Mɔl 41
41
Dwosefi kile belemgbunli ne ɛlalɛ bo
1Ɛvolɛ nwiɔ anzi, Yigyibiti belemgbunli ne hanle ɛlalɛ kɛ ɛnee ɔgyi Azule Naele ne anloa. 2Ɔnwunle kɛ nlankɛ mgbole, dɔlera nsuu vi azule ne anu ɛvinde na bɛlɛdidi ɛhonle ne mɔɔ wɔ ɛkɛ ne la anu. 3Ɔnwunle kɛ eza nlankɛ nwanlera, kengamgbaanwo nsuu bɛdabɛ bɛvi azule ne anu bɛvo bɛragyinlegyinla nlankɛ ɛhendeɛ ne mɔ anwo ɛkɛ wɔ azule ne anloa. 4Na nlankɛ nwanlera, kengamgbaanwo nsuu ne hyele nlankɛ mgbole, dɔlera nsuu ne lile. Na belemgbunli ne dunwuele. 5Eza ɔlafele, na ɔhanle ɛlalɛ bieko. Ɔnwunle kɛ abɛlɛ mbaka mgbole nsuu ɛwɔlɔwɔlɔ abɛlɛ baka ko anwo. 6Yeangyɛ biala ɛnee eza abɛlɛ mbaka ɛtane ɛtane, agyendo nsuu bɛdabɛ noko bɛwɔlɔwɔlɔ. 7Na abɛlɛ mbaka ɛtane ɛtane, agyendo nsuu ne memenle abɛlɛ mbaka mgbole nsuu ne. Belemgbunli ne dunwuele na ɔnwunle kɛ ɔle ɛlalɛ. 8#Dan 2.2 Yemɔti aleɛ hyenle la ɛnee ye adwenle ɛzɛkye. Na ɔzoanle ɔmanle bɛhɔvɛlɛle ngonyiama mɔɔ wɔ Yigyibiti la amuala nee maanle ne anu nrɛlɛbɛvolɛma ne amuala na ɔhanle ye ɛlalɛ ne ɔhilele bɛ. Noko bɛ nuhua ko bɔbɔ angola ɛlalɛ ne abo kile kile belemgbunli ne.
9Akee sonvolɛ ne mɔɔ nea belemgbunli ne nza nee ye ahyɛnze zo la hanle hilele ye kɛ, “Nana, ɛnɛ mehakye kɛ mevo. 10Mekɛ mɔɔ ɛvale me nee sonvolɛ ne mɔɔ to kpanwo la anwo ɛya, na bɛguale yɛ efiade wɔ belemgbunli sinzavolɛma safohyenle ne sua nu la, 11kenle ko nɔɔzo me nee sonvolɛ ɛhendeɛ ne yɛhanle ɛlalɛ. Yɛ ɛlalɛ ne mɔ le ngakyile, yɛɛ asolo ko biala abo. 12Mekɛ ne anu ɛnee yɛ nee Hibulunli kpavolɛ bie mɔɔ le sinzavolɛma safohyenle ne sonvolɛ la a gua ɛkɛ a. Yɛhanle yɛ ɛlalɛ ne mɔ yɛhilele ye, na ɔhilele ɛlalɛ ne mɔ abo ɔhilele yɛ, kɛmɔ sonla ko biala ye ɛlalɛ ne de la. 13Na kɛ ɔzile ɔhilele ɔ bo ɔhilele yɛ la, zɔhane ala yɛɛ ɔyɛle a. Bɛvale me gyima ne bɛmanle me, yɛɛ bɛhendanle sonvolɛ ne mɔɔ to kpanwo la.”
14Belemgbunli ne zoanle manle bɛhɔvale Dwosefi ndɛndɛ zo wɔ efiade ne bɛrale. Ɔkpale ɔ kɛsa, ɔbiale, ɔhakyile ye adɛladeɛ mɔɔ ɔwula la, na akee ɔhɔle belemgbunli anyunlu. 15Na belemgbunli ne zele Dwosefi kɛ, “Meha ɛlalɛ bie, na awie biala ɛnle ɛkɛ mɔɔ kola kile ɔ bo a. Na mede noko kɛ wɔmɔ, saa bɛka ɛlalɛ bɛkile wɔ a ɛkile ɔ bo.”
16Dwosefi buale kɛ, “Nana, medame me ngome mengola. Nyamenle yɛɛ bahile ɔ bo ahile Nana a.”
17Na belemgbunli ne zele Dwosefi kɛ, “Wɔ me ɛlalɛ ne anu, menwunle kɛ ɛnee megyi Azule Naele ne anloa. 18Na nlankɛ mgbole, dɔlera nsuu vi azule ne anu vindele na bɛvole bɛradidile ɛhonle ne anu. 19Na nlankɛ nwanlera, kengamgbaanwo nsuu bɛdabɛ bɛvi azule ne anu bɛvindele. Nlankɛ zɛhae, metɛnwunle bie ɛlɛ wɔ Yigyibiti maanle ye anu. 20Na nlankɛ nwanlera, kengamgbaanwo nsuu ne hyele alumua nlankɛ mgbole dɔlera nsuu ne lile. 21Noko bɛlile bɛ bɛwiele bɔbɔ la, ɛnee ɛnwu nlankɛ ne mɔ a ɛkɛze kɛ bɛtɛdile ɛhwee, ɔluakɛ ɛnee kɛ bɛde ala la yɛɛ bɛde a. Na mendunwuele. 22Meka ɛlalɛ bieko la ɛnee abɛlɛ mbaka mgbole nsuu ɛwɔlɔwɔlɔ abɛlɛ baka ko anwo, 23na abɛlɛ mbaka ɛtane ɛtane, agyendo nsuu wɔlɔle, 24na bɛmemenle abɛlɛ mbaka mgbole nsuu ne. Meha ɛlalɛ ɛhye mehile ngonyiama ne mɔ, noko meannyia bɛ nuhua ko bɔbɔ angile ɔ bo angile me.”
25Na Dwosefi buale kɛ, “Nana, ɛlalɛ ne le kokye. Nyamenle ɛye mɔɔ ɔbayɛ la ɛhile Nana. 26Nlankɛ mgbole nsuu ne kile ɛvolɛ nsuu, yɛɛ abɛlɛ mbaka mgbole nsuu ne kile ɛvolɛ nsuu. Bɛ mu nwiɔ bɛ bo le kokye. 27Nlankɛ nwanlera, kengamgbaanwo nsuu ne mɔɔ lile ɛhendeɛ ne mɔ anzi rale yɛɛ abɛlɛ mbaka ɛtane ɛtane, agyendo ne noko kile ɛhɔne ɛvolɛ nsuu. 28Ɔle kɛ mɔɔ menganle mengilele Nana la. Nyamenle ɛye mɔɔ ɔbayɛ la ɛhile Nana. 29Ɛvolɛ nsuu bara mɔɔ aleɛ babu kpole wɔ Yigyibiti azɛlɛ ye azo a. 30Na saa ɛhye pɛ nuhua a, ɛvolɛ nsuu badoa zo, mɔɔ ɛhɔne kpole kpalɛ bara a, na arɛlevilɛ bɔbɔ ara kɛ mekɛ bie ɛnee aleɛ ɛbu Yigyibiti. Ɛhɔne ne bara azɛlɛ ye amuala azo. 31Ɛhɔne ne mɔɔ bara la ati, awie ɛnrɛnwu kɛ ɛnee azɛlɛ ye azo le aleɛ ngome, ɔluakɛ ɛhɔne ne bayɛ kpole kpalɛ. 32Ɛlalɛ fane nwiɔ ne mɔɔ Nana hanle la kile kɛ Nyamenle ɛbɔ ye kpɔkɛ ɛwie, na ɔnrɛhyɛ biala na yeazi.
33“Zɔhane ati Nana, ɔwɔ kɛ ɛye sonla mɔɔ ɔ nye gyi ɔ ti anwo na ɔze nrɛlɛbɛ la, na ɛfa ye ɛsie Yigyibiti azɛlɛ ye kɔsɔɔti anloa. 34Nana ɛbɔ ɔ bo ɛyeye menli mɔɔ banlea azɛlɛ ne mɔ azo la, na ɔlie aleɛ biala mɔɔ kɛvinde Yigyibiti azɛlɛ ye azo la anu ngyɛnu nnu ɛkpɔ ko wɔ ɛvolɛ nsuu ne mɔɔ aleɛ babu la anu. 35Maa bɛboɔboa aleɛ mɔɔ bɛbanyia ye wɔ ɛvolɛ kpalɛ ne mɔ anu la anloa, na maa tumi maa bɛva abɛlɛ bɛzie azuamgbole ne mɔ azo, na bɛzinza. 36Zɛhae aleɛ ne mɔɔ bɛbaboɔboa ɔ nloa la yɛɛ bayɛ aleɛ mɔɔ bagyinla ɛkɛ amaa ɛvolɛ nsuu ɛhɔne ne mɔɔ bara Yigyibiti amuala la a, amaa saa ɛhɔne ne ba a, ɛhɔne angu maanlema ambɔ bɛ bo zo.”
Bɛyɛ Dwosefi amɛnlado wɔ Yigyibiti
37Nzuzulɛ ne zɔle Yigyibiti belemgbunli ne nee ye mgbanyima ne mɔ amuala anye. 38Na ɔzele ye mgbanyima ne mɔ kɛ, “Bɛnea a awie bie wɔ ɛkɛ tɛla ɛhye mɔɔ Nyamenle Sunsum ne wɔ ye nu la ɔ?” 39Yemɔti belemgbunli ne zele Dwosefi kɛ, “Kɛmɔ Nyamenle ɛye ɛhye mɔ amuala ɛhile wɔ la, awie ɛnle ɛkɛ mɔɔ anye gyi ɔ ti anwo na ɔze nrɛlɛbɛ kɛ ɛdawɔ la. 40Ɛbanlea me sua nu ɛke, na me menli ne amuala bayɛ tieyɛ amaa wɔ. Edwɛkɛ biala mɔɔ ɛkɛha la bɛbali zolɛ. Debie mɔɔ mefa metɛla wɔ la a le me belemgbunli ebia ne mɔɔ mede zolɛ la.” 41Belemgbunli ne zele Dwosefi kɛ, “Nea, meyɛ wɔ kpanyinli mɔɔ banlea Yigyibiti azɛlɛ ye amuala azo a.” 42Akee ɔyele ɔ sa kpɔdelera ne mɔɔ ɔfa ɔsisi ngɛlata zo la ɔwulale Dwosefi asa, na bɛvale adɛladeɛ ngɛnlɛma bɛwulale ye, bɛvale ndweabane bɛdole ɔ kɔme; 43na ɔmanle ɔdɛnlanle ye konle ehwili ne mɔɔ tɔ zolɛ nwiɔ la anu, na ye sonvolɛma deanle nu kɛ, “Bɛhoto ye!” Ɛnee kɛ bɛyɛle bɛvale Dwosefi bɛziele Yigyibiti azɛlɛ ne kɔsɔɔti anloa la ɛne. 44Eza belemgbunli ne zele Dwosefi kɛ, “Mame a mele Yigyibiti belemgbunli a. Mese, saa ɛtɛdiele ɛtɛtole nuhua a, awie biala ɛnlɛ adenle kɛ ɔkɛva ɔ sa ɔkɛha anzɛɛ ɔ gyakɛ ɔkɛtia Yigyibiti azɛlɛ biala azo.” 45-46Na belemgbunli ne manle Dwosefi Yigyibiti duma na ɔvɛlɛle ye Zafɛnate Pania. Belemgbunli ne eza manle bɛhɔgyale raalɛ bɛrɛlɛle Dwosefi. Bɛfɛlɛ raalɛ ne Asɛnate, yɛɛ ɔ ze a le Pɔtefɛla mɔɔ le kɔmenle kpanyinli wɔ Hɛleɔpɔlese#41.45-46 Hɛleɔpɔlese: Hibulu, “Ɔɔn.” la.
Dwosefi lile ɛvolɛ abulasa la yɛɛ ɔbɔle ɔ bo kɛ ɔsonle Yigyibiti belemgbunli ne a. Ɔvi belemgbunli suakunlu ɛkɛ ɔhɔkpɔsale Yigyibiti maanle ne anu amuala. 47Aleɛ mekɛ ɛvolɛ nsuu ne anu, azɛlɛ ne manle bɛnyianle aleɛ dɔɔnwo kpalɛ. 48Ɔboɔboale ɛvolɛ nsuu ne anu aleɛ mɔɔ bɛnyianle la anloa, na ɔmanle bɛziele aleɛ mɔɔ bɛnyianle wɔ ɛya avule ne mɔ anu la wɔ azuamgbole ne mɔ azo. 49Dwosefi manle bɛziele abɛlɛ dɔɔnwo mɔɔ nzinlii ɛnee akee bɛngola ye suzu. Yemɔti ɔmanle bɛgyakyile ye ɛzuzulɛ, ɔluakɛ abɛlɛ ne zonle somaa, bɛ somaa kɛyɛ kɛ ɛnweazo anwea.
50Mɔɔ ɛhɔne ɛvolɛ nsuu ne kabɔ ɔ bo la ɛnee Dwosefi nee ɔ ye Asɛnate ɛwo mrenya nwiɔ. 51Dwosefi donle ralɛ nrenya kpanyinli ne Manasɛ.#41.51 Manasɛ: Ɔ bo a le “Ɔmaa arɛlevilɛ.” Ɔse, “Nyamenle ɛmaa me rɛle ɛvi me nyane nee egya sua nu amra.” 52Ralɛ nrenya ne mɔɔ tɔ zolɛ nwiɔ la, ɔdonle ye Yifelaem.#41.52 Yifelaem: Ɔ bo a le “Ɛdanebɔlɛ.” Ɔluakɛ ɔse, “Nyamenle ɛmaa mebɔ ɛdane wɔ me amaneɛnwunlɛ azɛlɛ zo.”
53Ɛvolɛ nsuu ne mɔɔ nuhua a Yigyibiti nyianle aleɛ dɔɔnwo la wiele. 54#Gyi 7.11 Na ɛhɔne ɛvolɛ nsuu ne bɔle ɔ bo, kɛmɔ Dwosefi hanle ala la. Ɛhɔne zile maanle maanle kɔsɔɔti anu, na Yigyibiti ɛdeɛ, ɛnee aleɛ wɔ ɛkɛ. 55Mɔɔ ɛhɔne ne hanle Yigyibiti la, maanlema amuala zunle vɛlɛle bɛ belemgbunli ne kɛ ɔmaa bɛ aleɛ. Na belemgbunli ne zele Yigyibitima amuala kɛ, “Bɛhɔ Dwosefi ɛkɛ, na bɛyɛ debie biala mɔɔ ɔkɛze bɛ la.” 56Yemɔti mɔɔ akee ɛhɔne ne rale ye mgbole nu la, Dwosefi manle bɛbukebukele ɛleka ɛleka mɔɔ bɛvale aleɛ bɛziele la amuala, na bɛdɔnenle aleɛ bɛmanle Yigyibitima, ɔluakɛ ɛnee akee ɛhɔne ne ɛyɛ kpole wɔ Yigyibiti. 57Yeanga ye zɔhane angome, eza maanle maanle dɔɔnwo rale Dwosefi anwo ɛkɛ ne wɔ Yigyibiti radɔle abɛlɛ, ɔboalekɛ ɛhɔne ne hanle ewiade amra amuala.
Actualmente seleccionado:
Mɔl 41: NB
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Bible in Nzema © Bible Society of Ghana, 1998.
