JÚMÁN HRƆ́ 1
1
Nánnánmi Créncré khɛ́n wo tɔ lóbhwe tre Krisi-mranchɛ́mán lé
1Teofi mɛn jɔ bhwá,
Jezwi yí achan thé tɛ, le áyí ńnie, 2kábrɛ kábrɛ ádi mɛ́n cí ńno tho ɔn, mɛn nrɛ lóyí khúnbrɛn lókɔn ha mɛn hrɔ́ athwasi hromɛn. Ló néphan khɛ́n ńsan olí Krisi-mranchɛ́mán, ńkhɔ Nánnánmi Créncré sɛ́npɛ́ hrómɛn tɔ bhwe ha nkɔn phu, lókhɛ́n ńpha no tho. 3Mɛ́n ka ńkhu, lómánji ńmo mɛ́n nbrɛn nie nkɔn, ló wo yɛn salé ńma mɛpɔ́: ńmo mɛ́n nbrɛn nie wo kábrɛ kábrɛ ási ńcíbhí grebhɛ, ló ńtɔ Yankan Bhringbi khúbhɛ́ phɔ bhwe se wo. 4Cíbɛn, mɛ́n le nkɔn ɔ́nmɔn ka wo khwa nɛn mɛ́n, ló ánkranmán nkɔn sa:
– Ɔ́n ne chán Jeruzalɛ́mɛn ló nthwéthwemɛn, khɛ́n ɔ́n bo áyí Nthe tɔlé mɛ́n man tɛ́, lóbhwe nɔn mɛɛ́n tɔ se hɔ́n. 5Lósi yábhɛ brɛ khɛ́n Jan khɔ bho ndu ha hɔ́n hɛ́n, lóyábhɛ brɛ, abha le mɔ́n lɔ khɛ́n, wo bhá bhó Nánnánmi Créncré há hɔ́n nduhɛ́n.
Jezwi eló átho
6Ló Krisi-mranchɛ́mán khɛ́n abhurɛhɛ́n lóne, wo bhi Jezwi sa:
– Hwánthe, wú lóka yábhɛ nɔn ɛ́bha chɛ́ Izraɛ khúbhɛ́ bha cu fe tho?
7Ló Jezwi kranman nkɔn sa:
– Lócí le lóka ka ábha bhá, léli hɔ́n nɔn ɔ́n gɛ yɛ́n. Nthe nbrɛn nɔn abho mɛ́n sɛ́npɛ́ ha lócí lókɔn tre. 8Lóka Nánnánmi Créncré bha ká hɔ́n phɔ, ɔ́n ma gɛ sɛ́npɛ́ bɛn, ló ɔ́n ma lí mɛn ndalefɛlímán. Ɔ́n ma tɔ mɛn phɔ bhwe Jeruzalɛ́mɛn khúbhɛ́, Jude le Samari ɔ́nmɔn gotho khúnbrɛn, kábrɛ kábrɛ ábha di áthé le átho ɔ́nmɔn si atre mɛ́n lé.
9Lóka mɛ́n mɛ́n ka, wo ya wo enɛ́n nkɛ lókhɛ́n wo do nkɛ wo eló átho. Lókhɛ́n mɔngú mɔngú mrwɛn nkɛ, ló ńkhrɛ wo hɛ́nmɛn.
10Lóka ánno, khɛ́n wo gɛmɛlé ya wo enɛ́n átho, lótɛ néphan mɔn asɔ ntráliɛ́ phónpho, thandi ya wo hɛ́nmɛn 11ló wo ékranmán nkɔn sa:
– Galile nsɛ, bítɛ khɛ́n ɔ́n ya hɔ́n enɛ́n átho yábhɛ nɛn ɛ? Jezwi lókɔn khɛ́n wo ya hɔ́n thethé do wo eló tho ɔn, lósi yábhɛ ánman cu khɔ́ chántho má, sa lósi ɔ́n khɔ hɔ́n ewui ánno a.
Lephan khɛ́n echré Judasi phɛ́nmɛ́n
12Ló Krisi-mranchɛ́mán chan ábhóbhó óche Olive-nyá bhóbhó tho saji lo Jeruzalɛ́mɛn. Ló ábhóbhó lókɔn ɔn, ágbali Jeruzalɛ́mɛn, lóle ló ɔ́nmɔn thethé, áli khilomɛ́trɛn brɛ. 13Lóka wo di Jeruzalɛ́mɛn, wo pha lo ákhúthé bɛn abha nkhú tho si wo bháne wo bhurɛhɛ́n wɔ́wɔ. Piɛ, Jan, Jakhi, Andre, Filíphu, Toma, Batelemi, Mathie, Jakhi ali Alfe mi, Simɔn ali lephan ákhúbhɛ́ bhwe phé le Jude ali Jakhi mi. 14Wo khúnbrɛn wó bhɔha la Yankan ákakhúnbrɛn, wo le ńmie mɔ́nbɛn, Jezwi man Mari le Jezwi mɛ́n hɔnsɛ́nhɔn ɔ́nmɔn.
15Ló cíbɛn, krethiɛnmán bhurɛhɛ́n lóne bha elí néphan mɔ-khwá nbrɛn-áan, lótɛ Piɛ ya wo thethé, ló ántɔ sa:
16– Hɔnsɛ́nhɔn, áyɔn salé Judasi bhwe Nánnánmi Créncré khɔ Davi phɔ tɔ khɛ́n abha Yankan hrɔ́ hrómɛn ɔn, lóyí otɛ́ símɛ́n sa: Judasi nɔn ado néphan lo hɔn Jezwi. 17Ló Judasi lókɔn ɔn, mɛ́n lɔ wo kan nkɛ ka lo hromɛn, ló ńhɔn júmán lókɔn phɛ́nta bɛn pɛ.
18(Lóka ńmo ákatí jɛtɛn phɛ bithe, ńdi bhwalé, ńjan muri mɔn, ló mɛ́n nábhlɛ thwɛ khwalé. 19Jeruzalɛ́mɛn khúbhɛ́nɛ́n khúnbrɛn ye lóbhwe. Lóhɛ́nthé nɔn wo khúbhɛ́ ncan mɛn, wo éche lóne bithe “Akɛdama”, lóthé nɔn ali “ńká bithe”.)
20Áyí wo lrɛ ha Sómu hrɔ́ hrómɛn nɔn ali sa:
“Mɛ́n bháthó oká nwrɛ́,
olépɛ lephan ochré lóne.”
Saji wo cu lrɛ ha hrɔ́ mɛn sa:
“Áyɔn salé lephan nankhɛ obhó mɛ́n si.”
21-22Lóhɛ́nthé, néphan khɛ́n agɛ lo thá, lóka lo Hwánthe Jezwi bha lo thethé li júmán, achan Jan cí ahɛ nduhɛ́n, kábrɛ kábrɛ ádi lócí wo hɔn nkɛ yɛn lo thethé ɔn, tɛmɛ wo hromɛn lephan bɛn ogɛ lo ɔ́nmɔn lí lo Hwánthe Jezwi khúnɔn mɛn chánfe phɔ ndalefɛ.
23Wo chɛ néphan mɔn bha, Jozɛfu ali Basabási, khɛ́n mɛ́n npasá hɛ́n li Juthúsi le Mathiási ɔ́nmɔn. 24Wo khúnbrɛn wo bhɔha wo éla Yankan, ló wo étɔ sa:
– Hwánthe, ɛyɛn lephan khúnbrɛn thɛ́n hrómɛn bhwe. Néphan mɔn lókɔn, tɛmɛ ɛlie lo mɛ́n khɛ́n ɛsan. 25Ló Krisi-mranchɛ́wo júmán lókɔn khɛ́n Judasi yɔ kalé lo ási ali mɛ́n si, anká lóhrómɛn, ló anní.
26Wo ti ngbamán, ádɔn Mathiási, ló wo do nkɛ ka Krisi-mranchɛ́mán áwɔ́-brɛ gbe hrómɛn.
Actualmente seleccionado:
JÚMÁN HRƆ́ 1: ENT96
Destacar
Compartir
Copiar

¿Quieres guardar tus resaltados en todos tus dispositivos? Regístrate o Inicia sesión
Ebrié New Testament © Bible Society of Côte D'Ivoire, 1996.