Эвел 15

Заанури Ибрамдихъди йикьрар йитӀуб

1Гьаму гьядисйирин кьяляхъ Ибрамдиз аьжайиб улупбар шулу ва дугъаз РАББИЙИН гафар ерхьуру:

– ГучӀ мапӀан, Ибрам. Узу уву уьрхру Гъалхан вуза. Увуз зурба пешкеш хьибдивуз.

2Ибрамди кӀуру:

– Йиз Аьхюр, я РАББИ! Гьаз ву йиз Яв багъишар, эгер узухъ велед хъадарш? Йиз хал Дамаскдиан вуйи Элезерин хилиъ абхъра. 3Уву узуз насил тутруви, магьа, йиз хулаъ лихурайи гъараваш йиз ирсчи шула.

4Хъа дугъаз гьамци кӀури РАББИЙИН гаф шулу:

– Ваъ, думу яв тухум давам апӀрур хьидар, увкан гъахьир хьиди яв ирсчи.

5РАББИЙИ Ибрам чӀатинди адаъну кӀуру:

– Завуз лиг, хядар кудух, эгер увхьан дурар ктухуз шулуш! – Хъа давам апӀуру. – Гьадму хядаркьан увухъ наслар хьиди!

6Ибрам РАББИЙИХЪ хъугъру, ва гьадму хъугъʼвал РАББИЙИ дугъан гьякьлувал вуди гьисаб апӀуру.

7Хъа РАББИЙИ дугъаз кӀуру:

– Уву Халдея уьлкейин Ур шагьриан гьаму жил увузди тувуз адау РАББИ Узу вуза.

8Ибрамди гъапи:

– Йиз Аьхюр, я РАББИ! Думу жил йизуб шлуб узуз фици аьгъю хьибди?

9РАББИЙИ дугъаз гъапи:

– Узухьна шубуд йисаъ айи личӀна, шубуд йисаъ айи цӀигьна, шубуд йисаъ айи якъна, къукъу луфна жигьил луф хьади гъач.

10Ибрамди духну дурар вари кьюб йишваз пай апӀуру ва думу паяр чиб-чпиз гъаншарди дивру. Амма дугъу ничхрар кьюб йишваз пай гъапӀундайи. 11Пай дапӀну дивнайи йиккариин вягьши ничхрар алархьуйи, хъа Ибрамди дурар ултӀурккуйи.

12Ригъ алабхъурайи вахтна Ибрамдиин ижми нивкӀ алабхъуру. Сабпну жилиина ижми мучӀушин абхъру ва Ибрам зурба гучӀʼвалиъ ахъру. 13РАББИЙИ Ибрамдиз кӀуру:

– Аьгъю йибхьки, яв наслар жара жилиин юкьудварж йисан лукӀʼвалиъна гъагъишнаъ хьиди. 14Аммаки, дурар аьзабариъ иту халкьдиз Узу жаза адабтӀидиза, хъа гьадмуган дурар душвʼан девлетлу духьну удучӀвиди. 15Хъа уву яв абйирихьна мясляаьтниинди гъягъидива – лап кьаби гъахьиган накьвдик кивдиву. 16Увлантина вуйи юкьубпи наслин девриъ яв наслар мина кьяляхъ хътакиди, фицики амореярин гуннагь сабан чан кьадарнахъна дуфнадар.

17Ригъ алабхъну мучӀу гъабхьиган, дернин кумна цӀа дуфну, кьюб швур гьацӀ дапӀну дивнайи йиккарин арайиантина гъябгъюру. 18Гьадму йигъан РАББИЙИ Ибрамдихъди йикьрар йитӀуру ва кӀуру:

– Узу египтарин нирхъан гъадабгъуб тап машгьур Ефратдихъна гъягъяйизкьан вуйи: 19кенеярин, кенезеярин, кедмонеярин, 20хеттарин, перизеярин, рефаимарин, 21амореярин, ханаанеярин, гиргашеярин ва евусеярин – вари жилар увлантина вуйидариз тувдиза.

Actualmente seleccionado:

Эвел 15: ТабГК

Destacar

Copiar