1 Kings 3

Solomon-aaq Kaigauq Elisngamek

1Solomon-aaq taqutuq ilakuyutmek angayuqrat-llu Egypt-aarmiut nuliqsagutellermikun pania. Ayautaa David-aam Nunarpiinun taqnatkaanun eneni, Agayuvigpak, casguq-llu avatiini Jerusalem-aam. 2Agayuvigpak-llu wani-wa piliaqumaksaituq Atanermun, taumek cali yuut ekuagiurtut amllerni ayuqenrilngurni ekuavigni. 3Solomon-aam kenkaa Ataneq maligtaquluki-llu ayuqucirtuutai atami David-aam, tau͡gaam-llu cali tuqucilartuq ungungssinek elliitekaqluki ekualuki ayuqenrilngurni ekuavigni amllerni.

4Tamakut ayallmi iliitni ayagtuq Gibeon-aamun elliiluni ekuaginaluni tuanlan ekuavikuralallrat. Tuani ekuagilallruuq amllerqunek tamatum ciungani. 5Tuani unugmi Ataneq alairtuq elliinun qavangukun apluku-llu, “Camek wangnun cikiisqumasit?”

6Solomon-aaq kiuguq, “Nallunairimallruuten angelriamek caqtaanrilngurmek kenekmek pistevnun, David-aamun atamnun, ellii-llu assirluni, caqtaarpek'naku piciullni, picirrlugtuvkenani-llu ilakuyutmini elpenun. Elpet-llu maniiqurallruan angtuamek taqsuilngurmek-llu kenkevnek cikirluku qetunrarkaanek erneq man'a tekilluku atanirturilriamek eniini. 7Ataneq Agayun, elpet enaircetan ataka angayuqrurrlua, ayagyuapianger'ma atanirturillerkaqa-llu nallungramku. 8Wiinga waniwa yuut ilagarluki cucukelten elpet nakmiin piknaluki, yuut amllessiyaagameng naaqumasciigalnguut. 9Taumek cikirnga umyuartuyaramek aturyuk'ngamnek ataniurnaunka yut'en elluakun nallunritniarqa ayuqenriluciak assilriim assiilnguum-llu. Tuatnanrilkuvnga, qaillun ataniuyunarqeciqsia ukut elpet yugugaten?”

10 Ataneq ilukegciuq mat'umek apcani Solomon-aam, 11taumek qanertuq elliinun, “Tua-i cikiisqen͞gavet umyuartuyaramek elluarrluten atanirturinaluten, ak'anun unguvallerkarpenek wall'u tukuutnek wall'u ingluvet tuqullerkaitnek kaiganrilavet, 12kaigaten piciqaqa. Cikirciqamken angtuamek umyuartuyaramek taringyuyaramek-llu mat'um ciungani kia atuqsailkiinek wall'u atunqiggngailkiinek. 13Cikirciqamken-llu cali kaigatkenritlerpenek: unguvaqallerpeni pikciqagken tukuutet takarnarqun-llu, anaggluki allat angayuqat piutait. 14Niisngakuvnga-llu aturturluki-llu picirkiutenka alerquutenka-llu, atavet David-aam pillruciatun, erneten taklicarciqanka.”

15Solomon-aaq uituq taringa-llu Agayutmun qanruyucini qavangukun. Tua-i-llu ayagluni Jerusalem-aamun nangerrluni-llu ciuqerranun Atanrem Akqutiin Yaassiigan elliiguq-llu ekualuki elliiyarakun ilakuyutem-llu elliitiinek Atanermun. Taum kinguani nerevkaritai tamalkuita atanerruani.

Solomon-aaq Cuqciuq Qacignarqenrilngurmek

16Erenret iliitni malruk akissuk taiguk nangerrlutek-llu Angayuqam Solomon-aam ciuqerranun. 17Aipaak qanertuq, “Elpet Ucurnarqelriami, una-llu arnaq enelgutkukuk; irniunga-llu tan'gaurlurmek tamaani enemi uitallrani. 18Erenrek malruk irnillma kinguani, una cali arnaq irniuq tan'gaurlurmek. Wangkuk kiimnuk tuani enemi uitaukuk allamek ilaitukuk. 19Tua-i-llu unuut iliitni pitsaqa'artevkenaku engigaa irniani epluku-llu. 20Makluni-llu unugmi, teguluku qetunraqa canimnek qavallemni, ingleminun agutaa; tua-i-llu elliluku tuqumalria irniani inglemnun. 21Unuaquan, uicama aamarteqataryaaqellemni, tangrraqa tuqumallinilria. Tangevsiaramku maaten piaqa irniaqenritlinikeka.”

22Tau͡gaam aipaa arnaq qanertuq, “Qang'a, unguvalria mikelnguq pikaqa, tuqumalria-llu elpet pikluku!”

Ciuqliq arnaq kiuguq, “Qang'a! Tuqumalria mikelnguq elpet pikan, unguvalria-llu wii pikluku!”

Tua-i kiutaarutuk angayuqam ciuqerrani.

23Tua-llu Angayuqaq Solomon-aaq qanertuq, “Elpetek tamarpetek pikniluku unguvalria mikelnguq piutek tuqumalria-llu mikelnguq aipavtegnun pikniluku.” 24Taicesqiuq-llu nuussirpagmek, taicatgu-llu, 25ellii qanertuq, “Kepiciu unguvalria mikelnguq qukaakun arnak-llu tamarkegenka avegmek cikirlukek.”

26Nakmiin-llu aanii, ircaquni tamalkuan muirumiin kenekmek qetunraminun, qanertuq angayuqamun, “Arenqiapaa, Elpet Ucurnarqellriami, watqapik mikelnguq tuqucaqunaku! Tuniu arnamun!”

Tau͡gaam aipaa arnam qanertuq, “Taicaqunaku aipamegnun; kiiki qukaakun kepiciu.”

27Tua-llu Solomon-aaq qanertuq, “Tuqucaqunaku mikelnguq! Tuniciu ciuqlirmun arnamun—ellii ilumun aanakaa.”

28Tamarmeng Israel-aam yui niitellermeggni Solomon-aam pillerkiullranek, tamarmeng umyugait qigcikutmek imangut elliinun, nutaan nallunriamegteggu ilumun Agayutmun elisngamek cikillrullinicianek inglukutellriit inglukutait cuqtelallerkaitnek elluarrluki.

Actualmente seleccionado:

1 Kings 3: YPK

Destacar

Copiar