JAN 19

1 Piláthi chɛ wo lée wo hɔ́n Jezwi, ló wo bhrɛ mɛ́. 2Ngbumán bhu nbi ńthó bha ló phɔ, wo bho than kpró bhu Jezwi hɛ́n, ló wo hɔn ntráliɛ́ nánnan kpénkpé sɔ-ɛ. 3Wo tigbali nkɛ, ló wo étɔlé:

– Jwifunɛ́n bhringbi, lo ebhɔ́ hɛ yí!

Ló wo ébhra Jezwi ngbaphrá.

4Piláthi cu thandi ngbophro ló ánkranmán ápasá lée:

– Wú hɔ́n eye, mɛn mán hɔ́n-ɛn má ngbophro krɛn man sé hɔ́n, ló ɔ́n yɛ́n salé mɛn nɛn gɛ ábhwe bhrií mɛ́n phɔ khɛ́n alí mɛ́n wɛ́n bhwe.

5Jezwi thandi ngbophro, ńmu nthó kpró hɛ́n, ló ńsɔ ntráliɛ́ nánnan kpénkpé. Ló Piláthi ékranmán nkɔn lée:

– Nɛn lephan!

6Lóka nphahamán-óthemánhɔn le Yankan-nkhú bómán wu Jezwi, wo elúkhwɛ́ tɔ sa:

– Tɛmɛ ɛhɔ́n-ɛn chɛ́ há áyábhletre phɔ! Tɛmɛ ɛhɔ́n-ɛn chɛ́ há áyábhletre phɔ!

Ló Piláthi ékranmán wo lée:

– Tɛmɛ ɔ́n hɔ́n-ɛn ɔ́nmɔn lo, ló hɔ́n nbrɛn ɔ́n hɔ́n-ɛn chɛ́ há áyábhletre phɔ, lée ka mɛn-ɛ mɛn nɛn gɛ ábhwe bhrií mɛ́n phɔ khɛ́n alí mɛ́n wɛ́n bhwe.

7Ló Jwifunɛ́n ékrɛnmɛn lée:

– Lo bidí hrómɛn énɛn salé owɛn, átɛsalé ńkránman néphan khúnbrɛn lée mɛ́n ni Yankan Mi.

8Lóka Piláthi ye ábhwe lókɔn, ákhwíthá kɛ hromɛn. 9Ńcu ka ákwabhɔ́ khúthé ló ánmi Jezwi sa:

– Bánne ɛchan bha?

Lókhɛ́n Jezwi le ká mɛ́n. 10Ló Piláthi ékranmán Jezwi lée:

– Ɛle pɔ salé ɛ́tɔ bhwe sé mɛn yé? Wú ɛle yɛn salé mɛn gɛ mɔ́nsi mɛn yɔ́ hɛ ká, saji mɛn cu gɛ mɔ́nsi mɛn hɔ́n hɛ chɛ́ há áyábhletre phɔ?

11Ló Jezwi ékranmán Piláthi lée:

– Kasé átho le se hɛ lóphɔ mɔ́nsi, ɛle gɛ mɔ́nsi bhrií mɛn tho. Lóhɛ́nthé, lephan khɛ́n ephɛ́ mɛn lí, ńtɛ ne khóo bɛn abanbrɛn ńne khúnbrɛn.

12Lóka Piláthi ye ábhwe lókɔn, ánnɛn lósi ankhɔ́ yɔ́ Jezwi ká, lókhɛ́n Jwifunɛ́n elúkhwɛ́ salé:

– Kasé ɛyɔ́ lephan lókɔn ká, ɛle li athe khó mɛ́n lephan bhwá. Lephan khɛ́n afimɛ́n tɔlé mɛ́n ni bhringbi, élie salé ńgɛ athe khó ɔ́nmɔn ánswan.

13Lóka Piláthi ye bhwe lókɔn, ńdo Jezwi thandi ngbophro; ló ńchethé ákwabhɔ́ yákhru tho, lósi Ebrenɛ́n ncan mɛn óche “Gabatha” (lóthé nɔn ali: “Ási wo ha nmú”). 14Lóka ácí bha cí khɛ́n wo bhá lí Phákhe, lóka lókɔn ácɛ́nmɛ ya bháca. Ló Piláthi ékranmán Jwifunɛ́n lée:

– Nɛn hɔ́n bhringbi!

15Ló wo elúkhwɛ́ tɔ sa:

– Tɛmɛ ɛwɛn! Tɛmɛ ɛwɛn! Tɛmɛ ɛhɔ́n-ɛn chɛ́ há áyábhletre phɔ!

Piláthi ébhi wo lée:

– Wú ɔ́n pɔ salé mɛn hɔ́n hɔ́n bhringbi chɛ́ há áyábhletre phɔ?

Ló nphahamán-óthemánhɔn étɔlé:

– Lo bhringbi brɛ lo pɛ nɔn ali athe khó.

16Ló Piláthi hɔn Jezwi se wo salé wo hɔ́n-ɛn lo chɛ́ há áyábhletre phɔ.

Wo chɛ Jezwi ha áyábhletre phɔ

(Ɔ́n wú Mat 27.32-44; Ɔ́n wú Mák 15.21-32; Ɔ́n wú Lwik 23.26-43)

Wo khwa Jezwi tho. 17Ńhɔn mɛ́n yábhletre ka bhwa, ló ńchan ákhúbhɛ́ hrómɛn thandi annó ási óche “Hɛ́nphe nchwe”, (Ebrenɛ́n ncan mɛn, óche “Gɔgota”). 18Lóne nɔn wo hɔn-ɛn chɛ ha áyábhletre phɔ. Wo cu khwɛn néphan nankhɛ mɔn lɔ chɛ ha áyábhletre phɔ, bɛn ya áliémɔn, bɛn ya ámránkhu, ló Jezwi ya wo thethé.

19 Piláthi lrɛ áhrɔ́ ló ńchɛ wo bho la áyábhletre phɔ. Áhrɔ́ lókɔn étɔlé: “Jezwi achan Nazarɛ́thi, Jwifunɛ́n bhringbi.” 20Jwifunɛ́n búdúbúdú bha kan áhrɔ́ lókɔn, átɛsalé ási wo chɛ Jezwi ha áyábhletre phɔ, ágbali ákhúbhɛ́, ló áhrɔ́ lókɔn wo khɔ ebre ncan mɛn, latɛn ncan mɛn le grɛ́khi ncan mɛn ɔ́nmɔn lrɛ. 21Jwifunɛ́n nphahamán-óthemánhɔn ékranmán Piláthi lée:

– Hɛ yí lókɔn ɛlrɛ ɔn, ɛlé tɔlé “Jwifunɛ́n bhringbi” lókhɛ́n ɛtɔlé: “Lephan lókɔn nkɛé: Mɛn ni Jwifunɛ́n bhringbi”.

22Piláthi kranman wo lée:

– Mɛn yí mɛn nrɛ, mɛn nrɛ phu.

23Lóka ngbumán hɔn Jezwi chɛ ha áyábhletre phɔ, wo khwɛn mɛ́n ntráliɛ́, ló wo lwa ńdɔn bhwelí, lephan brɛ pɛ mɛ́n ékɛ, saji wo hɔn mɛ́n ntráliɛ́ thótho khóo alepɛ ngrɛmɛ́n. 24Ló ngbumán ya wo hromɛn étɔlé:

– Ole hɔ́n ntráliɛ́ lókɔn tí nran, lókhɛ́n tɛmɛ otí ngbamán, ló oyɛ́n lephan ábha lí mɛ́n ékɛ.

Lókhúnbrɛn lókɔn, élie salé ábhwe Yankan hrɔ́ phrɛ tɔ, lóyí otɛ́ osímɛ́n. Yankan hrɔ́ étɔlé:

“Wo lwa mɛn ntráliɛ́ khúnbrɛn

ló wo bho mɛn ntráliɛ́ thótho khóo ti ngbamán.”

Ngbumán yí atɛ nɔn ali lókɔn.

25Néphan aya Jezwi yábhletre phɔ nɔn ali, mɛ́n man, mɛ́n man hɔnmia, Mari ali Kleophási mia, le Mari achan Madala khúbhɛ́. 26Lóka Jezwi wu mɛ́n man le mɛ́n yíchwɛ́wo khɛ́n ńpɔ ya lóne, ló ánkranmán mɛ́n man lée:

– Bhie, nɛn hɛ bhi.

27Lómánji, ńkránman mɛ́n yíchwɛ́wo lókɔn lée:

– Nɛn hɛ man.

Achan lócí lókɔn élo, yíchwɛ́wo lókɔn do Jezwi man lo mɛ́n hwan.

Wo wɛn Jezwi

(Ɔ́n wú Mat 27.45-56; Ɔ́n wú Mák 15.33-41; Ɔ́n wú Lwik 23.44-49)

28Jezwi yɛn salé áyí khúnbrɛn etɛ́, thénthé ásimɛ́n, ló énɛn salé Yankan hrɔ́ bhwe atɔtre lóyí otɛ́, lóhɛ́nthé ántɔlé:

– Ńdukro ehɔ́n mɛn.

29Lóne ápɛ ábhwe bɛn wo ha divɛnkɔn si, ngbumán bho mra sɔ ka lóhrómɛn, ló wo bho gɛha áyá mɛ́n, áyá lókɔn óche izɔ́phu, ló wo hɔn jetho tre Jezwi mɛ́n. 30Lóka Jezwi nan divɛnkɔn lókɔn, ló ántɔlé:

– Thénthé, áyí khúnbrɛn átɛ simɛ́n!

Ńhɔ bhwalé, ló ńkhu.

Ngbuwo bɛn bho khɔ́n dɔn Jezwi ngbɛkhwɛ

31Lócí lókɔn, áli vandredi, ló Jwifunɛ́n-óthemánhɔn le pɔ salé néphan ochɛ ha áyábhletre phɔ obhá lóne osé saba, átɛsalé saba lókɔn, áli ácí khóo bɛn se wo, lóhɛ́nthé wo kranman Piláthi ochɛ́ ngbumán lo bhrwa néphan abha áyábhletre phɔ nta, ló wo khwɛ́n nkɔn yɛn lóne. 32Ngbumán lo lóne, ló néphan khɛ́n wo le Jezwi ɔ́nmɔn wo bha áyábhletre phɔ, mɛ́n khɛ́n ńthwási, wo bhu mɛ́n nta, lómánji áse lójɔ. 33Lóka wo di Jezwi yé, wo wu salé ńkhu ámɔn, lóhɛ́nthé wo le bhrwa mɛ́n nta. 34Lókhɛ́n ngbuwo bɛn bho khɔ́n dɔn Jezwi ngbɛkhwɛ, lóyámɛ́n ńká le ńdu ɔ́nmɔn ébie. 35Lephan khɛ́n étɔ ábhwe lókɔn, ńwu lóyí simɛ́n, ló mɛ́n bhwe ántɔ, áli ábhwe mímí. Ńyɛn salé ántɔ ábhwe mímí, ochɛ́sé hɔ́n lɔ ɔ́n mú mímí. 36Áyí khúnbrɛn lókɔn atɛ, énɛn salé Yankan hrɔ́ bhwe atɔtre lóyí otɛ́ simɛ́n, lónɔn ali salé: “Abha lé pɛ mɛ́n nchwe brɛ ábha bhú.” 37Yankan hrɔ́ phɛ́nta bɛn cu étɔlé: “Wo bhá gbɛnɛ́n wú lephan lókɔn wo bho ákhɔ́n dɔn.”

Wo mrwɛn Jezwi

(Ɔ́n wú Mat 27.57-61; Ɔ́n wú Mák 15.42-47; Ɔ́n wú Lwik 23.50-56)

38Lómánji, Jozɛfu achan ákhúbhɛ́ óche Arimate bha ébhi Piláthi mɔ́nsi, ló anhɔ́n Jezwi nánmí ɔ́nmɔn no. (Jozɛfu lókɔn, mɛ́n lɔ ńni Jezwi yíchwɛ́wo bɛn, lókhɛ́n Jwifunɛ́n-óthemánhɔn ansó hɛ́nthé, ńhɔn mɛ́n nbrɛn hrɔ́man.) Piláthi dɛn se lóphɔ mɔ́nsi, ló ńhɔn Jezwi nánmí ɔ́nmɔn no. 39Nikhodɛmɛn lókɔn khɛ́n lócí alo ewú Jezwi mréci, mɛ́n lɔ ńgɛ Jozɛfu ɔ́nmɔn no, ńkhwɛn ńmwe le áyá bɛn ásɔ́n yɔ́n óche aloɛsi, wo hɔ lókhúnbrɛn bhɔkhrɛ, ábha lí khilo áphɛn le áwɔ́. 40Wo mɔ́nmɔn wo hɔn Jezwi nkwá, wo bho ádɛgɔn phopho wo nran phɛ́nphɛ́n kra mɛ́n phɔ, ló wo hɔn ńnɔ́n ásɔ́n yɔ́n fɔn mɛ́n phɔ khúnbrɛn, sa lósi Jwifunɛ́n khɔ́ tɛ́ lephan phɔ khɛ́n wo hɔ́n-ɛn lo bhó. 41Lósi khɛ́n wo hɔn Jezwi chɛ ha áyábhletre phɔ, ápɛ ábithe bɛn, lóne wo bɔn álínɔn pɔ́pɔ́ bɛn kalé khɛ́n wo ka bho lephan lóhrómɛn. 42Lócí lókɔn áli ácí ógɛ khɛ́n ásé Jwifunɛ́n saba. Ló álínɔn lókɔn ágbali lósi wo chɛ Jezwi ha áyábhletre phɔ, lóhɛ́nthé wo hɔn Jezwi nkwá lo ka lóhrómɛn.

Actualmente seleccionado:

JAN 19: ENT96

Destacar

Copiar