MOTHI 3
3
Johon Baptist po Kapahar Alam
(Mrk. 1:1-8; Luk. 3:1-20)
1Labang adin Johon Baptist po wangsi, Judiya angnam aju Arnam alam paharsi pulo, 2“Pap aneng chipharlep mot, piyok pu tene ethakpe-alongri adung hetno.” 3Piyok pu tene, ingho alam Jisoya turki po parasi ladi kipathan, lake, “Ingnam aju kihang ihut asi lalo, nali Hemphu aduwarpo chihonjok, aro anang duwarsone chipakengot.” labangke anango. 4Johon po mihonghang areng apesi kachi-ik, areng pensi amicheng kachikok; aro anang long-chupur pen ingnam apiyo alangsi kicho. 5La-amun Jerusalem pen Judiya ahol aro Jordan langjon pe dung ahuwit arleng anang dung yok damsi, 6anali abithang pap katikihel hoi chosi, Johon po parasi Jordan langjonpe long baptist chiplango. 7Manta Pharisi hel pen Saduki hel anang dung baptist yok kiwangjap theksi, Johon po analiyok pulo, “Nali phurul badi angho abi kido abang, Arnam aneng akang kiwange para jok-une pusi ingho nali thano? 8La-apot nali aneng kachipharlep pamichangne athe kiwang katiki parane chipaklangot, 9aro Abraham po hali apa, puke nali neng chironnek; piyok pu tene ne naliyok thanbang, Arnam labang arlong hel parasi Abraham po aphan agijing pawang unman. 10Layok minonta thengpe akangri kuthar biwen do; la-apot jimehel athengpe akime athe wangwe, labang thudetsi, me-long phlong detman. 11Aneng kachipharlep aphan, ne ke naliyok lang along baptist otedo, manta ne phel kiwang jongpo neyok ta ajakong kidochot; ne anang keng-op kirung ponyok ta michangche; anangsi naliyok Jiuli-Kangthir long aro mepensi baptist ote ye. 12Anang balengpo me-atsi aphi pangthirsi do, anang sok rak thalsi biye, manta aphi hel ke jutjelen me-aten long pasek detne.”
Jisu baptist kachiplang
(Mrk. 1:9-11; Luk. 3:21-22)
13La-amunsi Jisu, Johon po arideng baptist kachiplangyok, Galili para Jordon yok, Johon po adung yok wango. 14Manta Johon po anangyok tengklaksi pulo, “Nang parasi baptist kachiplang nange doman, lalesi nang nedungyoksi wangdo ma?” 15Manta Jisu ke puphak ngo, “Minonke labadine pachok sonang; piyok pu tene ladisi ahuwit Arnam dhorom kangthir kidopo pachok hlonge.” La-amun Johon po hoicholo. 16Aro Jisu baptist chiplang tang aphel, lajongsi lang para ingthuro; aro langot, ethakpe aduwar anangyok ingpu pilo, aro Arnam Jiuli-Kangthir yok wothum badi wangsunsi, anang phuthak wang kirikuk chithekngo. 17Aro langot, “Anang ne nengdok Aso, ananglong ne neng ingsam man,” labadi ethakpe alam asi wango.
Actualmente seleccionado:
MOTHI 3: AMRI-BSI
Destacar
Compartir
Copiar
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fes.png&w=128&q=75)
¿Quieres guardar tus resaltados en todos tus dispositivos? Regístrate o Inicia sesión
AMRI KARBI N.T. - AKIMI ANGTON N.T.
Copyright © 2014 by The Bible Society of India
Used by permission. All rights reserved worldwide.