Lukə 20
20
Mį ɓə Jesus nwɔ huwalawala ə həɠə laa
(Matie 21.23-27; Markə 11.27-33)
1Hvóló ta, Jesus ə kɛi nuą kalan Yálá hee pɛlɛ́ mu, yɛ wɛlɛɛ lɛlɛɛ hukulɔ nuą diɛ. Ɉaláá laa həli nuą, tɔ́n galamɔ̨ɔ̨ɠaa da nɔi kalanɉonŋąą di pa. 2Diɛ Jesus ɓa: «Ɉeeɓolaai ə́ kaa mɛ̨nįɠaa ŋɛ̨i kɛi la, mo kuɔ.»
3Jesus ə di woo pulu pənə yɛ diɛ: «Ɲą́ą́ gbɛli gáá ka mąąni kɛi; 4Gbɛɛ ɓə Ɉaan tɔɔ yɛ mąąwaa kɛ, Yálá ɓə, a wala kɛ tii nuą ɓə? Ka bulu pənə.»
5Diɛ ɉu yala di kee lɔwai, diɛ kɛ mą: «Gwa kɛ mą: ‹Yálá ɓə dɔɔ›, gaa pai kɛi guɔ: ‹Lə mɛ̨nį ɓa ka hvo laa na?› 6Gwa kɛ nwɔ̨nɔ̨ mą: ‹Nuą ɓə dɔɔ›, nu kpulu kaa pai gu hɔɔi a kwɛni di gu paa. Mąąhɔlɔɓo, di laai na diɛ Ɉaan ə kɛ a Yálá kwəi mɛ̨nį hukulɔ mun.»
7Di Jesus woo pulu pənə diɛ mą: «Nui Ɉaan tɔɔ əgɛ, yɛ mąąwaa kɛ, ku hvo gɔlɔn.»
8Jesus yɛ diɛ: «A kɛ tii, ɲą́ą́ gbɛli, nui mɛ̨nįɠaai ŋɛ̨i kɛɛ mąą laa tɛɛ bɔ́ və́ naa ɓoi kaa.»
Kóló kɛ nuą ɲɔ̨nwɔ̨ɔ̨ haaɓa mąą hanwon
(Matie 21.33-46; Markə 12.1-12)
9Yili pulu, Jesus ə hanwon ɉɔɔ nu kpului tii ɓa yɛ diɛ: «Nu ta ə viɲə yɛa laa. Ə ɉəɠə ə dɛɛ nuą pɔ, diɛ goló kɛ. Yili pulu ə li hiɛ ɓa ə lamun laa. 10Viɲə ɓai lɔwai, ə ŋą tímun dɔ̨nɔ̨ tɔɔ, əgɛ, di nwɛi tɛɛ. Kɛlaa, goló kɛ nuą di ɉon, di gɛlɛ, di gbɛ ə pənə a ɲee howolo. 11Ə pənə ə dakpɛli tɔɔ, di nui tii hon, di gɛlɛ nwɔ̨nɔ̨ di nalan, di gbɛ ə pənə a yeehvowolo. 12Ə pənə nwɔ̨nɔ̨ ə ɉaaɓanąą tɔɔ, yili nwɛi di gɛlɛ, di mąą nwąną, di nɛɠɛ həɠə di bili ɲɛa pulu pələ. 13Viɲə nąmu yɛ diɛ: ‹Ŋą́ gɛ ləi kɛa? Gáá nwɛ̨́li kɛ mąą lon dɔ̨nɔ̨ ŋɛ̨i, tɔɔi laa. Gbəli, di kaa kiɛ pai mąąwiɛi.› 14Kɛlaa, gaai di mo yɛ pa, di mo di kee ɓa diɛ kɛ mą: ‹Nui gwɛlin gaa pai lɛɛi ɲəi ya ka, ka gu baa, gwɛlin ə lɛɛ a gu wɔɔ.› 15Di ɉon di kulɔ la ɲɛa pulu, di baa.»
Jesus yɛ diɛ: «Viɲə nąmu a pa, lə ɓə a gɛ a nuą tii? 16A pa, a nuą tii kəlee paa, ə ɉihɛn galihvaɓo nu takpɛliɠaa diɛ.»
Nwoo tii mɛ̨n di mo, diɛ mą: «Ɲɔ̨nwɔ̨ɔ̨ ə hvóló!»
17Kɛlaa, Jesus ə ɲɛ̨i hee diɛ yɛ diɛ: «Nwoo ŋɛ̨i Yálá laawoo hɛɓɛ́ ə mo mukulaa ɓaa lə? Yai ə kɛ mą:
«‹Gwɛnii pɛlɛ́ tɔɔ nuą di lənə mą,
yaamun mə a bɛlɛ kɔ́wɔ hvilɛn gwɛni leelee.›
18«Nui lɔpee a too gwɛni tii mɛ̨i a ɉu yali-yali, nui nwɔ̨nɔ̨ gwɛni tii a too mɛ̨i, a ɉu hunwɔ̨.»
Nįįhɔ̨nwɔ̨ kulɔ mɛ̨nį Sesarə ɓa
(Matie 22.15-22; Markə 12.13-17)
19 Dɔ́n galamɔ̨ɔ̨ɠaa da ɉalaa laa həli nuą kpɛa-kpɛaɠaa, di gɔlɔn, diɛ kɛ, diɛ ka tii Jesus ə di mąą hanwɔ̨n ɉɔɔ, kɛlaa, di kɛi ɲɔw nuą diɛ. 20Di kɛi Jesus mąą hɛŋi, nuą tii kɛi di kpɔɔ kaa yɛ nu mąą nwumɛ̨ɛ̨ɠaa, di nuą tɔɔ Jesus hon mɛ̨nį ɓa vaa woo hu, a mąąni kɛ ta, əgɛ di dɛŋɛn gwɛlɛ nɔi nąmįną da ɲąąwooɓo kɛ nuą?. 21Di mąąni kɛ diɛ mą: «Kalamɔ̨ɔ̨, ku gɔlɔn gbɔ kuɔ diɛ yii ya mo, da yii ya nuą kalan na, gaa a ɉaŋąa. Hva ə ɲɛ̨i hee nu kɛ pələ ɓa, kɛlaa, yá nuą mąąkwɛli Yálá kɔ́lɔn bələ ɓa a tɛ̨ą. 22Ku kilaa pono, gwa pɛli mɔ̨ɔ̨ nįįhɔ̨nwɔ̨ kulɔi Sesarə ɓa?»
23Kɛlaa, Jesus ə di wɔ gbana laa mu kaa, yɛ diɛ: 24«Nwalii da nįįhɔ̨nwɔ̨ kulɔ la, 'ka pa a da, ŋą gaa.»
Yɛ diɛ: «Gbɛɛ mąą nįnįn, da gbɛɛ yee pɔɔ ɓə ŋɛ̨i nwali ɓai?»
Di bulu pənə, diɛ mą: «Sesarə ɓə!»
25Ya ɓə Jesus a kɛ diɛ yɛ: «Yii kani gaa tii, 'ka Sesarə nwɛi tɛɛ Sesarə pɔ, 'ka Yálá nwɛi tɛɛ Yálá pɔ.»
26Di hvo pɛli di ɉon ɉii nwooɠaa tii ta hu nuą ɲɛ̨i ɓa. Kɛlaa, yaamun, nwɔ woo pulu pənə ə di kwəi pili diɛ, da hvo pɛli hvaai.
Sadusiɛ̨ɠaa
(Matie 22.23-33; Markə 12.18-27)
27 Sadusiɛ̨ɠaa, di hvo laa li haa ɓɛlaa nwun mɛ̨nį la. Daɠaa di pa Jesus pɔ, di mąąlən gɛ, 28Diɛ mą: «Kalamɔ̨ɔ̨, tɔ́n Moisə ə bɛ̨ɛ̨ ə dɛɛ ku pɔ ya ka; yɛ mą; akɛ nu ta a haa, nɛ̨ą a lɛɛ, hvo lon gaa li mą; mąąnɛ̨ɛ̨ nąn nonnii ta ə nɛ̨ɛ̨nui tii həɠə a nɛ̨ą, ə lon gaa mą, ə ɉaamun tii huwu kulɔ. 29Yaan, nąn gaa mɛ̨ihveelɛ di kɛ laa, nu pɔlɔ ə nɛ̨ą həɠə, ə haa hvo lon gaa nɛ̨ɛ̨nui tii ɓa. 30Yili nwɔ ləɠə ə pənə ə galanən tii həɠə, yaa kpɛli hvo lon gaa mą ə haa. 31Ɉaaɓa kɛɛnąą yaa kpɛli əgɛ lɔ tii. Ɉinąą mɛ̨ihveelɛi tii kəlee, di haa, di ta hvo lon gaa nɛ̨ɛ̨nui ɓa. 32Yili pulu, nɛ̨ɛ̨nui yaa kpɛli ə haa. 33Akɛti, haaɓɛlaa nwun ɲələ a ɉələi, nɛ̨ɛ̨nui tii a lɛɛ a gbɛɛ nɛ̨ą? Mąąhɔlɔɓo, ə hee mɛ̨ihveelɛi tii kəlee pɔ.»
34Jesus ə di woo bulu pənə yɛ diɛ: «Yɛnɛ̨ɛ̨ ɓɛ lɔ ɓə nɛ̨ą hee mɛ̨nį kaa laa, da hilɛtaa mɛ̨nį. 35Kɛlaa, nuą di mąąnɛ̨ɛ̨i di nwun, di kulɔ haa yəi; di lɔ ɲɛnɛ̨ɛ̨ nįnɛ̨i pai ɉu, nɛ̨ą həɠə mɛ̨nį hvo diɛ, hilɛ həɠə mɛ̨nį hvo diɛ. 36Haa mɛ̨nį hvo kɛa diɛ, di kɛ pələ a kɛ yɛ malakaɠaa. Di kaa Yálá lonnii, mąąhɔlɔɓo, daa nwun. 37Haa ɓɛlaa nwun mɛ̨nį nwɛi, Moisə ə yili mo kpɔ a ɉu ponoɔ̨, ɓɛlɔwai ə kɛi nwɔ̨n nən mąą mɛ̨nį pɛ̨ɛ̨ laa nwɔ hɛɓɛ́i hu; yɛ kɛ Ną́mu Yálá laa ɓa a: ‹Abrahamə nwɔ Yálá, Isaakə nwɔ Yálá da Ɉakɔbə nwɔ Yálá.› 38Yálá kaa a nu hvulúmąąɠaa di wɔ Yálá, hvo a haa nuą di wɔ Yálá. Hvo gaa, di kaa kɛa ɲəi a di hvulú.»
39 Dɔ́n galamɔ̨ɔ̨ taɠaa di mo kɛa diɛ Jesus ɓa; diɛ mą: «Kalamɔ̨ɔ̨, yáá mɛ̨nįi tii ɓo kpɔ a nɛlɛɛ.» 40Mąąhɔlɔɓo, nu tɔ̨nɔ̨ kpɛli hvo pɛli kɛa mąąni kɛi.
Nwun mąąɓomun Yálá aa ɉəɠə ɉu da Davidə
(Matie 22.41-46; Markə 12.35-37)
41Jesus yɛ diɛ: «Da pɛli kɛi ləi Nwun mąąɓomun Yálá ə ɉəɠə ɉu mą, Davidə lon? 42Mąąhɔlɔɓo, Davidə yaa kpinįi ə mo kpɔ Yálá mąątɛ̨nɛ̨ wələ hu, yɛ kɛ mą:
«‹Ną́mu Yálá ə mo Ną́mu ɓa yɛ mą: Hee mamįiyee hu;
43ɛlɛɛ ɉu, ŋą ə yowoɠaa pɛlɛ ə́ kɔ́wɔ mu, yɛ haɠa, ə́ hiɛ di mɛ̨i.›
44«Davidə kpinįi a kɛi kɛ Nąmu Kristə ɓa: ‹Ną́mu› yili a pɛli kɛi ləi a non da?»
Jesus ə ɉɛɓɛ́ kɛ nuą hon mo
(Matie 23.1-36; Markə 12.38-40)
45Ɓɛlɔwai tii nuą kəlee wəli tɔɔ kɛ la, Jesus ə mo nwɔ kalan nɛai diɛ yɛ diɛ: 46«Ka ka mɛ̨i kaa dɔ́n galamɔ̨ɔ̨ɠaa mąą mɛ̨nį ɓa, diɛi di liiɓa ɓaa diɛ həɠə kpɛa-kpɛa too di kwaną. Nu ta a kɛi di tuwɔ ɓo kwəli hɛ̨ąi, hvo kɛli a kwɛli hvilɛn diɛ, da lɔ Yálá hvɛli pɛlɛ́ mu, heei lɛlɛɛɠaa ɓə da gwɛli di hee laa. Da di təli kuu ɓa, nu kpɛa-kpɛa hee ɓə da gwɛli. 47Da too galanən nɛ̨ą mɛ̨i di di yəi hɛnŋąa həɠə, ɛlɛɛ, diɛ lamun Yálá hvɛliɛ hu, əgɛ, di di kpɔwɔ lɛ a nu lɛlɛɛɠaa, di wɔ gahoi kaa pai walawalai.»
Actualmente seleccionado:
Lukə 20: BKPG
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
