Эвел 14

Ибрамди Лут азад апӀуб

1Гьадму вахтна Шинариъ – Амрафел, Элласариъ – Ариох, Эламдиъ – Кедорлаомер, Гоимдиъ – Тидал паччгьар вуйи. 2Му паччгьар Содомдин паччагь Берихъди, Гоморрайин паччагь Биршайихъди, Адмайин паччагь Шинавдихъди, Цевоимдин паччагь Шевемерихъди ва Белин (гьамус мушваз Цуар кӀура) паччагьдихъди дявдиз удучӀвуру. 3Му хьур паччагь Сиддим дерейиъ (гьамус Кьилан гьюл айишваъ) сабишвʼина уч шулу. 4ЙицӀикьюд йисан мурар Кедорлаомерин зулмикк ккади гъахьну, хъа йицӀишубудпи йисан дурар дугъаз къаршуди гъудужвну. 5ЙицӀиюкьудпи йисан Кедорлаомерина дугъан терефкар паччгьари Аштерот-Карнаимдиъ – рефаимар, Гамдиъ – зузимар, Шав-Кириатаимдиъ – эмимар, 6чюлин гъирагъдихъ Ил-Паран рякъюхъ хъайи чпин дагъ Сеириъ – хорреяр дагъитмиш апӀуру. 7Гьадушвʼан дурар Эн-Мишпат (гьамус душваз Кадеш кӀура) терефназди гъюру ва амалекарин вари жилар ва Хацацон-Тамариъ яшамиш шули гъахьи амореярин жилар ккидирчуру. 8Содомдин паччагь, Гоморрайин паччагь, Адмайин паччагь, Цевоимдин паччагь, Белайин (гьамус Цуар) паччагь мурариз къаршуди удучӀвуру. Сиддим дерейиъ дурар 9Эламдин паччагь Кедорлаомериз, Гоимдин паччагь Тидализ, Шинарин паччагь Амрафелиз, Элласарин паччагь Ариохдиз къаршуди дявдиз удучӀвуру. Юкьур паччагь – хьуриз. 10Сиддим дерейиъ къир адабцӀру гизаф ичӀар айи. Хъа Содомдинна Гоморрайин паччгьарин гьерграйи эскрар гьадму ичӀаризди ахьру, хъа гъуздар дагълариз гьергру. 11Гъалиб гъахьидари Содомдинна Гоморрайин вари мал-мулк ва сурсат гъадабгъну гъягъюру. 12Дурар, Ибрамдин чвуччвун бай, Содомдиъ яшамиш шулайи Лутра дидисну, дугъан мал-мулкра тӀараш дапӀну, гъягъюру.

13Дявдиъ сагъди гъузу сар кас, Мамре кӀуру аморей жвуван мяхъярин багахь яшамиш шулайи жугьуд Ибрамдихьна гъюру. Мамре жвувахъ Эшколна Анер кӀуру гъардшар хъайи. Ибрамдина дурари чиб-чпиз кюмекназ гъюру йикьрар дийитӀнайи. 14Чан багахьлу дидисна кӀури хабар гъеебхьу Ибрам, дяви гъабхуз шлу шубудваржна йицӀимиржир кас хъади, душмнарихъ хъергру. Му ксар Ибрамдин мулкариин бабкан гъахьидар ва дугъахъ лихурайидар вуйи. Дан кӀурушван багахь, 15йишвну, Ибрам дурариин алархьуру, кьялаъ тӀаъру ва Дамаскдихьан кафарийиъ айи Ховайихьнакьан хъергру. 16Ибрамди душмнарихьан Лут, дугъан мал-мулк, дишагьлийир, йисир гъапӀдар ва тӀараш гъапӀуб вари тадабгъуру.

17Кедорлаомериин ва дугъахъди хъайи паччгьариин гъалиб духьну, Ибрам кьяляхъ хътакурайиган, Содомдин паччагь, думу къаршуламиш апӀури, Шаве дерейиз (гьамус Паччагьдин дере) улихьна удучӀвуру.

18Салим шагьрин паччагь Мелхиседек Ибрамдин улихьна чяхирна уьл хьади гъюру. Думу Первердигар Заанурин гъуллугъчи вуйи. 19Дугъу Ибрамдиз РАББИЙИКАН берекет хьуб ккун апӀуру ва кӀуру:

– Гъит Первердигар Заанури, жилна зав халкь ГъапӀури, Ибрам ужувлакк ккаъри! 20Яв хилиз яв душмнар туву Первердигар Заануриз шюкюр ибшри!

Ибрамди Мелхиседекдиз чав тадабгъу мутмуйикан йицӀубпи пай тувнийи.

21Содомдин паччагьди Ибрамдиз кӀуру:

– Йиз адмийир кьяляхъ ча, хъа мутму увуз гъибт.

22Ибрамди паччагьдиз гъапи:

– Узу РАББИ вуйи Первердигар Заанурихьна, завна жил халкь ГъапӀурихьна, йиз хил за дапӀну ху апӀураза: 23яв мутмуйикан узу мурсулкьан, шаламарин гъахмакьан, гъадабгъидарза. Хъа уву узуз макӀан: «Ибрам девлетлу гъапӀур узу вуза», кӀури. 24Узуз йиз эскрари гъипӀубна узухъди гъафи Анеризна, Эшколизна, Мамрейиз рубкьру пайтӀан, фукӀара лазим дарзуз.

Actualmente seleccionado:

Эвел 14: ТабГК

Destacar

Copiar