GENESIS 1

Saritan Hatalla manjapa kalunen

1Intu tamparae haliai Hatalla manjapa langit tuntang petak,#1:1: Intu tamparae haliai, Hatalla … langit tuntang petak, atawa Katika Hatalla manampara manjapa langit tuntang petak, atawa Katika sola-solake Hatalla manjapa langit tuntang petak. 2kalunen hindai aton ampin tampae, tuntang magon hewoi-habureh. Tasik lombah hagalombang, je manutup taloh handiai, inyangkulep awi taloh je kaput pijem, tapi kuasan Hatalla manari intu hunjun kare danum te.#1:2: Huang basa Ibrani tau kea inyalinan Tapi Roh Hatalla atawa tuntang riwut bara Hatalla atawa riwut ije hai. 3#2 Kor. 4:6 Hatalla hamauh: “Keleh aton kalawa!” Palus kalawa manjadi. 4Hatalla sanang manampayah taloh te. Palus imisah Awie kalawa te bara kakaput. 5Tuntang inggare Awie kalawa te “Handau”, tuntang kakaput te “Hamalem”. Hamalem mahalau hanjewu dumah. Jete andau je solake.

6-7 # 2 Ptr. 3:5 Limbah te Hatalla hamauh, “Keleh aton taloh hambirang je mambaris danum te manjadi due, tuntang manahae hong due eka je hapisah.” Palus taloh te manjadi. Kalote Hatalla manampa taloh je tau mamisah uka manahan danum hong penda bara danum hong hunjun. 8Hatalla manggare taloh hambirang te “langit”. Hamalem mahalau hanjewu dumah. Jete andau je kadue.

9Balalu Hatalla hamauh “Keleh danum hong penda langit mahasor akan ije eka, mangat eka te tau gitan.” Palus taloh te manjadi. 10Hatalla manggare eka je gitan te “Petak”, tuntang danum te “Tasik”. Hatalla sanang manampayah taloh te. 11Hatalla hamauh tinai, “Keleh petak mampalembut sepsimpan ampin kare taloh imbul, iete taloh imbul je habawak tuntang taloh imbul je mamua.” Palus taloh te manjadi. 12Kalote petak mampalembut sepsimpan ampin taloh imbul. Hatalla sanang manampayah taloh te. 13Hamalem mahalau hanjewu dumah. Andau je kateloe.

14-15Palus Hatalla hamauh, “Keleh aton taloh balawa hong langit je mampalawa petak, mangat mamisah handau bara hamalem, tuntang mangat manukas katika tamparan andau, nyelo, andau hai agama.” #1:14-15: andau hai agama atawa wayah. Palus taloh te manjadi. 16Kalote Hatalla manampa due taloh balawa je hai, iete matanandau hapa marentah andau, tuntang bulan hapa marentah alem; beken bara te inampae kea kare bintang. 17Hatalla mingkes taloh balawa te intu langit mangat mampalawa kalunen, 18hapa marentah andau tuntang alem, tuntang hapa mamisah kalawa bara kakaput. Hatalla sanang manampayah taloh te. 19Hamalem mahalau hanjewu dumah. Andau je kaepat.

20Limbah te Hatalla hamauh, “Keleh hong danum baraguet are macam taloh belom, tuntang hong penda langit are kare burong tarawang.” 21Hatalla manampa kare meto hai huang tasik tuntang kare macam taloh belom hong danum, tuntang kare macam burong. Hatalla sanang manampayah taloh te. 22Hatalla mamberkat kakare taloh te hayak manenga parentah akan taloh belom hong danum mangat manak-manaka mangontep tasik, tuntang akan kare burong mangat sasar are. 23Hamalem mahalau hanjewu dumah. Andau je kalime.

24Limbah te Hatalla hamauh, “Keleh petak mampalua sepsimpan ampin meto hunjun petak, meto balinek tuntang bariar, aloh meto je hai tuntang je korik.” Palus taloh handiai te manjadi. 25Kalote Hatalla jari manjadian taloh handiai te, tuntang Ie mite taloh handiai te uras bahalap.

26 # 1 Kor. 11:7 Limbah te Hatalla hamauh Koae, “Toh keleh itah manampa olon hatamunan arep itah, tumon ampin itah. Ewen kareh marentah kare lauk hong tasik, kare burong tuntang kare meto beken, aloh je balinek atawa baliar,#1:26: Salinan bara jaman horan: meto beken, aloh je balinek atawa baliar; Ibrani: meto je balinek tuntang hapus kalunen. aloh je hai atawa korik.” 27#Mat. 19:4; Mrk. 10:6 #Gen. 5:1-2 Palus Hatalla manjapa olon hatamunan Arepe kabuat. Ie manjapa olon hatue tuntang bawi. 28Limbah te Ie mamberkat ewen te hayak hamauh Koae: “Manak keton batila-tilap, dahang-dahanga bitin keton, suang salepah petak tuntang nguasa jete. Tinai Aku manyoho keton marentah kare lauk, kare burong tuntang sepsimpan ampin kare meto je haguet hunjun petak. 29Akan panginan Aku manenga akam sepsimpan ampin kare taloh je tumbo hunjun petak je habawak tuntang kare bua je habawak je impalembut awi kare batang kayu beken. 30Tapi akan kare burong tuntang kare meto tuntang kare taloh belom je haguet hunjun petak Aku manenga dawen kare taloh je tumbo hunjun petak akan panginae.” Palus kare taloh handiai te manjadi tumon te. 31Maka Hatalla manampayah taloh je jari injadian Awie te, toto uras bahalap. Maka hamalem mahalau tuntang hanjewu dumah tinai. Andau je kajahawen.

Actualmente seleccionado:

GENESIS 1: NIJ

Destacar

Copiar