Yaɓooda 12

Bɨraɓe kun Abram

1Bɨraɓe el Abram an: I tee kɔ dɔningt loi, kɨ ku noojigt, kɨ kam ɓet lo bɔwi, na aw dɔningt'n m'a m'ɔji 2M'a mad i tel girrdeg kɨngãi, m'a m'njang dɔi, m'a mad tɔi kɔ. A i tel ngemajkurr ko ro degt. 3M'a m'njang dɔ deg'n a njangɨn dɔi, na m'a m'ndɔl deg'n a ndɔlɨn Girrdeg kɨ dang dang tube kɨ dɔningt a ngahn njangdɔ kamit. 4Abram ɓai aw tit'n hã Bɨraɓe ela'n, na Lot aw sia nat. Ɓal Abram i dɔtanãimɨta gidaimi lon teen kam Harãt 5Abram un nẽn Sarai, kɨ Lot, ngon ngonkõn, kɨ nyag lod tube kɨ mbõn kɨnat kɨ deg'n ngahnd Harãt, teen ndɨ awɨn kɨ dɔning Kanat. Lon teen dɔning Kanat ye.

Abram i kam dɔning Kanat,

6Abram gang dɔning mbã tee lot mad'n a kunɨna Sikem nderbe kɨkad kag dilt lo More. Kaglot'n non Kanag ĩn dɔningt nõ. 7Bɨraɓe tee hɔi kɨ ro Abramt, na ela an: M'a mad kohi dɔning 'nten. Nõbe la Abram ɗa dɨngɨr kadkari kɨjakɔt ad Bɨraɓe'n tee hɔi kɨ roat. 8Ɓai lot'n non aw kad mbalbot, ko loɓakàdt kɨ Betel, na ɗa kujkubg lon mbɨna Betelt ko lokudkàdt, kɨ Ai ko loɓakàdt. Ɗa dɨngɨr kadkari kɨjakɔ nõbe ad Bɨraɓe, na ko kunɨn Bɨraɓe kɨ tɔa. 9Kamla Abram ɓai tɔi jan jan kɨkete, ɓa tan kɨ Negebt.

Abram aw dɔning Ejipt't

10Ɓoo õ dɔning Kanat, na Abram aw dɔning Ejipt kɨ'n hɔlondɨt kɨtɔ ɓoo õ ngãi dɔning Kanat. 11Lon i nderbe kad and kam dɔning Ejipt't ye, el nẽn Sarai an: Oo, m'ger ĩ dekɨdẽ kɨ mand maj koo. 12Lon Ejiptiag a ooin a ne, a elɨn anan, ĩ nẽm, a tɔlmɨn, na nyain kɨ dɔi dõ. 13M'kɔi kad i el an: Ĩn ngonkom kɨtɔkad ɗan sem maj kɨtatɔi, na kɨ m'ndɨn kɨ dɔm dõ kɨtakuli. 14Lon Abram tee Ejipt't woi ye, Ejiptiag oon kad dekɨdẽ mand kɨ dumbit. 15Na mbaiɓeg lo Paraõ oona, hitɨna nõ Paraõt, na ɔrrɨn dekɨdẽ'n non, awɨn sia kam ndogt lo Paraõ. 16Paraõ ɗa maj kɨ Abram kɨtakul Sarai, na Abram ngah batg, kɨ mangg, kɨ bɔw korrog kɨ ɓerg kɨdɨngã kɨ kɨdẽ kɨ kõ korrog kɨ lukumg. 17Na Bɨraɓe nda Paraõ kɨ ngékɨɓe loa kɨ yokoosɨ kɨngãi kɨtɔ Sarai kɨ nẽ Abram. 18Ngar Paraõ kun Abram, na ela an: Ɗi kɨɓe i ɗa sem a? I nẽi ale? Kɨtɔɗi elɨm al a? 19Kɨtɔɗi elɨm an: I kõnani mbã ad m'taa nẽmt a? Tajigla oo nẽi la ɗan, ɔrra na aw lo loi 20Paraõ ndamber deg lon dɔat, kad ndana ɗobo kad aw kɨ nẽn kɨ nyag lon tube.

Actualmente seleccionado:

Yaɓooda 12: MlL

Destacar

Copiar