Mateusi 17

Jesu okasia reve ojisaoka remẽwarà

(Maku 9.2-13; Rukasi 9.28-36; 2 Peturu 1.16-18)

1Ajaire 6 'arà paire, Jesu yvytyry yvate'e mã'ẽ rè ojiupi oo. Wemĩgwai kõ moapy rõmõ weraa oupi. Kejõ. Peturu. Ãmõ, Tiaku. Ãmõ, Juwão, Tiaku mõmirĩ. A'e kõ kõrijõ tè weraa yvytyrapyte 'aryvo. 2A'e pè ojimotee ovake kõ. Eny maevo sõ tite ova, kwaray vo sõ tite. Yru sĩ gatu teve, eny mã'ẽ reny vo tesõ.

3Ãmẽ py'awarà mõ karamoe remẽwarà kõ ojisa ipyri. Tãmõ Moisesi. Ãmõ, tãmõ Eriasi. Mokopejõ. Jesu reve oporegeta kupa upa. [A'evoa rè omã'ẽ moapy rõmõ oo upi mãe kõ.]

4Ameve Peturu e'i:

– Ikatuay ike jaiko remẽ, jõvijã! e'i. Nepota remẽ, ainõtà moapy rõmõ tapyina kõ aã ike. Ãmõ, ene neupewarà. Ãmõ, Moisesi pewarà. Ãmõ, Eriasi pewarà, e'i tite.

5Aepo e'i Peturu upa remeve, yva rãtasĩ iserenyny mã'ẽ owyjy uu ijatypa kõ. A'e pupe wyi kee jaa ojenu ijupe kõ:

– Era'yray ãwĩ! Eremiauvay tè ãwĩ! Emoryoka katu erereko ipi mã'ẽ tè! Tapejapyaka katu ikõ ijayvu rè nẽ! ejaa ojenu.

6Aepo emimo'earà kõ wenu remẽ, okyje ai tè kupa. Ajawyi ojayvy kõrijõ iwyi kupa. 7Ãmẽ Jesu uu ojipy ee kõ, kee javo ijupe kõ:

– Pepõ'ã! Pekyje sõ ewyi! e'i.

8Ãmẽ omã'ẽ erokwa kupa remẽ, Jesu rõmõ'ĩte a'e pè tui upa ky'y.

9Ãmẽ ajaire yvytyry pe wyi owyjy uu kupa ky'y. Owyjy iko kupa remẽ, e'i Jesu ijupe kõ:

– Age'e pemã'ẽ ee mã'ẽ tapemome'u e'ã rã'ĩ. Amãnõtà. Amãnõ maire apoera tarà mijẽ. Ãmẽ tè katu pemome'utà ky'y, e'i.

10E'i ijupe kupa:

– Manyvore põ tãmõ Moisesi remikusiwarerà rè poromo'e mãe kõ, “Tãmõ Eriasi rã'ĩ totuu Janejare'e Remimuurerà renone”, e'i sõ? e'i kupa.

11E'i Jesu ijupe kõ:

– Aje ywete oporegeta kupa. Eriasi totuu poroerojivy Janejare'e kyty.#Marak. 4.5 12Kee a'e pejẽ ajamã'ẽ. Ovãema ipe Eriasi vo 'ejẽ mã'ẽ. Ajamã'ẽ nokuwai kupa, omã'ẽ ipe ee kupa remẽ. Wereko ai kõrijõ tè wemimoãtãre'ã rõmõ kupa, e'i. Ãwĩvo ve ije erereko aità erereko kupa, Janejare'e Remimuurerà ajimojane mã'ẽ rõmõ, e'i.#Mat. 11.14

13Ãmẽ aepo e'i Jesu remẽ, emimo'ekwerà kõ okuwapa Juwão poromojãmorĩ mã'ẽ pewarà mõ tè “Eriasi” e'i.

Jesu omokatu ja'yry remẽwarà

(Maku 9.14-29; Rukasi 9.37-43)

14Ãmẽ Jesu kõ ovãe mijẽ yvytyry ypy pè remẽ, aty wasu a'e pè ekoi. Jesu remimo'ekwerà kõ pyri ekoi kupa. Ipyterà kõ pe wyi kwaima'e mõ uu Jesu kyty ojimoenãpa'ã ovake ojiporijauesaoka. 15E'i Jesu pè:

– Era'yry eporijauesa, jõvijã! e'i. Omãnõ mãnõ tesõ iko ipi, e'i. Ajawyi ojimomorijauvay ipi. A'evo ekoi remẽ, tata pupe o'a ipi. Ãmõ remẽ, yy pupe o'a ipi, e'i. 16Aeru ipe neremimo'earà kõ tomokatu. Ajamã'ẽ nokuwai imokatua kupa, e'i.

17Ãmẽ Jesu ijãgyoay aty wasu rè.

– “Aje ywete” napejẽi eayvukasia pè! Nivoi mãe kõ! Age'e rõwã tesõ aiko pepyterà rupi ky'y! Manyvo remẽ wete si pekuwatà eayvukasia ky'y? Ãwĩvotà tè põ peiko? e'i ijupe kõ.

– Peeru awi ja'yry ekoty, e'i.

[Weru ãmẽ kupa.] 18Ãmẽ Jesu ijayvukasi ãjãg pè, ja'yry rè ojimoemija mã'ẽ pè. Ameve ãjãg oẽ ja'yry pupe wyi oo ijayvu rupi. Ameve py'awarà mõ ja'yry ikatupa ky'y.

19Ãmẽ ajaire Jesu rõmõ'ĩte ekoi remẽ, emimo'ekwerà kõ uu javo ijupe.

– Manyvore põkõ noromoẽ kuwai sõ ãjãg ja'yry pe wyi? oro'e neupe, jõvijã, e'i kupa.

20Ajawyi Jesu e'i:

– Ekasia rè si napenako'i. “Aje” pejẽ kuwasi ekasia pè mijã. Ãmẽ erererovija a'ugà pekupa remẽ, kee pejẽ kuwa eayvu rupi mijã. Yvytyry pè, “Ejisyry ike wyi eo! Wãime kyty ekwa!” pejẽ kuwa. Ojisysry kuwa oo ãmẽ aepo pejẽ eayvu rupi remẽ. Aje ywete aepo a'e pejẽ, e'i.#Mat. 21.21; Mak. 11.23; 1Kor. 13.2 21Aje ywete peporegeta Janejare'e pè remẽ, napejimi'ui rã'ĩ tesõ peiko remẽ, ãwĩvo pejẽ remẽ tè katu kuwa ãjãg pemoẽ kuwa ja'yry wyi imono mijã, e'i Jesu ijupe kõ.#17.21 Kareta karamoe remẽwarà kõ pè jamã'ẽ remẽ, ãmõgwerà kõ pè vs. 21uve. Ãmõgwerà kõ pè nuvei.

“Ejukatà kupa”, e'i mijẽ Jesu remẽwarà

(Maku 9.30-32; Rukasi 9.43-45)

22Ãmẽ ãmõ 'ary pè Jesu remimo'ekwerà kõ ojimoaty mijẽ ojeeve, Karireja yvy pè. Jesu ve ipyri kõ ekoi. Ãmẽ Jesu e'i ijupe kõ:

– Kee a'e pejẽ. Yva pe wyi ajo ajimojane mã'ẽ rõmõ ije. Ajamã'ẽ nivoi mãe kõ po pè ereraatà eme'ẽ kupa. 23Ejukatà ãmẽ kupa, e'i. Ajamã'ẽ moapy 'arà paire apoera tarà mijẽ apõ'ã, e'i amãtejẽ.

Ãmẽ ijãgyoay aepo renu kupa.

“Omoepy põ penõvijã Janejare'e moe'ea retã pewarà ipi?” e'i Peturu kupa remẽwarà

24Ãmẽ aja paire Jesu oo Kapanão taa kyty, wemimo'ekwerà kõ reve. A'e pè ovãema kupa remẽ, kwaima'e kõ mõ uu Peturu pè javo. Karakuri moeta opyy jane kõ wyi imoaty mãe kõ mõ. Janejare'e moe'ea retã pewarà mõ karakuri omoaty kupa ipi. A'e kõ e'i Peturu pè:

– Omoepy põ penõvijã Janejare'e moe'ea retã pewarà ipi? e'i Peturu pè kupa.#Jisyry. 30.13; 38.26

25– Õ'õ. Omoepy ipi, e'i amãtejẽ Peturu ijupe kõ.

Aja paire Peturu oo iwyi kõ oike tetã wyry pè, Jesu reve. Oo javo Jesu pè. Ajamã'ẽ Jesu ypy oporegeta ijupe.

– Simão, manyvo ere põ kee jaa rè. Ikewarà jõvijã wasu kõ ke'ĩrõwã ojimojõvijã remẽ, iteetejẽ emĩgwai kõ ipi. Kee a'e ene. Mã wyi põ opyy tekoua repykwerà imoaty ipi? Opyriwarà kõ wyi põ? Ãnĩ? Ãmõ kõ wyi põ? e'i.

26– Ãmõ kõ wyi, e'i Peturu ijupe.

– Õ'õ aje, e'i Jesu. Ipyriwarà kõ nomoepyi ipi, e'i. Ãwĩvo Janejare'e pyriware'e tè ije. Ajawyi namoepy'ãi mijã, e'i. 27Ajamã'ẽ napotai tè amojimõarõoka kõ. Ajawyi amoepy jẽtà ijupe kõ. Ajawyi pãranã gyty ekwa rã'ĩ. A'e pe wyi pira mõ eekyi. Pira neekyi ypy mã'ẽ juru rè emã'ẽ. A'e je'o pupe karakuri moeta neesatà, epy rã, e'i. Oytà tè janeupe, mõrijõ, e'i. Eraa ãmẽ ijupe kõ teremoepy, e'i Jesu Peturu pè.

“Hoõ” e'i Peturu ãmẽ. A'evo ãmẽ.

Actualmente seleccionado:

Mateusi 17: oymNT

Destacar

Copiar