Lukə 23

Də li a Jesus Pilatə lííla

(Matie 27.1-2,11-14; Markə 15.1-5; Ɉaan 18.28-38)

1Nu kpului tii kəlee di di muhəɠə, diɛ li a Jesus Pilatə lííla. 2Di həliɛ, diɛ kɛa lɛɛ tamąą kɛ a nąą, diɛ kɛ mą: «Nui ŋɛ̨i, ku gaa yɛ nɔi nuą kwɛitee, yɛ kɛ diɛ: ‹Ka hvo nįįhɔ̨nwɔ̨ kulɔ Sesarə ɓa.› Ə lɛɛ, yɛ kɛ diɛ: ‹Yaa ɓə gaa a Nwun mąąɓomun Yálá ə naakwɛlanmo, yɛ ɓo nwɔ̨nɔ̨ a tɔɔmun.›»

3Pilatə ə mąąni kɛ, yɛ mą: «Akɛti, Ɉuifəɠaa di wɔ tɔɔmun mąą a yɛ́?»

Jesus ə nwoo pulu pənə yɛ mą: «Ya ka tii yáá mo.»

4Nąąlɔwai Pilatə ə mo ɉala laa həli nuą kpɛa-kpɛaa da nu kpului tii kəlee diɛ, yɛ diɛ: «Mɛ̨nįi kpɔ əgɛ a hɔn, və́ gaai.»

5Kɛlaa, di tómą kpɔ a di woo kɛnɛ̨, diɛ mą: «Kuɔ yɛ́, nwɔ kalan gɛ pələ ə kɛi nuą kwɛitee, ə gɔɠɔ tɔɔ kpɔ Galile lɔi hu, ə tɛɛ la Ɉude lɔi hu, ya ka aa pa aa həli la ɓɛ.»

Dəli a Jesus Herodə pɔ

6Yii kɛa Pilatə ə nwooɠaa tii mɛ̨n, ə mąąni kɛ kɛ, yɛ diɛ: «Akɛti, Galile nɔi mun məi?»

7Yii kɛa ə mɛ̨n diɛ mą: Jesus ə həɠə Herodə nwɔ lɔi hu, volói tii di kɛi mɛ̨nį kɛ la, Herodə ə kɛ Ɉerusalɛmə. Pilatə ə Jesus tɛɛ dəli la Herodə pɔ. 8Ɓɛlɔwai Herodə ə Jesus kaa la, gwəi ə nɛɛ kpɔ kɛnɛ̨. Mąąhɔlɔɓo, aa kɛ Jesus mąą mɛ̨nį bələ mɛ̨n kpɔ a lɔwai hu kwɛaa, ə kɛ bɔ ə ɲɛ̨i tɔɔ mą. Ə kɛ Herodə kwəi, Jesus kaa pai kpalo mɛ̨nį ta kɛi ə gaa. 9Ə Jesus mąąni kɛ kpɔ tamąą, kɛlaa, Jesus hvo gɛ hvo nwoo ŋąąpənə. 10Ɉaláá laa həli nuą kpɛa-kpɛaa da dɔ́n galamɔ̨ɔ̨ɠaa di kɛi lɛɛ tamąą pɛlɛ a Jesus laa. 11Herodə da gɔ́kulááɠaa di kɛi yɛlɛ Jesus ɓa, diɛ mɛlɛkpɛɛ ma. Di gbaawi lɛlɛɛ ta too Jesus kwąną, di pənə di dɛɛ diɛ li la Pilatə pɔ. 12Herodə da Pilatə di hvo kɛ nɛ̨ɛ̨li, volói tii lɔ ɓə di nɛɛ la.

Nu kəlee di hvaa Jesus paa mɛ̨nį ɓa

(Matie 27.15-26; Markə 15.6-15; Ɉaan 18.39—19.16)

13Pilatə ə ɉala laa həli nuą kpɛa-kpɛaa da nɔi kalanɉonŋąa, ə mą kɛ nɔi lonnii taɠaa təli, 14yɛ diɛ: «Ka pa a nui ŋɛ̨i bɔ́ ɓɛ, kaa diɛ: gaa nɔi nuą kwɛiteei, yɛ di həɠə pələ haŋąa mɛ̨i. Yaan, mąąni kɛi ŋį́ mo ka ɲɛ̨i ɓa, və́ hɔn nɔpee ta kaa li mą, yii mąąnɛ̨ɛ̨ ə gaho kɛ ɉu, yɛ hvilɛn na yiiɠaa ka mo a nąą ma. 15Herodə yaa kpɛli hvo hɔn gaa li mą. Mąąhɔlɔɓo, aa pənə aa dɛɛ gu pɔ. Yili ɓa, ɉulɔnui ŋɛ̨i, hɔn nɔpee ta hvo mą, yii da pɛli di baa la. 16Yili ɓa tii, gáá lɔ moi di gɛlɛ a hvaɠa, yili pulu, ŋį́ ɓo mą.»

17 Pakə hɛli həli pələ tɛitɛi kəlee, Pilatə ə kɛi gaho nąmu tɔ̨nɔ̨ lɛɛ gbɔwɔ ɓa.

18Kɛlaa, di kəlee di tómą kpɔ a di woo kɛnɛ̨, diɛ kɛ diɛ: «Nui ŋɛ̨i paa, ə́ Barabasə lɛɛ gbɔwɔ ɓa.»

19Di Barabasə too gaho ŋą, mąąhɔlɔɓo, ə lɔ nuą hu di di kwɛitee daa lee hu, yili pulu, ə nu paa.

20Pilatə ə kɛ kpɔ bɔ ə Jesus lɛɛ gbɔwɔ ɓa, ya ɓəi gɛ, ə pənə kpɔ ə di mąąni kɛ. 21Kɛlaa, nu kpului tii kəlee di tómą kpɔ a di woo kɛnɛ̨ɛ, diɛ mą: «Gbanwo wulu ɓa! Gbanwo wulu ɓa!»

22Kɛlaa, ɉaaɓa nąąn, Pilatə ə mo diɛ, yɛ diɛ: «Mɛ̨nį ɲɔ̨n nə kɛɛ ɓə əgɛ? Və́ hɔn ɲɔ̨n nɔpee ta kaa li mą yii mąąnɛ̨ɛ̨ di baa la. Gáá moi di gɛlɛ a hvaɠa, yili pulu, ŋą ɓo mą.»

23Ə mą kɛ tii, nuą di kɛi lɔ tómą a di woo kɛnɛ̨ɛ, diɛ kɛ mą: «Gbanwo wulu ɓa.»

Di tómą woo yee ə tɛɛ Pilatə ɓa. 24Yii di hvɛli Pilatə ɓa, ə hvaa mą ə yili tɛɛ di pɔ. 25Nui ŋɛ̨i gwɛitee laa lɔ nuą hu, ə lɛɛ, ə nu paa, ə ɓo yili ɓa, mąąhɔlɔɓo, yili ɓə di hvɛli ma. Ə Jesus tɛɛ di pɔ, yɛ diɛ: ka li ka gɛ yɛ pələi ka káá la bɔ.

Di Jesus kpanwo wulu ɓa

(Matie 27.32-44; Markə 15.21-32; Ɉaan 19.17-27)

26Ɓɛlɔwai di kɛi li la a Jesus, di hulɔnu ta kaa bələi, diɛ kɛ nąą ɓaa: Simɔn, yii həɠə Sirɛnə daai. Ɉulɔnui tii ə kɛi həɠə ɲəi ɲɛa pələ yɛ pa. Gɔ́kulááɠaa di ɉon, diɛ mą: Jesus nwɔ kolɔwai ta həɠə, ə́ hvilɛn na bulu.

27Nu kpulu kɛnɛ̨ ə kɛ Jesus pulu, nɛ̨ą tamąą di kɛ di lɔwai diɛ wɔlɔ, diɛ di woolaa Jesus mąą mɛ̨nį ɓa. 28Jesus ə tinɛ̨n ə mo diɛ, yɛ diɛ: «Ɉerusalɛmə nɛ̨ą, ka hvo wɔlɔ mą́ą́ mɛ̨nį ɓa, kaamun, ka ka kpɔɔ mąą wɔlɔ ɓo da ka lonnii. 29Mąąhɔlɔɓo, hvóló ta kaa pai ɉəli, nuą kaa pai kɛi diɛ: ‹Nɛa yiiɠaai di hvo ta lon gaa li, di hvo ta ɲįnį tɔɔ li lokolo la, di nwun na nɛ̨ɛ̨i!› 30Nąąlɔwai, nuą kaa pai kɛi yeeɠaa diɛ: ‹Ka pu ku mɛ̨i!›, diɛ kɛ yee kpu-kpuɠaa diɛ: ‹Ka ku loo!› 31Mąąhɔlɔɓo, akɛ wulu nwunu ɓə di gɛ la ŋɛ̨i, wulu kpala nwɛi a kɛ kɛa ləi?»

32Voló tɔ̨nɔ̨i tii hu, di kɛi li a mɛ̨nį ɲɔ̨n gɛ nuą hveelɛ, əgɛ, di di kpanwo wulu ɓa da Jesus ni. 33Ɓɛlɔwai kɛa di həli la gɛɛnąą ŋɛ̨i da kɛ mą: nwun gonon ɲee ɓa, di nu haaɓai tii kpanwo kolɔwa ɓa. Jesus ə lɛɛ di hąmąi. 34Jesus ə mo Yálá ɓa, yɛ mą: «Nąn Yálá, nuą ŋɛ̨i mąąhvaalɛɛ, mąąhɔlɔɓo, mɛ̨nį ŋɛ̨i di kaa gɛi, di hvo gbaɠala kɔ́lɔn.»

Ɉolahiɠaa di Jesus mąąhəɠə ŋąąkwɛlɛ di kee lɔwai yɛ pələi da tɔ̨nɔ̨ huwɔ ɲąąkwɛlɛ la. 35Nu kpului tii kəlee di kɛ tɔɔ ni di ɲɛ̨i həɛ laa. Ɉuifə kalanɉonŋąa diɛ yɛlɛ kulɔ Jesus hu, diɛ kɛ mą: «Aa kɛ nu tamąą nwun mąąɓo, ə gbɔwɔ nwun mąąɓo kani kɛa, akɛ Nwun mąąɓomun Yálá ə naakwɛlanmo, yii ɲɛɠɛɛ ɉu yaa li.»

36Ɉolahiɠaa diɛ kpɛli di kɛi yɛlɛ kulɔ ɉu, diɛ pa a lɔɔ kpona bɔ. 37Diɛ kɛ mą: «Akɛ Ɉuifəɠaa di wɔ tɔɔmun mąą a yɛ́, ə́ kpɔɔ nwun mąąɓo.»

38Di hɛɓɛ́ pɛ̨ɛ̨ di bɛlɛ Jesus nwun mɛ̨i diɛ kɛ mą: «Nui ŋɛ̨i kaa a Ɉuifəɠaa di wɔ tɔɔmun.»

39Mɛ̨nį ɲɔ̨n gɛ nuą hveelɛi tii dɔ̨nɔ̨ ə kɛi Jesus lalan, yɛ kɛ mą: «Akɛ Nwun mąąɓomun Yálá ə naakwɛlanmo ya ɓaa a yɛ́, ə́ kpɔɔ nwun mąąɓo, ə́ ku nwun mąąɓo.»

40Kɛlaa, mɛ̨nį ɲɔ̨n gɛ mun ŋɛ̨i kɛ ɲee lɛlɛɛ hu, ə haŋą mɛlan ma, yɛ mą: «Akɛti hva ɲɔw Yálá ɓa? Ə́ kɛ hɔn ga ŋɛ̨i ə́ kaa mąą mɔ̨nɔ̨ mįi, 41mɔ̨nɔ̨i ŋɛ̨i gu kaa mįi gu nu hveelɛ, gu kaa mįi, guɔ túwɔ́ pələ ɲɔ̨n vɛla li, kɛlaa, nwɛi, hvo kɛ mɛ̨nį ɲɔ̨n nɔpee ta kɛ li.»

42Nui tii ə tinɛ̨n ə mo Jesus ɓa, yɛ mą: «Ɓɛlɔwai ə́ kaa pai pənəi ə́ paa la yɛ́ ɓo a tɔɔmun, ə́ kili lɛɛ ɉú nąąlɔwai.»

43Jesus ə nwoo pulu pənə yɛ mą: «Gáá moi yɛ́ a tɛ̨ą, háákələi, ə́ kaa pai kɛi bɔ́ Yálá-taa tɔɔlaa hu.»

Jesus powa loo mɛ̨nį

(Matie 27.45-56; Markə 15.33-41; Ɉaan 19.28-30)

44Ə kɛ a hvóló tɛɛ nwun ma lɔwai, kpinį ə pɛlɛ nɔi tii hu nąą kəlee ə lɛɛ la ɉu pɛlɛ gɔwɔn nįnįn ə kwɛa a nu kɔ́wɔ laɠi ɉi hveelɛ. 45Nąąlɔwai, hvóló hvo kɛ yələi, ɉəɠə mɛla kɛnɛ̨ɛ ŋɛ̨i kɛi Yálá hee pɛlɛ́ ɓɛla ɓo ɉu hveelɛ, ɉu ə ɓɛla ɉamai ə həɠə yələi ə yɛɛ nɔi ɓa. 46Nąąlɔwai, Jesus ə tómą kpɔ a nwoo kɛnɛ̨ yɛ mą: «Nąn Yálá, gáá nį́į́ tɛɛi ə́ pɔ.»

Yii kɛa ə yili mo tii, nįį ə kulɔ. 47Mɛ̨nįi tii gɔ́kulaa nwun nąmui tii ə gaa, ə nɛɛ ŋąąɓa ə mąąwiɛ tɛɛ Yálá pɔ, yɛ diɛ: «A tɛ̨ą, hɔn və kɛ ɉulɔnui ŋɛ̨i ɓa.»

48Nu kpului tii pa gɛɛnąąi tii kaa mɛ̨nį ɓa, mɛ̨nįi tii kɛ laa di kəlee di gaa. Ɓɛlɔwai di kɛi di pulu pənə la, di kəlee di lii kələn ŋąąi kɛ di kwəi. 49Jesus mɛlaa, ə mą kɛ nɛ̨ą ŋɛ̨i kɛ bulu diɛ həɠə Galile lɔi hu, di kɛ tɔɔ ni kwɛala diɛ mɛ̨nįɠaa tii kəlee kaa.

Jesus powa loo mɛ̨nį

(Matie 27.57-61; Markə 15.42-47; Ɉaan 19.39-42)

50-51Hulɔnu ta ə kɛ laa diɛ kɛ nąą ɓaa: Ɉosɛfə, Ɉuifə taa ŋɛ̨i da kɛ mą: Arimate, nąą mun ni kɛ. Ɉulɔnui tii nii laaikɛ Yálá-taa tɔɔlaai pa mɛ̨nį mɛ̨i. Ə kɛ a tɔ́n vili nąmu ta, kɛlaa, nwun dɔɔ ŋɛ̨i di gɛ yɛ hvilɛn na Jesus paa mɛ̨nį ɓa, nwɛi hvo hvaa mą. 52Ɉosɛfə tii ə li Pilatə pɔɔli, ə Jesus powa hu hvɛli ma. 53Ə Jesus powa kulɔ kolɔwa ɓa, ə mąą kpinįn gɛ a həɠə, ə nąą kámą hu, yii yaa kpinįi ə dee gbɔwɔlɔ kwɛni-yee hɛŋɛlɛn ma, yii di hvo ni kɛ nu ta loo li ɉu. 54Ə kɛ a hvįįtɔɔ yələ mąąyii yələ.

55Nɛa ŋɛ̨i kɛ Jesus pulu da diɛni diɛ həɠə Galile lɔi hu, nɛ̨ą tii da Ɉosɛfə ni ɓə li, ɓɛi di Jesus laa laa gámąi, di nąą kaa. 56Nɛa tii di pənə də li di pulu, di wulɔ kun nɛ̨ɛ̨ kɛ pələ pɛli, əgɛ, di bu Jesus powa ɓa. Hvįįtɔɔ yələ, di di hvii tɔɔ yɛ pələi di bɛ̨ɛ̨ la tɔ́n ɉɛɓɛ́ hu.

Actualmente seleccionado:

Lukə 23: BKPG

Destacar

Copiar