LUKAS 23

Jesús Pilátupa nowpanchow

1Tseynam peykunapita llapankuna sharkur, apayarqan Jesusta Pilátuman. 2I qalleykuyarqan tunparnin, nishpa: —Keytam tariyarqó nasyon perturbaqta, i Sésarpa impwestunta qoyánanta michar, Kristu kashqanta kikin nirnin, tseynowpa juk rey.

3Tseynam Pilátu taporqan, nirnin: —¿Qamku kanki judyukunapa reynin?

I pey yaskirnam, nerqan: —Qanmi, ninkiy.

4I Pilátu nerqan apun saserdótikunata, i nunakunata: —Manam ima delítuta tariytsu key nunachow.

5Peru peykunam jikutayaq, nirnin: —Búllatsin pwebluta, yachatsikur llapan Judeyachow, Galileyapita qalleykur keykama.

Jesús Eródis Antipaspa nowpanchow

6Tseynam Pilátu, Galileya neqta wiyar, taporqan si galilew nunakush karqan. 7I Eródispa mandakunanchow kaqta wiyarirnam, apatserqan Eródisman, tsey junaqkunachowpis Jerusalenchow keykaptin. 8Eródis, Jesusta rikeykur, allápa kushiykorqan, uneypita rikeyta munashqa karnin; tukiyláyakunata peypita wiyashqa karnin, i señalkunata rurananta rikeyta shuyar. 9I rurarqan atska tapukiykunata, peru pey manam imata yaskerqantsu. 10I prinsipal saserdótikuna i judyukunapa leynin yachatsikoqkuna akusayarqan lluteypa. 11Tseynam Eródis soldadunkunawan despresyayarqan i burlakuyarqan, chipapeq ropawan bistirkatsir, yapey kutitserqan Pilátuman. 12I amígu tikrariyarqan Pilátu Eródiswan tsey junaq; nowpapita kikinkunapura liryashqa kayanqanpita.

Jesús yapey Pilátupa nowpanchow

13Tseynam Pilátu, qayatserqan apun saserdikunata, mandakoqkunata, i pwebluta, 14peykunata nerqan: —Key nunata apayámorqonki pwebluta perturbaqtanow; noqa qamkunapa nowpeykikunachow tapurnin, manam tarerqótsu key nunachow akusayanqeykipita ima delítutapis. 15I ni Eródispis, peyman apatsishqa kaptiy; i keymi key, manam imata wanunanpaqnow key nuna rurashqatsu. 16Kacharishaqmi, kastigarirnin.

17I wanarqan kacharinan jukta kada fyestachow. 18Llapan nunakunam juknowlla qapariyarqan, nishpa: —¡Jesusta wanutsi, i Barrabasta kachapuyámey!

19Keynam karselman churashqa karqan pwebluta búllatsishqa kaptin, i juk wanutsikiypita.

20Yapey parlapáyarqan Pilátu, Jesusta kacharita munar; 21peykunanam yapey qapariyarqan, nishpa: —¡Krusifikey, krusifikey!

22Peynam nerqan kima kutina: —¿Ima mana allitataq rurashqa key? Manam ima delítuta wanípaq meriseqta peychow tarerqótsu; kastigarirmi, kacharishaq.

23Peykunaqa jikutayarqan qaparirnin, krusifikashqa kananpaq mañakur. I peykunapa i apun saserdotikunapa qapariyanqan tsarakorqan.

Pilátu pweblupa muneyninta ruran

24Tseynam Pilátu sentensyarqan peykuna mañayashqanta rurayánanpaq; 25wanutsikoqta i pwebluchow búlla ruraq karselchow keykaqta kacharerqan, peypaq mañakushqa kayarqan, Jesustanam qoykorqan peykunapa muneyninkunaman.

Kalbaryuman náni

26Apeykayarninnam, tsariyarqan Sireynipita Simonta, chakrapita shamíkaqta, krusta churayarqan jananman Jesuspa qepanta apananpaq. 27I qatiyarqan atskaqkuna pweblupita, i waqaq warmikuna i peypaq llakikiy ruraqkuna. 28Peru Jesús, peykunaman tumeykur, nerqan: —Jerusalenpa wawankuna, ama waqayeytsu noqapaq, sinowqa waqayey kikikikunapaq i waweykikunapaq. 29Kaq keymi shamonqa junaqkuna i niyanqa: “Kushikiyoqmi mana wachakoqkuna i mana wawakoqkuna, mana chichisqa.” 30Tseynam qalleykuyanqa nirnin jirkakunata: “¡Jeqayámi janákunaman!” i taksha jirkakunata: “¡Tsapayámey!” 31Kaweykaq montichow keykunata rurayan, ¿tsakichownaqa, imataraq rurayanqa?

32Apayarqan peytawan ishkaqta, mana alli ruraqkunata, wanutsiyananpaq.

Jesuspa krusifikeynin

33Kalabera nishqan sityuman cháriyaptinna, krusifikáyarqan tseychow, i mana alli ruraqkunata, jukta deréchaman i jukninta itsoqman. 34I Jesús nerqan: —Teyta, perdoneykiy, manam musyayantsu rurayanqanta.

I rakinakuyarqan kikinkunapura bistídunkunata, swertita jitarnin.

35Nunakuna rikareykáyarqan; i mandakoqkunapis burlakuyarqan peypita, nirnin: —Jukkunata salbarqan, kikinpis salbakutsun, Dyospa akrashqan Kristu karqa.

36Soldadukunapis burlakuyarqan, witiykur qoyárqan binagrita, 37nirnin: —Judyukunapa Reynin karqa kikiki salbakiy.

38Karqanmi kruspa peqanchow qellqashqa juk letréru griegu letrakunawan, latinwan i ebrewuwan KEYMI KEY JUDYUKUNAPA REYNIN.

Jesús i mana alli ruraqkuna

39I juknin mana alli ruraqkunapita warkureykaq asharqan, nishpa: —Qam Kristu karqa, salbakiy kikiki i noqakunatapis.

40Juknin yaskirnam, piñaparqan, nishpa: —¿Ni Dyostapis qam mantsankitsu, tsey kondenasyonllachow keykar? 41Noqantsikqa, rasonpa, rasonpa kaqtam, jipantsik rureynintsik meriseqtam chaskintsik; keyqa manam ima mana allita rurashqatsu.

42I nerqan Jesusta: —Reyníkichow shamur yarpáramey noqata.

43Tseynam Jesús nerqan: —Tseqeypam neq kanantámi noqawan kanki parayisuchow.

Jesuspa waniynin

44Karqan chunka ishkey óranownam, i llapan patsa ampikurkorqan kima órakama. 45Inti ampikurkorqan, templupa bélun pullapeq rachikárerqan. 46Tseynam Jesús, sinchipa qaparir nerqan: Teyta makikikunamanmi churamú espiritúta.

I keyta nirirnam, wanurerqan.

47Tseynam senturyon susedishqanta rikárir, Dyosta glorifikarqan, nirnin: —¡Rasonpam key nuna kashqa justu!

48I llapan nunakuna keychow keykaqkuna key rikaráyashqanta, pasashqanta rikarnin; kutikuyarqan peychunkunata kutar. 49Peru llapan reqishqankuna, i Galileyapita qateqnin warmikuna, keykáyarqan karullachow key kosaskunata rikarnin.

Jesusta pampakuyan

50Arimateyapitam, juk ollqu José jutiyoq karqan, Judea pweblupita, keymi karqan konsilyupeq, alli nuna i allita ruraq. 51Peypis shuyarqanmi Dyospa reynunta, i mana meytikunaqtsu akwerdunkunaman ni peykunapa rureyninkunaman. 52Pilátuman eywarqan i mañarqan Jesuspa kwerpunta. 53I jorquriykur, juk sabanaswan piturerqan, churarqan qaqachow juk sepultúra kichasqaman, tseyman pitapis churayashqaraqtsu karqan. 54Alistakiy junaq karqan, i jamakiy junaq qallarinan keykaptin.

Jesuspa kawarimiynin

55Galileyapita peywan shayámushqa warmikuna, jina qatiyarqan, i rikáriyarqan sepultúrata, imanow kwerpun churashqa kanqanta. 56I kutirayámurnin, alistayarqan pukutaqkunata i ungwentukunata; i jamayarqan jamakiy junaqchow kamatsikiymannow.

Actualmente seleccionado:

LUKAS 23: QUEAN

Destacar

Copiar