uLuuka 9

UYeesu akuvhatuma avhasundikwa

(uMataayi 10:5-15; uMaaliko 6:7-13)

1UYeesu ahavhiita avhasundikwa vhaakwe 12, ahaavhapa amaha amasisya na maha aga kushimbizya impepo inkandamanu zyonti nu kuponia amavhinu. 2Pe ahavhasonteelezya kukumusya izwi ilya vhumwene uvhwa Mulungu nu kuvhaponia avhavhinu. 3Ahavhavhuuzya ahati, “Lwe mukushuula, mutahaapaye ishintu naashimo: poosye indoogo, poosye imbuguulu, poosye ishaakulya, poosye impiiya, poosye amenda aga kugalulanya. 4Inyumba yonti ye vhavhaposheela, mutendamaje munuumwo kufishila pe mukwepa mu nkaaya iyo. 5Ileelo mu nkaaya yonti ye vhatavhaposheela, mwepaje, lwe mukwepa mupupulaje nu lusuuto mu vinama vwinyu.#9:5 Mupupulaje nu lusuuto mu vinama vwinyu: Kwe kulolesya kuuti uMulungu akuvhahaana avhantu ivho, mwe pe vhakuvhahaana avhasundikwa vhaakwe.” Kuvha vhwe vhwahoome uvhwa vhutalamalandu vhwavho uvhwa kuhaana Izwi iLyinza. 6Pe avhasundikwa ivho vhahasogola mu ntala amavhiila mu mavhiila, umwo vhahalumbililaga Izwi iLyinza nu kuvhaponia avhavhinu kwonti kwe vhahasogolaga.

Kufwa ukwa Yoohani uMwozyi

(uMataayi 14:1-12; uMaaliko 6:14-29)

7Umwene uHeelodi ahiivwa imbombo zyonti zye uYeesu ahavhombaga. Izyo zihamuvhiiha kuvha na maganigani nkaani, mwe pe vhamo vhahayangaga vhahatinji wu Yoohani uMwozyi azyusile. 8Avhamwavho vhahayangaga vhahatinji, wu mukuvhwi uEeliya ayinzile havhili.#9:8 UEeliya ayinzile havhili: AVhayuuda vhahasuvhilaga kuuti aliyinza havhili umukuvhwi uEeliya, kusengaanya kwinza ukwa Chilisiti. Vhaazya uMalaaki 3:1; 4:5-6. Avhamwavho vhahatinji, wooka mu vhakuvhwi avha hali azyusile. 9Ileelo uHeelodi ahati, “UYoohani námudumuuye itwe! Ishi, wu naanu we akuvhomba izi zye nkuzyivwa?” Pe uHeelodi ahanza nkaani kulolana nu Yeesu.

UYeesu akuvhaliisya avhantu 5,000

(uMataayi 14:13-21; uMaaliko 6:30-44; uYoohani 6:1-14)

10Avhatumwa vhaala vhahagaluha kwa Yeesu, vhahamuvhuuzya zyonti zye vhávhomvile. Pe ahavhanyatula vhahasogola mu nkaaya ye vhahatinji iBetisaayida, inga vhavhe vheeka kukwilu. 11Ileelo lwe ivhungaana ilya vhantu lyamanya kwe ásogooye, lihamulandata. UYeesu ahavhaposheela ahinza, ahavhasambilizyaga izwi ilya vhumwene uvhwa Mulungu. Havhili vhe vháamile vhavhinu, ahavhaponiaga.

12Lwe haafiha hamazuuvha, avhasundikwa vhaakwe 12 vhahasogola ku kwakwe, vhahamuvhuuzya vhahati, “Ulilaje ivhungaana ili ilya vhantu, vhasogole mu ntala na mu nkaaya izya mupiipi, inga vhalaavhe ishaakulya na pa kukaata, mwe pe ipa pe pi ilaala patali naashimo isha kuvhaavwa.” 13UYeesu ahavhaamula ahati, “Vhapi mweneemwe ishaakulya!” Vhahamwamula vhahati, “Iswe tutali nasho naashimo, nkandi ge makaati gasaano ni nswi zivhili. Vhanga tusogole tukale ishaakulya ishamwavho she shingavhakwila avhantu vhonti ivha!” 14Avhantu vhe vháamile paala, avhanaavuli vheeka vháali 5,000 ishi. Ileelo uYeesu ahavhavhuuzya avhasundikwa vhaakwe ahati, “Vhatendamishe avhantu mu mpuga izya vhantu amashumi gasaano gasaano.” 15Pe vhahavhomba vhwevhulo, vhahavhatendamiha avhantu vhonti. 16Pe uYeesu ahanyatula amakaati gasaano igo ni nswi zivhili izyo, aheenya ku mwanya, ahamusalifwa uMulungu. Ahamensulanya amakaati igo, ahaavhapa avhasundikwa vhaakwe, inga vhavhagavhile avhantu ivho. 17Avhantu vhonti vhahalya, vhahiikuta. Avhasundikwa vhaakwe vhahavhungaaniha ivwalila, vihiizula ivitundu 12.

UPeeteli akuhomeshezya kuuti uYeesu wu Chilisiti

(uMataayi 16:13-19; uMaaliko 8:27-29)

18Isiku limo, uYeesu na vhasundikwa vhaakwe vháamile pooka, kukwilu. UYeesu ahamulaavhaga uMulungu. Pisinda, ahavhavhuziilizya avhasundikwa vhaakwe ahati, “Avhantu vhakuti ine ne naanu?” 19Avheene vhahamwamula vhahati, “Vhamo vhakuti we Yoohani uMwozyi, avhamwavho vhakuti we mukuvhwi uEeliya. Havhili avhamwavho vhakuti we wooka mu vhakuvhwi avha hali we azyusile.”

20UYeesu ahavhavhuziilizya havhili ahati, “Ileelo imwe mukuti ine ne naanu?” UPeeteli ahamwamula ahati, “Iwe we we Chilisiti we uMulungu áfinzile kumuleeta!” 21UYeesu ahavhasoha avhasundikwa vhaakwe kuuti vhatahamuvhuuzye umuntu nuumo inongwa izyo.

UYeesu akuyanga izya kufwa nu kuzyuha kwakwe

(uMataayi 16:20-28; uMaaliko 8:30-9:1)

22UYeesu ahavhavhuuzya havhili ahati, “Ne Mwana wa Aadamu nkwanzilwa kuyimba nkaani nu kuhaanwa na vhasongo na vhapiti avha vhapuuti na vhasambiilizi avha ndajizyo,#9:22 Avhasongo na vhapiti avha vhapuuti na vhasambiilizi avha ndajizyo: Ivha vhahinjilaga mu lukuvhato. Vhaazya ulukuvhato mu Ntantiho izya Mazwi aMajeni. havhili kwe vhangoje. Ileelo isiku ilya vhutatu uMulungu alinzyusya.”

23Pisinda, uYeesu ahavhavhuuzya vhonti ahati, “Umuntu wonti we akwanza kundandata ine, yikwanzilwa ayihaane wuuyo weeka, ayikungulaje kundandata insiku zyonti, poosye nu kufwa.#9:23 Ayikungulaje kundandata insiku zyonti, poosye nu kufwa: IShiyunaani shikuti, Avhusyaje ishihovhenkanyo shaakwe insiku zyonti nu kundandata. 24Umuntu wonti we akwanza kuvhupoha uvhulanzi vhwakwe, alivhulovwa. Ileelo umuntu wonti we akuvhulovwa uvhulanzi vhwakwe ku zyane, alivhupoha. 25Umuntu angalyaga lilonka vhuli, inga avhiiha insi yonti yavha yaakwe, ileelo avhuteezya uvhulanzi vhwakwe? 26Umuntu wonti we akunkaana ine ni nsambiilizyo zyane pa vhantu, niine ne Mwana wa Aadamu lwe nkwinza mu vhushindamu vhwane, nu vhwa Taata nu vhwa vhahavhizya avhafinjile, ndimuhaana umuntu uyo. 27Nalyoli nkuvhavhuuzya kuuti, vhaliipo vhamo vhe vhimiliiye ipa, te vhahaafwe, she vhatavhuvhwenyi uvhumwene uvhwa Mulungu.”

UYeesu akwanduha

(uMataayi 17:1-8; uMaaliko 9:2-8)

28Lwe zyatuuha insiku 8 kufuma pe ahayangaga amazwi igo, uYeesu ahavhanyatula avha Peeteli nu Yoohani nu Yaakobu, ahazuvha navho pi igamba kulaavha. 29Lwe akulaavha, ahagalunkana pa minso na menda gaakwe gahavha mazelu, gahanyengʼenyela nkaani. 30Yeenya, vhahitushila avhanaavuli vhavhili, uMoose nu Eeliya vhahavhaloleshela, vhahayangaga nu Yeesu. 31Vhahalolehaga mu vhushindamu uvhwa Mulungu. Vhahayangaga vwe uYeesu kuuti alunjisye zye uMulungu ásivhiliiye, izya kufwa kwakwe ku Yelusaleemu.

32Ahavhaliilizyo iho uPeeteli na vhamwavho vhásupiliiye. Ileelo lwe vhakudaamula, vhahalola uvhushindamu uvhwa Yeesu, havhili vhahavhalola avhanaavuli vhavhili vhimiliiye pooka nawo. 33Avhantu vhavhili ivho lwe vhakulehaana nu Yeesu, uPeeteli ahamuvhuuzya uYeesu ahati, “We Mwene, hinza iswe tusyale panaapa, tuzenje ivwegwi vitatu. Shimo shivhe shaaho, ishamwavho shivhe sha Moose, ni shamwavho shivhe sha Eeliya.” Ileelo uPeeteli atámanyile zye ahayangaga.

34UPeeteli lwe akuyanga amazwi igo, ivhingo lihafumila lihavhagubishila, pe vhahoogopa nkaani. 35Izwi lihivwiha kufuma mwi ivhingo ilyo, lihati, “Uno Mwana waane#9:35 UMwana waane: Vhaazya uMwana wa Mulungu mu Ntantiho izya Mazwi aMajeni. we imusavhuuye, mumutejelezyaje uweene!” 36Lwe izwi ilyo lyivwiha, uYeesu ahaloleha ali weeka. Avhasundikwa vhaakwe vhahapuuma mwaa, vhatámuvhuziizye umuntu nuumo mu nsiku izyo, ziila zye vházivhwenyi.

UYeesu akumuponia umwana uwa mpepo inkandamanu

(uMataayi 17:14-18; uMaaliko 9:14-27)

37Indaavhi yaakwe, uYeesu na vhasundikwa vhatatu ivho lwe vhiiha kufuma mwi igamba, vhahahomaana ni ivhungaana ipiti ilya vhantu. 38Kufuma mwi ivhungaana ilyo umuntu wumo ahavhilishila ahati, “We Musambiilizi, nkulaavha umwavwe umwana waane, mwe pe indi nawo wunuuno weeka. 39Ulwinji impepo inkandamanu yikumulema, lwe yikumulema akuhoolaga nkaani. Havhili yikumuyinzanyaaga nu kumugwisya pansi. Yikumuletelaga ishinzilisi na matatafula gakumufumaga mwi ilomu. Impepo iyo yikumuhomezyaga nkaani, yitakumuleshelaga naluvhiilo. 40Mbalaavile avhasundikwa vhaaho kuuti vhayishimbizye, ileelo vhaposiitwe.” 41UYeesu avhavhuuzya ahati, “Imwe mwe vhantu avha havhaliilizyo iha mwe mutali nu lwitiho, havhili mwe vhatalamalandu! Kwe ntendame niimwe kufishila lyeli? Havhili kwe mbajimbiilile kufishila lyeli? Muleete umwana waaho ipa.”

42Umwana uyo lwe akusogola kwa Yeesu, impepo iyo yihamugwisya pansi nu kumugalagaasya. Pe uYeesu ahayipilila, ahamuponia umwana uyo nu kumugalusya kwa yise. 43Avhantu vhonti lwe vhagalola amaha amapiti aga Mulungu vwe gali, vhahasukumila nkaani.

UYeesu akukuvhwa havhili izya kufwa kwakwe

(uMataayi 17:22-23; uMaaliko 9:30-32)

Avhantu vhaala lwe vhakusukumila zyonti zye uYeesu ávhomvile, ahavhavhuuzya avhasundikwa vhaakwe ahati, 44“Tejeelezyi ahinza zye nkwanza kuvhavhuuzya: Ne Mwana wa Aadamu kwe vhambiishe mu nyoovhe izya vhalugu.” 45Ileelo avheene vhatahazimanyinsanyaaga zye uYeesu ahayangaga, mwe pe zyázyisiilwe, inga vhatazimanyinsanyaaje, vhoope vhahoogopa kumuvhuziilizya.

Umupiti mu vhumwene uvhwa Mulungu

(uMataayi 18:1-5; uMaaliko 9:33-37)

46Avhasundikwa avha Yeesu vhahanda kudalinkana kuuti wu naanu mu vheene we mupiti. 47UYeesu ahamanya insiivho zyavho. Pe ahamunyatula umwana umunsi, ahamuvhiiha papiipi nawo. 48Ahavhavhuuzya ahati, “Umuntu wonti we akumuposheela umwana umunsi inza uno kwi izina lyane, akumposheela neene. Woope we akumposheela ine, akumuposheela ula we antumiliziizye. Vhwevhulo, we munsi kuli imwe mwenti, akuvha mupiti kuvhaluusya mwenti.”

We atakumuhaana uYeesu ali pooka nawo

(uMaaliko 9:38-40)

49UYoohani ahamuvhuuzya uYeesu ahati, “We Mwene, twaamuvhwenyi umuntu wumo akushimbizya impepo inkandamanu kwi izina lyaho. Twaamuhaanile, mwe pe atali pooka niiswe.” 50UYeesu ahamwamula ahati, “Mutamuhaanaje, mwe pe umuntu wonti we akuvhomba zye zitakusugaana ni zyinyu, ali pooka niimwe.”

AVhasamaliya vhakuhaana kumuposheela uYeesu

51Insiku zyakwe izya kuzuvha ku mwanya lwe zyapalamila, uYeesu ahaamula kusogola ku Yelusaleemu. 52Pe ahavhasonteelezya avhantu vhalongolele, vhahasogola mu lutala lumo ulwa mu Samaliya inga vhamusenganizanye pamo. 53Ileelo avhantu avha pa lutala ulwo vhahahaana kumuposheela, mwe pe áhampiiye kusogola ku Yelusaleemu. 54Avhasundikwa vhaakwe uYaakobu nu Yoohani, lwe vhaalola izyo, vhahati, “We Mwene, ukwanza tulaavhe umwoto wiishe kufuma ku mwanya wuvhapembe, inza vwe umukuvhwi uEeliya woope ávhomvile?#9:54 Inza vwe umukuvhwi uEeliya woope ávhomvile: IBiibiliya intanzi zye zisimviilwe mu njango iya Shiyunaani nyinji. Zimo muli izyo zitali na mazwi iga. Zyope iBiibiliya zimo izya manda iga zikugaleha amazwi iga ishisita kusimba.” 55Ileelo uYeesu ahagalunkana kuvheenya, ahavhapilila. Ahati, “Imwe mutamanyile amooyo giinyu vwe gakwanzilwa kuvha ku vhanji, mwe pe ne Mwana wa Aadamu ntínzile kulovwa, nkandi nínzile kuvhapoha avhantu.”#9:55 Ahati, “Imwe mutamanyile amooyo giinyu vwe gakwanzilwa kuvha ku vhanji, mwe pe ne Mwana wa Aadamu ntínzile kulovwa, nkandi nínzile kuvhapoha avhantu.” IBiibiliya intanzi zye zisimviilwe mu njango iya Shiyunaani nyinji. Zimo muli izyo zitali na mazwi iga. Zyope iBiibiliya zimo izya manda iga zikugaleha amazwi iga ishisita kusimba. 56Vhaheepa, vhahasogola mu lutala ulunji.

Vhe vhakwanzilwa kuvha vhasundikwa avha Yeesu

(uMataayi 8:19-22)

57UYeesu na vhasundikwa vhaakwe lwe vhali mwi idala, umuntu wumo ahamuvhuuzya ahati, “Kuuti nkulandate kwonti kwe ukusogola!” 58Ileelo uYeesu ahamwamula ahati, “Avhahavhila vhali na mashembo, zyope inyunyi zili ni visanza, ileelo ne Mwana wa Aadamu ntali na pa kukaasya uluvhazu lwane.”

59UYeesu ahamuvhuuzya umuntu uwamwavho ahati, “Undandate!” Umuntu uyo ahati, “We Mwene, unitishile suuti insogole imusyile utaata waane.” 60UYeesu ahamwamula ahati, “Vhaleshe avhafwe vhavhasyile avhafwe vhaavho. Ileelo iwe, sogoola ukumusye uvhumwene uvhwa Mulungu.”

61Woope uwamwavho ahamuvhuuzya uYeesu ahati, “We Mwene, kuuti nkulandate, ileelo suuti unitishile insogole indaje kuhaaya.” 62UYeesu ahamuvhuuzya ahati, “Umuntu inga ayanda kulima ni ngʼombe, kumo akugalunkana kwenya kwisinda, uyo atahondeeye kuvha muvhomvi mu vhumwene uvhwa Mulungu.”

Actualmente seleccionado:

uLuuka 9: nih

Destacar

Copiar