Lukə 16

Hɛn gɔw laaikɛ mun gbąnąą

1Jesus ə mo nwɔ kalan nɛai diɛ, yɛ diɛ: «Hɛn gɔw nąmu kɛnɛ̨ ta ə kɛ laa, ə nu ta həɠə, yɛ ɲɛ̨i kɛ nwɔ hɛn gɔwi ɓa. Hvóló ta, di pa diɛ mą: ‹Ə́ wɔ hɛn gɔw laaikɛ mun kaa ɉɛn gɔw hu kalai.› 2Ɉɛn gɔw nąmu ə nwɔ hɛn gɔw laaikɛ mun də li, yɛ mą: ‹Ŋą́ą́ mɛ̨nįɠaa mɛ̨n ə́ laa mɛ̨i, yii hvo lɛlɛ li, bələi hiɛ ə́ kaa goló kɛi la, pa ə́ gwɛlanmo kɛ. Mąąhɔlɔɓo, hvo kɛa pai lɛɛi a nwɔ́ hɛn gɔw laaikɛ mun.› 3Ɉɛn gɔw laaikɛ mun tii ə giliŋąhiɛ, yɛ diɛ: ‹Nwún nąmu kaa pai gɛ́ koló kulɔi ɲéi, a kɛ tii, lə ɓə gáá pai gɛi? Huwalawala hvo ɲéi və́ yɛa koló kɛ, ŋą kɛ nwɔ̨nɔ̨ gáá gɔ́nɔn vɛlii nuą diɛ, yili kaa pai kɛi mą́ą́ a nwumɛ̨ mɛ̨nį. 4Yii mąąnɛ̨ɛ̨ ŋį́ gɛ, əgɛ, da gúlɔ góló hu, nuą di di yee hee mú, ŋą́ą́ gɔlɔn.› 5Yili pulu, nuą kpɔ ɉɛn nąmui tii nwɔ kwələ ə kɛ diɛ, ɉɛn gɔw laaikɛ mun ə gəlee təli kpɔ tɛitɛi. Yɛ nu dɔlɔɔ ɓa: ‹Lə ɓə gwələ kaa yɛ́?› 6Yili yɛ mą: ‹Wulɔ yaliɠí nwun dɔ̨nɔ̨.› Ɉɛn gɔw laaikɛ mun yɛ mą: ‹Yii mąąnɛ̨ɛ̨ ə́ ɉala ya ɓaa: pow lɔɔli.› Ɉɛn gɔw laaikɛmun yɛ mą: ‹Ə́ wɔɔ hɛɓɛ́i ka, 'héé ə́ bɛ̨ɛ̨ pow lɔɔli ɉa-ɉa.› 7Yɛ dɔ̨nɔ̨ ɓa: ‹Yɛ́ kpɛli, lə ɓə gwələ kaa yɛ́?› Yili yɛ mą: ‹Mɔ̨nun mɔlɔ nwundɔ̨nɔ̨.› Ɉɛn gɔw laaikɛ mun tii yɛ mą: ‹Ə́ wɔɔ hɛɓɛ́i ka, 'héé, ə́ bɛ̨ɛ̨ pow mɛ̨ihaaɓa ɉa-ɉa.› 8Ɉɛn gɔw laaikɛ mun vuluɔ tii, nąmu ə mąątɛ̨nɛ̨ nwɔ gbąnąlaa túwɔ́ tii hu. Ɲɛnɛ̨ɛ̨ ŋɛ̨i hu nuą gbąnąąi di kee ni lɔwai mɛ̨nįɠaa kɛɛ hu, ə tɛɛ kɛɛ pono lonnii diɛ.»

9Jesus ə mo, yɛ diɛ: «Gáá moi kaa, ka ɓɛlan naa kwɛli kaa, a ɲɛnɛ̨ɛ̨ ŋɛ̨i hu hɛn gɔw, ya ɓə a gɛ, ɓɛlɔwai hɛn və la ka yəi, ka ɓɛlaa tii, di di ɲee hee la ka mu, bɛlɛi hva kala mu. 10Nui a tələnmolaa kɛ mɛ̨nį logolo hu, a pɛli tələnmolaa kɛi mɛ̨nį kɛnɛ̨ hu. Nui a hulu kɛ mɛ̨nį logolo hu, a hulu kɛ lɔ nwɔ̨nɔ̨ gɛnɛ̨ hu. 11Akɛ ka hvo tələnmolaa kɛ li ɲɛnɛ̨ɛ̨ ŋɛ̨i hu hɛn gɔw hui, gbɛɛ ɓə a pɛli hɛn gɔw leelee kalihvaɓoi kaa? 12Akɛ ka hvo tələnmolaa kɛ li nu takpɛli nwɔ hɛn mɛ̨nį hu, gbɛɛ ɓə a pɛli ka wɛi tɛɛi ka pɔ?

13«Nu tɔ̨nɔ̨ hva pɛli tí nwun nąmu hveelɛ ɓa. A dɔ̨nɔ̨ wɛli la kɛ, ə dɔ̨nɔ̨ wɛli kpɛɛ mą. A gwəi kwələ dɔ̨nɔ̨ ɓa, ə dɔ̨nɔ̨ hulu. Ka hva pɛli tí Yálá ɓa, kaa nwɔ̨nɔ̨ tí hɛn gɔw ɓa.»

Jesus ə mɛ̨nį tamąą ɓo

(Matie 11.12-13; 5.31-32; Markə 10.11-12)

14Yii kɛa Farisiɛ̨ɠaa di nwoo tii mɛ̨n, di kɛi yɛlɛ Jesus ɓa, mąąhɔlɔɓo, wali wɛli ə kɛ diɛ. 15Jesus ə mo diɛ, yɛ diɛ: «Ka kɛ ka kpɔɔ kɛi a nu haŋąąɠaa nuą ɲɛ̨i ɓa. Kɛlaa, Yálá ə ka kwəi kiliŋąhiɛ kɔ́lɔn. Mąąhɔlɔɓo, yii mąąwia nuą ɲɛ̨i ɓa, mɛlɛkpɛɛi ma Yálá ɲɛ̨i ɓa.

16«Yii dɔ́n ɉɛɓɛ́ ə mąą mɛ̨nį ɓo, da yii Yálá kwəi mɛ̨nį hukulɔ nuą di mo, mąąwiɛi kɛ, ə lɛɛ la ɉu, ə həli la Ɉaan Baptistə hɔlɔɓo yələ ɓa. Ə həɠə Ɉaan Baptistə nwɔ yələi tii ɓa, ə həli la yiihu ɓa, Yálá-taa tɔɔlaa mąą wɛlɛɛ lɛlɛɛ laa aa həli. Ɛlɛɛ, nu kəlee kaa tɔɔi a nwąnąi, əgɛ, ə lɔ dɔɔlaai tii hu.

17«Yələkɔlɔn da lɔi da pɛli tɛɛi kpɔ a viikpɛɛ, kɛlaa, dɔ́n ɉɛɓɛ́ gɔw logolo tɔ̨nɔ̨ kpɛli hva ɉəɠə mą.

18«Hulɔnui lɔpee a nɛ̨ą kpɛ, ə pənə ə nɛ̨ɛ̨nu takpɛli həɠə, a kɛ tii, aa wɛli ɲɔ̨nwɔ̨ɔ̨ hon. Da nɛ̨ɛ̨nu kpɛ, nui nwɔ̨nɔ̨ a ɉəɠə a nɛ̨ą, a kɛ tii, aa wɛli ɲɔ̨nwɔ̨ɔ̨ hon.»

Hɛn gɔw nąmu ta da Lazarə di mąą mɛ̨nį

19«Hɛn gɔw nąmu kɛnɛ̨ ta ə kɛ laa, tɔɔ həɠəɠaa lɔ ɓə kɛ mą. Ə kɛ lɔ hɛli pu mɛ̨nį hu a yələ kəlee. 20Yeehvowolo mun da ə kɛ laa, diɛ kɛ naa ɓa: Lazarə; pala ɲɔ̨n ə kɛ mą, ə kɛ lɔ laani ɉɛn gɔw nąmui tii yəi bɛlɛ́ laaləi a yələ kəlee. 21Gɔ̨nɔ̨n gbəliɠaa tii kɛi lɛɛ, ya ɓə Lazarə ə kɛ bɔ yɛ mį́į́. Yili pulu, yilɛɠaa ɓə kɛi nwɔ palai ŋą kɔ́mɔ̨.

22«Ɲeehvowolo mun tii, ə haa. Malakaɠaa di ɉəɠə də li la Abrahamə ə kɛ laa. Ɉɛn gɔw nąmui tii yaa kpɛli ə haa, di noo. 23Ɉɛn gɔw nąmui tii, ə yɛɛ ŋąmuą taa, yɛ mɔ̨nɔ̨ mį́į́ kpɔ laa a mɔlɔɔ. Ə nwun muhəɠə, ə Abrahamə kaa Lazarə yɛ ɓo gwɛlɛ. 24Nąąlɔwai tii, ə nwoo tɛ kpɔ hɔ̨́ɔ̨́, yɛ mą: ‹Ną́n Abrahamə! Ɲɛ̨́i mąąwɛli kaa, Lazarə tɔɔ ə ɲee kpiɛ lɔ yalaɠi hu, ə vilɛn nɛ̨́n ŋą. Mąąhɔlɔɓo, gáá mɔ̨nɔ̨ mį́i kpɔ kɛnɛ̨ nwɔ̨n ŋɛ̨i hu ɓɛ.›

25«Abrahamə yɛ mą: ‹Nón! Ə́ kili ə pu ɉu yɛ kɛ, ɓɛlɔwai ə́ kɛ la yɛnɛ̨ɛ̨, ə́ mɛ̨inɛ̨ɛ̨ɠaa hɔlɔɓo; Lazarə nwɛi yɛ mɔ̨nɔ̨ mį́į́. Yiihu, yaa kpɛli gaa ɓɛ nɛ̨ɛ̨ hu; yɛ́ kpɛli yɛ kɛa mɔ̨nɔ̨ mį́į́. 26Ə həɠə yili ɓa, ɓoloon gɛnɛ̨ kaa gwa kaani gu lɔwai, nui a kɛ bɔ ə həɠə ku pɔɔli, ə pa ka pɔɔli, pɛli mąą hvo ɉu. Ɛlɛɛ, nu ta hva pɛli həɠəi ka pɔɔli hvo pa ku pɔɔli ɓɛ.›

27«Ɉɛn gɔw nąmui tii yɛ mą: ‹Ną́n, gáá nɛ̨ɛ̨mąą hvəə yɛ́, gɛ́, ə́ Lazarə tɔɔ, ə li ku yəi bɛlɛ́n. 28Ną́n nonnii lɔɔli kaa laa, ə di kilaa pono, əgɛ, diɛ kpɛli di hvo pa pa mɔ̨nɔ̨ kɛnɛ̨i ŋɛ̨i hu ɓɛ.›

29«Abrahamə ə nwoo pulu pənə yɛ mą: ‹Moisə nwɔ tɔ́n ɉɛɓɛ́i da Yálá kwəi mɛ̨nį hukulɔ nuą hvaa woo pɛ̨ɛ̨ kaa laa di yəi; yɛ di kilaa pono, mąąnɛ̨ɛ̨ di di wəli tɔɔ nwoo ɓa!›

30«Ɉɛn gɔw nąmui tii yɛ mą: ‹Ną́n Abrahamə, yili hva pɛli. Kɛlaa, akɛ nu ta a həɠə ɓɛ ɲąmuątaa, ə li ə di kilaa pono, da pɛli di di túwɔ́ pələ mąąhvalin.›

31«Kɛlaa, Abrahamə ə mo mą, yɛ mą: ‹Akɛ, da wala di wəli tɔɔ Moisə nwɔ tɔ́n ɉɛɓɛ́i da Yálá kwəi mɛ̨nį hukulɔ nuą woo ɓa, di hvo pai di wəli tɔɔi di kilaa pono mɛ̨nį takpɛli ɓa, ə mą kɛ nu ta aa həɠə ɓɛ ɲąmuątaa aa li laa.›»

Actualmente seleccionado:

Lukə 16: BKPG

Destacar

Copiar