Luka 13
13
Ĩrireni kana bũkue
1Kagiitani o kau nĩ kwarĩ antũ bamwe au, na bakĩĩra Jesũ bũrĩa antũ ba Galili baũragirwe nĩ Pilatũ bakĩthĩnja nyamũ jia kũrutĩra Ngai magongwana. 2Jesũ akĩbacokeria akĩbeera, “Bũrĩciria antũ bau baũragirwe nĩũntũ baarĩ eyia nkũrũki ya antũ barĩa bangĩ bonde ba Galili? 3Arĩ, tĩ bu! Ĩndĩ ka ndĩbwĩreni; bwarega kwĩrira o nabwi bũgakua o ta bo. 4Ĩ nabo antũ barĩa ĩkũmi na banana baakwire rĩrĩa bagwĩrĩrwe nĩ mũnara wa Siloamu; bũrĩciria ũgu nĩ kwonania baarĩ eyia nkũrũki ya antũ bonde barĩa batũũraga Jerusalemu? 5Arĩ, tĩ bu! Ĩndĩ ka ndĩbwĩreni, bwarega kwĩrira o nabwi bwinde bũgakua o ta bo.”
Ngerekano ya mũfigi ũrĩa ũtaarĩ na majiaro
6Jesũ akĩbaa ngerekano ino: “Muntũ ũmwe nĩ aandire mũfigi mũgũndani wae wa mĩfĩgi#13.6 mĩfĩgi Mũtĩ ũjiaraga matunda marĩjagwa, ũkari ta mũramba. Akĩthi gũcũa matunda mũfigini ũu ĩndĩ akĩthĩra ũtĩjiere no mbi. 7Akĩĩra mũrĩmi mũgũnda atĩrĩ, ‘Mbĩjĩte aa mĩaka ĩthatũ rĩu ngĩcũaga matunda mũtĩni ũũ, na gũtĩ mo mbonaga. Ũrenge ũtige kũrĩa mũgũnda burĩ.’ 8Mũrĩmi wa mũgũnda akĩmwĩra atĩrĩ, ‘Mwathani wakwa, tigana nau mwaka ũũ o nau; mbambe ndĩũrĩmĩre na ndĩwĩkĩre thumu. 9Ũkeja kũjiara matunda mwaka tũthiĩte rĩ, wĩkare o; ĩndĩ ũkarega kũjiara, ũũrenge.’”
Jesũ kũragithia mũka kionje ntukũ ya Sabatũ
10Ntukũ ĩmwe ya Sabatũ Jesũ nĩ arutanaga sinagoguni. 11Kũu sinagoguni nĩ kwarĩ na muntũ mũka atũũrĩte athĩnĩtue nĩ nkoma ya wonje mĩaka ĩkũmi na ĩnaana. Atũũraga akuamĩrĩtie na atĩnkĩũmba kũrũngama cikĩ. 12Na rĩrĩa Jesũ amwonire nĩ amwĩtire akĩmwĩra atĩrĩ, “Mũka, ũkũragithua wonje bwaku.” 13Jesũ akĩmwigĩĩra njara, na o rimwe mũgongo wa muntũ mũka ũu ũkĩrũngara. Nawe agĩkumia Ngai.
14Ĩndĩ mũrũngamĩĩri wa sĩnagogu akĩthũũra mũno nĩũntũ bwa Jesũ kũragithania ntukũ ya Sabatũ. Kwogu akĩĩra antũ atĩrĩ, “Kũrĩ na ntukũ ithandatũ irĩa tũbaterie kũruta wĩra; ũkagani bũkaragithua ntukũ iu, ĩndĩ tĩ ntukũ ya Sabatũ.”
15Mwathani akĩmũcokeria, “Mpinga ino! Kũrĩ ũmwe wa jienu atĩthaũraga ng'ombe kana ntigiri yae akamiira kũnyua rũjĩ ntukũ ya Sabatũ? 16Ĩndĩ mũka ũũ wa rũjiaro rwa Aburahamu athirĩtie mĩaka ĩkũmi na ĩnaana arĩ mwoe na wonje nĩ Nkoma; Anga tĩ wega athaũrĩtwe kuuma kĩrĩ ũkombo ũũ ntukũ ya Sabatũ?” 17Rĩrĩa Jesũ augire ũgu anthũ bae bonde bagĩconoka, nabo antũ bonde bagĩkenua nĩ maũntũ ma kũrigaria marĩa Jesũ arũthaga.
Ngerekano ya mpĩndĩ ya Muthandũkũ
(Mat 13.31-32; Mar 4.30-32)
18Jesũ akiuga, “Ũnene bwa Ngai bũkari atĩa? Nĩmbi ndĩnkĩũmba kũbũringithania nayo? 19Ndĩbũringithania na gapĩndĩ ka mũthandũkũ#13.19 mũthandũkũ: Kana mũtĩ unde mũnene ũrĩa ũjiaraga gapĩndĩ kanini buru. karĩa muntũ ajũkirie agĩkaanda mũgũndani wae; gakĩmera, gagĩkũra gagĩtuĩka mũtĩ, na inyoni igĩaka jiuru mpũani jiau.”
Ngerekano ya ndawa ya kwimbia mĩgate
(Mat 13.33)
20Agĩcoka akiuga o kaĩrĩ, “Nĩmbi ndĩnkĩũmba kũringithania Ũnene bwa Ngai nayo? 21Ũnene bwa Ngai bũkari ta ndawa ya kwimbia mĩgate, ĩrĩa muntũ mũka ajũkiirie akĩmĩkandania na mũtu wa ngano wa kilo ta mĩrongo ĩna, na mũtu unde ũkimba.”
Mwari ũrĩa mũceke
(Mat 7.13-14,21-23)
22Jesũ nĩ athiire mbere na rũgendo erekeere Jerusalemu, agĩkũrũkagĩĩra taũnini na ntũũrani akĩrutanaga antũ kiugo kĩa Ngai. 23Muntũ ũmwe nĩ amũririe, “Mwathani, anga no antũ banini bakaonoka?” Nawe Jesũ agĩcokia akĩĩra antũ bonde atĩrĩ, 24“Ĩrutanĩrieni gũtonya Ũneneni bwa Ngai gũkũrũkĩĩra mwari ũrĩa mũceke; nĩũntũ antũ baingĩ bakageria gũtonya na batĩũmba. 25Kagiita nĩ gagũkinya mwene nyomba aũkĩre ainge mũrango; nabwi bũrĩ kaja bwambĩĩrie kũringaringa bũkiugaga, ‘Mwathani tũrugũrĩre.’ Nawe akabũcokeria abwĩre, ‘Niũ ntijĩ kũrĩa bumĩte.’ 26Rĩu nabwi bũkambĩĩria kũmwĩra, ‘Anga tũtarĩjanagĩra na tũkanyunyanĩra naagwe; na ũkarutana antũ ntũũrani jietũ?’ 27Ĩndĩ akabwĩra kaĩrĩ, ‘Ndĩbwĩra ntijĩ kũrĩa bumĩte; mpumani aa bwiũ antũ barĩa baganu!’ 28Ĩndĩ ĩu bũkarĩra na bũkabange magego rĩrĩa bũkona Aburahamu na Isaka na Jakubu, na iroria jionde barĩ Ũneneni bwa Ngai, nabwi bũrĩ agere nau nja. 29Antũ bakeja baumĩte mwena wa ũrio na wa ũmotho, wa rũgũrũ na wa gaĩti, bekare ndĩ barĩe kĩrugo kĩa Ũneneni bwa Ngai. 30Na atĩrĩ, antũ bamwe barĩa barĩ mũthia bakethĩrwa barĩ mbere, na barĩa barĩ mbere bakethĩrwa barĩ mũthia.”
Bũrĩa Jesũ endete Jerusalemu
(Mat 23.37-39)
31Kagiita o kau Afarisai bamwe nĩbejire bakĩĩra Jesũ, “Uma aa ũthi gũntũ kũngĩ, nĩũntũ Herode nĩ akwenda gũkũũraga.”
32Jesũ nĩ akĩbacokeria akĩbeera, “Thini bwĩre mbwe ĩu atĩrĩ, ‘ũmundĩ na rũ nkethĩrwa nkĩruta nkoma kuuma kĩrĩ arũaru na nkĩbaragithagia, na ntukũ ya ithatũ ndĩkie wĩra wakwa.’ 33O na kũnarĩ ũgu, no mwanka ndi mbere na rũgendo rwakwa ũmundĩ na rũ o na ntukũ ĩu ĩrũmĩrĩte, nĩũntũ gũtĩũmbĩka kĩroria kĩũragĩrwa kũngĩ o tiga Jerusalemu.
34“Jerusalemu, Jerusalemu! Gwe ũragaga iroria na ũkaria na maiga barĩa Ngai agũtũmĩrĩte! Nĩ maita megana ndanenda gũcokanĩĩria antũ baku ta bũrĩa ngũkũ ĩcokanagĩĩria tũcui twayo rungu rwa mathagu mayo, nagwe utĩmbĩtĩkĩĩrie! 35Atĩrĩ, gĩtũũro gĩaku nĩgĩtiganĩrie. Ndĩkwĩra na ma ũtĩkarombona nkinya rĩrĩa kagiita gagakinya uuge, ‘Kũtharimwa nĩ ũrĩa wĩjĩte na riĩtwa rĩa Mwathani.’ ”
Actualmente seleccionado:
Luka 13: LUKA
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
God's word open for all
©Bible Society of Kenya, 2021
