Luka 22
22
Zhuda onowiiwanana ni apogo a aZhudewu dhoompeleka Yesu
(Matewuzhi 26.1-5, 14-16; Maruku 14.1-2; Zhuwawu 11.45-57)
1Mudhidhi wa Othabela wa Mikaathe Dhoohuheliwa Emela, weeriwa Paxkwa,#22.1 Paxkwa yaali mathanga oofuneyesesa a aZhudewu. Moone Okuma 12.1-27. Vowi Yesu avenyihiwe nlabo nenddo na Paxkwa, hiyo dhiinova Paxkwa eehu nnathabela ovenyihiwa wa Yesu muukwani. aaddamelaga. 2Apogo a anamakutha ni anamasuuziha a Malamulo yoosayelaga mukalelo wowi empe Yesu, mbwenye yowawoova athu. 3Vevale Sathana ahivolowaga mmurimani mwa Zhudasi a oEsikariyothi,#22.3 Esikariyothi mu ewogelo ya eGerego enatapulela wi muthu a oKariyothi. mmohi mwa anamasuuza aaye kumi ni abiili. 4Oliye ahidhowa ogumana ni apogo a anamakutha ni ale yaang'anela nyuba ya Mulugu wi yeewananele mukalelo woompeleka Yesu. 5Aliwa veewiliiwa dhedho yahidhiveliwaga, yahimuroromeliha omvaha korowa. 6Zhudasi ahirumeedhela, wambeela osayela mpatha wowi ampeleke anamwinji ehilivo.
Yooja ya Nabwiya
(Matewuzhi 26.17-35; Maruku 14.12-31; Zhuwawu 13.18-30; Zhuwawu 13.36-38)
7Vano nigafiyile nlabo na Mathanga a Mikaathe Dhoohuheliwa Emela vapiwa nibila na Paxkwa. 8Yesu ahimuruma Peduru ni Zhuwawu, eeraga: <<Kaweni mwasasanyedhe dhooja dha Paxkwa wi nije>>.
9Aliwa yahimukohaga, wiira: <<Munafuna nasasanyedhe waani Mathanga a Paxkwa?>>
10Yesu ahawaakulaga, wiira: <<Mwaavolowaga muluwani, muneere ogumanana mulobwana agathukule muno wa mahinje. Mmuharege vaade vineeriiye avolowe. 11Mmukohe mwiinya a vaade, mwiire: <Namasuuziha onakoha: suubi a aleddo wi gijemo Mathanga a Paxkwa ni anamasuuza aaga oli waani?> 12Oliye onowuwoonihani suubi mulubale a vadhulu, mwemo muli dhaatedhene dhoofuneya vamathangani, musasanyedhemo dhoojadha>>.
13Aliwa edhowaga yahifwanya dhaatedhene wona mwawaaddelege Yesu. Vevale yahisasanyedha Mathanga a Paxkwa. 14Vano mudhidhi ogaakwanile Yesu ahikaraatigi vameeza vamohi ni arumiwi aaye. 15Ahiwogaga, wiira: <<Ginofuna vajinjivene wi nimuje vamohi Paxkwa ola gihinoone dhoovoreya. 16Ginowuwaaddelani wi kagidha gimuja mmohi ofiyedha aakwanelihiwe muuMweneni wa Mulugu>>.
17Ageere ndo ahimuthukulaga nakoma#22.17 Nakoma Naari wi: kopo. Moone teto maverisikulu 20, 42. a vinyu, otamaalela, wiira: <<Mwaakeleni mmugawane mwaatene mukaleliinyu. 18Ginowuwaaddelani wi kagidha gimung'wa vinyu dila emohi ofiyedha odha Omwene wa Mulugu>>.
19Vano ahithukulaga mukaathe, omutamaalela Mulugu, ogwaddanya wawinka, wiira: <<Ola bu mwiili waaga onavahiwa wa nyo; mwiiregenave ela muguubuwelelaga>>.
20Vooharela, ahimuthukulaga nakoma, ovahedha mahala, wiira: <<Ola di nakoma a nipangano no waandana nixa na mwazi waaga onakuthuleliwa wa nyo>>.
21<<Mbwenye moone, muthu ole onafuna ogiguliha oli ni miyo vameeza veva. 22Ebaribareene, miyo, Mwaana a Muthu, gineere opiwa wona mwafuneyeliiwa, mbwenye oddilu oli ni muthu oyene onaagigulihe!>> 23Vano arumiwi yahambeelaga okohana vakaleligiisu, yiiraga mwa aliwa wi eerena dhedho baani.
24Teto wahikalaga ovaanyihana vakaleligiisu, yiiraga wi mwa aliwa aali oofuneya baani. 25Yesu ahawaaddelaga, wiira: <<Mamwene a athu oode enowaajela athu eewa; ale enaalamula eneeriwa anameerana dhapama. 26Mbwenye nyo kamunaakale ndo. Moohiyaniha, mpogo mwa nyo onaakale wona mung'ono. Vano ole onasogolela onakala wona ole oneemelela. 27Ki oofuneya baani: di ole oli vameeza naari ole oneemelela? Kahuwo ole onaja vameeza? Mbwenye miyo gili vaari va nyo wona ole oneemelela. 28Nyo muli alene munakalave ni miyo moweehiwani mwaaga. 29Wona ababa egisakulele omwene, miyo ginowuusakulani 30wi muje, mung'we vameeza vaaga muuMweneni mwaaga. Muneere okaraati mumpanddoni dha omwene wi mwaathonge malogo kumi ni meenddi a Ezarayeli>>.
31Teto Yesu ahiwogaga, wiira: <<Simawu, Simawu, woone, Sathana ohuuwaddihedha wi oveetheni wona tirigu.#22.31 Oveethiwa wa tirigu onafwanafwana wona oveethiwa wa mbuga. 32Mbwenye miyo guhuulobelela wi nroromelo naawo nihithime. Wadha otthwaruwa waalibihe addibilo>>.
33Mbwenye Peduru ahaakulaga, wiira: <<Nabwiyani, gili owiimeleene odhowa ofugeliwa ni nyo, ofiyedha okwa>>.
34Vevale Yesu ahiiraga: <<Ebaribareene ginowuwaaddela mahiyu alena a peeno mutubi ahinandde <Kokoliko>, oneere ogikoodda dila thaaru wiiraga kuginonile>>.
35Vano Yesu ahaakohaga anamasuuza aaye, wiira: <<Voorumiliimini voolenddoni giiraga wi kamuthukule thumba na korowa, naari thumba na olenddo, naari sapatho; yahikalavo yoohaleeleni?>>
Aliwa wiira: <<Kanahaleeliwe yego>>.
36Oliye wawaaddela, wiira: <<Mbwenye dhiinova winna thumba na korowa athukule ni thumba na voolenddoni; ole ohinna supaadda, agulihe yowiikuneelana yaaye wi agulena naaye. 37Ginowuwaaddelani wi enofuneya dhigipadduwele dhedho dhilebiwe: <Wi oliye oneere otaganyihedhiwa ni anameerana dhabure>.#22.37 Ezaya 53.12. Ebaribareene dhaatedhene dhinawoga dha miyo dhinofuneya dhaakwanelihiwe>>.
38Aliwa yahimwiirelaga: <<Nabwiyani, nihikanna masupaadda meenddi ala!>> Waakula, wiira: <<Baahi, ehaakwana>>.
Yesu onolobela vaMwaangoni wa Olivera
(Matewuzhi 26.36-46; Maruku 14.32-42)
39Vano ahivenyaga odhowa oMwaangoni wa Olivera wona moolemeelela ni anamasuuza aaye vamohi. 40Egafiyile mburo wasakuliwe, ahiiraga: <<Lobelani, mulobaga wi munaamorele moweehiwani>>. 41Ahisusedhaga vang'ono, olapelawa wona vinamorela nibwe muthu avoka, ahikokoraga wambeela olobela. 42Alobelagave, ahiiraga: <<Babani, mwafuna girabeliheni nakoma#22.42 Nakoma etoonyihedho ya owali wa Mulugu. Moone Ezaya 51.17, 19, 22; Zheremiya 49.12. a goyi ola, mbwenye ohiireye ofuna waaga, wiireye ofuna weenyu>>. 43[Vano mungero a odhulu ahimooneyelaga wi amulibihe mmurimani. 44Yesu agali mmasoosoni, oolobelagave ni kopolo. Nikurumela naaye naaligi wona mathotho a mwazi waddonddelaga vati.]
45Agamalile olobela ahiwelela waaligi anamasuuza ale araaru, aafwanyilege egonaga, vowi okubanya weewa wahitthabwaga. 46Oliye wiira: <<Munagonela ddi? Mvenye, mulobele wi munaamorele moweehiwani!>>
Omagiwa wa Yesu
(Matewuzhi 26.47-56; Maruku 14.43-50; Zhuwawu 18.1-11)
47Yesu awogagave yahifiyaga athu ajinjeene ni mmohi wa anamasuuza kumi ni abiili, ole eeriwa Zhudasi, aaligi vasogolo. Ahisusedhaga vaaligi Yesu wi amulojele ni bezhu. 48Yesu ahiwoga ni oliye, wiira: <<Zhudasi, onafuna ompeleke Mwaana a Muthu ni ombezhari?>>#22.48 Olojela omohi.
49Vano anamasuuza a Yesu yamwaapeelelege vevale yoonaga dhafunaga opadduwa, yahimukohaga, wiira: <<Nabwiyani, munofuna naaporose ni masupaadda eehu athu ala?>> 50Mmohi aaligi vevale ahixomolaga supaadda omporosana mwiimeleli a musogoleli a anamakutha. Ompadha nibaru na omoononi wooja.
51Yesu waahiiha, wiira: <<Baahi! Hiyani!>> Oliye okahinya nibaru, ovoliha.
52Vano Yesu ahiwogaga ni apogo a anamakutha, anamaang'anela a nyuba ya Mulugu ni makolo a mutugumano, yadhiilege wi emwihidde, wiira: <<Nyo munadha ni masupaadda ni golomonddo wi mugihidde wona gili mbava? 53Malabo maatene gakala ni nyoovo nyuba ya Mulugu, mbwenye kamugihiddile. Mudhidhi ola bweenyu. Si kopolo dha mwiipipini>>.
Peduru onokoodda wi ohumunona Yesu
(Matewuzhi 26.69-75; Maruku 14.66-72; Zhuwawu 18.15-18, 25-27)
54Vano egamwihiddile Yesu, yahimudhowana vaade va musogoleli a anamakutha. Peduru egi waahara voolapelavene. 55Yahitubaanyaga munddo vathaddo aatene okaraati. Peduru ahifiyaga mburo olene okaraati ni aliwa. 56Mwiimeleli mmohi a namwali ahimoonaga Peduru vakaraatiligiiye vooneyelaga munddo, omusugwesesa, wiira: <<Mulobwana ola akala ni oliyeene!>>
57Mbwenye Peduru ahikooddaga, eeraga: <<Asa! Mwihiyana we, miyo kagimunonile>>.
58Vigavirile mudhidhi vang'onove, mwiimeleli mmohi agamoonile ahiiraga: <<Teto we oli mmohi mwa aliwa>>.
Peduru wiira: <<Mulobwana we, miyo kagili>>.
59Vigavirile mudhidhi wowaakwana wora emohi muthu mmohiya ahikalelaga ntidi, eeraga: <<Ebaribareene ola aali ni oliyeene, vowi muGalileya>>.
60Mbwenye Peduru ahikalelaga ntidi okoodda, eeraga: <<Mulobwana we, miyo dhinawogiiwe kaginonile!>> Awogagave ndo mutubi ahunddaga: <<Kokoliko>>. 61Nabwiya ahirugunuwaga omusugwa Peduru. Oliye wuubuwelela madhu yamwaaddelile Nabwiya owi: <<Peeno veva mutubi ahinandde onogikoodda dila thaaru>>. 62Vano Peduru ahivenyagavo, odhowa wuunddaga ni okubanya wuulubale.
Anyakoddo enombedda Yesu.
63Alobwana yamwiing'anelaga Yesu yoombeddaga, emuddwadhaga. 64Yoomukuneelaga wiintoni waaye ni guwo yiiraga: <<Ovuhulele! Wuuddwadhile baani?>> 65Yoomuwogelaga dhego dhijinjidhene emunyemulaga.
Yesu agali va Pilatu ni Heroddi
66Ode ogasile bebeheene, apogo a mutugumano a nlogo na Ezarayeli, apogo a anamakutha ni ale yasuuziha malamulo, yahitugumanaga, omuthukula Yesu omudhowana omuthegoni weewa. 67Omukohaga, yiiraga: <<Akala oli Kirixtu#22.67 Kirixtu mu ewogelo ya eGerego enatapulela Muthikitheliwi, Misiya, naari wi oosakuliwa a Mulugu, oyene onaavulumuse athu. Moone teto verisikulu 70. ole aroromelihiwe, onaaddele>>.
Oliye wawaakula, eeraga: <<Naari guwaaddeleni kamunarumeedha. 68Naari guukohani, kamunagaakula yego. 69Okuma dhiinoveva munomoona Mwaana a Muthu agakaraatile omoononi wooja wa Mulugu winna kopolo dhaatedhene>>.
70Athu aatene wiira: <<We oli Kirixtu ole aroromelihiwe, Mwaana a Mulugu ooreelihiwa?>>
Oliye waakula, wiira: <<Nyoovo dinawoga wi gili>>.
71Yahiiraga: <<Ki ninafunelege ddi onamoona wumohi? Vowi nihiiwa weekiihu dha muwano mwaaye>>.
Actualmente seleccionado:
Luka 22: tke
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© 2015, Wycliffe Bible Translators, Inc. All rights reserved.
