LOUKAS 18
18
Ka pharshi ka riewkynthei bad u nongbishar
1Nangta U Jisu u la ïathuh ha la ki synran ïa ka pharshi ban hikai ïa ki ba ki dei ban duwai borabor ban ym noh mynsiem da lei lei ruh. 2“Ha kawei ka shnong la don u nongbishar u bymsheptieng ïa U Blei lymne burom ïa u briew. 3Bad la don ka riewkynthei ha kata kajuh ka shnong kaba ïai wan sha u bad kyrpad na ka bynta ki hok jong ka, da kaba ong, ‘To ïarap ïa nga pyrshah ïa u nongïaleh pyrshah jong nga!’ 4La slem bah u nongbishar u la kyntait ban leh ei ei, hynrei ha kaba khatduh u la ong ha lade, ‘Wat la ngam sheptieng ïa U Blei lane burom ïa u briew, 5pynban na ka bynta ka jingpynjynjar baroh ba kane ka riewkynthei ka ai ha nga, ngan khmih ïa kata ba kan ïoh ïa ki hok jong ka. Lada ngam leh kumta, kan ïai wan bad khatduh kan pynlwait ïa nga!’ ”
6Bad U Trai u la bteng, “Shahshkor ïa kaei kaba uta u nongbishar bamsap u la ong. 7Mynta, hato U Blei un ym bishar ha ka liang jong ki briew jong u kiba kyang sha u mynsngi bad mynmiet ban ïoh jingïarap? Hato un long uba suki ban ïarap ïa ki? 8Nga ong ha phi, un bishar ha ka liang jong ki bad un leh kloi ïa ka. Hynrei hato U Khun U Briew un shem mo ïa ka jingngeit ha ka pyrthei haba u wan?”
Ka pharshi u Pharisi bad u nonglum khajna
9U Jisu u la ïathuh ruh ïa kane ka pharshi ha ki briew kiba la sngewthikna ïa la ka jingbha jong ki hi bad kiba ñiewbeiñ ïa baroh kiwei pat. 10“Shisien la don ar ngut ki rangbah kiba la leit sha ka Templ ban duwai: Uwei u la long u Pharisi, uwei pat u long u nonglum khajna.
11“U Pharisi u la ïeng kyrpang la ka jong hi bad u la duwai, ‘Nga ainguh ïa me, a Blei, ba ngam long uba lalot, u bymhok, lane uba klim, kum uno uno uwei pat. Nga ainguh ba ngam long kum utai u nonglum khajna hangtai. 12Nga shahjingit ar sien shi taïew, bad nga ai ha me kawei na ki shiphew jong ki jingïoh jong nga baroh.’
13“Hynrei u nonglum khajna u la ïeng ha pajih bad um shym khmied la ka durkhmat sha bneng, hynrei u ïai tied ïa la ka shadem bad u la ong, ‘A Blei, to isynei ïa nga, u nongpop!’ 14#Mat. 23:12; Luk. 14:11Nga ong ha phi,” U Jisu u la ong, “u nonglum khajna, bad ym u Pharisi, uba don ha ka liang kaba dei bad U Blei haba u leit noh sha ïing. Naba ïa uno uno uba pynkhraw ïa lade yn pynrit, bad ïa uno uno uba pynrit yn pynkhraw.”
U Jisu u kyrkhu ïa ki khynnah
(Mat. 19:13-15; Mrk. 10:13-16)
15Katto katne ngut ki briew ki la wallam ïa ki khunlung jong ki sha U Jisu ba un buh ïa ki kti jong u halor jong ki. Ki synran ki la ïohi ïa ki bad ki la kynhied ïa ki naba ki leh kumta, 16hynrei, U Jisu u la khot ïa ki khynnah sha u bad u la ong, “Shah ïa ki khynnah ban wan sha nga bad wat khang ïa ki, namar ka Hima U Blei ka long ïa kiba kum kine. 17Kynmaw ïa kane! Uno uno u bym pdiang ïa ka Hima U Blei kum u khynnah un ym rung shapoh jong ka da lei lei ruh.”
U briew uba riewspah
(Mat. 19:16-30; Mrk. 10:17-31)
18U nongïalam jong ki Jiw u la kylli ïa U Jisu, “Ko Nonghikai Babha, kaei nga dei ban leh ban ïohpdiang ïa ka jingim bymjukut?”
19“Balei me khot uba bha ïa nga?” U Jisu u la kylli ïa u. “Ym don uno uno uba bha lait tang U Blei. 20#Eks. 20:14; Deut. 5:18; Eks. 20:13; Deut. 5:17; Eks. 20:15; Deut. 5:19; Eks. 20:16; Deut. 5:20; Eks. 20:12; Deut. 5:16Me tip ïa ki hukum: ‘Wat klim; wat pynïap briew; wat tuh; wat mudui lamler ïano ïano; burom ïa la u kpa bad ïa la ka kmie.’ ”
21Uta u briew u la jubab, “Naduh ba nga dang samla nga la kohnguh ïa kine ki hukum baroh.”
22Haba U Jisu u la ïohsngew ïa kane, u la ong ha u, “Dang don sa kawei pat kaei kaei kaba me donkam ban leh. Die noh ïa baroh kaba me don bad ai ïa ka pisa ha kiba duk, bad men don ka spah ha bneng; nangta wan bad bud ïa nga.” 23Hynrei haba uta u briew u la ïohsngew ïa kane, u la sngewsih eh, namar u la long uba riewspah shibun.
24U Jisu u la ïohi ba u la sngewsih bad u la ong, “Katno ka long kaba eh ïa ki briew bariewspah ban rung shapoh ka Hima U Blei! 25Ka long kaba kham eh ïa u riewspah ban rung shapoh ka Hima U Blei ban ïa ka ut ban leit lyngba ka thliew thyrnia.”
26Ki briew kiba la ïohsngew ïa kane ki la kylli, “Mano, te, uba lah ban lait im?”
27U Jisu u la jubab, “Kaei ka bym lah ha u briew ka long kaba lah ha U Blei.”
28Nangta u Petros u la ong, “Ha khmih! Ngi la iehnoh ïa la ki ïing ban bud ïa me.”
29“Ho-oid,” U Jisu u la ong ha ki, “bad nga pynthikna ïa phi ba uno uno uba iehnoh ïa ka ïing lane ïa ka tnga lane ïa ki hynmen ki para lane ïa ki kmie ki kpa lane ïa ki khun na ka bynta ka Hima U Blei 30kin ïohpdiang kham bun shah ha kane ka pateng bad ïa ka jingim bymjukut ha ka pateng ka ban wan.”
U Jisu u kren ha ka sien kaba lai shaphang ka jingïap jong u
(Mat. 20:17-19; Mrk. 10:32-34)
31U Jisu u la ïalam sharud ïa ki khat-ar ngut ki synran bad u la ong ha ki, “Ha sngap! Ngi ïaleit sha Jerusalem ha kaba ïa kaei kaei baroh kaba ki nongïathuhlypa ki la thoh shaphang U Khun U Briew kan urlong shisha. 32Ïa u yn sa aiti noh ha ki Jentil, ki ban ibeiñ ïa u, krenbeiñ ïa u bad bynthiew ïa u. 33Kin sympat ïa u bad pynïap ïa u, hynrei hadien lai sngi, un mihpat.”
34Hynrei ki synran kim shemphang ïa kano kano na kine kiei kiei; ïa ka jingmut jong ki kyntien la buhrieh na ki, bad kim tip shaphang kaei U Jisu u kren.
U Jisu u pynkhiah ïa u nongkhrong uba matlah
(Mat. 20:29-34; Mrk. 10:46-52)
35Katba U Jisu u dang wan hajan ka Jerikho, la don u briew bamatlah uba shong harud ka lynti bah, u da khrong. 36Haba u la ïohsngew ba u paidbah u ïaid najan, u la kylli, “Kaei kane?”
37“U Jisu uba na Nasareth u dang ïaid nangne,” ki la ïathuh ïa u.
38U la pyrta, “Ko Jisu! U Khun u Dabid! To isynei ïa nga!”
39Ki briew kiba sha khmat ki la kynhied ïa u bad ki la ong ïa u ban sngap jar. Hynrei u la pyrta kam jam shuh shuh, “Ko khun u Dabid! To isynei ïa nga!”
40Kumta U Jisu u la sangeh bad u la hukum ban wallam sha u ïa u briew uba matlah. Haba u la wan hajan, U Jisu u la kylli ïa u, 41“Kaei me kwah ïa nga ban leh na ka bynta jong me?”
“Ko Kynrad,” u la jubab, “nga kwah ban imat pat.”
42U Jisu u la ong ha u, “Te, to peit! Ka jingngeit jong me ka la pynkhiah ïa me.”
43Hangta hi u la lah ban imat pat, bad u la bud ïa U Jisu, da kaba ainguh ïa U Blei. Haba ki paidbah ki la ïohi ïa kata, ki la ïaroh ïa U Blei.
Actualmente seleccionado:
LOUKAS 18: KHACLBSI
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Khasi CL Bible
Copyright © Bible Society of India, 2016.
Used by permission. All rights reserved worldwide.
