Luka 21

Yooveleela ya maamukwele oorabula

(Maruku 12.41-44)

1Yesu ahisugwaga, wawoona aliba oreela evokedhaga yoovaha mukaxani mwa korowa, ya nyuba ya Mulugu. 2Ahimoonaga mwihiyana maamukwele oorabula, ahivokedhagamo korowa biili dhing'onong'ono dha gwingwi. 3Vano ahiiraga: <<Ebaribareene ginowuwaaddelani wi maamukwele a mwihiyana oorabula ola ohuvaha vajinji waakwaranya aatene. 4Mwaha wi ala ehivaha wona yoovaha moothapa. Mbwenye ola, moorabulani mwaaye, ohuvaha dhaatedhene dhanniiyena dhafuniiye wiikamihedhana>>.

Etoonyihedho ya makuthulo a dhaatedhene

(Matewuzhi 24.1-35; Maruku 13.1-31)

5Anamasuuza amohiwa yoowogaga dha mukalelo woomageya nyuba ya Mulugu, moowomihedhela ni mabwe ooriya ni mvahi dha nyuba ya Mulugu. Yesu ahiiraga: 6<<Nyo munoona dhego nda? Enoofiya malabo ohunaakale nibwe vadhulu va nibwe nikwaaye, nihinaadhe nihibwanyuliwe>>.

7Yahimukohaga, wiira: <<Namasuuziha, dhinapadduwa alini dhego dhedho? Ki etoonyihedho baani enaadhe ekalewo dhego ndo dhadha dhaakwanelihiwaga?>>

8Yesu ahawaakulaga, wiira: <<Pole-pole wi munadha muholosiwe, ajinji enoodha edheege mundina naaga, yiiraga: <Miyo gili oliyeene> teto enoodha yiirege: <Mudhidhi ohaaddamela>. Ala munadha mwaahare! 9Mudha mwiiwaga dha koddo, ovenyedhana, muhoove. Soofuneya vowambeela dhipadduwe dhego ndo, mbwenye omakuthulo wa elabo kunafiye>>.

10Vano ahawaaddela, wiira: <<Nlogo nneerege owana koddo ni nlogo nimohi, omwene oneerege owana ni omwene omohi. 11Onoodha okalewo othikeya wuulubale wa elabo, ni dhiredda wona thoba, ni dala mburo dhoohiyana-hiyana, dhoopadduwa dhuulubale dhowoopiha, ni dhitoonyihedho dhuulubale dhodheela odhulu.

12<<Dhihineereye dhego dhaatedhene nda, enoodha yuuhiddegeni ni wuurabulihani, yuuthukulelegeni omuladduni mu nyuba dha matugumano dha aZhudewu#21.12 Nyuba dha matugumano dha aZhudewu Nda mu ewogelo ya eGerego dheeriwa sinagoga. Mabasa eewa kayaali oolobelamoove, naari osuuzamo Malamulo, mbwenye teto yowaathongamo athu yahaaharihamo Malamulo a aZhudewu. ni wuufugelani mukaambura, munoodha mpelekiwege vameentoni va mamwene ni va makuminadori, mwaha wa ndina naaga. 13Nda dhinoodha dhuupadduweleni wi mukanne mpatha wogiirela onamoona. 14Mulibe murima kamukathamiheye yoofuna waakula. 15Vowi miyo ginodha guuvaheni madhu ni tthottho wi amwiiddani eenyu kidha ekoodda naari ovaanya. 16Ababiinyu, addibilinyu, amudhiinyu ni akwiinyu enodha yuupelekegeni. Amohiwa mwa nyo enodha epiwe. 17Aatene enodha yuwiiddegeni mwaha wa ndina naaga. 18Mbwenye kamudha muyelela naari nthithi nimohi na mmuruni mweenyu. 19Mwavilelave, munoodha mpure egumi yeenyu.

20<<Teto mudha mmoona Zheruzalemi arijiwa ni anyakoddo, munone wi obwanyuliwa waaye ohaaddamela. 21Vano ale enaakale oZhudeya ethawelege mmwaangoni, ale enadha ekale muluwani, ekumemo, ale enadha ekale mmamidda enadha evolowe muluwani mwa. 22Vowi malabo ayo enadhe ekale malabo agoyi wi dhaakwanele dhaatedhene dhilebiwe. 23Ooddilu ba ahiyana enaakalena wari mudhidhi oyene teto wawaamwiha ahima! Vowi onodha okale goyi, okubanya wuulubale mwiilaboni ya vati ni owali wa Mulugu wa athu ala. 24Enodha epiwege ni masupaadda, amohi enodha ecedheliwege dhilabo dhaatedhene. Zheruzalemi athu oode enodha emunyingalele ofiyedha waakwanela mudhidhi wa athu oode ale.

25<<Onoodha wooneye dhitoonyihedho vanduwani, vamweerini ni vattendderini. Veelaboni ya vati vinoodha vikale masooso ni makathamiho wa athu a milogo, othuusiwa ni okukuma wa mahinje a munyaza ni kuluzi. 26Athu aatene enoodha ehileyege ni woova yuubuwelaga dhinafuna opadduwa mwiilaboni vowi kopolo dha odhulu dhinoodha dhithikeye. 27Vano athu aatene enoodha emoone Mwaana a Muthu adhaaga mmuraboni ni owodha ni nthithimiho nuulubale. 28Mwadha moona dhipadduwaga dhego dhedhi libani mirima, muthukule kove dheenyu vowi wooboliwa weenyu ohaaddamela>>.

29Yesu ahawaaddelaga musibe mmohi, wiira: <<Mwamoona namutaambwi#21.29 Naari wi: namutaambu. ni mithanko dhimohi. 30Dhambeela opwedheya, nyo munonona wi elimwe ehaaddamela. 31Mwa mukalelo mmohive nyo mwadha moona dhego dhedhi dhipadduwaga, munone wi Omwene wa Mulugu ohaaddamela.

32<<Ebaribareene ginowuwaaddelani wi nlogo nenddi kannamale nda dhaatedhene dhihinapadduwe.

33<<Elabo ya vati ni odhulu dhinoodha dhimale, mbwenye madhu aaga kidha emala.

34<<Pole-pole, mirima dheenyu dhihikale dhoolodhowa ni mathanga, olezela ni ozuzumela dha elabo ya vati, wihina nlabo nenddo nnoodheeleni moorurumusa wona musapa. 35Vowi nnodha naadheele athu enakala elabo yaatene ya vati. 36Mwiyiing'anele mudhidhi waatene ni olobela mwaha wi mukalena kopolo dhoorabelana dhego dhaatedhene dhineereyege ni wiimela vameentoni va Mwaana a Muthu>>.

37Yesu oosuuziha malabo maatene munyuba ya Mulugu, mbwenye vakala mahiyu, ookuma odhowa okalaga omwaangoni oneeriwa Olivera. 38Vano athu aatene yoodhowa bebeheene wi yakale ni oliye munyuba ya Mulugu wi yamwiiwege.

Actualmente seleccionado:

Luka 21: tke

Destacar

Copiar