MOTHI 2

Ni-hang Abang Wang-kilang

1Herod rechopo kido apor Judiya ahol long kido Bethlehem rongso along Jisu plango; langot, ni-hang aga para angkhan kithek-kire abang Jerusalem rongpe yok wangsi arjulo, 2“Jihudi hel aphan recho kiplang, Oso so dak longte do? Piyok pu tene hali anang chiklo-langso ni-hang agak ka-ole theksi, anangyok kachirdom yok wang ngo.” 3Herod recho po labang alam arjusi, anang pen Jerusalem kido ahuwit ta angthin ihik-bihiksi do detno. 4La-amun anang ahuwit bor-bangthe pen arleng hel kanong paklang helyok pangrumsi arjulo, “Khristo daklong te wang plange?” 5Anali anangyok pulo, “Judiya ahol Bethlehem rongso along hali labangpo thek hlongo, piyok pu tene turkipo parasi labadi kiwi do, 6Juda alongri Bethlehem abang, Juda rongpe hel adak nali bekchot kalek, piyok pu tene nali sitem para ihut kapangdom po ole ye, anangsi ne Israyel arlengyok al-en pone.” 7La-amun Herod po kithek-kire abangyok taram jolsi, labang chiklolangso kachiklang konbak adin chokdo, bangpo apor pangtheksi anali para arjulo. 8Aro analiyok Bethlehem yok tolsi pulo, “Nali, damne labang oso soyok me-atne chilangdam; aro anangyok thekngo tene neyok ta wangthanot, la tangsi ne ta damsi chirdom dam une.” 9Anali Herod recho po alamthe arjusi damjongo; la-amun langot, labang chiklo-langso anali ni-hang aga kithek, labang chiklolangso anali kidam ango-ango damsi, Oso so kido athem hlongsi, anang aphuthaksi ri-dam kukngo. 10Labang chiklo langso kiridamkuk theksi anali aneng arong ongo. 11Aro hem arlo lut damsi, anang ai Mary pe pen kachikso yok theksi, anangyok tarhuksi chirdomo; aro anali ador-ong abihini chulpo para ser, hujung aro kanempru ajangthu olesi anangyok banta pilo. 12Aro Herod po adung kipadam phakphe yok anali apharlo long Arnam para kithan hlong si, prek aduwarsi abithang alongriyok dam phakngo.

Ijip Alongriyok Kapajokpon

13Laparake langot, kithek-kire abang kachikak aphel, Hemphu tharlon ihut Jusep poyok apharlo chihomansi pulo, “Thurnot, Oso so aro anang aipe yok ensi, Ijip alongriyok kak-hrol not, aro ne nangyok nangthanthe lengke lalong donot; piyok pu tene Oso soyok kamari ayok, Herod po kapasandi damwor yok arleng toldo.” 14Aro Jusep po thursi, Oso so yok aro anang aipe yok anuwepesi ensi, Ijip alongri ayok chipon detno; 15aro Herod po thitheleng ke lalong si dolo; “Ne Ijip longri para neso yok chitaramo,” labang alam turki po parasi Hemphu kipathan, alamthe chokplengyok ladisi chiplango.

Osohelyok Kamari

16La-amun Herod po kithek-kire abang nichobel peno pusi chithan unsi, anang nengkang halo, aro kithek-kire abang para me-at arjusi kiplang apor atengsi, Bethlehem aro adung arel kido nengkan hini abo oso aro layok kibek chot penso oso majit, arleng tolsi pamari det no. 17Latengsi Jeremiya turkipo yok Arnam kapathan alamthe hel chok penno, lake, 18“Rama rongso long kasurujo aro nengduk kiwangjin arju hlongo, Rachelpe asomar anat suru-surusi, anali kangwedet theksi, nengpangsam hlongyok, aneng wedet no.”

Ijip Para Kiwang Phak

(Luk. 2:39)

19Manta langot, Herod po thilo apot, Hemphu atharlon ihut Ijip alongri long Jusep poyok apharlo long chiklangsi pulo, 20“Thurnot, Oso so pen aro anang ai yok en-ne Israyel alongri yok dam phak ngot; piyok pu tene Oso so yok kamariyok kiron, labang arleng hel thidet no.” 21La-amun anang thursi, Oso so aro anang ai yok ensi, Israyel alongri ayok wango. 22Manta Judiya along Arkhelayus po anangpa Herod po kithitang aphel recho kachiplang arjusi, anang lalong kidamyok chiphere lo; laparake apharlo long Arnam para kithan hlongsi, Galili aholyok damphakngo. 23Aro Najaret rongso long damsi pahem-paretsi dolo; “Anang yok ke Najaret abang pusi taramme,” pune turkihel parasi kipathan, alamthepo kichok ayok ladisi chiplang peno.

Actualmente seleccionado:

MOTHI 2: AMRI-BSI

Destacar

Copiar