Lukə 21

Galanən da ə Yálá kɔ́

(Markə 12.41-44)

1Jesus ə́ kɛ Yálá hee pɛlɛ́ mu, mɛ̨nįɠaai kɛi tɛɛ yɛ gaa. Ə hɛn gɔw nąmįną kaa diɛ pa diɛ Yálá kɔ́ a di yəi hɛn gɔwɠaa. 2Ə kalanin ta kaa ə wali pɛlɛɛ hveelɛ too ɉɛn ɲąŋą hu. 3Jesus yɛ diɛ: «A tɛ̨ą kpɔ-kpɔ gáá moi kaa, galanən nɛ̨ɛ̨nui ŋɛ̨i a hɛn gɔw kɛnɛ̨ too a tɛɛ nu kəlee ɓa. 4Mąąhɔlɔɓo, nuą yiiɠaai tii di wɛi, wali yii di mąąkpaan və kɛ mą, ya ɓə di gɛ a kɔ́ɓo hɛn. Kɛlaa nɛ̨ɛ̨nui ŋɛ̨i, pələi tii gaa la a yeehvowolomun yii lɔ kɛ ɲəi a gɔ̨nɔ̨n ɉɔ̨nwɔ̨ gəlee ka tii ə dɛɛ Yálá pɔ.»

Jesus ə Yálá hee pɛlɛ́ pu mɛ̨nį ɓo

(Matie 24.1-2; Markə 13.1-2)

5Nu taɠaa di kɛi Yálá hee pɛlɛ́ lɛlɛ mɛ̨nį ɓo, pələi gwɛniɠaa mąą haaɠaa la a nɛlɛɛ da hɛn yiiɠaai kɛ a Yálá nwɔɔ. Nąąlɔwai Jesus ə mo diɛ yɛ diɛ: 6«Yələ ta kaa pai ɉəlii, gwɛniɠaai ŋɛ̨i ka káá gaai dɔ̨nɔ̨ kpɛli hva lɛɛ mɛlan mɛ̨i, gəlee kaa pai taɠai gee ɓa.»

Laa nɔ̨nwɔ̨ da ɓɛlɛkpɛɛ mąą

(Matie 24.3-14; Markə 13.3-13)

7Nuą tii di Jesus mąąni kɛ diɛ mą: «Kalamɔ̨ɔ̨, mįnɛ̨ lɔwai ɓə yili kaa pai kɛi la? Pɔɔ kɔ́ɔn nɛɠaai ɓə da mɛ̨nįɠaai tii pai lɔwai lɛ?»

8Jesus yɛ diɛ: «Ka gɛ a nɛlɛɛ, ka hvo nɛɛ laa nu ta hvo ka ɓowo, mąąhɔlɔɓo, nu tamąą kaa pai pai náá hu diɛ kɛ diɛ: ‹Nwun mąąɓomun Yálá ə naakwɛlanmo, ya ɓaa a ɲą́ą́!› Ə lɛɛ: ‹Lɔwai aa ɉəli!› Kɛlaa, ka hvo hvilɛn di pulu. 9Ɓɛlɔwai ka káá pai kɛi kɔ́ mɛ̨nį mąą pələ mąn ɉi la, ə lɛɛ, nuą diɛ di muhəɠə di wɔ nwun nąmįną laa ɓa; ka hvo ɲɔw. Hvo kɛ li mɛ̨nįɠaa tii di gbɛa kɛ, kɛlaa, yili hvo pai kɛi a yɛnɛ̨ɛ̨ ŋąąkpɛɛ mɛ̨nį.»

10Yili pulu yɛ nwɔ̨nɔ̨ diɛ: «Lɔi kaa pai muhəɠəi mɛlan nɔi laa ɓa, tɔɔ ɓɛlaa diɛ di muhəɠə di kee laa ɓa. 11Lɔi kaa pai kɛi kpɛlin ɉi a gbɛa-kpɛa kɛɛnąą tamąą, pulu yɛ too, ɲɔ̨n ɉuwu ɲɔ̨nwɔ̨ɔ̨ɠaa diɛ pu nuą mɛ̨i nąą taɠaa. Mɛ̨nį mąą ɲɔwɔ kpɛa-kpɛa tamąą kaa pai kɛi kɛi yələ kwəi.

12«Kɛlaa, gɛɛ yili kəlee ə kɛ, di kaa pai kɛi ka hon ɉii diɛ ka ɓɛlɛkpɛɛ kaa, diɛ ka kiti tee di wɔ Yálá hvɛli pɛlɛ́ɠaa mu, diɛ ka too gaho ŋą. Di kaa pai kɛi lii a kaa nwun nąmįną da ɲɛ̨itɔwɔ nuą lííla, náá mąą mɛ̨nį ɓa. 13Yili ɓə a lɔwai tɛɛ ka pɔ, əgɛ, ka mą́ą́ kɛla hvaa ɓo. 14Yili mąą mɛ̨nį ɓa, nąąlɔwai a həli, ka hvo ka liihɛlɛn a woo yii mąąnɛ̨ɛ̨ ka mo. 15Mąąhɔlɔɓo, ɲą́ą́ gbinįi ŋą kilimąą wooɠaa tɛ ka la, kaa mo. Yii ka yowo ta lɔpee hva pɛli bulu həɠəi. 16Ka káá nuą, ka kaayɔwɔɠąa ə mą kɛ ka ɓɛlaa, di kaa pai kɛi ka tɛŋɛn gwɛlɛi. Di kaa pai nu tamąą paai ka lɔwai. 17Ka wɛli kaa pai kpɛɛi nu kəlee ɓa, náá mąą mɛ̨nį ɓa. 18Kɛlaa, ə mą kɛ ka nwun-nəɠa kɔ́w tɔ̨nɔ̨ kpɛli hva pili ɉu. 19Ka tɔɔ kpaan, ya ɓə a gɛ ka nwun mąą ə ɓo.»

Ɉerusalɛmə taa wolo mɛ̨nį

(Matie 24.15-21; Markə 13.14-19)

20«Ɓɛlɔwai ka káá pai kɔlaɠa kaai la a Ɉerusalɛmə taa mąą tinɛ̨n, ka gɔlɔn kaa diɛ, daa woloi lɔwai aa həli. 21Nąąlɔwai, nuąi da kɛ Ɉude lɔi hu, di pu də li ɲee tonnaɠaa ɓa. Nuąi da kɛ Ɉerusalɛmə, mąąnɛ̨ɛ̨ di kulɔ laa. Yiiɠaai da kɛ ɲɛɛ kɔ́wɔɠaa hu, di hvo kɛ di kaa pai taai. 22Volóɠaa tii hu ɓə Yálá kaa pai nwąną kulɔi la, əgɛ, mɛ̨nįɠaai Yálá laawoo hɛɓɛ́ ə mo nąą ə hvɛɛ. 23Kpalo a ɓɛla koonɛ̨ąɠaa da kɔ̨nwɔ̨leeɠaa diɛ a volói tii. Mąąhɔlɔɓo, volói tii, nɔi ŋɛ̨i hu nuą da mɔ̨nɔ̨ kɛnɛ̨ mį́į́, ə lɛɛ, Yálá nwɔ lii ɲąnwąną a kulɔ ponoŋą nuą ŋɛ̨i diɛ. 24Di kaa pai di paai a ɓɔwa, di kaa pai damąą kɛi a luwɔɠaa lɔi tamąą hu, nuąi di hvo laa li Yálá la, di kaa pai di kɔ́wɔ hiɛi Ɉerusalɛmə taa hu, ə lɛɛ la ɉu, nuąi di hvo laa li Yálá la di wɔ huwalawala nwɔ lɔwai ə kpɛɛ.»

Nu Lon pai lɔwai

(Matie 24.29-31; Markə 13.24-27)

25«Mɛ̨nįɠaa kaa pai kɛi hvóló ɓa, da yɛ kɛ ɲąnįn ma da pɛmɛ̨nɛ̨n gɔwɠaa. Lɔi mɛ̨i da, gboloyá hu tin gɛ pələ, yɛ liihɛlɛn doo nuą diɛ. 26Nuą da di kiliŋąhiɛ, mɛ̨nįi pai kɛi lɔi mɛ̨i mąą mɛ̨nį ɓa, diɛ haa a ɲɔw. Mąąhɔlɔɓo, hɛnŋąa kpɔ di kaa yələ kwəi, da həɠə di tɔɔi. 27Yili pulu ɓa ɓə, da Nu Lon kaa la, ɉeɛ tulɔ kpiliɠilin mɛ̨i yɛ pa a huwalawala da mąąwiɛ kɛnɛ̨ɛ.

28«Ɓɛlɔwai mɛ̨nįɠaai tii kaa pai gɔwɔ tɔɔi la yɛ kɛi, ka ka nwun muhəɠə ka yələi kaa, mąąhɔlɔɓo, Yálá kaa pai kɛa ka nwun mąąɓoi ɉu hvo kwɛa li.»

Mɛ̨nį yii ɓɔlaa wulu a nɛ

(Matie 24.32-35; Markə 13.28-31)

29Yili pulu, Jesus ə ɉanwon ŋɛ̨i hɔɔ diɛ yɛ diɛ: «Ka ɓɔlaa wulu kaa da wulu takpɛliɠaa. 30Ka ɓɔlaa wulu kaa nąą yɛ tɛlin, a kɛ tii tulɔ-ya lɔwai kaa lɛɠɛi. 31Pələ lɔ ɓə gaa la, ka mɛ̨nįɠaa tii kaa yɛ kɛ, a kɛ tii Yálá-taa tɔɔlaai pai lɔwai kaa lɛɠɛi. 32Gáá mo kaa a tɛ̨ą, háákələi nuą ŋɛ̨i gəlee di hvo pai haai, mɛ̨nįɠaa tii kɛi lɔwai yɛ həli. 33Yələkɔlɔn da lɔi di kaa pai tɛɛi, kɛlaa nwóóɠaa ŋɛ̨i dɔ̨nɔ̨ kpɛli hva tɛɛ.»

Ka lɛɛ a ka ɲɛ̨i

34«Ka ka kpɔɔ mɛ̨i kaa. Ka hvo ka nii lɔ yɛnɛ̨ɛ̨liiɓa hu, ka hvo kɛ a lɔɔ honŋąa. Ə lɛɛ, ka hvo ka liihɛlɛn a ka wɔ yɛnɛ̨ɛ̨ kɛ hɛn mɛ̨nį. Ə kulɔ yili pulu, volói tii kaa pai kulɔi ka kəlee ka tɛɠii. 35Mąąhɔlɔɓo, gaa pai pui yɛnɛ̨ɛ̨ nuą kəlee mɛ̨i yɛ pələi da diŋɛ̨n bili la yai. 36Ka hvo yii, ka Yálá hvɛli a lɔwai kəlee; ya ɓə a gɛ, huwalawala ə hɔlɔɓo ka yəi, mɛ̨nįɠaa ŋɛ̨i pai pai ka kulɔ ɉu, ə lɛɛ, ka tɔɔ kpaan tinąą Nu Lon lííla.»

37Akɛ a yələ ɓɔɔ, Jesus ə kɛi li Yálá hee pɛlɛ́ mu yɛ nuą kalan. Yələ wilii pɔ, ə kɛi li yɛ yii Olivə yee ɓa. 38Nuą kəlee di kɛi pa yələ wala pɔ Yálá hee pɛlɛ́ mu, əgɛ, di di wəli tɔɔ Jesus woo ɓa.

Actualmente seleccionado:

Lukə 21: BKPG

Destacar

Copiar