Lukə 17
17
Nɛ̨ŋɛ̨n da mąąhvaalɛɛ mɛ̨nį
(Matie 18.6-7, 21-22; Markə 9.42)
1Jesus ə mo nwɔ kalan nɛai diɛ, yɛ diɛ: «Nuą too mɛ̨nį nɛ̨ŋɛ̨n ɉu, yili hva ɉəɠə mą; kɛlaa, nui a mɛlan doo nɛ̨ŋɛ̨n ɉu, nɛ̨ŋɛ̨n naa ɓə. 2Vialaɓoɔi di kwɛni kpuwulu kɛnɛ̨ kpulɔn mąą nu kwaną, di bili gboloyá baləi, əgɛ, hvo pa nɛapɛlɛɛ ŋɛ̨i dɔ̨nɔ̨ kpɛli lan. 3Ka gɛ a nɛlɛɛ, yili hu.
«Akɛ, ə́ nąn non a nɛ̨ŋɛ̨n həɠə yɛ́, ka mo ka nu hveelɛi ka lɔwai, akɛ, a dúwɔ́ pələ mąąhvalin, ə́ mąąhvaalɛɛ. 4Ə mą kɛ aa nɛ̨ŋɛ̨n ɉəɠə yɛ́ gee mɛ̨i mɛ̨ihveelɛ hvóló tɔ̨nɔ̨ yee mu, ɛlɛɛ, ə pənə, ə pa ə́ pɔ gee mɛ̨i mɛ̨ihveelɛ, yɛ kɛ yɛ́: mą́ą́hvaalɛɛ; mąąnɛ̨ɛ̨ ə́ mąąhvaalɛɛ.»
Laa na laa
5Jesus nwɔ kɛlaɠaa tii di mo Ną́mu Jesus ɓa, diɛ mą: «Kuɔ laa na laa ta pɛlɛ mą.»
6Ną́mu ə di woo pulu pənə yɛ diɛ: «Akɛ kɛ, ka wɔ laa na laa a kɛ kpɛli yɛ gbɔ kɔ́w, ka pɛli kaa nwului ŋɛ̨i ɓa: ‹Kulɔ ɓɛ, ə́ li, ə́ tɔɔ gboloyá hu!› A gɛ kpɔlɔɔ yɛ pələi tii ka mo la.»
Tímun a gɛ kóló kɛ
7«Akɛ gbəli hu, luwɔ a kɛ ka ta yəi, yɛ nwɔ kɛɛhí, a wala kɛ tii yɛ nwɔ taatɛlɛɛɠaa mɛ̨i kaa; ɓɛlɔwai a nuwɔi tii kaa la yɛ həɠə ɲɛa pələ yɛ pa, a nɛɛ ŋąąɓa, yɛ kɛ mą: ‹Pa ə́ ə́ kɔ̨nɔ̨n mį́į́?› 8Kpaa-o! Kɛlaa yaamun, a kɛ mą: ‹'Gɔ́nɔ̨n ɲili! 'Ə́ hąą yili, 'mą́ą́ mɛ̨nį ɲɛ̨i kulɔ nįį, ŋą kɔ̨nɔ̨n mį́i kɛa, ŋą gbə́lə; yili pulu, yá kɔ̨nɔ̨n mį́i, ə́ ə́ kpələ.› 9Akɛti, a mɔ̨ɔ̨ kɛ nuwɔi tii ɓa: Ə́ mąmą! Mąąhɔlɔɓo, aa gɛ koló kɛ? 10Bələ kpɔlɔɔ ɓə gaa la, ka mąą mɛ̨nį ɓa, yii da ka tí la, ka kpɛɛ a yiliɠaa kɛɛ; mąąnɛ̨ɛ̨ kaa diɛ: ‹Tínuą kpɛli-kpɛli lɔ ɓaa a kuɔ. Yii mąąnɛ̨ɛ̨ ku gɛ, ya lɔ ka tii ku gɛ.›»
Jesus ə hvólóɲɔ̨n gɛ mun da ɓalo
11Ɓɛlɔwai Jesus ə kɛi li la Ɉerusalɛmə, ə tɛɛ Galile lɔi da Samari lɔi di lɔwai. 12Hvólóɲɔ̨n gɛ nuą pow di pa naa kwiɛn ɉii, ɓɛlɔwai ə tɛ la taa lon da hu. Di tɔɔ kwɛa la, 13diɛ tómą kpɔ diɛ kɛ mą: «Mąąkwɛli kɛmun Jesus, ku ɲɛ̨imąąwɛli kaa.»
14Jesus ə ɲɛ̨i hee diɛ, yɛ diɛ: «'Ka li ka ka kpɔɔ lɛ ɉala laa həli nuą kpɛa-kpɛaɠaa diɛ.»
Ɓɛlɔwai di kɛi li la, di kəlee di kɔ́lɔi ə pono. 15Nu tɔ̨nɔ̨ ə kɛ di lɔwai, ɓɛlɔwai ə gaa la yɛ kɛ gɔlɔi a pono; ə yali bulu yɛ pa, yɛ Yálá hɛɠɛɛɓo kpɔ a nwoo kɛnɛ̨. 16Ə pa ə pɛlɛ Jesus kɔ́wɔ mu, ə ɉɛɠɛɛ ɓo. Ɉulɔnui tii ə kɛ a Samari mun. 17Nąąlɔwai Jesus ə mo yɛ diɛ: «Akɛti, nu pow tii kəlee kɔ́lɔi hvo pono? Mɛ̨inąąn tii di lɛɛ mį? 18Akɛti, dɔ̨nɔ̨ kpɛli hvo pənə li hvo pa hvo Yálá hɛɠɛɛɓo, hvo kɛi lɔ nwɛ̨ąi ŋɛ̨i?»
19Yili pulu Jesus ə mo ɉulɔnui tii ɓa, yɛ mą: «'Ə́ muhəɠə ə́ li, ə́ wɔ laa na laa aa ə́ ɓalo.»
Yálá nwɔ tɔɔlaai pa mɛ̨nį
(Matie 24.23-28, 37-41)
20 Farisiɛ̨ɠaa di Jesus mąąni kɛ, diɛ mą: mįnɛ̨ lɔwai ɓə Yálá-taa tɔɔlaa kaa pai la? Jesus ə di woo pulu pənə yɛ diɛ: «Yálá nwɔ tɔɔlaai hvo pai pai ŋɛ̨i nuą di hvo gaa. 21Di hvo pai kɛi mą: ‹Gaa ɓɛ!› A wala kɛ tii: ‹Gaa ɓɛi ti!› Mąąnɛ̨ɛ̨ ka gɔlɔn kaa diɛ: Yálá nwɔ tɔɔlaai kaa ka lɔwai.»
22Yili pulu ə mo nwɔ kalan nɛai diɛ, yɛ diɛ: «Volóɠaa ŋɛ̨i ka Nu Lon ni ka káá la ka kee ɓa, gaa pai kɛi a hvóló ta, kaa volóɠaa tii ta wɔlɔ ɓo, kɛlaa, ka hva kɛa da kaa. 23Di kaa pai kɛi kaa: ‹Gaa ɓɛ ti!› A wala kɛ tii: ‹Gaa ɓɛ ŋɛ̨i!› Ka hvo həɠə kaa hvilɛn di pulu. 24Yɛ bələi mąlą-mąlą a gɛ la yələi yɛ kɛɛ nąą kəlee pono, pələ kpɔlɔ ɓə Nu Lon ba hvóló kaa pai kɛi la. 25Kɛlaa, gɛɛ yili hvo kɛ, gaa pai mɔ̨nɔ̨ mį́į́ kpɔ kɛnɛ̨, ə lɛɛ, háákələi nuą di lənə mą. 26Bələi lɔ ə kɛ la a Noe nwɔ yələi pələ lɔ ɓə gaa pai kɛi la a Nu Lon pa yələ. 27Noe ŋą yələi, nuą di kɛi di laa mį́į́, diɛ di kpələ, diɛ nɛ̨ą həɠə, diɛ li hilɛtaai, diɛ di lon nɛ̨ąni ya. Ə lɛɛ ɉu, ɲələi Noe ə lɔ la gələn ɉu, ɲą nwąną yɛ nuą kəlee nwun napili, ɲələ ə ɉəli. 28Bələ lɔ ɓə nwɔ̨nɔ̨ ə kɛ la a Lɔtə nwɔ yələi: nuą diɛ di laa mį́į́, diɛ di kpələ, diɛ lɔwɔ́tɔɔ, diɛ hihɛn ɲɛa laa, ɛlɛɛ, diɛ pɛlɛ́ tɔɔ. 29Kɛlaa, ɲələi Lɔtə ə həɠə la Sodomə, nwɔ̨n yɛ pu Sodomə nuą mɛ̨i yɛ tulɔ, ə di kəlee di nwun napili. 30Bələ kpɔlɔɔ ɓə gaa pai kɛi la a Nu Lon pa hvóló.
31«Ɲələi tii a həli, nui a kɛ ɲəi ɲįmąn mu, hvo kɛ gaa lɔi bɛlɛ́n hɛn da həɠəi, nui nwɔ̨nɔ̨ a kɛ ɲəi ɲɛa, hvo kɛ gaa tɛi taai. 32Ka ka kiliŋąhiɛ, ka hvilɛn Lɔtə nɛ̨ą nwɛi ɓa. 33Nui a nwɔ yɛnɛ̨ɛ̨ mąąkɔ̨nwɔ̨, a hvɛɠɛ a nįį; kɛlaa, nui a hvɛɠɛ a nwɔ yɛnɛ̨ɛ̨, nįį a ɓalo. 34Gáá moi kaa, mąą kpinįi tii hu, nu hveelɛ da kɛ kpin dɔ̨nɔ̨ ŋą, da dɔ̨nɔ̨ həɠə di dɔ̨nɔ̨ lɛɛ. 35Nɛ̨ą hveelɛ da kɛ kwənąi hiɠɛi da dɔ̨nɔ̨ həɠə, di dɔ̨nɔ̨ lɛɛ. 36Hinąą hveelɛ da kɛ yɛa, da dɔ̨nɔ̨ həɠə, di dɔ̨nɔ̨ lɛɛ.»
37Galan nɛa di Jesus mąąni kɛ, diɛ mą: «Mįnɛ̨ ɓə yili kaa pai kɛi laa?»
Ə di woo pulu pənə yɛ diɛ: «Ɓɛi lɔ hɛn da powa kaa laa, nąą ɓə gwąą-gwąąɠaa da di ŋąąkpɔn naa.»
Actualmente seleccionado:
Lukə 17: BKPG
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
