Mateusi 16

“Mãrãnà jikuwa e'ã emojisa orerovake”, e'i tite kupa remẽwarà

(Maku 8.11-13; Rukasi 12.54-56)

1Ãmẽ Jesu oo Makatã yvy rupi iko remẽ, Pariseu kõ mõ uu mijẽ ikoty. Ãmõ, Satuseu kõ mõ. A'e kõ opota Jesu wã'ã mijã. Ajawyi kee e'i kupa:

– Jesu! Mãrãnà jikuwa e'ã emojisaoka age'e toromã'ẽ ee. A'evoa rè oromã'ẽ remẽ tè, “Aje Janejare'e kasia rupi a'evo ekoi”, oro'età ene oromãjã nere, e'i rã'ãga Jesu pè kupa.#Mat. 12.38; Ruk. 11.16

2-3Ajamã'ẽ Jesu e'i ijupe kõ:

– Ãnĩ! Namojisa'ãi! Emojikuwapa rè pemã'ẽ kõ'ẽ jawe jawe ipe. Ãwitõ yva rãtasĩ rè pemã'ẽ yva rè remẽ, “Okytà ãmãnà”, pejẽ ipi penemikuwa rupi. Naikoi yva rãtasĩ remẽ, “Arakatuaytà age'e”, pejẽ teve ipi, e'i. Ajawyi 'arà mojikuwapa pekuwa katu ipi. Ãwĩvo ve kuwasi emojikuwapa rè pemã'ẽ remẽ mijã. Ajamã'ẽ nekuwai pekupa. 4Nivoi mãe kõ tè pejẽ, age'ewarà kõ rõmõ! Ajawyi erã'ã tarepe pekupa. Kee pejẽ tite: “Nekasia emojisaoka toromã'ẽ ee. Ãmẽ tè ‘aje’ oro'età neupe”, pejẽ tite. Ajamã'ẽ ije namojisaoka'ãi ekasia pejẽ, e'i. Ãwitõ Janejare'e ayvu mojenuarà Jonasi ekoi karamoe remẽ, ãwĩvo pemã'ẽtà ere, e'i kõrijõ tè Jesu ijupe kõ.#Mat. 12.39; Ruk. 11.29; Jona. 1–3

Aepo e'i paire, ojisyry oo iwyi kõ.

“Tapejireko katu Pariseu kõ rekoa wyi”, e'i Jesu mã'ẽ

(Maku 8.14-21)

5Ãmẽ ajaire Jesu wasa mijẽ pãranã oo yarà rupi wemimo'ekwerà kõ reve. Ja'umã'ẽ noeraai kupa ajamã'ẽ. Earai iwyi kupa. 6Ãmẽ o'yasa oo iko kupa remẽ, Jesu e'i ijupe kõ:

– Tapejireko katu Pariseu kõ remi'õ'y wyi,#16.6 Fermento rè tè poromosã'ãga. Ruk. 12.1 Satuseu kõ remi'õ'y wyi teve, e'i poromosã'ãga mã'ẽ rupi.

7Aepo e'i Jesu ijupe kõ paire, e'i ojiupe kupa:

– Manyvo jaa põ aepo e'i mã'ẽ? Meju wyi janerearai rewarà mõ sipõ aepo e'i? e'i tite ojiupe kupa.

8Ajamã'ẽ Jesu okuwapa sikaepo ojimogeta kupa. Ajawyi e'i ijupe kõ:

– Aepo pejẽ sõ! “Aje” pejẽ kuwasi eayvukasia pè mijã! Napetekokuwaive sipõ peiko! 9Napeja'ai wete si aty wasu aapoi maekwerà rè? 5 rõmõgà ipe meju mijã. Ajamã'ẽ aty wasu kõ rè amoypa katu ee kõ. 5.000 rõmõ tesõ itõkõ amojimi'u. Ajaire itõkõ ikurerà pemoaty jẽ. Mapejõ rykyry rõmõ tesõ itõkõ pemoaty? Napeja'ai si aekwerà rè? e'i Jesu ijupe kõ.#Mat. 14.17-21

10E'i jẽ Jesu:

– Aja paire a'evo mijẽ. 7 rõmõ meju itõkõ amoypa mijẽ ee kõ. 4.000 rõmõ tesõ itõkõ kwaima'ekwerà kõ amojimi'u. Mapejõ rykyry rõmõ tesõ meju kurerà kõ pemoaty ajaire? Napeja'ai sipõ aekwerà rè!#Mat. 15.34-38 11Meju rè rõwã aporegeta ji'i pejẽ! e'i. Poromosã'ãgaa rupi tè aporegeta. Pariseu kõ rekoa rè aporegeta ajupa. Ãmõ, Satuseu kõ rekoa rè teve. Ajawyi, “Ekoa kõ wyi tapejireko katu”, jaa tè aepo a'e mã'ẽ. Aje ywete a'evoa napekuwai! Pekuwa kuwasi mijã! e'i.

12Ameve tite ajaire Jesu ayvu okuwa kupa ky'y, manyvo jaa rè tè oporegeta. Temi'õ pewarà mõ rõwã sikaepo aepo e'i. Pariseu kõ ayvukwerà pè tè sikaepo e'i, nivoi poromo'e kupa rewarà mõ. Ãmõ, Satuseu kõ nivoi poromo'ea rè teve Jesu oporegeta. Ajawyi otekokuwapa a'evoa rè kupa ky'y.

“Janejare'e Remimuurerà tè ene”, e'i Peturu Jesu pè remẽwarà

(Maku 8.27-30; Rukasi 9.18-21)

13Ãmẽ ajaire Jesu oo wemimo'ekwerà kõ reve, Sesapiripu taa pyri'ĩje'ẽ. Ãmẽ pee rupi oo oiko kupa remẽ, Jesu e'i ijupe kõ:

– Ava e'i põ jane kõ ije ipi? e'i Jesu.

14E'i ijupe ãmẽ kupa:

– Ãmõ kõ, “Juwão poromojãmorĩ maekwerà tè rõwã põkõ opoera mijẽ?” e'i neupewarà mõ. Ãmõ kõ, “Ãnĩ, tãmõ Eriasi tè rõwã põkõ owyjy mijẽ uu?” e'i. Ãmõ kõ, “Tãmõ Jeremia amyry põkõ opoera mijẽ uu?” e'i teve. “Janejare'e ayvu mojenuarà amyry karamoewarà tè rõwã põkõ opoera mijẽ uu?” e'i teve neupe kupa, e'i Jesu pè kupa.#Mat. 14.1-2; Mak. 6.14-15; Ruk. 9.7-8

15E'i jẽ Jesu:

– Pejẽ pa'e? Ava pejẽ põkõ ãmẽ ije? e'i.

16Ãmẽ Simão Peturu e'i:

– Ije ãmẽ, “Janejare'e Remimuurerà tè ene, orerõvijã ywete rõmõ”, a'e ene. “Janejare'e oiko teãmã mã'ẽ Ra'yry tè”, a'e neupe, e'i Peturu ãmẽ ijupe.#Juw. 6.68-69

17Ãmẽ Jesu oryvay aepo renu.

– Õ'õ aje ywete ere, Simão Pajona.#16.17 “Jonasi ra'yry” jaa tè Pajona. Jane kõ rõwã nemotekokuwa aepo jaa rè. Papa yvapewarà teãmã nemotekokuwa aepo tere ije, e'i. Tanerory ajawyi. 18Ajare kee a'e ene. Peturu a'e neupe. “Takuru” jaa tè aepo a'e ene.#16.18 Jesu “takuru” jaa tè e'i Peturu pè remẽ, takuru tetã rè tè poromosã'ãga. Ava tetã oinõ remẽ, ijãparõga ypy oinõ. A'e 'aryvo ipari kõ oinõ. Ajaate tetã ape oinõ ky'y. Oinõ gatu remẽ mãerã ekoi ky'y. Eps. 2.20; 1Pe. 2.5; Rom. 8.37-38; Juw. 1.5; J.Jim. 6.9-11; J.K.R. 5.33-39; Epr. 11.35-40; 1Kor. 15.26 Ene ypy ekuwa Janejare'e Ra'yry rõmõ. Ajawyi aepo ere mã'ẽ a'evo ve tetã ãparõga vo. Ãwĩvo ve ekoty rewarà kõ amoatytà ojirõromõarà rõmõ toiko kupa. Pe'ĩypyte mã'ẽ rõmõ ainõ kõtà. Ikasiaytà ekoty rewarà kõ atyry. Ava nikasi'ãi imomaa rè. Mãnõa tẽ tesõ nikasi'ãi imomaa rè. Mãerã tè ekoità, e'i Jesu Peturu pè.

19E'i jẽ Jesu:

– Nekuwa manyvo oroereko Janejare'e remĩgwai rõmõ. Ajawyi oroayvumokasità Janejare'e omoẽoka o'arà kyty mãe kõ atyry kõ rè, ivo katu mã'ẽ kuwaparà rõmõ, e'i. Neayvukasità Janejare'e yvapewarà ayvu rupi tè, e'i. “Nivoi” ere sõ ava mõ pè remẽ, “nivoi” e'i tary ve Janejare'e ijupe. “Ivo” ere sõ ava mõ pè remẽ, “ivo” e'i tary ve Papa ijupe, e'i Jesu Peturu pè.#Mat. 18.18; Juw. 20.23

20Ãmẽ Jesu kee e'i jẽ wemimo'ekwerà kõ pè:

– I'ete aepo ere ije, e'i. Ajamã'ẽ aepo tapemome'u e'ã rã'ĩ ãmõ kõ pè, e'i Jesu.

“Ejukatà kupa”, e'i Jesu mã'ẽ

(Maku 8.31–9.1; Rukasi 9.22-27)

21Ajaire Jesu omome'u ypy amãtejẽ wenonewarà rã rewarà ijupe kõ.

– Taa jẽsi Jerusarẽ taa kyty, e'i. A'e pè avãema remẽ, jõvijãgwerà kõ emomorijauokatà. Ãmõ, Janejare'e pè oporegeta mãe kõ rõvijã kõ ve. Ãmõ, tãmõ Moisesi remikusiwarerà rè poromo'e mãe kõ teve. A'e kõ emomorijau ywetetà avãe remẽ. Ejukaokatà kupa. Ajamã'ẽ moapy 'arà remẽ Janejare'e aekwery vo emomoera tarà mijẽ emopõ'ã, e'i.

22Aepo e'i paire Peturu weraa rã'ĩ kuipe'e kyty. Kee e'i epe Jesu pè:

– Aepo ere sõ, jõvijã! e'i tite. A'evo remẽ ni'ei 'eteay! Janejare'e nerereko katutà a'evoa wyi, e'i ijupe.

23Aepo e'i remẽ, Jesu ojirova omãjã ee wayvukasi rõmõ ijupe.

– Manyvo põ aepo ere sõ! e'i. Ãjãgai rõvijã Satanasi tè aepo nemo'eoka ywe'e tite upa, e'i. Nemoigooka'ãi epe Janejare'e rekoa rupi rejupa, e'i. Aepo ere neporegeta remẽ, Janejare'e ayvu rupi rõwã nejipy'amogeta, e'i. Jane kõ ayvu rupi tè nejipy'amogeta tite, e'i Jesu Peturu pè.

24E'i jẽ Jesu wemimo'ekwerà kõ pè:

– Pepota awyje erupi peiko remẽ, eayvu rupi tapeiko ipi. “Jesu remimota ywesõ ikasi eremimota wyi”, tapejẽ. Ãmõ, ava mõ sõ, “Nereityi Jesu remẽ, orojukatà”, e'i sõ pejẽ remẽ, kee tapejẽ ãmẽ ijupe: “Nimanyvoi ejuka pekupa remẽ”, tapejẽ kõrijõ ijupe ãmẽ. “Ajamã'ẽ naity'ãi Jesu ejuka pekupa remẽ”, tapejẽ, e'i Jesu ijupe kõ.#Mat. 10.38; Ruk. 14.27

25– Ãmẽ ava mõ nereityi 'ete mã'ẽ omãnõ remẽ, i'ãg nomãnõ'ãi. Janejare'e omoigo puku karuarutà opyri. Ajamã'ẽ ava mõ ojireko katu ipe mãnõa wyi remẽ, kãramõ omãnõ jẽtà ajamã'ẽ, e'i.#Mat. 10.39; Ruk. 17.33; Juw. 12.25 26Nooi Janejare'e pyri oiko karuaru remẽ, manyvoa rã rõmõ rõwã kuwa oma'e kõ omoaty ywete. Agyvotè ootà jimomorijaua rena kyty. Awyje a'e pè ekoità. Manyvo ne'i'ãi omoẽa moepy, e'i Jesu.

27– Kãramõ ajo tarà mijẽ, e'i. A'e remẽ sõsi Janejare'e Remimuurerà ajimojane mã'ẽ rõmõ ajikuwatà ajo ky'y, e'i. Jõvijã wasu rõmõtà tẽ tesõ ajo ije ky'y. Ãmẽ Janejare'e remĩgwai yvapewarà kõ ve uutà erupi, e'i. Papa votà ije ajimomojytà tè ajo, e'i. Poromoe'yiarà rõmõ tè ajotà ky'y, e'i. Ãmẽ si ivo mãe kõ aepyme'ẽtà ky'y, e'i. Ãwĩvo ve nivoi mãe kõ aepyme'ẽtà ky'y, e'i ijupe kõ.#Mat. 25.31; Rom. 2.6

28E'i jẽ ijupe kõ:

– Aã a'e mã'ẽ pekuwa ikenẽ. Ãmõgwerà janepyterà rupiwarà omã'ẽtà ere, Jõvijã wasu rõmõ ajo ajikuwa remẽ, e'i. Nokãjãive mãe kõ ve omã'ẽtà ere a'evo remẽ. Aje ywete aepo a'e aporegeta pejẽ, e'i Jesu ijupe kõ.

Actualmente seleccionado:

Mateusi 16: oymNT

Destacar

Copiar