Lukə 24

Jesus ə muhəɠə ə kulɔ haa ɓɛlaa lɔwai

(Matie 28.1-10; Markə 16.1-6; Ɉaan 20.1-10)

1Ɉimahi ɲələ yələ wala pɔ, nɛ̨ą tii di həɠə diɛ li Jesus kámą la a di wɔ wulɔ kun nɛ̨ɛ̨ɠaa di bɛli. 2Di liɛ, gwɛni ŋɛ̨i kɛ Jesus kámą laaləi, di gaa giliɠilin ŋąą ɉəɠɛɛ bələi. 3Di lɔ gámą hu, kɛlaa, di hvo Jesus kaa. 4Di kwəi ə pili diɛ nąąlɔwai, di həɠə kwəlɛɛ nąmįną hveelɛ kaa, 5Di ɲɔw kpɔ kɛnɛ̨, di pɛlɛ nɔi ɓa. Nuą tii di mo diɛ, diɛ diɛ: «Lə mɛ̨nį ɓa ka káá nu húlu kwɛlii nu powaɠaa lɔwai? 6Jesus hvo ɓɛ, aa pənə aa kɛ a vúlu. Mɛ̨nįi ŋɛ̨i ə mo kaa ɓɛlɔwai ə kɛ la Galile lɔi hu, ka ka kiliŋąhiɛ ma. 7Ə kɛ kaa: ‹Ho kɛli di Nu Lon dɛŋɛn gwɛlɛ nɛ̨ŋɛ̨n ɉəɠə nuą diɛ, di gbanwo, ə haa, voló haaɓa yələ, ə kulɔ haaɓɛlaa lɔwai ə kɛ a vulú.›»

8Jesus woo tii nąą kili ə too di ŋą. 9Di kulɔ gámą hu, də li, di mɛ̨nįi tii kəlee hukulɔ galan nɛa pow-kɔw-tɔnɔ̨ tii diɛ, da di ɓɛlaa kəlee. 10Nɛa tii ɓa kɛ a: Mari Magdala mun, Ɉanə, da Ɉakə nee Mari. Nɛa yiiɠaa tii kɛ di pɔ di mɛ̨nįi tii hukulɔ Jesus nwɔ kɛlaɠaa diɛ. 11Kɛlaa, Jesus nwɔ kɛlaɠaa tii di kɛi nɛ̨ą tii woo kaa yɛ ɓowo woo, di hvo kpɛli laa di woo la. 12Nąąlɔwai, Piɛrə ə muhəɠə yɛ li gámą la pələ a gilɛ, ə li ə lɔ gámą hu, ɉəɠəi tii kɛ gbinįn ŋąą Jesus ɓa, yaa lɔ ɓə ə gaa. Ə pənə ə li bɔɔli, gwəi piliɛ kpɔ ma kɛnɛ̨ mɛ̨nįi tii ə gaa mąą mɛ̨nį ɓa.

Kalan nɛa hveelɛ di Jesus kaa Ɛmausə pələ mɛ̨i

(Markə 16.12-13)

13Voló tɔ̨nɔ̨i tii hu lɔ, kalan nɛa hveelɛ di kɛi li taa ta hu, diɛ kɛ nąą laa ɓaa: Ɛmausə. Ə həɠə Ɉerusalɛmə yɛ li daai tii hu, a pɛli kɛi a kilə pow-kɔw-tɔnɔ̨. 14Mɛ̨nįɠaa kpɔ tii kɛ, galan nɛa hveelɛi tii di kɛi da nono kɛ di kee lɔwai bələ pɔ. 15Ɓɛlɔwai di kɛi nonoi tii kɛ la, diɛ ɉu yala di kee lɔwai, Jesus kpinįi ə kulɔ diɛ pono ŋą, da diɛni diɛ li. 16Di kɛi kpɔ Jesus kaa, kɛlaa, ə kɛ yɛ hɛn da a kɛ a bɛlɛɛ di ɲɛ̨i, di hvo kɛi gɔlɔn. 17Jesus ə di mąąni kɛ, yɛ mą: «Lə mɛ̨nį ɓə ka káá ɉu yalai ka kee lɔwai?»

Di kpəla di tɔɔ, di lii ə kələn gbɔ di kwəi.

18Nu hveelɛi tii dɔ̨nɔ̨ laa ɓa kɛ: Kleopasə. Yili yɛ Jesus ɓa: «Yɛ́ tɔ̨nɔ̨ gbən ɓə a Ɉerusalɛmə mun, mɛ̨nįɠaa daa tɛɛ laa voló hveelɛi ŋɛ̨i hu, hvo gbaɠala kɔ́lɔn.»

19Jesus yɛ diɛ: «Lə mɛ̨nįɠaa li?»

Di nwoo ŋąąpənə diɛ mą: «Mɛ̨nįi ŋɛ̨i həli Jesus Nazarɛtə mun ma, yaa ŋɛ̨i kɛ a Yálá kwəi mɛ̨nį hukulɔ mun gɛnɛ̨, gɛ koló da vaa wooɠaa kəlee hu Yálá ɲɛ̨i ɓa da nuą kəlee. 20Kuɔ ɉala laa həli nuą kpɛa-kpɛaa da ɲɛ̨itɔwɔ nuą di dɛŋɛn gwɛlɛ, di mąą ɲąbalɔ, əgɛ, di gbanwo kolɔwa ɓa. 21Ku kilitɔɔ kɛ mą, kuɔ diɛ yaa ɓə pai Israɛlə nu huwu nwun mąąɓoi. Kɛlaa, mɛ̨nįɠaa tii kɛɛ voló haaɓa ɓaa háákələi. 22Kwa nɛ̨ą ŋɛ̨i kɛ gbulu tɔ̨nɔ̨i tii hu, daɠaa daa ku kwəi pili kuɔ. Yələ wala piinɛ̨ɛ̨, di humo kɛ gámą la kpɔ tii a tɛ̨ą. 23Kɛlaa, di hvo bowa kaa. Di pənə di pa diɛ kuɔ: di malakaɠaa kaa, malakaɠaa tii diɛ diɛ: Jesus aa pənə aa kɛ a vúlu. 24Ku ɓɛlaa hinąą taɠaa də li gámą la, pələi tii nɛ̨ą tii di mo la, di gaa tii. Kɛlaa, di hvo Jesus kaa.»

25Nąąlɔwai, Jesus ə mo diɛ, yɛ diɛ: «Ee kə́! Ka hva mɛ̨nį kpaɠala kaa ɉa, ə lɛɛ, mɛ̨nį Yálá kwəi mɛ̨nį hukulɔ nuą di mo ka laa la walai yili la! 26Hvo kɛli kɛ Nwun mąąɓomun Yálá ə naakwɛlanmo, ə mɔ̨nɔ̨ mį́į́ tii, hvo tɛɠa kɛ lɔi nwɔ mąąwiɛ kɛnɛ̨ɛ hu.»

27Yili pulu, mɛ̨nįɠaa kpɔ kɛ bɛ̨ɛ̨ yaa tii nąą mɛ̨i Yálá laawoo hɛɓɛ́ hu, ə gəlee hukulɔ diɛ, ə gɔɠɔ tɔɔ Moisə nwɔ hɛɓɛ́ yilii hu, ə nąą kulɔ Yálá kwəi mɛ̨nį hukulɔ nuą di wɔ hɛɓɛ́ yiliɠaai ɓa.

28Daa ŋɛ̨i di kɛi li ɉu, yii kɛa di lɛɠɛ gwɛlɛ, Jesus əgɛ yɛ aa kɛi pa tɛɛi laa daai. 29Kɛlaa, di ɉu hon diɛ mą: «Gu yii ɓɛ, kpinį aa gbɛa pɛlɛ.»

Da diɛni di lɛɛ laa. 30Di kɛɛ yələ wilii laa mį́į́ kɛi da Jesus ni, Jesus ə Yáláhɛɠɛɛɓo nɛɠɛ tii mąą mɛ̨nį ɓa, ə ɉu tee ə nu kəlee nwɛi tɛɛ pɔ. 31Nąąlɔwai, di ɲɛ̨i laa ə ɓo di Jesus kɔ́lɔn gea, kɛlaa, ə kwɛlɛɛn di ɲɛ̨i mu. 32Di hee kɛa diɛ mo di kee lɔwai diɛ kɛ mą: «Ɓɛlɔwai ŋɛ̨i ə kɛi Yálá laawoo hɛɓɛ́ hukulɔ la guɔ bələ pɔi, kɛlɛi ŋąą nɛɛ ə kɛi kpɔ gu kulɔ ee!»

33Di di muhəɠə kpɔlɔ tii ŋąąɓa diɛ pa Ɉerusalɛmə. Di galan nɛa pow kɔ́w hveelɛ tii kaa da di ɓɛlaani di ŋąąkpɔn ŋąą. 34Di mo nu hveelɛi tii ɓa diɛ diɛ: «Jesus aa muhəɠə kpɔ aa kulɔ haaɓɛlaa lɔwai a tɛ̨ą, Simɔn ə gaa.»

35Diɛ kpɛli, yiiɠaa kpɔ di gaa bələ pɔ, di ɉukulɔ, ə lɛɛ, da pələi di Jesus kɔ́lɔn na nɛɠɛ ŋąąkwɛlɛi lɔwai.

Jesus ə gbɔwɔ lɛ nwɔ kalan nɛai diɛ

(Matie 28.16-20; Markə 16.14-18; Ɉaan 20.19-23; Gɛlaɠaa 1.6-8)

36Nąąlɔwai, di lɛɛ lɔ moi tii, Jesus yaa kpinįi ə kulɔ ə tɔɔ di lɔwai, yɛ diɛ: «Yálá ə liilaa tɛɛ ka pɔ.»

37Di kəlee di ɲɔw kpɔ kɛnɛ̨, mąąhɔlɔɓo, ə kɛ di kwəi haaŋąmu ta li. 38Kɛlaa, Jesus ə mo diɛ, yɛ diɛ: «Lə mɛ̨nį ɓa ka kwəi aa pili kaa, ə lɛɛ, kaa ɲįnɛ-ɲį́nɛ̨n? 39Ka ɲééɠaa da gɔ́wɔ́ɠaa kaa, ɲą́ą́ Jesus ɲą́ą́ li! Ka ka yee hee mą́ą́ ka gaa. Mąąhɔlɔɓo, haaŋąmu nwɛi, gɔlɔ hvo mą, ə lɛɛ, gɔw hvo ɉu yɛ pələi ŋɛ̨i gáá la.»

40Ə kɛi lɔ mo tii, yɛ ɲee ŋą da gɔwɔ mɛ̨i lɛ diɛ. 41Di hvo kɛi pɛli laai na, mąąhɔlɔɓo, di kwəinɛ̨ɛ̨i kɛ kɛnɛ̨, ə lɛɛ, di kwəi piliɛ ni kɛ diɛ. Jesus ə di mąąni kɛ yɛ diɛ: «Laa mį́į́ hɛn da kaa ɓɛ ka yəi?»

42Di hɔ̨nwɔ̨lee yələŋąa ta həɠə di dɛɛ bɔ. 43Ə mį́į́ di ɲɛ̨i ɓa. 44Yili pulu ə mo diɛ, yɛ diɛ: «Mɛ̨nįɠaai ŋį́ kɛi mo kaa, ɓɛlɔwai gu kɛ la gu kee pɔ ya ka; ŋį́ kɛ kaa: mɛ̨nįɠaai kpɔ kɛ bɛ̨ɛ̨ náá mɛ̨i Moisə nwɔ tɔ́n ɉɛɓɛ́i hu, Yálá kwəi mɛ̨nį hukulɔ nuą, da Yálá Mąątɛnɛ Wələɠaa hu, hvo kɛli gəlee laa ə hvɛɛ.»

45Nąąlɔwai, Jesus ə di wɔ kilaa pono ɲɛ̨i hvólóon, əgɛ, di Yálá laawoo hɛɓɛ́ kpaɠala kaa 46Ə mo diɛ, yɛ diɛ: «Yii bɛ̨ɛ̨ ya ka: Nwun mąąɓomun Yálá ə naakwɛlanmo, hvo kɛli ə mɔ̨nɔ̨ mį́į́, ə haa, voló ɉaaɓa yələ ə kulɔ haaɓɛlaa lɔwai. 47Yaan a kɛ tii, nąą hu ɓə di kaa pai hįi kəlee kalan ɉi la, əgɛ, di di túwɔ́ pələ ɲɔ̨nŋąa mąąhvalin, di kɛ nɛ̨ŋɛ̨n mąąhvaa ə lɛɛ, ə gɔɠɔ tɔɔ Ɉerusalɛmə. 48Ka káá a mɛ̨nįɠaa tii kəlee nwɔ kɛla. 49Ɲą́ą́n ŋą lii, yii Nąn ə naakwɛlanmo kaa, ŋą dɛɛ. Kɛlaa, ka lɛɛ ɓɛ daa lee hu, ə lɛɛ la ɉu, ka huwalawala ta hɔlɔɓo yɛ həɠə Yálá pɔ.»

Jesus ə tɛ yələkɔlɔn ɉu

(Markə 16.19-20; Gɛlaɠaa 1.9-11)

50Yili pulu, Jesus ə di həɠə di kulɔ daa lee hu də li Bɛtani daai pələ. Di həliɛ laa, ə ɲee haŋą di mɛ̨i, ə lúwɔ́ too diɛ. 51Ɓɛlɔwai ə kɛi núwɔ́i tii too la diɛ, Yálá ə kɛi muhəɠə yɛ dɛ yələi pələ. 52Yii ɓaa galan nɛa tii di nwɛi, di kwɛli hvilɛn ma, di pənə də li Ɉerusalɛmə kpɔ a kwəinɛ̨ɛ̨. 53Hvóló kəlee di kɛi li Yálá hee pɛlɛ́ mu, diɛ Yálá mąąwiɛ.

Actualmente seleccionado:

Lukə 24: BKPG

Destacar

Copiar