Matiu 3

1Va ŋala po Jɔɔn Sokateerɔwa a yaa jam a mooli Judia Gɔnni po 2a weeni ayen, <<Ni meena basi ni wabaataŋa abe ni ge va Wen suiku, dii nyiŋla, Wen naamu a moata kama.>> 3Wen biisiteerɔwa waai ate ba jam a wi ayen Azaya la, a jam ŋmarisi Jɔɔn wie kama a nyo Wen gbaŋka po dipo ayen, <<Nuru ale bo gɔnni po a mooli ayen, <Ni gomsi Naawen suiku abe ni yuarisi ku.> >> (Azaya 40:3)

4Ba jam pai ka laalaakomi kɔbta a nye Jɔɔn gattaŋa, wa jam pai ka chiak gbain mɛ a bobi wa chiaka. Wa jam a ŋɔbi ka tintue ale a dɛ siita me.#3:4 Zakaria 13:4; 2 Nalima 1:8; Kaabka 11:22 5Nuruba yegayega yaa jam nyini Jerusalem tɛŋka ale Judia tɛŋsaŋa meena ale tɛŋ sii meena ale jam za gilim beli dii ate ba a wi ayen Jodan la nɔi la, a cheŋ Jɔɔn jigi ayen ba wom wa sinsaŋŋa. 6Ba ale wom wa sinsaŋŋa la, ba yaa tɔk ba tuimbaataŋa meena a sak Naawen alege ate Jɔɔn yaa te ba soka Jodan benni po.

7Dai yeŋ ate, Jɔɔn yaa nya Juuma baai ate ba jam a wi ayen Farisiiba ale baai mɛ ate ba jam a wi ba ayen Sajusiiba la yegayega ale ba cheena wa jigi ayen wa te ba soka. Wa yaa weeni ba ayen, <<Ni a nye ase ka waapiisa la. Ka wana ale weeni ni ayen ni baga a chali a nyini suipuurum buui ale cheen la po? 8Ni be a tom tuim ŋaai ale ŋa sak ayen ni basi ni tuimbaataŋa tomka kama la, 9abe ni kan a weeni nidek ayen, <Abrayam ka tama ko.> Ni basi ate m weeni a sak ni ayen Wen baga pai tintanaŋa de kama a nye ate ŋa a chim Abrayam ŋaaŋbisa. 10Ni nya liaka abe gomsi magsi ayen ka che tiimu kinni naŋsaŋa kama. Ti sii meena mɛ ale kan a yɔni yɔn maŋsa la, ka le gebi si kama a lɔnsi tɛŋ, ate ba pai si a yuk basi bolim po.>>

11<<Mi, Jɔɔn, pai ka nyiam a te ni soka ate ku a sak nuruba ayen ni basi ni wabaataŋa kama. Nuru wanyi ale bo mi ŋaaŋ cheena. Wa le jam pai Wen Chiika ale bolim a te ni soka. Wala pagra kama a gaam mi. Mi pɔsima kama ale m nin ji wa nuensaŋa. 12Wala le pai ka doalaadi a fɔbi wa zaaŋa. Wa dan fɔbi nueri, wa yaa le yali ŋa kama abe wa pai zabeeŋa a nyo wa bunni po abe wa yaa ju vottaŋa ale bolim buui ale kaa a kpimsi la.>>

13Va ŋala po Yeezu a yaa basi Galili ale ge cheŋ Jodan benni po ayen Jɔɔn te wa soka nyiamu po. 14Jɔɔn ale ga nya Yeezu la, wa yaa zɛri ayen wa kan te wa soka ale ge weeni wa ayen, <<Ku an magsi ayen fi jam mi jigi ate mi a te fu soka, alege ku a magsi kama ayen fi a te mi soka.>>

15Yeezu a yaa weeni wa ayen, <<Fi te mi soka, dii nyiŋla ku ka Wen dek yaalika ayen fi nye dila.>> Jɔɔn a yaa siak.

16Jɔɔn ale te wa soka a nueri ate Yeezu a yaa nyini nyiamu suŋsuŋ a jueli la, wa yaa deri nya wenŋmazuk ale ku lagri ate wa nya Wen Chiika a siŋ jam kali wa zuk ase nangbaŋ la. 17Nuru baai ale jam za dula jigini la, a yaa wom lueluk ate ku nyini wenŋmazukku po a weeni ayen, <<Ka mi Nidoabili dii ate mi a yaali la. M sui a peenti ale wa ka nna yegayega.>>

Actualmente seleccionado:

Matiu 3: BWU

Destacar

Copiar