LUKAS 24

1Semanapa qallanan junaq, qoyalla, shayámorqan sepultúraman alistayashqan pukutaqkunata apamur, i wakin warmikunapis peykunawan. 2I tariyarqan sepultúra rumita kuyushqata; 3i yeykurirnam, tariyarqantsu Señor Jesuspa kwerpunta.

4Peykuna almirashqa keykayanqanchowna, kaq key ishkey ollqukuna peykunapa ládunchow sheykáyarqan chipapaq bestidukunawan; 5i mantsakeyninkuna kaptin, qaqllankunata puktitsiyarqan patsaman, i niyarqan: —¿Imanirtaq ashiyanki kaweykaqta wanushqakunachow? 6Manam keychowtsu sinowqa kawarimushqanam. Yarpáyey parlapáyashonqeykita Galileyachow keykarninraq, 7nirnin: “Wananmi Nunapa Tsurin entregashqa kanan jutsasapa nunakunapa makinkunaman, i krusifikashqa kanan, i kima junaqta kawarimonqa.”

8Tseynam peykuna yarpáyarqan palabrankunapita, 9i sepultúrapita kutíkur, willakuyarqan keykunapita chunka jukkunata, i llapan wakinkunatapis.

10Kayarqan Marya Magdalena, i Juana, i Marya Jakobupa maman, i wakinkuna peykunawan, keykunam niyarqan keykunata apostulkunata. 11Peykunata nirápuyarqan lókupanow peykunapa palabrankuna, i manam kreyiyarqantsu.

12Peru sharkurnam Pedru, eyqerqan sepultúraman; i ruriman rikeykurnam, rikarqan páñukunallatana, i wayita eywakorqan susedishqanpita almirakur.

Jesús Emausman nánichow

13I keymi key, peykunapeq ishkaq eywayarqan tsey junaq Emaus nishqan tunaman, chunka juk kilómetrunow Jerusalenpita. 14I eywayarqan parlar kikinkunapura taqey kosaskuna susedikonqanta. 15Susederqan kikinkunapura parlar i liryeykáyaptin, kikin Jesús witiykorqan, i peykunawan eywarqan. 16Peykuna rikeykarninpis reqiyarqantsu. 17I peykunata nerqan: —¿Imatataq parlayanki kikikikunapura eyweykarnin, i imanirtaq llakishqa keykáyanki? 18Yaskirninna peykunapita juknin, Kleofas jutiyoq, nerqan: —¿Qamllaku japallan forastéru kanki Jerusalenchow manaku musyarqonki key junaqkunachow susedikushqanta?

19Tseynam pey peykunata nerqan: —¿Imakunata?

Peykuna niyarqan: —Jesús Nasarénupita, profeta ollqu karqan, pwedeq rureychow i palabrachow Dyospa i llapan pweblupa nowpanchow; 20i imanow entregayarqan apun saserdotikuna i gobernadornintsikkuna sentensya waníman, i krusifikáyarqan. 21Peru noqantsikqa shuyararqantsik pey Israyelta salbananta; i kanan, key llapanpita kima junaqnam key susedenqan. 22Noqantsikchow keykaq warmikunapis almiratsimarqontsik, manaraq junaqyaptin eywayarqan sepultúraman; 23i kwerpunta mana tarirnin, shayámorqan angelkunatam rikáyarqó nirnin, peykuna niyarqan pey kawanqanta. 24I eywayarqan noqantsikkunapita wakinkuna sepultúrata, i tariyarqan tseynow warmikuna niyashqannowlla, peru peyta rikáyarqantsu.

25Tseynam pey peykunata nerqan: —¡Á upakuna, chukru shonqukuna profetakuna llapan niyashqanta kreyiyáneykipaq! 26¿Manaku wanarqan Kristu key kosaskunata jipanan i gloryaman yeykunan?

27I Moysespita qalleykur, i llapan profetakunapa, willakurqan llapan Eskritúrakunachow peypaq niyanqanta. 28Cháyarqan eywayanqan tunanman, i pey rurarqan mas karuta eywaqnow. 29Peykuna obligayarqan keydakunanpaq, nirnin: —Keydakiy noqakunawan, tardiyárinnam, i junaq usharinnam.

Yeykorqan, peykunawan keydakunanpaq. 30I susederqan peykunawan mésachow teykáyaptin, i tantata tsarir bendiserqan, pakirirnam, peykunata qorqan. 31Tseynam nawinkuna, reqiriyarqan; peynam, illarirerqan rikeyninpita. 32I ninakuyarqan kikinkunapura: —¿Manaku rawrarqan shonquntsik noqantsikchow, nánichow parlapeykámashqa, i Eskritúrakunata kichapumaptintsik?

33I tsey óra sharkur, kutikuyarqan Jerusalenman, i tariyarqan chunka juk eyllukáyashqata i peykunawan keykaqkunata, 34niyaq: —¡Rasonpam Señor kawarimushqa, i Simonta yuripushqa!

35Tseynam peykuna willakuyarqan nánichow imakuna pasayashqanta, i imanow tantata pakiptin reqiyashqanta.

Jesús yuripun apostulkunata

36Key kosaskunata peykuna parleykáyaptinraq, Jesús peykunapa chowpinkunaman churakárerqan, i peykunata nerqan: —Yamey key qamkunata.

37Tseynam, mantsakashqa i espantashqa, espiritu rikáyanqanta pensayarqan. 38Tseynam pey nerqan: —¿Imanirtaq mantsashqa keykáyanki, i shamun shonqiykikunaman key yarpakacheykuna? 39Rikáyey makiykunata i chakiykunata, noqa kikiymi ká; yatayey i rikáyey, juk espiritupaqa manam kapuntsu eytsan ni tullunkuna, noqapata rikáyanqeykinow.

40I keyta nirirna rikátserqan makinkunata i chakinkunata. 41I imanow peykuna, kushikiywan, kreyiyarqantsu, almirakushqa keykáyarqan, nerqan: —¿Kayápushunkiku keychow imallapis mikunapaq?

42Tseyna qoyarqan peskadu kankashqapa pullanninta, i juk panal mishkita. 43I peyna tsarirkur, mikorqan peykunapa nowpanchow. 44I peykunata nerqan: —Keykunam palabrakuna parlapáyanqaq, qamkunawanraq keykar, wanarqan tinkunan noqapita llapan qellqashqa keykaq Moysespa leyninchow, profetakunapachow i salmukunachow.

45Tseynam kicharerqan káyikiyninkunata, Eskritúrakunata káyiyánanpaq; 46i peykunata nerqan: —Tseynowmi qellqashqa keykan, tseynowmi wanashqa Kristu jipanan, i kawarimunan wanushqakunapita kima junaqta; 47i jutinchow predikakanan wanakiyta i jutsakunapeq perdonta llapan markakunachow, Jerusalenpita qalleykur. 48I qamkunam testígukuna kayanki keykunapita. 49Kaq keymi, noqam kachamushaq Teytápa ánikiyninta qamkunaman; peru qamkuna keydakuyey Jerusalen pwebluchow, rarapita poderta chaskiyanqeykiyaq.

Jesús ewkun syeluta

50I jorqurerqan Betaniakama, i makinkunata pallarkur, bendisererqan peykunata. 51I susederqan bendisikaptin, peykunapita rakikárerqan, i apashqa karqan rara syeluman. 52Peykuna, adorarirninna, Jerusalenman kutikuyarqan jatun kushikiywan; 53i keykáyarqan templuchow wiñeypa, Dyosta alabarnin i bendisirnin. Amen.

Actualmente seleccionado:

LUKAS 24: QUEAN

Destacar

Copiar