Logo de YouVersion
Ícono Búsqueda

JAN 20

20
Álínɔn ka nwrɛ́
(Ɔ́n wú Mat 28.1-8; Ɔ́n wú Mák 16.1-8; Ɔ́n wú Lwik 24.1-12)
1Dimánsi njuju fítaan, lóka áyé ka lɛ mwámwá, Mari achan Madala khúbhɛ́ lo álínɔn tho, ló ńwu salé wo hɔn ábhú yɛn nɔn mɛ́n. 2Ńwa no gɛ Piɛ le yíchwɛ́wo lójɔ khɛ́n Jezwi pɔ, ló ánkranmán nkɔn lée:
– Wo hɔn lo Hwánthe yɛn álínɔn hromɛn, ló lo le yɛn lósi wo hɔn-ɛn ka.
3Ló Piɛ le yíchwɛ́wo lójɔ ɔ́nmɔn chanfe eló álínɔn tho. 4Wo mɔ́nmɔn wo wa wo élo, lókhɛ́n yíchwɛ́wo lójɔ ewá brɛn Piɛ ló ńphrɛ di álínɔn tho. 5Ńsilé mathé, ńgbɛnɛn wu álínɔn hromɛn, ló ńwu kandanman phɛ́nphɛ́n khɛ́n wo khwɛn kra lephan khwalé áyítathé, lókhɛ́n mɛ́n nbrɛn ńnɛn ka álínɔn hromɛn. 6Simɔn Piɛ khɛ́n abha mɛ́n mánji ebhá, lóka ńdi lóne, ńka álínɔn hromɛn. Ńwu kandanman phɛ́nphɛ́n khwalé áyítathé, 7le ádɛgɔn wo bho gɛ Jezwi hɛ́nphe, ádɛgɔn lókɔn wo le khwɛn lóle kandanman phɛ́nphɛ́n ɔ́nmɔn khwa sibrɛ, lókhɛ́n ló-ɛ wo gbɛ tre njɛ. 8Lómánji yíchwɛ́wo lójɔ khɛ́n aphrɛ di álínɔn tho, mɛ́n lɔ ńka álínɔn hromɛn, ńwu lóyí, ló ńmu mímí. 9(Mímí nbrɛn, Yankan hrɔ́ bhwe lókɔn atɔlé Jezwi bha chán khúnɔn mɛn fe ɔn, lóka lókɔn mɛ́n yíchwɛmán ka ye lóthé.) 10Ló yíchwɛmán mɔn lókɔn saji lo bháthó.
Jezwi lɛ Mari achan Madala mɛ
(Ɔ́n wú Mat 28.9-10; Ɔ́n wú Mák 16.9-11)
11Mari ya álínɔn njɛ ethɔ́n hɛ́ndu. Lóka ńya lóne anthɔ́n hɛ́ndu, ńsilé mathé gbɛnɛn wu álínɔn hromɛn; 12ló ńwu Yankan-mranchɛ́mán mɔn sɔ ntráliɛ́ phónpho chre lósi wo hɔn Jezwi la, bɛn chre mɛ́n hɛ́nphe si atre, saji lójɔ chre mɛ́n nta si asa lo. 13Ló wo ébhi Mari sa:
– Yípɔman, bítɛ khɛ́n ɛthɔ́n hɛ́ndu ɛ?
Ló ántɔlé:
– Wo hɔn mɛn Hwánthe yɛn, ló mɛn nɛn yɛn lósi wo hɔn-ɛn ka.
14Lóka ńtɔ bhwe lókɔn, ńsáka ánno, ló ńwu Jezwi nɔn aya lóne, lókhɛ́n ńnɛn yɛn sa Jezwi. 15Ló Jezwi ébhi nkɛ sa:
– Yípɔman, bítɛ khɛ́n ɛthɔ́n hɛ́ndu ɛ? Abɛn ɛ́nɛn ɛ?
Lókhɛ́n ńmu salé lephan abha lóne ébosi, lóhɛ́nthé ánmi nkɛ sa:
– Yípɔ nthe, kasé áli hɛ ɛhɔn-ɛn yɛn, lie mɛn lósi ɛhɔn-ɛn ka, ló mɛn nó lóne no hɔ́n-ɛn.
16Ló Jezwi che nkɛ hɛ́n:
– Mari!
Ńsáya, ló ńkhɔ Ebrenɛ́n ncan mɛn ántɔlé:
– Rabuni! (lóthé nɔn ali “Yíliéwo.” )
17Jezwi kranman Mari lée:
– Ɛle pá mɛn pɛ, átɛsalé mɛn ka saji no tho mɛn Nthe yé. Lókhɛ́n tɛmɛ ɛlo kranmán mɛn hɔnsɛ́nhɔn lée, mɛn saji mɛn nó tho mɛn Nthe yé, ńni hɔ́n The, mɛn nó mɛn Yankan yé, ńni hɔ́n lɔ hɔ́n Yankan.
18Mari achan Madala khúbhɛ́ lo gɛ Jezwi yíchwɛmán, ló ánkranmán nkɔn lée:
– Mɛn wu lo Hwánthe!
Ló ábhwe lo Hwánthe kranman Mari, Mari lɛ lómɛ́n se wo ye.
Jezwi lɛ mɛ́n yíchwɛmán mɛ
(Ɔ́n wú Mat 28.16-20; Ɔ́n wú Mák 16.14-18; Ɔ́n wú Lwik 24.36-49)
19Dimánsi njuka, Jezwi yíchwɛmán bhurɛhɛ́n bha khúthé, ló wo tɔnsi ha wo nbrɛn, átɛsalé wo esó Jwifunɛ́n-óthemánhɔn. Jezwi bha ya wo thethé, ló ántɔ sa:
– Tɛmɛ ńthɛ́nkhwálé ogɛ hɔ́n!
20Lóka ńtɔ bhwe lókɔn kalé, ńhɔn mɛ́n mɔ́n le mɛ́n ngbɛkhwɛ ɔ́nmɔn nie wo. Lóka yíchwɛmán wu wo Hwánthe, áphɔhá gɛ wo. 21Ló Jezwi cu ékranmán nkɔn lée:
– Tɛmɛ ńthɛ́nkhwálé ogɛ hɔ́n! Lósi yábhɛ brɛ khɛ́n mɛn Nthe khɔ chɛ mɛn ma ɔn, lósi yábhɛ brɛ nɔn mɛn lɔ mɛn khɔ mɛn chɛ́ hɔ́n nó áthéji.
22Lómánji ńfi guphrɛ ha wo phɔ, ló ántɔlé:
– Tɛmɛ ɔ́n gɛ Nánnánmi Créncré! 23Kasé ɔ́n yɔ bhwe phɔ néphan, Yankan lɔ bha yɔ́phɔ́ wo, lókhɛ́n kasé ɔ́n ne yɔ wo bhwe phɔ́ wo, Yankan lɔ bha lé yɔ́phɔ́ wo.
Jezwi le Toma ɔ́nmɔn
24 Yíchwɛmán áwɔ́-mɔn hrómɛn ápɛ lephan bɛn óche Toma (lóthé nɔn ali ńjrwan), lócí lókɔn khɛ́n Jezwi bha, lephan lókɔn ńnɛn ma áwɔ́-mɔnmán hrómɛn. 25Ló mɛ́n jɔn yíchwɛmán nánkhɛ ékrɛnmɛn lée:
– Lo wu lo Hwánthe.
Lókhɛ́n Toma ékranmán wo lée:
– Kasé mɛn nɛn wu nchígbrɔ mɛ́n mɛ́n ngbɛthé, kasé mɛn nɛn mo mɛn khwɛ ka lóhrómɛn, ló kasé mɛn nɛn mo mɔ́n pa mɛ́n ngbɛkhwɛ pɛ, mɛn man nɛ́n mú mímí.
26Ácído brɛ bha hɛn, ló Jezwi yíchwɛmán cu bhurɛhɛ́n khúthé, lóka lókɔn Toma lɔ bha wo hromɛn. Ákhúmɛ́n si tɔn tre, lókhɛ́n Jezwi bha ya wo thethé, ló ántɔlé:
– Tɛmɛ ńthɛ́nkhwálé ogɛ hɔ́n!
27Lómánji, ánkranmán Toma lée:
– Tia mɔ́n bha, bho hɛ khwɛ ka krɛn, ló gbɛnɛn wu mɛn ngbɛthé, tia mɔ́n bha, ló ɛpá mɛn ngbɛkhwɛ pɛ. Ɛlé gba bhwe khwá, lókhɛ́n tɛmɛ ɛbhú mímí!
28Ló Toma étɔlé:
– Mɛn Hwánthe le mɛn Yankan!
29Ló Jezwi ékrɛnmɛn lée:
– Thénthé ɛwu mɛn, lónɔn achɛ ɛbhú mímí, áphɔhá gɛ néphan ale wu mɛn, lókhɛ́n abhu mímí.
Lóyí hɛ́nthé khɛ́n wo lrɛ áhrɔ́ lókɔn
30Jezwi cu tɛ hɛ́nmɛntányí búdúbúdú nánkhɛ mɛ́n yíchwɛmán hɛ́nmɛn, ló hɛ́nmɛntányí lókɔn, wo le lrɛ ha áhrɔ́ lókɔn hromɛn. 31Lókhɛ́n lókpɛ lókɔn wo lrɛ abha áhrɔ́ lókɔn hromɛn, wo lrɛ tre, ochɛ́sé ɔ́n mú mímí salé Jezwi li Mesi, ńni Yankan Mi. Ló kasé ɔ́n mui mímí, ɔ́n ma khɔ́ mɛ́n phɔ gɛ mɛpɔ́bhá.

Actualmente seleccionado:

JAN 20: ENT96

Destacar

Compartir

Copiar

None

¿Quieres guardar tus resaltados en todos tus dispositivos? Regístrate o Inicia sesión