LUKAS 18
18
Feswan i biwdawan tinkutsikiy
1Peykunatam nerqan Jesús juk tinkutsikiyta wiñeypa Dyos mañakiyta waney, i mana desmayanapaq, 2nirnin: “Juk pwebluchowmi karqan juk fes, ni Dyosta mantsaqtsu, ni nunata respetaqtsu. 3Karqanmi tsey markachow juk biwda, peyman shamoq; nirnin: ‘Chikimaqniypita justisyá ruramiy.’ 4I pey munarqantsu juk tyempuyaq; tseypitanam pey nerqan kikinchow: ‘Dyosta mana mantsarpis, ni nunata mana respetarpis, 5peru, key biwda fastidyamanqanreykur justisyan rureykushaq; amataq kadallayan shamur, pasyensáta ushakátsimunman.’ ”
6I Señor nerqan: “Wiyayey mana alli fes nishqanta. 7¿I Dyos manaku justisyan ruranqa akrashqankunapaq, peyman junaqpa i paqaspa qayakuyaptin? ¿Unanqatsuraq yaskirninkuna? 8Niyaqmi sasllam justisyata rurayáshunkiy. Peru Nunapa Tsurin shamurnin, ¿tarenqatsuraq kreyikiyta patsachow?”
Farisewwan i publikánuwan tinkutsikiy
9Wakinkuna kikinkunachow justunow markákoqta, i wakinkuna despresyaqta, nerqan key tinkutsikiytapis: 10“Ishkaq nunakunam witsáyarqan templuman Dyos mañakoq: Juk karqan farisew, i juknin publikánu. 11Farisew kaq, sheykar, Dyosta mañakoq kikinchow keynow: ‘Dyos grasyastam qoq wakin nunakunanow mana kanqáta, suwakunanowtsu, mana alli nunakunanowtsu, olteronkunanowtsu, ni key publikánunowtsu; 12ayuná ishkey kutim semanachow, dyesmútam qó llapan gananqápita.’ 13Publikánunam, karuchow keykar, manam nawinllatapis syeluman rikarkiyta munarqantsu, sinowqa peychunta kutaq, nishpa: ‘Dyos, ankupeykamey noqa, jutsayoqta.’ 14Niyaqmi keymi eywarqan wayinta justifikashqa jukninpita, meyqanpis alabakoqqa, úshutsishqam kanqa; i úshukoqqa alabashqam kanqa.”
Jesús wamrakunata bendisin
15Peyman apayámoq wamrakunata yatananpaq; disípulunkuna tseyta rikarna, piñapáyarqan. 16Jesusnam, qayeykuyarnin, nerqan: “Jaqiyey wamrakunata noqaman shayámunanpaq, ama jarkáyeytsu; peykunapam Dyospa reynunqa. 17Tseqeypam niyaq, Dyospa reynunta juk wamranow mana chaskeqqa, peyman manam yeykonqatsu.”
Jesús i kapoqyoq jobin
18Juk prinsipal nunam taporqan, nirnin: —Alli Mayestru, ¿imataraq rurashaq wiñey kaweyta chaskinápaq?
19Jesusnam nerqan: —¿Imanirtaq nimankiy “alli”? Manam pí alli kantsu, sinowqa Dyosllam. 20Musyankim kamatsikiykunata: Ama olteron keyta rureytsu; ama wanutsikiytsu; ama suwakiytsu; ama ulikurkur parleytsu, teyteykita i mameykita onrey.
21Peynam nerqan: —Key llapantam rurarqó jobin kanqápita.
22Jesús, keyta wiyarirna, nerqan: —Jukran pishipushunkiy: Rantikiy llapan kapushoqnikita, i qoykiy waktsakunata, i syeluchowmi kapushunkiy tesoriyki; i shamiy, qatimey.
23Tseynam pey, keyta wiyarir, allápa llakikurkorqan, allápa kapoqyoq karnin.
24Jesús allápa llakikurkushqanta rikeykurnam, nerqan: —¡Imaláya sasam Dyospa reynunman yeykuyanqa kapoqninkuna katseq! 25Fásilllam juk kamellu pasarinman juk awjapa uchkunpa, Dyospa reynunman juk kapoqyoq yeykunanpita.
26Keyta wiyaqkunanam niyarqan: —¿Piraq, salbashqa keyta pwedenqa?
27Peynam nerqan: —Nunakunapaq mana pwedinan kaqmi, Dyospaqqa fasilllam.
28Tseynam Pedru nerqan: —Kaq key, noqakuna jaqiyarqó kapoqniykunata i qatiyarqoq.
29I peynam nerqan: —Tseqeypam niyaq, manam pí kantsu wayinta jaqireq, ó teytankunata, ó wawqinkunata, ó warminta, ó tsurinkunata, Dyospa reynunreykur, 30chaskenqa masran key tyempuchow, i shamoq sigluchow wiñey kaweyta.
Jesús willakun waniyninta i kawarimiyninta
31Chunka ishkeykunata rakirir, Jesús nerqan: —Kaq keymi witsantsik Jerusalenta, i profetakunapa llapan qellqashqankuna Nunapa Tsurinpaq tinkunanpaq. 32Entregashqam kanqa gentilkunaman, i burlakushqam kanqa, i ultrajashqa, i toqapushqa. 33Tseypita astariyarna, wanutsiyanqa; i kima junaqtana kawarimonqa.
34Peru peykuna ni imata káyiyarqantsu keykunapita, i key parleykuna karqan pakashqa, i káyiyarqantsu ima niyashqanta.
Jesús kachakátsin juk wiskuta Jerikóchow
35Susederqan Jesús Jerikóta yeykureykaptinna, juk wisku teykarqan náni kuchunchow llimushnakurnin; 36atska nunakuna pasaqta wiyarir, tapukorqan ima kashqanta. 37I niyarqan Jesús Nasarenu pasareykanqanta. 38Tseynam qaparerqan, nirnin: —¡Jesús, Dabidpa tsurin, ankupákiyniki katsun noqapaq!
39I punta eywaqkuna piñapáyarqan upallákunanpaq; peru pey qaparerqan masraq: —¡Dabidpa tsurin, ankupákiyniki katsun noqapaq!
40Tseynam Jesús, sharárir, mandarqan nowpanman apayánanpaq; cháriptinna, taporqan,
41nishpa: —¿Ima ruranaqtataq munankiy?
I peynam nerqan: —Señor, rikeytam muná.
42Jesusnam nerqan: —Chaskiy, kreyikiynikim salbashorqonki.
43Tseyllana rikárerqan, i qaterqan, Dyosta glorifikarnin; i llapan pweblupis, tseyta rikárir, Dyosta alabayarqan.
Actualmente seleccionado:
LUKAS 18: QUEAN
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Quechua Ancash New Testament © Peruvian Bible Society, 1992.
