Matiu 2

1Ba jam biak Yeezu ka Betiliyem#2:1 Nya fotowa, Maika 5:2. tɛŋka ale bo Judia po la. Va ŋala po, naab waai ale jam soa tɛŋ kala meena a nya la yuei jam ale Ayerod. Dai yeŋ po ate nuru baai ale jam seba chiŋmarisa kie la, yaa jam nyini kori geŋ a jam Jerusalem a bek ayen, 2<<Ka be ate ba biak biik kaai le ka jam chim Juuma Naawa la? Tama nya ka wa chiŋmarika kori geŋ ate ti yaa va ka a cheena ayen ti zuli wa.>>

3Naawa Ayerod ale wom ale nichamma a bek biika wie la, ku yaa deri a daani wa nna yegayega. Ku jam maari a daani Jerusalem demma meena kama. 4Ayerod yaa wi kaabteerɔ kpaŋŋa ale Sinsak sagrɔma meena ate ba jam jigi yeŋ ate wa bek ba ayen, <<Ka bɛ ate ba le biak Kirisitawa?>> 5Ba yaa weeni wa ayen, <<Ka Wen biisiteerɔwa ale jam ŋmarisi dila po ayen ba le biak wa ka Betiliyem tɛŋka ale bo Judia po la ayen, 6<Ba le biak niŋdeerɔ Betiliyem tɛŋka po, ate wa a nya m nuruma Juuma zuk. Ka dila ale soa ate Betiliyem chim tɛŋ kpieŋ a gaam tɛŋ sii meena ale bo Judia po la.> >> (Maika 5:2)

7Ayerod yaa wi nichamma badek ba nyiini a bek diipo ate ba nya chiŋmarika la. 8Wa yaa tom ba Betiliyem ayen, <<Ni ga kpesi gisi nya biika. Ni dan nya wa, ni weeni mu ate mi mɛ a ga te wa zula.>>

9Ba le wom naawa la ŋaaŋnyiŋ, ba yaa cheŋ. Ba le jam bo suiku po la, ba yaa ŋman nya chiŋmarik kaai ale jam nyini kori geŋ la, ate ka dɛ ba niŋ, a ta ba ga zaani juijui ate biika a jam boro la zuk. 10Ba le ga nya chiŋmarika ale ka za dula jigini la, ba sue yaa deri peenti nna yegayega. 11Ba yaa ga jo yenni po a nya biika ale wa mawa Mɛɛri ate ba yaa kpi duna dula jigini a te wa zula, ale ge lak ba fottaŋa a yeeri ba tiirimu a te wa. Ba jam ta ka ligmɔniŋ ale frankinsense#2:11 Frankinsense ate ku a nye ase tiib kuŋ la. ale mir.#2:11 Mir ale kpa buui nyum ale masa la. #2:11 Nya fotowa, Yaalika Yiila 3:6. 12Wen yaa jam kaam ba gɔdaasima po ayen ba kan ŋman cheŋ naawa Ayerod jigiya. Ba yaa va suik yoŋ a taam kuli ba dek tɛŋka.

13Ba le cheŋ ga nueri la, Josefi yaa ŋman nya Naawen maarɔ gɔdaasima po, ate wa weeni Josefi ayen, <<Yiti a ta Biika ale ka mawa a cheŋ Ejipiti. Ni bo dula ate m weeni diipo ale magsi ni ŋmani la, diila Ayerod a gisi Biika ayen wa ko kama.>>

14Josefi yaa yiti yok diipo a ta Biika ale ka mawa a cheŋ Ejipiti. 15Ba jam bo ka dula jigini a ta ga paari diipo ate Ayerod a kpi la. Ba jam nye dila kama, ayen Naawen biisiteerɔwa ale jam ŋmarisi diila a chim wensie. Wa jam ŋmarisi ayen, <<M wi M Nidoabinni kama a ta nyini Ejipiti po a nyini.>> (Yosea 11:1)

16Ayerod ale miŋi ayen nichamma paasi wa kama la, wa sui yaa jam puuri nna yegayega, ate wa yaa tom ba ayen ba nyini cheŋ Betiliyem tɛŋka ale tɛŋ sii meena ale gilim ka la a yik biik sii meena ale ka nidoabilisa an gaam bena ŋaye la a ko. Wa lueri bisila kama dii nyiŋla wa wom nichamma jigi kama ayen ba ale piilim nya chiŋmari ka la ku ka bena ŋaye. 17Wen biisiteerɔwa Jeremaya ale jam weeni diila, a yaa chim wensie ayen, 18<<Nuruba ale wom kaarik ale woolika Arama tɛŋka po, Arekel ale a kum wa bisaŋa nyiŋ. Ba meena a kpi kama. Wa kan siak wa suinni a yɔgi.>> (Jeremaya 31:15)

19Ayerod ale jam kpi la, Naawen maarɔ yaa cheŋ Josefi jigi gɔdaasima po Ejipiti tɛŋka ayen, 20<<Yiti pai biika ale ka mawa a ta ba a ŋman pilim cheŋ Izirali. Baai ale a yaali ayen ba ko biika la a kpi kama.>>

21Dila wa yaa yiti a pai Biika ale wa mawa a ta cheŋ Izirali tɛŋka. 22Alege wa le wom ayen Akilayasi a jam tagri ka wa kowa Ayerod zuk a nya Judia la, wa yaa jam a chali yɔgsum ale dula chelim. Gɔdaasimaŋa po ate wa wom kaamka la wa yaa basi ale cheŋ Galili, 23a ga bo tɛŋ ate ba a wi ayen Nazaret la. Ate biisiteerɔma ale weeni diila a chim wensie ayen, <<Ba le wi wa ayen ka Nazaret denɔ.>>

Actualmente seleccionado:

Matiu 2: BWU

Destacar

Copiar