Mɔl 40
40
Dwosefi kile pilizama ne ɛlalɛ bo
1Ɛhye anzi mɔɔ ɛnee mekɛ ɛgua nu la, sonvolɛ ne mɔɔ nea Yigyibiti belemgbunli ne nza nee ye ahyɛnze zo nee mɔɔ to ye kpanwo la vonle bɛ menle ne. 2Na Yigyibiti belemgbunli ne vale bɛ nwo ɛya 3na ɔhyele bɛ ɔguale efiade wɔ sinzavolɛma safohyenle ne sua nu ɛkɛ ne efiade ne ɛleka mɔɔ Dwosefi la la. 4Bɛguale efiade ɛkɛ ne bɛhyɛle dɔɔnwo, na sinzavolɛma safohyenle ne yele Dwosefi kɛ ɔzonle bɛ.
5Kenle ko nɔɔzo sonvolɛ ne mɔɔ nea Yigyibiti belemgbunli ne nza nee ye ahyɛnze zo nee sonvolɛ ne mɔɔ to kpanwo la hanle ɛlalɛ. Asolo ko biala ɛlalɛ mɔɔ ɔhanle la, yɛɛ asolo ɔ bo noko. 6Mɔɔ Dwosefi rale bɛ nwo ɛkɛ ne nwonlomɔ ne la, ɔnwunle kɛ bɛ adwenle ɛzɛkye. 7Yemɔti ɔbizale belemgbunli ne sonvolɛma ne mɔ mɔɔ bɛ muala a bɛgua efiade, wɔ ɔ menle ne sua nu ɛkɛ ne la kɛ, “Duzu ati a ɛnɛ bɛ nyunlu ɛdo zɛhae a?”
8Bɛbuale ye kɛ, “Yɛha ɛlalɛ, na yɛnnyia awie ɛngile bɛ bo ɛngile yɛ.”
Dwosefi buale bɛ kɛ, “Ɔ bo ɛhilelɛ ne vi Nyamenle ɛkɛ ne a ba a. Mebodo bɛ, bɛha bɛ ɛlalɛ ne mɔ bɛhile me.”
9Yemɔti sonvolɛ ne mɔɔ nea nza nee ahyɛnze zo la hanle ye ɛlalɛ ɛdeɛ ne hilele Dwosefi kɛ, “Meka ɛlalɛ la ɛnee vanye baka gyi me nyunlu ɛkɛ. 10Vanye baka ne lɛ ngane nsa. Ɔfefɛle nya ala la yɛɛ ɔbɔle ndotolo, ɔzole na ma ne mɔ bolole a. 11Menwunle kɛ ɛnee melɛ belemgbunli ne kɔpo ne mɔɔ ɔfa ɔno ye nza la me sa nu, yemɔti mentetele ma ne mɔɔ ɛbolo la bie na mendwihwinle nuhua nzule ne menguale belemgbunli ne kɔpo ne anu, na menvale menwulale ɔ sa nu.”
12Na Dwosefi buale kɛ, “Wɔ ɛlalɛ ne abo ɛne: vanye ngane nsa ne kile kenle nsa. 13Ɛnɛ anwo zo kenle nsa, belemgbunli ne bamaa bɛaraye wɔ wɔ efiade ɛke na bɛava wɔ gyima ne bɛawula ɛ sa nu; ɛbava belemgbunli ne kɔpo ne wɔawula ɔ sa nu, na wɔazu ye nza kɛ dɛba ne ala la. 14Na saa ɔyɛ boɛ ɔmaa wɔ a, anrɛɛ kakye me na yɛ boɛ ɛhye maa me. Mebodo wɔ, bɔ me duma kile belemgbunli ne maa ɔye me ɔvi efiade ɛke. 15Ɔluakɛ nɔhalɛ nu, bɛwuale me a bɛ nee me vi Hibulu azɛlɛ zo rale a, yɛɛ ɛke noko, metɛyɛle ɛhwee mɔɔ ɔwɔ kɛ bɛto me efiade a.”
16Mɔɔ sonvolɛ ne mɔɔ to belemgbunli kpanwo ne la nwunle kɛ ɛlalɛ ne abo le kɛnlɛma la, ɔzele Dwosefi kɛ, “Medame noko menganle ɛlalɛ. Ɛnee mezo keeki ahɛndɛne nsa me ti zo. 17Mɔɔ gyi zolɛ kpalɛ anwuma la, aleɛ ngakyile dɔɔnwo mɔɔ bɛdo ye fonlomo nu la wɔ nu mɔɔ mefa meahɔmaa belemgbunli ne a, na ɛnee nloma ɛlɛsuso ye me ti zo ali.”
18Dwosefi buale kɛ, “Wɔ ɛlalɛ ne abo ɛne: ahɛndɛne nsa ne kile kenle nsa. 19Ɛnɛ anwo zo kenle nsa belemgbunli ne bamaa bɛaraye ɛ ti ne bɛavi zolɛ. Bɛbahenda wɔ baka zo, na nloma bali wɔ nwonane ne.”
20Kenle nsa ne azo Yigyibiti belemgbunli ne lile ye awolɛ kenle. Ɔdole ɛkponle kpole bie ɔmanle ye sonvolɛma ne amuala. Ɔyele ye sonvolɛ kpanyinli ne mɔɔ nea ye nza nee ye ahyɛnze zo nee sonvolɛ ne mɔɔ to kpanwo la ɔvile efiade. 21Ɔvale ye sonvolɛ ne mɔɔ nea ye nza nee ye ahyɛnze zo la ɔziele ye gyinlabelɛ dɛba ne, na ɔzule belemgbunli ne nza. 22Akee ɔhunle sonvolɛ ne mɔɔ to kpanwo ne la, kɛmɔ Dwosefi zile hilele bɛ ɛlalɛ ne mɔ abo ala la. 23Noko sonvolɛ kpanyinli ne mɔɔ nea belemgbunli ne nza nee ye ahyɛnze zo la arɛle vile Dwosefi, yeangakye ye fee.
Actualmente seleccionado:
Mɔl 40: NB
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Bible in Nzema © Bible Society of Ghana, 1998.
