulo, mwe pe mukuti nkushimbizya impepo inkandamanu ku maha aga Belizabuuli. 19Ishi, inga ine nkushimbizya impepo inkandamanu ku maha aga Belizabuuli, pe avhasundikwa vhiinyu vhakushimbizya ku maha aga naanu? Kuli izyo, avhasundikwa vhiinyu vhe kwe vhalolesye kuuti zye mukusiivha te zya nalyoli. 20Ileelo ine, inga nkushimbizya impepo inkandamanu ku maha aga Mulungu, pe uvhumwene uvhwa Mulungu vhwinzile kuli imwe!

21“Umuntu uwa maha, inga ali ni shilwilo, akuyimililila inyumba yaakwe, ataliipo we angavipumula ivintu vwakwe. 22Ileelo inga ayinza umuntu uwa maha kuluusya uweene, akumugoma nu kumupoota. Pe akumufwula ivilwilo vwonti vwe asuvhilaga, nu kupumula ivintu vwonti vwe vili mu nyumba nu kuvhagavhila avhanji. 23Umuntu wonti we atali uluvhazu lwane, mulugu waane. Havhili we atakuvhavhungaaniha avhantu pooka niine, uyo akuvhasasaanya.”

Kugaluha ukwa mpepo inkandamanu

(uMataayi 12:43-45)

24UYeesu ahayanga havhili ahati, “Lwe impepo inkandamanu yaafuma mwa muntu, yikutuuha pe patali aminzi, lwe yikulondola apa kutuuzya, ileelo yitakupaaga, pe yikuti, ‘Kwe ngalushe mu nyumba yaane ye naafumile.’ 25Inga yaafiha nu kumulola umuntu uyo ali ngati nyumba ye vhuusile nu kuyiyemvwa ahinza, 26pe yikusogola kuzileeta impepo izyamwavho 7 zye nkandamanu kuluusya iyeene. Impepo zyonti izyo zikwinjila mwa muntu uyo, nu kutendama munuumwo, pe umuntu uyo akuvha havhiivhi nkaani, kuluusya ku vhwandilo.”

27UYeesu lwe akuyanga izyo, umwantanda wumo mwi ivhungaana liila ahayanga kwi izwi ahati, “Alosiitwe we ákupaafile nu kukwonsya!” 28Ileelo uweene uYeesu ahati, “Vhalosiitwe nkaani vhe vhakwivwa nu kulishindiha izwi ilya Mulungu!”

Avhantu vhakwanza uYeesu alolesye ishilolesyo

(uMataayi 12:38-42)

29Avhantu lwe vhakujendeelela kuvhungaana, uYeesu ahati, “Avhantu avha havhaliilizyo iha vhavhiivhi! Vhakwanza ishilolesyo, ileelo te mbalolesye ishilolesyo naashimo, nkandi sheshiila isha mukuvhwi uYoona. 30Inza vwe uYoona áali shilolesyo ku vhantu avha mu nkaaya iya Nineewe, niine ne Mwana wa Aadamu kwe mbe ne shilolesyo ku vhantu avha havhaliilizyo iha. 31Isiku ilya vhulonzi, usamwene uwa ku Sheeba aliyimiilila nu kuvhalonga imwe mwe vhantu avha havhaliilizyo iha. Alivhalonga kuuti mwe vhavhiivhi, mwe pe uweene áshuuye kufuma mu nsi iya kutali, ahinza kutejeelezya amazwi aga vhushindamu uvhwa njeele uvhwa mwene uSolomooni.#11:31 1 aVhamwene 10:1-10; 2 iMbombo izya Havhaliilizyo 9:1-12 Ileelo ipa ndiipo ne mupiti kuluusya uSolomooni! 32Havhili isiku ilya vhulonzi, avhantu avha mu Nineewe vhoope vhaliyimiilila kuvhalonga imwe mwe vhantu avha havhaliilizyo iha, kuuti mwe vhavhiivhi. Vhalivhalonga, mwe pe lwe uYoona akumusya izwi ilya Mulungu ku mwavho, vhátonsite imbiivhi zyavho.#11:32 uYoona 3:5 Ileelo ipa ndiipo ne mupiti kuluusya uYoona!”

Inyaale iya muvhili

(uMataayi 5:15; 6:22-23)

33“Ataliipo umuntu we akuhozya inyaale nu kuyivhiiha pe pazyihiime, poosye kuyigubishila ni nsonta, nkandi akuyivhiiha pi ibeeja, inga avhantu lwe vhakwinjila, vhalolaje. 34Aminso gaaho gali inza inyaale ye yikuwuhozya umuvhili waaho. Inga aminso gaaho gali ahinza, pe umuvhili waaho wonti wukuvha nu vhuzelu. Ileelo inga gafuuye, umuvhili waaho wukuvha ni shiisi. 35Pe ishi, uvhe minso, uvhuzelu vhwe vhuli muhati yaaho vhutahinze vhuvhe shiisi. 36Ishi inga umuvhili waaho wonti wavha nu vhuzelu, ishisita kuvha ni shiisi inga pooka, pe umuvhili wonti kwe wuvhe muzelu, inza inyaale vwe yikuhozya.”

Insoshi izya Yeesu ku Vhafalisaayi

(uMataayi 23:1-36; uMaaliko 12:38-40)

37Lwe uYeesu aamala kuyanga amazwi igo, uMufalisaayi wumo ahamulanjila kuuti asogole kulya ku kwakwe. Pe uYeesu ahasogola, ahinjila, ahatendama kulya ishaakulya. 38UMufalisaayi uyo lwe aalola uYeesu akulya ishisita kuvhomba amaata gaavho aga kugeeza mu nyoovhe,#11:38 Akulya ishisita kuvhomba amaata gaavho aga kugeeza mu nyoovhe: AVhafalisaayi vhahitihaga kuuti inga umuntu aalema ishaakulya ishisita kugeeza mu nyoovhe, akushivhiiha ishaakulya isho kuvha shihombezu, nu kumuvhiiha we akulya ishaakulya isho kuvha muhombezu. AVhafalisaayi vhásukumiiye kulola uYeesu atakusaajila kuhombela ukwa vhasundikwa vhaakwe. ahasukumila nkaani. 39Pe uMwene uYeesu ahamuvhuuzya ahati, “Imwe mwe Vhafalisaayi mukuyivhiiha mwe vhagolosu pilongolela ilya vhantu, ileelo muhati zyinyu mwizuuye uvhupumula vintu nu vhuvhiivhi. Isho she shooka nu kwozya ulupindi nu luvhiga munzi vhweleele.#11:39 Isho she shooka nu kwozya ulupindi nu luvhiga munzi vhweleele: AVhafalisaayi vhahozyaga iviliilo kunzi, vhahasiivhaga kuuti, kuvhomba isho kukuvhavhiiha kuvha vhalunjisu pilongolela ilya Mulungu. 40Mwe vhapukupuuku imwe! We ápezile munzi, te we ápezile na muhati vhweleele? 41Muvhavwaje avhapiina ku mwoyo wonti, pe vwonti kuuti vizelupe kuli imwe.

42“Mwasheela imwe mwe Vhafalisaayi! Yeenya, mukumufumwizya uMulungu ishigavho shooka pa vigavho 10 poosye ni sha vintu ivinsi inza uvhulende ni nzembwa ni nyanyi izyamwavho izya matundu amavhiila mu mavhiila. Ileelo mutakusaajila kuvhomba ingolosu, poosye kumukunda uMulungu. Izi zye mukwanzilwa kuzivhomba, pooka ni nyinsi izyo zye mukuzivhomba. 43Mwasheela imwe Vhafalisaayi, mwe pe mukusungwa kutendama mu vitengo ivwa pilongolela mu masinagoogi. Havhili, mukusungwa kuuti avhantu vhavhalamuhaje ku mushinzi mu madala. 44Mwasheela imwe! Muli fwe mbiipa zye zitali ni shivhulumwanya, avhantu vhakujenda pamwanya ishisita kumanya.”#11:44 Ku Vhayuuda yáamile mwiho kujenda pamwanya pa mbiipa, inga umuntu avhomba isho, yihamuvhiihaga kuvha muhandamanu. Ishiholanyo isha Vhafalisaayi kuvha inza imbiipa zye zitali ni shivhulumwanya, kwe kuuti aVhafalisaayi vhakuloleha ngati vhagolosu ileelo mu mooyo gaavho vhahandamanu. Havhili kuvha pooka na Vhafalisaayi kukuvhavhiiha avhantu kuvha vhahandamanu.

45Umusambiilizi wumo uwa ndajizyo ahamuvhuuzya uYeesu ahati, “Musambiilizi, lwe ukuyanga izyo, ukutuyanga havhiivhi niiswe swe vhasambiilizi avha ndajizyo.” 46UYeesu ahamwamula ahati, “Niimwe mwe vhasambiilizi avha ndajizyo mwasheela, mwe pe mukuvhavhegazya avhantu amaligo amamwamu#11:46 Amaligo amamwamu: UYeesu ipa akuholanya indajizyo zyonti izya vhasambiilizi avha ndajizyo izya Moose ni zya Vhafalisaayi na maligo amamwamu. Indajizyo izyo zyáli ngomu avhantu kuzilema nu kuzilandata. ge vhatangavhuusya. Niimwe mutakuvhaavwa kuvhuusya poosye kulinjizya na hasamba inga hooka!

47“Mwasheela imwe, mwe pe mukuzenga imbiipa izya vhakuvhwi vhaala vhe avhataata vhiinyu vhávhagozile! 48Ipo mukuhomeshezya kuuti, mukwitinkana na zye avhataata vhiinyu vhávhomvile, mwe pe avheene vhávhagozile, niimwe mukuzenga imbiipa izyo! Mukushindiha imfwa zyavho, ileelo mutakuzilandata zye vhahalumbililaga.

49“Izyo zye zyámuvhiisile uMulungu kuuti ayanje ku vhushindamu vhwakwe uvhwa njeele ati, ‘Ndivhasonteelezya avhakuvhwi na vhatumwa ku kwavho, ileelo vhamo vhalivhagoga na vhamwavho vhalivhayimvwa.’ 50Ishi, avhantu avha havhaliilizyo iha vhalisundwa kuzya vhakuvhwi vhonti vhe vhávhagozile, kufuma ku vhwandilo uvhwa nsi, 51kufuma pe uKaayini ámugozile uAabeli, kufishila pa Zakaliya,#11:51 Kufuma pe uKaayini ámugozile uAabeli, kufishila pa Zakaliya: Mu Lufingwi ulwa Hali, yisimviilwe kuuti avhantu vhe vhávhagozile, uwa kwanda áamile wu Aabeli, uwa vhusililishilo áamile mukuvhwi uZakaliya. Vhaazya uVhwandilo 4:8; 2 iMbombo izya Havhaliilizyo 24:20-22. we vhámugozile pahati pa shifinjilo ni Nyumba iMfinjile. Nalyoli nkuvhavhuuzya kuuti, avhantu avha havhaliilizyo iha vhalisundwa kuli izyo zyonti.

52“Mwasheela imwe mwe vhasambiilizi avha ndajizyo, mwe pe mudinzite idala ilya vhantu kumumanya uMulungu. Niimwe mweneemwe mutamumanyile, havhili muvhadindiiye vhe vhakwanza kumumanya.”

53Lwe uYeesu aamala kuyanga amazwi igo, aheepa pa nyumba iya Mufalisaayi ula. Kwandila ipo aVhafalisaayi na vhasambiilizi avha ndajizyo vhahavha vhalugu nkaani kwa Yeesu. Pe vhahanda kumuvhuziilizya inyinji, 54inga vhamuteje, kuuti ayanje zimo pe vhalyaje idala ilya kumulonjeelela.

Actualmente seleccionado:

uLuuka 11: nih

Destacar

Copiar