Mateusi 18

“Ava ywesõ põ Janejare'e koty rewarà rõmõ ekoi?” e'i kupa mã'ẽ

(Maku 9.33-37; Rukasi 9.46-48)

1Ãmẽ ajaire Jesu remimo'ekwerà kõ uu javo ijupe.

– Nejimojõvijã wasu remẽ, ava ywesõ põ Janejare'e koty rewarà rõmõ ekoità? e'i ijupe kupa.#Ruk. 22.24

2Ãmẽ Jesu ja'yry mõ omuu okoty topõ'ã ovake kõ, tomã'ẽ ee kupa. 3E'i ijupe kõ:

– Kee aje ywete mã'ẽ rè tapeja'a. Ja'yrerà kõ opota katu Janejare'e omoẽoka o'arà kytywarà rõmõ ipi. “Aje” e'i teãmã ikasia pè kupa ipi. A'evo ve tapeiko. Ja'yry vo 'ejẽ tapeiko. Na'evoi sõ peiko remẽ, napeo'ãi kuwa ipyri ena pè.#Mak. 10.15; Ruk. 18.17 4Emã'ẽ aã ja'yry rè. Nojimoẽokai jo'arà kytywarà rõmõ ipi. Pejẽ ãwĩvo tapeiko. A'evo mãe kõ ywesõ Janejare'e koty rewarà kõ rõmõ ekoi, e'i.

5– Erauvay pekupa remẽ, ja'yry kõ peauvaytà. Penory katu ee kõ pemãjã. Ja'yry rauparà kõ pè “erauparà kõ” a'e ipi, e'i ijupe kõ.

“Tapeauvay ja'yry kõ”, e'i Jesu mã'ẽ

(Maku 9.42-48; Rukasi 17.1-2)

6– Ja'yry kõ erauvay ipi. Ajawyi akãte'ã ee kõ ipi. Ava mõ sõ omojaiwe kõ eraa weko ai rupi remẽ, ojimomorijau 'atà tè Janejare'e po pè. Ikatu sa'u kuwa na'evoive remẽ ojimomarama amãtejẽ ovote omãnõ, e'i. Ikatu sa'u kuwa a'evo mã'ẽ takuru mitirõwã mã'ẽ wãpasĩ okuruka rè ero'a pãranã pupe omãnõ amãtejẽ, ja'yry kõ nomojaiweive remeve, e'i.

7– Oiko teãmã ike yvy pè poromojaiwe mã'ẽ, e'i. Ajamã'ẽ mokoi a'e mirà kõ poromojaiwe kõ poroeraa weko ai rupi mãe kõ pè. Ipojy ai tè a'evo ekoi mãe kõ. Ajawyi Janejare'e omomorijau kõ ywetetà kãramõ, e'i.

8– Ajawyi kee a'e eayvukasia rõmõ. Ma'e remẽ pepo ojavyokatà ivo tekoua pejẽ. Ma'e remẽ pepy rupi peotà peneko ai kyty. Ikatu kuwa peeta amãtejẽ ity remẽ, Janejare'e rekoa tapejavy ywe'e tite e'ã. A'evo peiko amãtejẽ remẽ tè napeo'ãi kuwa pepo revejẽ, ãmõ, pepy revejẽ, jimomorijau wasua rena kyty, tata wasu noe'ãi mã'ẽ kyty. Ajawyi kee a'e pejẽ. Ojipoeta mã'ẽ vo 'ejẽ tapeiko, taperovija ywe'e tite e'ã ikõ pepo nẽ, a'e pejẽ. Ãmõ, ojipyeta mã'ẽ vo 'ejẽ tapeiko, a'e pejẽ. Ãmẽ tè erekoa rupi peiko jẽtà. A'evo remẽ tè pepo e'ãte, pepy e'ãte, Janejare'e rena kyty peo jẽ kuwa.#Mat. 5.30 9Penea a'evo ve. Ojeakwaro mã'ẽ vo 'ejẽ tapeiko, tapejimoaioka ywe'e tite e'ã ikõ penea pè nẽ, a'e pejẽ. Ãmẽ tè erekoa rupi peiko jẽtà. Ãmẽ tè peotà Janejare'e rena pè. Tata wasu, jimomorijau wasua rena kyty napeo'ãi penea revejẽ, a'e pejẽ, e'i Jesu.#Mat. 5.29

Kaneiru oo opa oo mã'ẽ rè tè Jesu poromosã'ãga remẽwarà

(Rukasi 15.4-7)

10Jesu e'i jẽ wemimo'ekwerà kõ pè:

– Ikatu ikõ ja'yrerà kõ pereko ipi nẽ. Tapejimoemija e'ã ikõ ee kõ nẽ. Janejare'e ja'yrerà kõ rè okãte'ã ipi, e'i. Nopotai ojisyry tite owyi kupa, e'i. Uve ja'yrerà pãtavõarà yvapewarà kõ, Papa rovake ekoi kupa ipi. Ipyri yva pè tui kupa ipi. Ja'yrerà rewarà kõ omome'u ijupe ipi, e'i.

11– Ojisyry we'e tite iwyi mãe kõ resa ajo erojivy eraa Papa kyty.#18.11 Kareta karamoe remẽwarà kõ pè jamã'ẽ remẽ, ãmõgwerà kõ pè vs. 11 uve. Ãmõgwerà kõ pè nuvei. 12Kee jaa rè peja'a. Ãwitõ kaneiru teima jarà mõ, mõa'ãrõwã eima kõ mã'ẽ. 100 rõmõ tesõ eima mã'ẽ. Ãmẽ pe'ĩgà sõ opa oo tite yvytyry kõ rupi remẽ, ijarà oitytà rã'ĩ ãmõ kõ oo opa oo rã'ĩ mã'ẽ reka, ajaate wesa. 13Ãmẽ ijarà wesa remẽ aje ywete orytà ee, oo rã'ĩ iko maekwerà wesa rewarà mõ. A'e rè ywesõ ory rã'ĩtà noopai mãe kõ wyi, 99 mãe kõ wyi. A'e rè kõrijõ tè ojipy'amopirai mijã, ajawyi, e'i. 14Ãwitõ kaneiru jarà weka tite rã'ĩ iko ajaate weima wesa. Ãwĩvo ve Papa yvapewarà wekatà ja'yry pe'ĩgwerà, oopa tite oo remẽ. Nivoi tekoua rupi oo tite mã'ẽ wekatà esa, e'i Jesu wemimo'ekwerà kõ pè.

“Kee tapereko imogeta nivoi penereko mã'ẽ”, e'i Jesu mã'ẽ

15E'i jẽ Jesu wemimo'ekwerà kõ pè:

– Ekoty rewarà mõ sõ nivoi nerereko remẽ, ekwa rã'ĩ eporegeta ijupe. Kee eretà ijupe: “Manyvore põ ãwĩvo sõ nivoi erereko tite rejupa?” eretà. Ajamã'ẽ teã'ã rupi tè rã'ĩ ere ijupe. Ãmẽ neayvu werovija remẽ, maevo ijãgyotà aekwerà rè. Pejimory tarà mijẽ ojeeve ãmẽ ky'y.#Ruk. 17.3 16Ajamã'ẽ, noenu tari sõ neayvu remẽ, ekwa mijẽ ikoty. Nevo mãe kõ ve eraa nerupi ky'y, ikuwaparà kõ rõmõ. Pe'ĩ neraa remẽ, ikatu tè. Mõrijõ neraa remẽ, ikatu teve. A'evoa rè kee e'i Janejare'e Moisesi remikusiwarerà rupi: “Nivoi mã'ẽ jamo'ytà ava mõ rè remẽ, pe'ĩ mirà remikuwa rupi rõwã ta'evo. Mõrijõ, moapy rõmõ e'i ky'y mãe kõ remikuwa rupi tè”, e'i maekwerà.#T.M. 19.15 Ãmẽ a'e kõ rovake ere mijẽ ijupe, nemoaiarerà pè. [“Manyvore põ ãwĩvo sõ emoai rejupa?” ere tarà mijẽ ijupe. Maevo ojimorytà nere ãmẽ ky'y. Ajamã'ẽ noenu tari mijẽ sõ neayvu remẽ, nerupi oo mãe kõ wenutà ãmẽ. Ajaire, “Õ'õ aje, noenu tari neayvu”, e'ità ãmẽ kupa, e'i.] 17Ãmẽ noenu tari mijẽ sõ remẽ, nijãgyoay'ãi sõ nemoaiawerà rè remẽ, ekwa Janejare'e koty rewarà kõ jimoatya pè ky'y. A'e kõ pè emojenu pirujẽ ky'y, e'i. Ãmẽ pirujẽ toporegeta ijupe ky'y. Maevo ojimorytà nere ãmẽ. Ajamã'ẽ ojimoane'e jẽ sõ remẽ, tapemã'ẽ tè rã'ĩ ee ãmẽ ky'y. Ajawyi Janejare'e noerovijai mã'ẽ vo 'ejẽ tè perekotà ky'y, ijaiwererà rewarà mõ, e'i. Nivoi mã'ẽ vo tè a'e ãmẽ ky'y, e'i Jesu.

“Janejare'e wenu peporanu ijupe mã'ẽ ipi”, e'i Jesu mã'ẽ

18E'i jẽ Jesu wemimo'ekwerà kõ pè:

– Ãmõ, kee a'e pejẽ. Ava mõ pewarà mõ, “Nivoi mã'ẽ tè ãwĩ,” pejẽ remẽ, “nivoi” e'i tevetà Janejare'e ijupe. Ãwĩvo ve, “Ivo mã'ẽ tè ãwĩ,” pejẽ ava mõ pè remẽ, “ivo” e'i tevetà Janejare'e ijupe, e'i Jesu.#Mat. 16.19; Juw. 20.23

19E'i jẽ ijupe kõ:

– Ãmẽ temimotarà ojevo jẽ pepota Janejare'e pe wyi remẽ, “Ja'e ãwĩ Janejare'e pè tijaporanu”, pejẽ remẽ, tapeporanu ikõ ijupe ãmẽ nẽ, e'i. Papa yvapewarà wenutà peporegeta ijupe maekwerà ãmẽ, e'i. “Hoõ” e'ità ãmẽ. Aje ywete aepo a'e. 20Ãmẽ, mõrijõ moapy rõmõ sõ pejimoaty Janejare'e pè pemogeta eremĩgwai kõ rõmõ remẽ upi upi, ije ve a'e pè aikotà pepyri, e'i Jesu ijupe kõ.

Temiporijauesakwerà rè tè Jesu poromosã'ãga remẽwarà

21Ajaire Peturu e'i Jesu pè:

– Ma'e remẽ ava mõ nivoi janerereko remẽ, “awyjepa” ja'e tarepe ijupe ijaiwererà pè ipi. Ajamã'ẽ ajaire nivoi jẽ janerereko tarà mijẽ ajaire. Ajawyi “awyjepa ky'y” eu ipe tarà mijẽ põ ijupe? Manyvo remẽ põ “awyjepa” nija'e'ãi ijupe ky'y? 7 rõmõ tesõ ja'e paire põ? e'i.

22Ãmẽ Jesu e'i ijupe:

– Ãnĩ. 7 wyi wete,#18.22 Jesu “7 x 70,” e'i. Kee jaa tè aepo e'i mã'ẽ. 7 wyi wete. 7 rõmõ janepoaty wyi! Jamokãjãma tesõtà kuwa. Maevo 490 rõmõ tesõ “awyjepa” tija'e tè jẽ! e'i. Ijatyray tesõ aepo tija'e jẽ ijupe. Nijapi'ãi aepo javo rõmõ, e'i Jesu ijupe.#Ruk. 17.3-4; 18.22; Jinõ. 4.24

23-24Jesu oporegeta jẽ wemimo'ekwerà kõ pè. Kee e'i:

– Janejare'e poroporijauesa ywete ipi. Ikarakuri ywete mã'ẽ rè tè poromosã'ãgatà tapekuwa manyvotà jareko ikuwa Janejare'e Jõvijã wasu rõmõ ekoi remẽ. Kee. Ikarakuri ywete jõvijã wasu rõmõ ekoi, a'e rupi jakuwa. Ma'e remẽ mõa'ãrõwã karakuri e'ekwerà jõvijã opãtavõarà mõ pè ome'ẽ rã'ĩ, ajaire tomojivy mijẽ ijupe. Ajamã'ẽ ipãtavõarà nomojivyi sire'e ajaire. [Nomoaty kuwai imojivy.]

– Ãmẽ ãmõ 'ary pè jõvijã omã'ẽ kareta kõ rè upa, karakuri ome'ẽ rã'ĩ jane kõ pè maekwerà kõ rè. Nomojivyive mãe kõ omuroka tomojivy ky'y. Ãmẽ opãtavõarà okwai imuu. “Kejavu karakuri jypy remẽ ame'ẽ rã'ĩ itõkõ neupe. Neremojivyive ije ajamã'ẽ”, e'i. “Age'e sikõ teremojivy ekarakuri rekovijarerà ije ky'y nẽ”, e'i jõvijã ijupe ky'y.

25– Ãmẽ jõvijã aepo e'i remẽ, ipãtavõarà e'i: “Nareko ywe'ei epy rã ajamã'ẽ”, e'i. “Manyvotà põ areko imojivy?” e'i oõvijã pè. Ãmẽ jõvijã e'i: “Orome'ẽtà awi temĩgwai ai#18.25 Oposiko karuaru oõvijã pè mã'ẽ. Escravo e'i karai kõ ijupe mã'ẽ. rõmõ epy rõmõ ky'y”, e'i. “Nererekwarà ame'ẽ tary ve. Ãmõ, neãkarã kõ”, e'i. “Ãwĩ kõ nerepy rõmõtà ky'y”, e'i jõvijã.

26– Ãmẽ ipãtavõarà aepo wenu remẽ, ojimonyi tesõ enu. Ameve kuise'ẽ jẽ ojimoenãpa'ã ovake ojiporijauesaoka ky'y. Otytypa tesõ. Kee e'i oõvijã pè: “Eporijauesa rejupa! Terejikõtevẽ e'ã rã'ĩ nerepy rã rè neiko!” e'i. “Mewe tè amojivytà pirujẽ ene”, e'i. 27Aepo e'i remẽ jõvijã oporijauesa ky'y. “Hoõ” e'i ãmẽ ijupe. “Awyjepa” e'i. “Najipy'amogeta'ãi ekarakurikwerà rè ky'y”, e'i jõvijã ijupe. Oryvay tesõ temiporijauesakwerà ãmẽ ky'y.

28– Ojivy oo ky'y, oõvijã retã pe wyi. Ameve oõvijã remĩgwai mõ ovo mã'ẽ oõvaisĩ, eeve oposiko mã'ẽ mõ. A'e jypy remẽ kejõgà karakuri moeta opyy rã'ĩ iwyi maekwerà. Ãmẽ temiporijauesakwerà omã'ẽ ee remẽ, okarakurikwerà rè oja'a. Ameve kuise'ẽ opyy ikurukavy. “Age'eve sikõ emojivy ekarakuri rekovijarerà ije nẽ!” e'i. 29Ãmẽ kejõgà karakuri nomojivyive mã'ẽ ojimonyi enu. Kuise'ẽ ojimoenãpa'ã temiporijauesakwerà rovake ojiporijauesaoka mijã. Otytypa tesõ javo ijupe. “Eporijauesa rejupa!” e'i. “Amojivytà tè neupe!” e'i ijupe.

30– Soõ, noporijauesai. Omono kõrijõ imopã'ãoka jimopã'ãga pupe. “Neepyme'ẽma ije remẽ tè katu oromoẽokatà jimopã'ãga pupe wyi”, e'i. 31Ãmẽ ãmõ temĩgwai kõ omã'ẽ a'evoa rè remẽ, ojimonyi wete kupa. Ãmẽ oo oõvijã wasu pè javo kupa. Pirujẽ a'evoa omome'u kupa.

32– Ajawyi jõvijã okwai mijẽ wemiporijauesakwerà imuu. Waka wasu ãmẽ ky'y. “Nivoi 'eteay eremĩgwai nevo mã'ẽ nereko, ji'i itõkõ oroporijauesa ywete paire! ‘Awyjepa’ na'ei sipõkõ ene! Oroporijauesa rewarà mõ rõwã põkõ aepo a'e ene! ‘Eporijauesa rejupa’, ere ije remẽ itõkõ oroporijauesa ãmẽ! 33Ãwĩvo kuwasi ene mijã. Neporijauesa kuwasi nevoarà mijã!” e'i ijupe.

34– Ojikõ'õ ai jõvijã ãmẽ ee ky'y. Ajawyi omono wemiporijauesakwerà jimopã'ãga pè ky'y, sota kõ tonõpã nõpã imomorijau ky'y. “Neepyme'ẽma ije remẽ tè katu oromoẽokatà jimopã'ãga pupe wyi”, e'i jõvijã ijupe ky'y, e'i Jesu poromosã'ãga mã'ẽ rupi.

35Jesu e'i jẽ wemimo'earà kõ pè:

– Janejare'e “awyjepa” e'i jane kõ pè ipi, poroporijauesa ywete teãmã rewarà mõ. Ãwitõ jõvijã oporijauesa opãtavõarà mijã, ãwĩvo ve tapeporijauesa ãmõ kõ ipi, Janejare'e reruparà mõ. “Awyjepa” tija'e janevo mãe kõ pè ipi, e'i. Ajamã'ẽ “awyjepa” napejẽi sõ ãmõ kõ pè remẽ, napeporijauesai ãmõ kõ remẽ, Janejare'e yvapewarà ve napeporijauesa'ãi, e'i Jesu imogeta kõ.

Actualmente seleccionado:

Mateusi 18: oymNT

Destacar

Copiar