Гелип чыкыш 47

47‑нҗи бап

1-2Шейдип, Юсуп доганларындан бәшисини алып, Гошен велаятындан гайтды ве фараоның янына гелип, оңа: «Какам хем доганларым өзлериниң машгаласы, овнуклы-ирили маллары ве әхли гош-голамлары билен Кенгандан гелдилер. Олар хәзир Гошенде» дийди. Онсоң Юсуп доганларыны фараон билен таныш этди. 3Фараон олардан: «Кәриңиз нәме?» дийип сорады. Олар фараона: «Биз гулларың ата-бабаларымыз ялы чопандырыс» дийип җогап бердилер. 4Олар фараона: «Ёвуз ачлык зерарлы Кенганда доварларымыз үчин өри галмансоң, биз Мүсүрде гелмишек болуп яшамага гелдик. Шоңа гөрә-де, сиз өз гулларыңыза Гошен велаятында месген тутмага ыгтыяр эдиң» дийдилер.

5Фараон Юсуба шейле дийди: «Какаңдыр доганларың сениң яныңа гелипдирлер. 6Мүсүриң чар тарапы сениң үчин ачыкдыр. Олары юрдуң иң оңат еринде ерлешдир. Гой, олар Гошен велаятында месген тутсунлар. Эгер оларың арасында укыплылары бар болса, олара мениң малларыма серетдир». 7Соңра Юсуп какасыны фараоның хузурына гетирип, онуң билен таныш этди. Якуп фараона пата берди. 8Фараон Якупдан: «Нәче яшыңда?» дийип сорады. 9Якуп: «Мен гөчүп-гонуп йүз отуз йыл яшадым. Дурмушым гысга хем агыр болды. Мениң өмрүм гөчүп-гонуп яшан ата-бабаларымыңкы ялы узак болмады» дийди. 10Якуп фараона ене-де пата берип, онуң янындан гайтды. 11Юсуп какасыдыр доганларыны Мүсүрде ерлешдирди. Юсуп фараоның өзүне буйрушы ялы эдип, олара Мүсүриң иң говы ери болан Рагмесес этрабындан мүлк берди. 12Ол какасыны, доганларыны ве какасының әхли хоҗалыгыны – иң көрпесине ченли азык билен үпҗүн этди.

Ачлык ёвузлашяр

13Ачлык җуда ёвузлашып, хич ерде иймит ёкды. Ачлык Мүсүрдир Кенганың халкларыны халыс ысгындан гачырды. 14Юсуп галла сатып, Мүсүриң хем Кенганың әхли пулларыны сырып-сүпүрип алды. Ол пуллары фараоның көшгүне гетирди. 15Шунлукда, Мүсүриң-де, Кенганың-да пулуның соңуна чыкылансоң, әхли мүсүрлилер Юсубың янына гелип, оңа: «Бизе азык бер. Инди биз гөзүңизиң алнында өләймели боларысмы?! Пулумыздан галан зат ёк» дийдилер. 16Юсуп олара: «Эгер пулуңыз болмаса, онда азыгы мала чалшаялың» дийди. 17Шейдип, олар өз малларыны Юсуба гетирип бердилер. Юсуп хем оларың атларыны, овнуклы-ирили малларыны ве эшеклерини азыга чалышды. Шол йыл Юсуп халкың малларыны алып, олары азык билен үпҗүн этди. 18Бир йыл гечди. Индики йыл мүсүрлилер ене-де Юсубың янына гелип, оңа шейле дийдилер: «Биз җенабымыздан хич зады яшырмарыс; бар пулларымызы гутардык, малларымызы болса биз сизе бердик. Сизе берер ялы тенимизден ве мүлклеримизден башга галан зат ёкдур. 19Инди биз гөзүңизиң алнында өләймелими, мүлклеримиз чөле дөнәймелими? Бизи мүлклеримиз билен биле ал-да, бизе азык бер. Мүлклеримиз билен биле фараона гул болалы. Бизиң өлмезимиз ялы, мүлклеримизиң-де чөле дөнмези ялы, сиз бизе тохум бериң».

20Шейдип, Юсуп Мүсүриң әхли мүлклерини фараон үчин сатын алды. Әхли мүсүрлилер ёвуз ачлыга дөз гелип билмән, өз мүлклерини сатдылар. Шейлеликде, тутуш Мүсүр топрагы фараоның элине гечди. 21Юсуп Мүсүриң тутуш халкыны гула өвүрди#47:21 Юсуп… гула өвүрди – бу җүмле кәбир голязмаларда Юсуп халкы гала гөчүрди дийип душ гелйәр.. 22Ол диңе руханыларың мүлк ерине дегмеди, чүнки руханылара фараон тарапындан белленен мөчберде хак төленилйәрди ве олар шол төленен хак билен гүзеран гөрйәрдилер. Шол себәпден хем олар өз мүлклерини сатмадылар.

23Юсуп Мүсүр халкына шейле дийди: «Фараон үчин сизи ерлериңиз билен биле сатын алдым. Ине, тохум, алың-да, экиң. 24Сиз алан хасылыңызың бәшден бир бөлегини фараона берерсиңиз, дөртден бир бөлегини болса өзүңизе тохум үчин, хоҗалыкларыңыза ве чагаларыңыза азык үчин аларсыңыз». 25Олар: «Сиз бизи халас этдиңиз; җенабымыз разы болса, биз фараона гул боларыс» дийдилер. 26Шейдип, Юсуп руханылардан башга хеммелериң хасылының бәшден бир бөлегиниң фараона берилмелидиги хакында хөкүм чыкарды. Бу хөкүм шу гүнки гүне ченли хем өз гүйҗүндедир.

Якубың иң соңкы хайышы

27Ысрайыллар Мүсүриң Гошен велаятында месген тутуп, шол велаятда өзлерине мүлк эдиндилер. Олар өрңәп, җуда көпелдилер.

28Якуп Мүсүрде он еди йыл яшады. Ол йүз кырк еди йыл яшады. 29Өлүм пурсады голайланда, Ысрайыл Юсубы янына чагырып, оңа шейле дийди: «Эгер мени сөййәниң чын болса, онда элиңи уйлугымың астында гой-да, маңа вепалы болҗакдыгыңа хем сөзүми тутҗакдыгыңа ант ич. Мени Мүсүрде җайламагын. 30Ата-бабаларымың янында ятарым ялы, мени Мүсүрден әкидип, шоларың янында җайла». Юсуп оңа: «Айдышың ялы эдерин» дийди. 31Ысрайыл Юсуба: «Ант ич!» дийди. Юсуп ант ичди. Онсоң Ысрайыл дүшегиниң башында тагзым этди.

Actualmente seleccionado:

Гелип чыкыш 47: TukCyr16

Destacar

Copiar