1 Kings 1

Angayuqaq David-aaq Ak'allaurrluni

1Angayuqaq David-aaq ak'allaurtuq, pistain-llu ulignek patuqtuungraatni urugciigaliluni. 2Taumek atanerruarin qanrutaat, “Elpet Ucurnarqellriami, yuaqernaurtukut ayagyuamek arnamek nayurtekarpenek aulukestekarpenek-llu. Inartelarniartuq canivnun urumaurtelluten-llu.” 3Yuartut-llu tamalkuan Israel-aam nunii qaqilluku arnaqegtaarmek ayagyuamek, Shunem-aami-llu nalaqutut arnamek aterluni Abishag-amek, tailluku-llu angayuqamun. 4Kenegnapiartuq cakneq, kevgiuraa-llu angayuqaq aulukluku-llu, tau͡gaam nulirqellriit pilauciicetun piksaitaa.

Adonijah-m Pikliutaa Atanruvik Aqumlleq

5-6Tua-i Absalom-aaq tuqullruan, Adonijah, qetunraak David-aankuk Haggith-aaq-llu, ciuqlikacaarqaat unguvalriit qetunrakenka. Cakneq tangkegcinaqluni angun. David-aam canganarqutiinek camek atauciungraan qalarutqaqsaitaa, cumiggluni-llu cakneq angayuqrurcugluni. Ellminek-llu pikarrluni anguyagcuutnek akalrialegnek, horse-aanek, ilikaminek-llu yuinaak malruk qulmek cipluku (50) angutnek. 7Qanellgutkellrua Joab-aq (aanaluni Zeruiah-mek) Abiathar-aq-llu agayulirta, taukuk-llu maligutuk ikayuanaluku piyullranek. 8Tau͡gaam Zadok-am agayulirtem, Benaiah-m-llu qetunraan Jehoiada-m, Nathan-aam prophet-aam, Shimei-am, Rei-am, David-aam-llu nakmiin nayurtain Adonijah pillgucinritaat.

9Erenret iliitni Adonijah elliiguq ekuagiluni qusnginek, angucalunek, uqungcaumalrianek-llu kuluvagnek, caniani Ciissirpiim Teggalquan, mallgeskiini ulevlartaan Enrogel-aam. Kelgai-llu allat qetunrai Angayuqam David-aam angayuqam-llu atanerruari Judah-mek taisqelluki ekuagiluni kalukamun, 10tau͡gaam kelenritaa atamikun anelgutni Solomon-aaq wall'u Nathan-aaq prophet-aaq wall'u Benaiah, angayuqam-llu nakmiin nayurtai.

Solomon-aaq Angayuqrurtaat

11Tua-llu Nathan-aam ullagaa Bathsheba, Solomon-aam aanii, apluku-llu, “Niiteksaitan-qaa Haggith-aaq qetunraa Adonijah-m ellminek angayuqrurtellra? Angayuqam-llu David-aam nalluluku tamana! 12Unguvan anirturyukuvgu unguvii-llu qetunrarpet Solomon-aam, alerquramken 13ayaasqelluten egmianun Angayuqamun David-aamun apluku-llu, ‘Elpet Ucurnarqellriami, elpet-qaa piciuluten akqellrunritarpenga wiinga nakmiin qetunramnun Solomon-aamun cimirciqniluten angayuqrurrluni? Qaillun-mi, piluni, Adonijah angayuqrurta?’” 14Waten-llu Nathan-aam ilaluku, “Tua-llu, qalarusnginanerpeni Angayuqaq David-aaq, wiinga iterciqua qanerlua-llu piciuniluku qanemcin.”

15Tua-i Bathsheba-m ayagluni tangerrsarturaa angayuqaq qavarviani. Ak'allaurtepiarluni, Abishaq-am-llu, arnam ayagyuam Shunem-armium, aulukluku. 16Bathsheba ciktuq ciuqerrani angayuqam, elliin-llu aptaa, “Camek piyugcit?”

17Arnaq kiuguq, “Elpet Ucurnarqellriami, piciuluten akqellruavnga atrakun Atanrem elpet Agayutvet wiinga qetunraqa Solomon-aaq kinguvkun angayuqrurciiqniluku. 18Tau͡gaam Adonijah-q ak'a angayuqrurtellruuq, elpet-llu nalluqapiarluku. 19Elliiluni ekuagillruuq amllernek angucalunek, qusnginek, uqungcaumalrianek-llu qusngiyagarnek, kelegluki-llu qetunraten, Abiathar-aq-llu agayulirta, Joab-aq-llu atanrat anguyagtevvet qalukamun, tau͡gken qetunraan Solomon-aaq kelegpek'naku. 20Elpet Ucurnarqellriami, yuin tamarmeng Israel-aam tangvagaatgen qanrucesqelluteng elpenun kitumun cimirarkaucirpenek angayuqruluni. 21Pinrilkuvet, tuqucirpetun, wiinga qetunraqa-llu Solomon-aaq tangvaumaciqukuk inglukesten͞gulunuk.”

22Qanenermek taqvailgan, Nathan-aaq prophet-aaq tekituq atanruvigmun. 23Angayuqaq-llu qanrutaat prophet-aaq tainiluku, Nathan-aaq-llu itertuq cikluni-llu ciuqerranun angayuqam. 24Ellii-llu qanertuq, “Elpet Ucurnarqellriami, qanellruuten-qaa Adonijah-q angayuqaugarkauniluku kinguvkun? 25Mat'umi ernermi ayallruuq elliiluni-llu ekuagarkanek amllernek angucalunek, qusnginek, uqungcaumalrianek-llu kuluvayagarnek. Tamalkuita-llu qetunraten kelellrui, Joab-aq atanerruarat anguyagtevvet, Abiathar-aq-llu agayulirta; wanirpak-llu waniwa kalukartut ilakluku qayagpagaqluteng, ‘Unguvamakili angayuqaq Adonijah!’ 26Tau͡gaam wiinga kelenritaanga, wall'u Zadok-aq agayulirta wall'u Benaiah-q wall'u Solomon-aaq. 27Man'a-qaa, Elpet Ucurnarqellriami, ciuniullruan qanrutevkenaki-llu atanerruaten kina kinguvkun angayuqaurtarkaullranek?”

28Angayuqaq David-aaq qanertuq, “Bathsheba-q piciu wangnun utercesqelluku.” Itertuq-llu ciuqerranun-llu nangerrluni. 29Qanrutaa-llu, “Akqamken unguvalriakun Atanerkun, aviucestellemkun tamalkuitnek arenqiallugutemnek, 30ernerpak elpenun akqutkelqa aturarkauluku atrakun Atanrem, Agayutiin Israel-aam, qetunrarpet Solomon-aam cimirarkaulua angayuqrurrluni kingumkun.”

31Bathsheba-llu ciktuq qanerluni-llu, “Kitaki ataneqa angayuqaq unguvakili akwarpak!”

32Angayuqam-llu David-aam taisqevkarai Zadok-aaq, Nathan-aaq, Benaiah-q-llu. Itrata, 33qanrutai, “Maligtelluci qanercetaarvima atanerruarinun; qetunramnun Solomon-aamun aturceciu wiinga nakmiin ciulvaka, maliggluku-llu atrauciu ulevlamun Gihon Spring-amun, 34Zadok-ankuk Nathan-aaq-llu mingugvigkaagnun angayuqaurtelluku Israel-aamun. Tua-i-llu cupu'uryaraq cupluku qayagpagluci-llu, ‘Unguvamakili Angayuqaq Solomon-aaq!’ 35Maliggniaraci kingunrakun taikan aqumyarturluni atanruvima aqumllertaanun. Elliin enaiqerlua kingumkun angayuqrurteqatartuq, tua-i-wa ellii wiinga cucukellruamku atanirturtekesqelluku Israel-aamun Judah-mun-llu.”

36“Tuaten pimaciquq,” kiuguq Benaiah-q, “kitaki-llu Atanrem Agayutvet piciurceskiliu! 37Atanrem nayullrucirmitun, Elpet Ucurnarqellriami, elliin cali nayuqiliu Solomon-aaq, atanirturillra-llu piluaqeranrukili elpet pillerpeni.”

38Tua-i Zadok-am, Nathan-aam, Benaiah-m-llu, nakmiin-llu murilkestain aqumtaat Solomon-aaq Angayuqam David-aam ciulviinun maliggluku-llu atraulluku ulevlamun Gihon Spring-amun. 39Zadok-am teguluku caqumalria olive-aat uquat taitellni Pelatekaanek Atanrem tuanlucian, mingugaa Solomon-aaq. Cupaat-llu cupu'uryaraq, yuut-llu tamarmeng qayagpagluteng, “Unguvamakili Angayuqaq Solomon-aaq!” 40Tua-i-llu tamarmeng maligtaat kingunrakun, angnirluteng qayagpagaluteng, aturcetaarluteng cupsaranek, nepiita kiituan qiivtaa nuna.

41Adonijah-nkut allaneni-llu taqeqanermegteggun kalukanermek, niitaat nepiit. Joab-am-llu niicamiu cupu'uryaraq, apyutkaa, “Ca pitekluku neplissiyaagpakartat nunarpagmi?” 42Qanrinanrani-llu, tangerrluku, Jonathan-aaq, qetunraa Abiathar-am tekituq. “Iterluten,” Adonijah-q qanertuq, “Yuk'egtarauguten — niitekegcinarqellriamek taitelliuten.”

43“Tavaqaa,” Jonathan-aaq kiuguq. “Elliin Ucurnarqellriim Angayuqam David-aam Solomon-aaq angayuqaurcetaa. 44Ayagcetellrui Zadok-aq, Nathan-aaq, Benaiah-q, nakmiin-llu murilkestai maliggluku atrautelluku. Ekumavkarluku angayuqam ciulviini, 45Zadok-aankuk-llu Nathan-aaq-llu mingugluku angayuqaurrluku ulevlami Gihon Spring-ami. Tua-i-llu iterluteng nunarpagmun, qayagpagaluteng angnirluteng, yuut-llu tua-i waniwa nepengluteng. Nepiit waniwa niitaci. 46Solomon-aaq waniwa angayuqaurtuq. 47Tamana-llu ilaluku, qanercetaarviim atanerruari iterluteng cakaarpek'naku cali qigcikuteteng maniyartullruat Elliinun Ucurnarqellriamun Angayuqamun David-aamun qanerluteng-llu, ‘Agayutvet kitaki Solomon-aam atanirturillra piluaqanruvkaqiliu elpeni pinruluku.’ Tua-i-llu Angayuqaq David-aaq cikluni inglemini 48piicagluni-llu, ‘Nanrarnaurput Ataneq, Agayutii Israel-aam, elliin ernerpak piyugngarivkaaku kinguvema iliit kingumkun angayuqrurtelluku, unguvavkarlua-llu tangertelluku wangnun!’”

49Adonijah-m-llu allanri alingut, tamarmeng-llu nangerrluteng an'ut, kingunermeggnun uterqaqluteng. 50Adonijah-llu, alingqapiggluni Solomon-aamek, ag'uq Pelatekaanun Atanrem tuanlucian tegulukek-llu kangirak ekuaviim.#1.50: kangirak ekuaviim: Pugumauralriik cetamani kangiraini ekuaviim tangellrat cirunernganateng. Kia imum taukut tegumiaqekuniki aarnaiciiquq tuqucimallerkaa. 51Qanrucimauq-llu Angayuqaq Solomon-aaq Adonijah-q elliinek alingniluku tegumiaqniluki-llu ekuaviim kangirai qanerniluku-llu, “Ciumek, Angayuqamun Solomon-aamun akqesqua tuqutauvkarngaitnilua.”

52Solomon-aaq qanertuq, “Ellii piciuluni pikan, atauciunge'rmi nuyain iliit agtuumangaituq; tau͡gaam tuaten ayuqenrilkan, tuquarkauguq.” 53Angayuqam Solomon-aam taisqevkaraa Adonijah-q atrartevkarluku-llu ekuavigmek. Adonijah-m-llu ullagluku angayuqaq ciktuq ciuqerranun, angayuqam-llu qanrutaa, “Kitak enevnun uterten.”

Actualmente seleccionado:

1 Kings 1: YPK

Destacar

Copiar