Génesis 38

José öpöe Judá ö̧jina jawa

1Ja̧danö, Josénö tjiyaja̧ tupakwö, José öpöedötjö bakwo̧, Judáma öpöedö tjö̧jelö, mö'ösa'iju jelöma yutubö Adulam comunidadbe 'yi̧jetö, jelo̧ Hira mikwo̧ ejunö ö̧jobö. 2Ja̧danö, jobe ja̧nö bakwujunö, Canaán jojosujunö edö ösödijetö, Chilekwo baibanö chemena, jö̧ba̧lö. Jobuju jabe'doma Súa mikwo̧. Ja̧danö, Judáma jobujunö emijetö ilekwo baibanö. 3Jemi tupakwöma jobujuma metu'wo ji̧jotö. Me'tuwo ja̧ju jitji̧nö emijotö. Jemajökwenö midijotö, Er, jö̧ba̧lö. 4Ju'wi möle yemidanö metu'wo ja̧ju jelo̧ jitji̧nö emijotö. Jo̧banö, Onán, jö̧ba̧lö, midijotö. 5Ja̧danö, ju'wi möle Judáma, ilekwokwö, i̧tji̧mukwö 'yi̧jetö Quezib comunidadbe tjuju̧kwobö. Jobetjö Judá ilekwoma, metu'wo jujuma yemidanö emijotö jitji̧nö. Jo̧banö, Sela, jö̧ba̧lö, midijotö. Ja̧danö, Judá, ilekwo tji̧tji̧mu ömadöma wa̧medukwabijadötö.

6Ja̧danö, Judá itji̧ abönö pöe Er mikwo̧ma ida̧ökö möayo̧ baibena Judáma ichejebijetö jo̧ba emakwujunö. Jobujuma Tamar mikwijotö. 7Jo̧kwijayonö Erma jwiinö sulabenö, Isabenö Jo̧ Dios jwiinö öpöjödi̧ jawa ja̧iökwe jo̧banö ö'wö baibanö lȩbebijetö, Isabenö Jo̧ Diosma.

8Ja̧danö, Er woaja̧ ikena Judáma jö̧ba̧lijetö itji̧ Onánnö, ikena jojonö:

—Chitji̧ a̧ja̧kwitjö. Kwöpöe Erma i̧tji̧mu debo̧ woinobe. Kwöwaisa, ökwödö da'dödö wetjinama, baikwö weobe: Bakwo̧ iteda öpöe tjemu debo̧ woajaitjö̧ma jo̧ba öjawo̧ma öpöe ilekwobajujunö emobö weobe, öpöe ö̧jajabe okobe ja̧nö itji̧nö 'yaebobö. Jo̧ba itji̧ abönö pöema wobina itji̧danö ö̧jakwo̧, wobinatjö̧ tupadanö jojodö tjö̧jakobetjö̧. Jo̧kwaobetjö̧ chitji̧ wetakwö: Kwöpöemine ilekwobajujunö kwemo— webijetö Judáma itji̧ Onánnö.

9Jo̧kwaijayonö Onánma öpöjödijetö, jobujutjö chi̧tji̧muma ötjö chi̧tji̧mu̧böködö batjibena, chöpöemine i̧tji̧mu̧da, jö̧ba̧lö .

Jo̧kwaobetjö̧ Onánma Tamarkwö ö̧jenama metu'wo jö̧joböma öpöjödö Tamar jipjeanöda ja̧bö lobiabijetö. 10Jejenö sulabenö omukwatö ja̧iökwe Isabenö Jo̧ Diosma Onánnö ö'wö baibanö lȩbebijetö webijetö.

11Jejenö balediökwe Judáma, yebabinö omukwatijetö, ¡Ayö! Chitji̧ bajaliyanö luwo̧nö Tamarnö emobö wetitjö̧ma, jo̧babi ö'wö baibena, jö̧ba̧lö. Jo̧kwaobetjö̧ jö̧ba̧lijetö ojoliju Tamarnö:

—Babeda kwabe'do ejube daji, jobeda ja̧nö, kwilekwenö emökönö. Chitji̧ bajaliyanö luwo̧ Sela, möayo̧ baibena ökwönö emakobe— jö̧ba̧lijetö. Jo̧kwaobetjö̧ Tamarma jabe'do ejube ȩwa̧jaju jobeda ja̧nö te'ada̧lijotö.

Tamar Judánö balekwa mikwa ja̧bina jawa

12Ja̧danö, ju'wi möle, lekwe möle baledinena Judá ilekwo, Súa itjijuma wobijotö. Judáma ilekwo wojaiökwe o̧'wo̧ tjo̧ekwi̧ söawena ömöayedönö, a̧jwi̧mu o̧bȩja̧dö tjöwö'ye 'wibadönö edö 'yi̧jetö. Ja̧danö, ömöledöso̧ Hira mikwo̧, Adulam comunidad jojokwö 'yi̧jetö.

13Jejenö baledonö ju'wedöma Tamarnö yöbawijadötö, Kwöjaba Timnabe i̧'yobe a̧jwi̧mu o̧bȩja̧dö tjöwö'ye 'wibö, jö̧ba̧lö. 14Tamarma jöjaba Judánö labijotö, itji̧ Shelanöma ida̧ökö möayo̧ ö̧ji̧jayonö jo̧banö weiokoko jilekwe baibanö. Jo̧kwaobetjö̧ jobujuma Judánö jo̧'wo sulinö edö balekwa mikwa omukwatö junijotö. Jejenö omukwatö jobujuma tjilekwenö wobekwinadö 'duawakwawado̧ 'dujawi̧ma 'yo̧bekwö lobibö, jȩlȩdo̧ 'dubawijotö. Ikenama jöba öwawökönö muchekwijotö jojodöma jobujunö edö tjöwaisapji jö̧ba̧lö. Muchekwajuma Timna comunidad 'ya̧kwawa ja'ö 'yi̧jotö, Enaim comunidad teachakwawemi ö'öbö. Jobe jitebiya weoko ichejekwujudanö ba̧nö te'ada̧lijotö Judá öbaledenanö.

15Ikenama, Judáma jena baledöma wajwibijetö jobujunöma. Ja̧danö, Bisuma jöba muchekwujuma jitebiya weoko, jö̧ba̧lö, omukwatijetö. 16Jejenö jö̧ba̧lö, jobuju mana ö'öbö bu̧ju̧nö 'ya̧wibö jö̧ba̧lijetö:

—Ötjökwö kwö̧jo— jö̧ba̧lijetö. Wajwibijetö jobujunöma itji̧ ö̧jinokomine ilekwojinajayonö.

Jejenö jö̧a̧loko:

—¿Dokwa nöinö kwimidenada ökwönö chataditjö̧ma, Jao ökwökwö chö̧jocha, jö̧ba̧lö?— abebö ja̧ja̧kwökwe:

— 17Cha̧jwi̧mu chi̧wo̧dötjö ina möayo̧nö chiyokwö— atadoko:

—¿Babema taji kwiyakwa̧da tupakwö chiwonö kwiyakwa̧ i̧seböma?— ajebökwe

18—¿Taji chiyobö kwösöda?— aeboko:

— Kwitea seyu, seyu lo̧pja, kwömamunö do̧kaa̧la'o kwotokwa'o iyitjö— ajebökwe okobe jwiinö ajebi̧ma iyijetö Judáma. Seyu doawayu, önawajayu Ikenama jobujukwö ji̧jetö. Tamarma jo̧ba Judákwö ja̧nö iteda itji̧nö 'yabebijotö. 19Ikenama Tamarma jelöma ȩwa̧juma jöba muchekwado̧ma 'yo̧bekwö lobibö, ja̧danö, tjilekwenö wobekwinadö 'duawakwawado̧ yemidanö 'dubawijotö.

20Jemi ikenama Judáma webijetö ömöledöso̧, Adulam comunidad jojonö Tamar jö̧jobekwö i̧'yobö̧, a̧jwi̧mu chi̧wo̧ möayo̧nö e'ewö iyö. Ja̧danö abebijetö, jobujunö chiyaja̧ma seyu, jayu nöawasopja, chotokwa'o emibö kwichejebo, jö̧ba̧lö. Jejenö weökwe 'ya̧jo̧ma jobe ichibö isakwemi debijotö jobujuma, Judá ö̧jajokoma. 21Ja̧danö, jobe ju̧kwadö ömadönö abebö a̧ja̧kwijetö:

—¿Daida jitebiya weoko jujuma, bena Enain mana ö'öbö binujuma?—abebö a̧ja̧kwawö:

—Baima deobe jitebiya weokoma— jö̧ba̧lijadötö.

22Ikenama Judá ömöledöso̧ Judá ö̧jobekwö tjebachajö yöbawijetö:

—Chisakwemi dejatö jobujuma. Jobe ju̧kwadö ömadöma, Baima deobe jobuju ja̧yuma jö̧tja̧latö— yöbawijetö Judánö.

23Jejenö yöawökwe:

—Jau kwatjö̧ma, ötjö chiteama wainö jujuna̧li. Tjo̧wi̧ disakwoko, jojodöma ökwödönö otjapji jö̧ba̧lö. Ja̧danö, otiwanö omukwatö chiyobö wetijayonö deja— jö̧ba̧lijetö Judáma.

24Ja̧danö ju'wi möle, ja̧wo̧dö wamedukwa tjöbaledibena ju'wedöma yöbawijadötö Judánö, kwitji̧mine ilekwoma sulabenö i̧so̧kwö alewinujuma babema metu'wo jö̧jobe, jö̧ba̧lö. Jejenö yötjawökwe Judáma jwiinö labijetö, do̧batö kwichejebaduwojö baikwö, jojodö tjö̧'da̧de junö, juwö lotojö, jö̧ba̧lö. 25Jejenö weawö̧ jobujunö do̧batajadö tötöbö tji̧'yonö, Tamarma jelo̧nö iyijetö jöjaba jobujunö itea iyinama. Iyö webijotö:

—Biya̧ jawa e'ewö iyaji chöjaba Judánö. Ja̧danö, jo̧banö yöka̧lo: ötjö metu'wo chö̧jobö ja̧binama biya̧ itea iyijatö ötjönöma, jö̧ba̧lö. Ja̧danö yöka̧lonö: Otiwanö edi kwöwaiso ti u̧kwada biya̧ma. Jo̧bada ötjönö metu'wo chö̧jobö ja̧binama.

26Ikenama Judáma iteda itea, seyu, lawosopja, otokwa'o edinö, Ötjödasa, jö̧ba̧lö, waisachibijetö. Ja̧danö, jö̧ba̧lijetö:

—Isabenö, ötjödasa jelobekwö omukwatö jo̧ma. Bisu Tamarma jweinö jomukwatonö sulabenö omukwatö wetijökötö chitji̧ Selanö jobuju jilekwe baibobö— jö̧ba̧lijetö. Jemi ikenama Judáma jobujukwö ji̧jökötö yemidanöma.

27Ja̧danö, Tamarma metu'wo ja̧ju, jemakwa̧ lekwökö badekwachena waisachibijotö, Bakwo̧kö̧ du̧ju̧taja tja̧ja, jö̧ba̧lö. 28Ja̧danö, jemobö nienama bakwo̧ma ö̧ja i̧seibijetö. Tjemunö tjemobe te'ada̧lujuma tjemu öja i̧seibaja do̧batö ime'anö isopja duwopja di̧batijotö, Bitema abönö pöe, jö̧ba̧lö. 29Jo̧kwaijayonö jo̧bama yemidanö öjama töbeibijetö okwakwö. Öja töeibemi ö̧jawo̧ma omöna mebijetö öpöe abönö. Te'ada̧lujuma jo̧banö edö jö̧ba̧lijotö ¿Dakwö abönö ichinö baibada? jö̧ba̧lö. Jejenö baledobetjö̧ jo̧bama Fares#38:29 · Fares, jö̧ba̧löma da̧la jö̧ba̧lö wanekwachobe. , jö̧ba̧lö, mikwijetö. 30Ikenama jelonö ime'anö isopja duwopja di̧jatajökwenö emibijotö. Jo̧bama, Zara#38:30 · Zara jö̧ba̧löma, dejö jö̧ba̧lö wanekwachobe. , jö̧ba̧lö, mikwijetö.

Actualmente seleccionado:

Génesis 38: WPC

Destacar

Copiar