Luka 14
14
Jesũ kũragithia muntũ mũrwaru
1Ntukũ ĩmwe ya Sabatũ Jesũ nĩ athiire kũrĩa irio mũjiĩ kwa mũnene ũmwe Mũfarisai, na antũ barĩa baarĩ o nĩbamũtuĩragia mũno nĩkenda bona bũrĩa akarũtha. 2Na rĩ, nĩ kwarĩ na muntũ au mbere yae, warũarĩte mũrimũ wa kwimba njara na magũrũ. 3Jesũ akĩũria arutani ba Watho na Afarisai atĩrĩ, “Watho nĩ bwĩtĩkĩrĩtie kũragĩthania ntukũ ya Sabatũ, kana bũtĩtĩkĩrĩtie?”
4Ĩndĩ bo bagĩkira ki. Jesũ akĩjũkia muntũ ũu, akĩmũragithia na akĩmwĩtĩkĩria ethiĩre. 5Agĩcoka akĩbaũria atĩrĩ, “Nũũ wa jienu atĩnkĩruta mwana wae kana ng'ombe yae ĩrimani rĩa rũjĩ ĩgwĩte ku ntukũ ya Sabatũ?”
6Nabo bakĩremwa nĩ kũmũcokeria kĩũria kĩu.
Nteto ya kwĩnyiyia na kũgwata antũ ũgeni
7Rĩrĩa Jesũ onire bũrĩa ageni barĩa betĩtwe kĩrugoni bathuuraga gwĩkara arĩa kwarĩ kwa ageni ba gĩtĩo rĩ, nĩ abaere ngerekano ĩno: 8“Rĩrĩa wetwa kĩrugoni kĩa ũiki tiga gwĩkaragĩra itĩ irĩa ageni ba gĩtĩo baigĩrĩtwe, nĩũntũ no kwĩthĩrwa nĩgwĩtĩtwe mũgeni wa gĩtĩo nkũrũki yaku. 9Nawe ũrĩa ũbwĩtĩte bwi baĩrĩ akeja akwĩre atĩrĩ, ‘Nenkera muntũ ũũ kanya ekare ndĩ.’ Rĩu gwe ũgaũkĩĩra ũconokete, ũthi wambĩrie gũcũa gwa gwĩkara nau nyuma buru. 10Ĩndĩ rĩrĩa wetwa kĩrugo rĩ, ĩkaragĩra itĩ jia nyuma nĩkenda mwene ũrĩa ũgwĩtĩte akeja akwĩre, ‘Mũcoore wakwa, ũkĩra ũthi arĩa itĩ jia mbere!’ Ũntũ bũu bũgakũretera gĩtĩo methoni ma barĩa bonde bakethĩrwa barĩ kĩrugoni kĩu. 11Nĩũntũ muntũ wonde wĩneneagia akanyiua, na ũrĩa wĩnyiagia akaneneua.”
12Jesũ agĩcoka akĩĩra muntũ ũrĩa wamwĩtĩte kĩrugo, “Watua gwĩta antũ kĩrugo rĩ, tigaga gwĩta acoore baku kana ba mũruanyũkwe kana antũ benu, o na kana antuura barĩa itonga, nĩũntũ o nabo nĩka bagagwĩtĩra kĩrugo kĩao, bakĩrĩyia bũrĩa wabetĩre kĩrugo gĩaku. 13Ĩndĩ rĩrĩa watua gwĩta antũ ĩtaga nkĩa na jionje na ithua, na atumuumu, 14na ũkatharimwa, nĩũntũ batĩũmba gũkũrĩa. Gwe ũkarĩwa nĩ Ngai ĩndĩ ya kũriũka kwa barĩa aagĩru.”
Ngerekano ya kĩrugo kĩrĩa kĩnene
(Mat 22.1-10)
15Rĩrĩa muntũ ũmwe wa barĩa barĩjanagĩra na Jesũ egwire ũgu akĩĩra Jesũ atĩrĩ, “Gũkena nĩ muntũ ũrĩa ũkarĩa irio Ũneneni bwa Ngai!”
16Ĩndĩ Jesũ akĩmwĩra, “Kagiita kamwe kwĩ muntũ wathondekete kĩrugo kĩnene, na agĩĩta antũ baingĩ mũno kĩrugoni kĩu. 17Rĩrĩa thaa jia kũrĩa jiakinyire muntũ ũu nĩ atũmire ntungata yae ĩthi ĩkere barĩa betĩtwe kĩrugoni atĩrĩ, ‘Njũni rĩu, maũntũ monde nĩ mabangĩku!’ 18Ĩndĩ bonde bakĩambĩria o muntũ kũejana jiĩgwatio jia kũgiria bathi kĩrugoni. Muntũ wa mbere akiuga, ‘Nĩngũrĩte kĩthaka na no nkinya mbambe ndi ngakione. Mwĩre ambĩguĩre.’ 19Ũngĩ nawe akiuga, ‘Nĩngũrĩte ng'ombe ĩkũmi jia mũraũ, na ndiĩte kwona kana ikaũmba kũruta wĩra wega. Mwĩre ambĩguĩre.’ 20O na ũngĩ akiuga atĩrĩ, ‘No ĩndĩ ndagũranire, kwogu ntĩũmba kwĩja.’ 21Ntungata ĩgĩcoka kĩrĩ mwathi wayo ĩkĩmwĩra maũntũ mau monde. Nawe mwathi ũu akwĩgua ũgu akĩthũũra mũno. Akĩĩra ntungata atĩrĩ, ‘Uma na mpũĩ ũthi njĩrani na tũjĩrani twa ntũũra ũrete nkĩa, na jionje, na itumuumu na ithua.’ 22Nyuma ya kagiita kanini ntungata ĩkĩĩra mwathi wayo atĩrĩ, ‘Nkũrũtha bũrĩa ũmbĩrire ndũthe, ĩndĩ kanya no gatigaru ka antũ bangĩ.’ 23Nawe mwathi wayo akĩmwĩra, ‘Umagara ũthi nau njĩrani irĩa nene na tũcocoroni ũkaĩrĩrie antũ beeje gwakwa, nĩkenda nyomba ĩjũre.’ 24Na ndĩbwĩra na ma gũtĩ o na ũmwe wa barĩa ndaretĩte mbere agacama kĩrugo gĩakwa.”
Ĩrĩi rĩa gũtuĩka mũrutwa wa Jesũ
(Mat 10.37-38)
25Ĩndĩ ĩmwe antũ baingĩ mũno nĩbagendanĩtie na Jesũ. Nawe akĩgarũka akĩbeera atĩrĩ, 26“Muntũ ũrĩa ũnkienda kũndingata no mwanka ambende nkũrũki ya bũrĩa endete ĩthe na gina, mũka na jiana, ba mũruagina na ba mwarwagina, o na ningĩ ambende nkũrũki ya bũrĩa eendete we mwene. 27Muntũ o wonde ũtĩgakamata mũtharaba wae na andingata atĩũmba gũtuĩka mũrutwa wakwa. 28Nĩ muntũ ũrĩkũ wa jienu rĩrĩa akwenda gwaka mũnara wa nyomba atĩambaga gwĩkara ndĩ atara ĩrĩi rĩayo, oona kana arĩ na mbeca jia kwĩgana kwĩjũria nyomba ĩu? 29Akarega kũrũtha ũgu, akambĩĩria kũmĩaka, ekĩre mũsingi, ĩndĩ aremwe kũmĩjũria. Antũ bonde barĩa bakamionaga bakamũthekagĩĩra 30bakiugaga, ‘Muntũ ũũ ambĩrĩrie mwako ĩndĩ akĩremwa kũũrĩkia.’ 31Kana nĩ mũnene ũrĩkũ ũthijaga kũrũa mbaara na mũnene ũrĩa ũngĩ atĩambĩte gwĩkara ndĩ eũrie kethĩrwa athigari bae ngiri ĩkũmi bakaũmba gũcinda athigari ngiri mĩrongo ĩĩrĩ ba mũnene ũu athiĩte kũrũa nawe? 32Akeja kwona atĩũmba gũcinda mũnene ũu ũngĩ atũmanaga kĩrĩ we atanakuĩria akamũũria begujane na ũkiri. 33Kwogu, ũmwe wa jienu ũrĩa ũtĩgatiga into jionde irĩa arĩ najio atĩtuĩka mũrutwa wakwa.”
Cumbĩ ĩtĩ na mũcamo
(Mat 5.13; Mar 9.50)
34“Cumbĩ nĩ mbega, ĩndĩ ĩkeja kũthira mũcamo rĩ, nĩ atĩa ĩnkĩũmba gwĩkĩrwa mũcamo kaĩrĩ? 35Cumbĩ ĩu ĩtĩ na baita mũthetuni o na kana thumuni. Nĩka ĩtejagwa. Ũrĩa ũrĩ na matũ nĩ egue!”
Actualmente seleccionado:
Luka 14: LUKA
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
God's word open for all
©Bible Society of Kenya, 2021
