JAN 18
18
Lóka wo hɔn Jezwi
(Ɔ́n wú Mat 26.47-56; Ɔ́n wú Mák 14.43-50; Ɔ́n wú Lwik 22.47-53)
1Lóka Jezwi tɔ bhwe phu, mɛ́n le mɛ́n yíchwɛmán ɔ́nmɔn wo chan lóne féne, ló wo bhuri ádubhɛ bhri bɛn óche Sedrɔn. Lóne Jezwi le mɛ́n yíchwɛmán ɔ́nmɔn lo ási bɛn wo ha nyá búdúbúdú. 2Judasi khɛ́n ali lephan ephɛ́ Jezwi lí yɛn lóne, átɛsalé Jezwi le mɛ́n yíchwɛmán ɔ́nmɔn bháne áló lóne lo bhurɛhɛ́n. 3Judasi lo lóne, ńdo néphan ha mɛ́n phɔ, Rɔ́mɛn khúbhɛ́nɛ́n ngbumán le Yankan-nkhú bómán. Wo néphan lókɔn, nphahamán-óthemánhɔn le Fariziɛnnɛ́n ɔ́nmɔn nɔn achɛ wo bha. Wo bhra tha, ló wo tɔ khanniɛn le ńgbran tɛn ɔ́nmɔn pɛ. 4Jezwi phrɛ yɛn áyí khúnbrɛn ebhá tɛ́, ńnɛ́nsi gbali wo, ló ánmi wo sa:
– Abɛn hɔ́n énɛn?
5Ló wo nkɛé:
– Jezwi achan Nazarɛ́thi nɔn lo énɛn.
Jezwi ékranmán wo lée:
– Mɛn nɔn mɛn ni lókɔn.
Lóka lókɔn, Judasi ali gɔngɔnsáwo gɛ wo ɔ́nmɔn ya lóne. 6Lóka Jezwi étɔlé: “Mɛn nɔn mɛn ni lókɔn”, wo khúnbrɛn wo phɔn lo mánji, ló wo chrwalé yítathé. 7Jezwi cu bhi wo sa:
– Abɛn hɔ́n énɛn?
Ló wo nkɛé:
– Jezwi achan Nazarɛ́thi nɔn lo énɛn.
8Jezwi kranman wo lée:
– Mɛn phrɛ kranman hɔ́n lée mɛn nɔn mɛn ni lephan hɔ́n énɛn. Ló kasé ali mɛn hɔ́n énɛn o, tɛmɛ ɔ́n yɔ́ néphan krɛnnɛ́n khwá olo.
9Ábhwe lókɔn, élie salé Jezwi bhwe aphrɛ tɔ áli mímí, lónɔn ali sa: “Nthe, néphan ɛse mɛn ɔn, mɛn nɛn yɔ brɛ ka khɛ́n ália.” 10Simɔn Piɛ ti mɛ́n khókhríyan san, ńwáka nphaháwo bhrɔ́khó hwan nɛnkhwɛ́nwo phɔ, ló ńjan nkɛ liémɔn njɛ. (Nɛnkhwɛ́nwo lókɔn mɛ́n hɛ́n li Malkusi.) 11Lókhɛ́n Jezwi kranman Piɛ lée:
– Bho hɛ khókhríyan ka amɔn mɛn gbraa. Wú ɛbhú salé áyíkhúphɔ yábhɔ́ lókɔn mɛn Nthe hɔn se mɛn, lóyí abha lóhrómɛn, mɛn man nɛ́n nán?
Wo hɔn Jezwi lo Ánan hɛ́nmɛn
12Rɔ́mɛn khúbhɛ́nɛ́n ngbumán gbe, wo bhrɔ́khó bɛn le Jwifunɛ́n ngbumán ɔ́nmɔn hɔn Jezwi gɛ mɛ́. 13Wo yalisi hɔn-ɛn lo se Ánan, Ánan mɛ́n grosɛ li Kayífu. Lópá lókɔn tho ɔn, Kayífu nɔn ali nphaháwo bhrɔ́khó. 14Mɛ́n nɔn ńphrɛ kranman Jwifunɛ́n-óthemánhɔn lée: “Áyɔn salé lephan míbrɛ okhú sé ápasá”.
Piɛ étɔlé mɛ́n nɛ́n ni Jezwi yíchwɛ́wo
(Ɔ́n wú Mat 26.69-70; Ɔ́n wú Mák 14.66-68; Ɔ́n wú Lwik 22.55-57)
15Simɔn Piɛ le yíchwɛ́wo nankhɛ bɛn ɔ́nmɔn gɛ Jezwi thá élo. Mɛ́n yíchwɛ́wo nankhɛ lókɔn, ńni lephan bɛn nphaháwo bhrɔ́khó yɛn mwámwá, ló ńgɛ Jezwi ɔ́nmɔn ka nphaháwo bhrɔ́khó lókɔn hwan. 16Lóka lókɔn Piɛ ya bhádromɛ́n. Yíchwɛ́wo lókɔn cu saji bha mánji, ńkránman bhiebhri aya bhádromɛ́n ébosi, ló ńchɛ Piɛ ka bháthó. 17Ló bhiebhri lókɔn aya bhádromɛ́n ébosi ébhi Piɛ sa:
– Wú hɛ lɔ ɛbha lephan lókɔn mɛ́n yíchwɛmán hrómɛn?
Ló Piɛ nkɛé:
– Léli mɛn, mɛn nɛn ma wo hromɛn.
18Ágba édi, ló júmánmán abha lóne le ngbumán ébosi ɔn, wo khwɛn tɛnmra phutɛn, ló wo jekhali khwa wo ékhrwe. Ló Piɛ lɔ bha gɛ wo ɔ́nmɔn ya ékhrwe tɛn.
Nphaháwo bhrɔ́khó ébhi Jezwi bhwe
(Ɔ́n wú Mat 26.59-66; Ɔ́n wú Mák 14.55-64; Ɔ́n wú Lwik 22.66-71)
19 Nphaháwo bhrɔ́khó ébhi Jezwi bhwe, ńmi Jezwi yíchwɛmán phɔ bhwe, saji Jezwi yí élie néphan lɔ ńmi lóphɔ bhwe. 20Ló Jezwi étɔlé:
– Mɛn ya ápasá hrómɛn tɔ bhwe gbée se néphan khúnbrɛn ye, ácí khúnbrɛn mɛn nie yí hɛ́nbhúrɛ si le Yankan-khúthé, lósi Jwifunɛ́n khúnbrɛn bha bhurɛhɛ́n. Álepɛ bhwe khɛ́n mɛn hrɔman tɔ. 21Ló bítɛ khɛ́n ɛ́bhi mɛn bhwe yábhɛ nɛn? Néphan aye mɛn bhwe, ɛbhi wo lóbhwe yábhɛ mɛn tɔ, átɛsalé wo-ɛ wo yɛn lóbhwe mɛn tɔ.
22Lóka Jezwi tɔ bhwe lókɔn kalé, ngbumán khɛ́n abha lóne ébosi ɔn, bɛn jan Jezwi ngbaphrá ló ántɔlé:
– Bítɛ khɛ́n ɛnɛ́n nphaháwo bhrɔ́khó hɛ́nmɛn tɔ bhwe yábhɛ nɛn?
23Ló Jezwi ébhi nkɛ sa:
– Kasé mɛn tɔ bhwe yan, tɛmɛ ɛtɔ sé néphan khúnbrɛn abha krɛn oyé. Lókhɛ́n kasé mɛn bhwe mɛn tɔ áyɔn ɔn, ló bítɛ khɛ́n ɛbhe mɛn yí ɛ?
24Lóka khúnbrɛn lókɔn, wo gɛ Jezwi mɛ́ ya, ló Ánan hɔn-ɛn thu Kayífu ali nphaháwo bhrɔ́khó.
Piɛ cu étɔlé mɛ́n nɛ́n yɛn Jezwi
(Ɔ́n wú Mat 26.71-75; Ɔ́n wú Mák 14.69-72; Ɔ́n wú Lwik 22.58-62)
25Lóka lókɔn Piɛ ya lóne ékhrwe tɛn ntɔ́nyán, ló néphan abha lóne ébhi nkɛ sa:
– Wú hɛ lɔ lephan lókɔn mɛ́n yíchwɛ́wo bɛn le hɛ?
Lókhɛ́n Piɛ elɛ́mɛ́n ló ántɔ sa:
– Léli mɛn, mɛn nɛn ma wo hromɛn.
26 Nphaháwo bhrɔ́khó, mɛ́n júmánwo bɛn, wo hwan lephan nɔn ali sɛ lókɔn khɛ́n Piɛ jan mɛ́n njɛ, júmánwo lókɔn mɛ́n nɔn ántɔlé:
– Wú mɛn nɛn wu hɛ lephan lókɔn phɔ ábithe lóne?
27Ló Piɛ cu ésamɛ́n, lóyámɛ́n kɔsɔ thɔn.
Wo hɔn Jezwi lo Piláthi hɛ́nmɛn
(Ɔ́n wú Mat 27.1-2,11-14; Ɔ́n wú Mák 15.1-5; Ɔ́n wú Lwik 23.1-5)
28Ńjuju fítaan, wo hɔn Jezwi chan Kayífu hwan lo ákwabhɔ́ si, lókhɛ́n Jwifunɛ́n-óthemánhɔn le dɛn ka bháthó. Lósi akhɔ tɛ ɔn, wo le pɔ salé wo gɛ muswe, ló wo wúsi khɔ́ lí nɛn Phákhe hromɛn. 29Lóhɛ́nthé Piláthi nbrɛn thándi ngbophro gɛ wo, ló ánmi wo sa:
– Bíyí lephan lókɔn tɛ?
30Ló wo kranman Piláthi lée:
– Kasé lephan lókɔn le li yíléletɛ́wo, lo bha lé hɔ́n-ɛn bha sé hɛ.
31Ló Piláthi kranman wo lée:
– Tɛmɛ ɔ́n hɔ́n-ɛn ɔ́nmɔn lo, ló ɔ́n ya hɔ́n nbrɛn bidí tho bhɔ-ɛ kwa. Ló wo nkɛ́é:
– Lo le gɛ mɔ́nsi lo hɔ́n lephan lo wɛ́n.
32Jezwi bhwe khúnbrɛn atɔ ɔn, lóyí khɔ lóne tɛ simɛ́n, lónɔn ali lóka ánkranmán néphan lókhú yábhɛ ebhá wɛn. 33Piláthi cu ka ákwabhɔ́ khúthé, ńche Jezwi ma, ló ánmi nkɛ sa:
– Wú hɛ nɔn ɛli Jwifunɛ́n bhringbi?
34Jezwi kranman Piláthi lée:
– Wú hɛ nbrɛn hɛ́n thethé bhwe nɔn ɛ́bhi mɛn lée nka néphan nankhɛ nɔn atɔ mɛn phɔ bhwe se hɛ ye?
35Ló Piláthi étɔlé:
– Mɛn, wú Jwifu lephan le mɛn? Hɔ́n khúbhɛ́nɛ́n le nphahamán-óthemánhɔn nɔn ahɔn hɛ bha se mɛn; ébí ɛtɛ?
36Ló Jezwi étɔlé:
– Mɛn bhringbi khúbhɛ́ le bha áthéji krɛn, kasé mɛn bhringbi khúbhɛ́ bhá áthéji krɛn, ka mɛn nɛnkhwɛ́nmán bha kútha sé mɛn, ló wo bha le hɔ́n mɛn sé Jwifunɛ́n-óthemánhɔn. Lókhɛ́n mɛn bhringbi khúbhɛ́ le bha áthéji krɛn.
37Ló Piláthi ébhi Jezwi sa:
– Wú mímí nbrɛn ɛli bhringbi?
Ló Jezwi kranman Piláthi lée:
– Lótɛ nɔn ɛtɔ o: mɛn ni bhringbi. Lóhɛ́nthé nɔn wo ho mɛn bha áthéji salé mɛn tɔ ábhwe mímí sé néphan oyé. Lephan kasé ɛyɛn áyí óche ábhwe mímí, tɛmɛ ɛyé mɛn bhwe mɛɛ́n tɔ.
38– Ló Piláthi ébhi Jezwi sa: ébí li ábhwe mímí?
Wo bhɔ Jezwi wɛ́n kwa phu
(Ɔ́n wú Mat 27.15-31; Ɔ́n wú Mák 15.6-20; Ɔ́n wú Lwik 23.13-25)
Lóka Piláthi mɛ́n ka, ńthándi ngbophro gɛ Jwifunɛ́n, ló ánkranmán nkɔn lée:
– Mɛn nɛn gɛ ábhwe bhrií mɛ́n phɔ khɛ́n alí mɛ́n wɛ́n bhwe. 39Lókhɛ́n áli hɔ́n bidí salé Phákhe hromɛn, mɛn yɔ́ khúthékáwo bɛn ká sé hɔ́n. Ló wú ɔ́n pɔ salé mɛn yɔ́ Jwifunɛ́n bhringbi ká?
40Ló wo elúkhwɛ́ kranmán Piláthi lée:
– Léli mɛ́n! Lo-ɛ Barabási nɔn lo énɛn!
Lótɛ khɛ́n Barabási lókɔn, ńni khokhroháwo.
Actualmente seleccionado:
JAN 18: ENT96
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Ebrié New Testament © Bible Society of Côte D'Ivoire, 1996.
