Luka 4

Ozimizi ye Efeke Yesu edi

1Gi Yesu ádɔ ní Yordan onipe lo su i, Ɔfuɛfuɛ Dradra lɔ kigagla ɛ kize ní yɛ aʋa, Lɛ ɛgbani yɛ ɛtsinɔ Ɔyaya klɔ ɛ, 2níklɔ Ozimizi ye efeke ye edi ewe avi tene nyɔŋ. Lipoe lɛklɔ petee ɔŋa kididɔ ɔ, lɛ loso gi ewe la ɛza ɛ, kuʋɛ kwiku ye.

3Lɛ Ozimizi ye asi yɛ si i, “Xe Aya Yebi wonu i, ki tɔ likla lɛ ya lidzì lìklã.”

4Pɔ̀ Yesu ebu le onu si, “Aya liboe le lipani si, ‘Aní kiŋaŋa su ko ɔnɔ gbagbe aaze ligbã́ nɛ ɛ.’ ”

5Lɛ Ozimizi ye atsini yɛ ní ɔkɔ gyɔgyɔ ɔtɔ, lɛ ebu kelea mɛ baʋaŋa ʋa petee abasi Yesu ni lipoe kpekpemi itɔ mɛ ɛ. 6Lɛ asi yɛ si, “maakɔ kigaglaɛ ni exo a la petee ki wɔ, bɛkɔ bɛ petee kpɛ awla ɛki mɛ, lɛ makɔ bɛ ki ɔniliɛ gi mapɛ ɛ. 7Xegi wɔasumu me e, bɛ petee biadzi wɔ binɛ.”

8Yesu ebu le onu si, “Aya liboe le lipani si, ‘Aya gi onu Wɔka ɛ, Yɛ tete ko wɔasumu lɛ Yɛ lixwɛ ko wɔawa a.’ ”

9Lɛ Ozimizi ye agbani Yesu atsinɔ ní Yerusalem Lisɔligba lɛ ɔgyɔgyɔ klɔ. Lɛ asi yɛ si, “Xegi Aya Yebi wonu i, lɛ kɔ yɔ lixu le dɔni ya tɔ zɛdɔ kesea. 10Lɛ ese linu si Aya liboe le lipani si,

“ ‘Aya aakpɛ ɔsã aki yɛ baxwɛdzɛ ba

gi biadi wɔ aʋa mumɔ ɔ.’

11Lipani fɛ si, ‘Biafeke wo ni ba awla la gi

wɔtratù kikliʋi i.’ ”

12Pɔ̀ Yesu ebu lɛ onu dzɛ si, “Aya liboe le ke lipani dzɛ si, ‘Wukífeke wɔ Ɔkaɛ gi yɛ onu wɔ Aya edi i!’ ”

13Agi Ozimizi ye efeke Yesu edi gani kude kakaa onu xe ɔ́mɔ yɛ kude e, ayurɔ yɛ fukɔ.

Yesu ekpese yɛ axwɛ na ní Galilea

14Lɛ Yesu edzì atrɛ ní Galilea, lɛ Ɔfuɛfuɛ Dradra lɔ kigaglaɛ kize ní yɛ aʋa a. Banima benu yɛ onu ní kusio klɔ petee. 15Abasɛ bidɔ ní Yudanɛ ma itsaklɔ, gi banima petee bɛkpɔ̀ yɛ ɛ.

Bekyi kede ekpɛ Yesu ní Nazaret

16Lɛ Yesu atrɛ ní Nazaret niklɔ gi bɛgani yɛ ɛ. Lɛ ní Sabat liwe le aʋa ɛ, atrɛ ní Yudanɛ ma ɔtsaklɔ ŋwisi kiliɛ gi izɛbitɛ kinɛ ɛ. Ayɔ si yikla Aya yɛ Liboe le. 17Lɛ bɛkɔ oboedoplɛ Yesaya yɛ keplekpa ɛki yɛ ɛ. Gi adra ka ɛ, keboekpea lia klɔ gi aklà ɛ kɛpani si:

18“Ɔkaɛ yɛ Ɔfuɛfuɛ nɔ ɔtini mɛ aʋa,

lɛ ese linu si akya mɛ

si mikɔ liboe gbã nɛ tsini bepiplinete ba.

Akpɛ mɛ si, mible banama gi balɛ ní kunyánya mɛ ɛ,

tɔ kuŋupoo fɛ kumɔ,

tɔ banama gi bemi kpɛ kese e, fɛ bamɔ obufuɛkɔ.

19Atɔ miki kelea petee ketè si, lipoe le lina

gi Aya aabu yɛ banima ɛ.”

20Yesu ada keplekpaa lɛ edzini ka aki ɔnɔpɔnɔ ɛ, xe eze kesea ɛ. Banama petee gi beze ní ɔtsaklɔ ɛ, bezeedi ye 21lɛ asi ba si, “Liboe lɛ klɔ gi makla a xe mlenu i, liba lɛ mɛ omono.”

22Yɛ liboe le liku ba petee aŋu, lɛ yɛ kinemi ye kɛ kubebeo, kwibitɛ ba yaa. Niteme si beʋi isu ya si, “Aní yɛ onu Yosef yebinyime lo o?”

23Yesu asi ba si: Maka lɛ aʋa si mlɛtrabu abee liɛ ɛki mɛ si, “Ɔwabitɛɛ, bitɛ kuwa ki isu” mlɛtrapani si mɛ fɛ si, ‘eboa la klɔ gi mlenu si bɛbitɛ ní Kapernaum i, mibitɛ la ní mɛ kepea ní ya fɛ.’

24Pɔ̀ mɛɛsi mlɔ si, “Oboedoplɛ tɔtɔ liboe liʋiku aŋu ní yɛ ɔtutɔ yɛ kepea.” 25Atrɛ lɛ aʋa si, “Mlata kutu: anukwarɛ linu si, lipoɛ lɛ klɔ gi dzeni ɔ́dɔ ɔ ní Israel kesea aʋa agɔ tata nì kapɛ ní Eliya lizepoe le e, xe kuʋɛ gagla atɔ kwidɔ ní kesea mɛ ɛ, badzɛ glegle gi ba benye ba betse e, beze ni Israel. 26Pɔ̀ Aya ɔ́kpɛ Eliya ní ɔtɔtɔ kɔ ɔ, sani ɔdzɛ ɔtɔ gi yenye etse ní Zarefat ní Sidon kesea mɛ kɔ ɔ. 27Lɛ kunya kyikyi yɔ kwize ní banɔ glegle su ní Israel ní Oboedoplɛɛ Elisa lizepoe le e. Pɔ̀ Aya ɔ́yɔni ɔtɔtɔ sani Naaman, Siria ɔnɛ ɛ.”

28Banama petee gi beze ní Yudanɛ ma ɔtsaklɔ ɔ, xe benu yɛ eboe la ɛ, isu iyeʋi ba. 29Bɛyɔ lɛ behe Yesu idono ní ɔma nɔ mɛ ɛtsini ketokpaa aʋa ɛ. Ketokpaa lia klɔ aʋa bɛtsa ba ɔma nɔ. Nya bɛpɛ si betutru Yesu ikpɛ ní kupɛɔ mɛ xe e. 30Pɔ̀ Yesu aga linɔkpi le kusi i, lɛ asɛ ní ba su i.

Yesu akpikpini Ɔfuɛfuɛ zimizi idono ní Onyime ɔtɔ mɛ

31Lɛ Yesu atrɛ ní Kapernaum ɔma ɔtɔ ní Galilea kesea mɛ, lɛ abasɛ banima bidɔ ní Sabat liwe le aʋa ɛ. 32Banima inugu itse ní yɛ bidɔbasɛbasɛ ʋɛ su, lɛ ese linu si kigagla kize ní yɛ bidɔbasɛbasɛ ʋɛ mɛ.

33Onyime ɔtɔ eze ní ɔtsaklɔ gi Ɔfuɛfuɛ zimizi eze ní yɛ aʋa a. Akpɛ ozi tatata si, 34“Ei! liboe woli wɔɛpɛ ní blɔ su u? Wɔ Yesu, Nazaret ɔnɛɛ, Blɔ ɔkyurɔ kɔ́ wɔba na a? Mete ɔniliɛ gi yɛ wo nu i. Wɔ wo nu Aya yɛ Ɔxwɛdzɛ Dradra yɛ.”

35Yesu akpɛ ozi ní Ɔfuɛfuɛ zimizi no aʋa si, “Gɔ tsriɖi! Do za ní onyimee mɛ!” Ɔfuɛfuɛ zimizi no ɛŋwia onyimee plɛ kesea ní banima aŋu mɛ pɔ̀ ɔ́kpɛ yɛ libi i, lɛ edo ní yɛ mɛ ɛ.

36Banima petee inugu itse lɛ bekyi xe beʋi ba ahanuglɔ ba si, “E! Eboe woli lu la ya a? Amɔ kudeonu ni kigagla gi ɛɛkɔ ɛpani iiki ifuɛfuɛ zimizi ne lɛ iido e.” 37Niteme si Yesu yɛ linyi ne liyii klanɔ ní kusio klɔ petee.

Yesu ayɔ ni banyanya glegle

38Gi Yesu asɛ ní Ɔtsaklɔ ɛ, atrɛ ní Simon kepea mɛ. Kuwe gagla kutɔ kwivu Simon yɛ nadze; nite si bɛki Yesu kutete ní yɛ su. 39Adzɛ alɛɛ ní yɛ ɔtɔsi lɔ su lɛ akpɛ ɔsã aki kunyaa si kudo ní yɛ mɛ. Kuweo kwido ní yɛ mɛ nite si ayɔ kyɔŋ lɛ edi ba aʋa ɛ.

40Gi liwo le liku i, banɔ baklɔ petee gi ba benete ba bɛzɛnyà bànyà ede ede na ɛ, bɛgbani banyanyaa ba petee manɔ ní Yesu klɔ. Yesu atrɔ awla ni ba mɛ ɔkakaa aʋa lɛ ayɔ ni ba ɛ. 41Ifuɛfuɛ zimizi ne gi izɛkpɛ ozi tatata si “wɔ wonu Aya Yebi ye” kyɛ ido ní banɔ glegle me gi Yesu akpɛ ɔsã aki lɛ si ikípani yɛ su i. Lɛ ese linu si ite si yɛ onu Kristo ye.

Yesu edo Liboe Gbã nɛ aklanɔ ni Yudanɛ ma Itsaklɔ

42Keletitia livlɛ lɛ ɛ, Yesu edo ní ɔma nɔ mɛ, lɛ atrɛ ni ɔkutɔ gi ebu lidze e. Banima bɛzɛpɛ́ yɛ klanɔ. Lɛ gi bɛmɔ yɛ ɛ, bekeni edi si betsí kudeo ɛki yɛ kusɛ̀sɛ. 43Pɔ̀ asi ba si, “Lilɛ si mipani Aya yɛ Kaʋaŋaa su Liboe Gbã nɛ klanɔ ní ima dzedze le kyɛ mɛ. Lixwɛ lɛ klɔ loso Aya akpɛ mɛ.”

44Lɛ loso Yesu apani Liboe Gbã nɛ aklanɔ ní Yudanɛ ma itsaklɔ petee ní kesea mɛ ɛ.

Actualmente seleccionado:

Luka 4: avn

Destacar

Copiar