Yohana 6
6
Yéésù zàn nɛ́b vɔ̀ɔ̀m bəd laa núnà zɔ̀ŋ laa iira zè kób
(Mata 14.13-21; Markus 6.30-44; Luka 9.10-17)
1Záàn zɔ̀gɔ̀ gə́, Yéésù záá ɛ̀m Galili wəl nyìgə̀l naà gúuú (bə̀ dɛ̀d Tiberiya wəl nyìgə̀lá). 2Zɔ̀ŋ aa nɛ́b bəd bé' inkɔrə bəraa Yéésù mà' kə̀ nɛ́b bəd si' gáŋ̀mbə̀ mad bərú yée ní, nɛ́b zùúm bəd zá' guùm bə̀ bàgə̀ bòórú. 3Yéésù na' kɔ̀l wàà nə́ŋ̀ yílú, bít dáá kùm wərə̀ kə̀ nɛ́b sáànmbə̀ oò bəd tá. 4Yahudu bəd wálke aa bə̀ dɛ̀d Paska rə, gbad wə́ə́ì kə́d ba. 5Yéésù ɛ̀g núù gə́, bít bé' nɛ́b zùúm bəd tóò yaànà oò sunú. Bàà Filip: «Báan bə̀rɛ́d bɔbm̀ lɛ́bm̀ bínì, báàn taà nɛ́b bəraa yée piìn, boò líí kíìn boò kóólé gú?» 6(Dɛ̀d kàandə, í' nwɔŋ aa Filip kè' dá í'ǹ də kiìnmbìá. Kə̀ aakíin də, oò gə́, gàb in aa dá ma'ǹ dəì gbòód.)
7Filip kè' í'ù: «Nɛɛ̀n aa nɛ́b bəd káá rú yée gə́, kóó dáà báan kuùm kə̀ ba' lɛ̀ɛ́ŋə̀ laa kób má, bə́n bɔbm̀ bə̀rɛ́d kə̀ kùrú, bɔ̀b nɛ́ɛ̀réè kóólé oò bɔ̀b weeké nə́ŋ̀ gá.»
8Nɛ́ŋə̀ nə́ŋ̀ nɛ́b sáànmbə̀ oò bəd tə́ŋú, bə̀ dɛ̀rə̀ Andre, Simon Piyɛr kudvɛɛ̀lá, bààù: 9«Wàà váàndo nə́ŋ̀ tə́ zɔ̀ŋə, ɛ̀mà tə́ kə̀ bə̀rɛ́d naà núnà, kə̀ díb iira. Zá aarə, dá nɛ́b gùùbə̀ bəraa yée níì ma'ǹ gú?»
10Kàanyée gə́, Yéésù bàà: «Ìì bàà nɛ́b vɔ̀ɔ̀m bəd kóólé boò kùm yɛ́b ba.» (Fɔ̀g zùúm zɔ̀ŋ aarə ba.)
Kàanyée gə́, bə̀ kùm bəd taà yɛ́b ba. Ká'ke boò rə, mà'ì nɛ́b bəd laa núnà zɔ̀ŋ laa iira zè kób. 11Yéésù pà' bə̀rɛ́d bəd gə́, mɔ̀' Vɛnɛ́bá, bít gààm nɛ́b bəraa kùm wərə̀ roó. Bít pii bə̀ díb kɔ̀ kàani, kə̀ nɛɛ̀n aa bə̀ í' rú rə kíin. 12Zɔ̀ŋ aa nɛ́b bəd kóólé líí bə̀ wùb bəd yée gə́, Yéésù bàà nɛ́b sáànmbə̀ oò bəd: «Pú' ìì wál welké bəraa nyɛ́d də kúnú, bɔ̀b kóó in nə́ŋ̀má oò bɔ̀b sí.»
13 Nɛ́b sáànmbə̀ bəd pú' bə̀ nyíí welké bəd də pìlə̀m kób zè iira. Pìlə̀m kób zè iirə aarə, vúgà bə̀rɛ́d núnə̀ rə rú.
14Zɔ̀ŋ aa nɛ́b bəd bé' inkɔrə aa Yéésù mà' yée gə́, bə̀ bàà: «Vɛ́nà, Nɛ́ŋ Váàndo aa yée, kùmsə̀n Vɛnɛ́b gbantumsə̀ aa Musa gám nwɔŋ oò, dáà yaànà zɔ̀ŋə yɛ́b bəroó!»
15Yéésù sèl bé' gə́, bə̀ í' bəǹ yaàn pa'ǹmbìá, bít gààd lə́ə̀nmbə̀ kə̀ kpɛŋsɛ́lá. Kàanyée gə́, zá' na' kɔ̀l wàà yílú sɔ̀ŋ, oò nə́ŋ̀ní tə́ŋtə́ŋ.
Yéésù ɛ̀m wəl nyìgə̀l yílú
(Mata 14.22-33; Markus 6.45-52)
16Zɔ̀ŋ aa nyàm yaà mà' gə́, nɛ́b sáànmbə̀ oò bəd bə̀ símà wəl kàd ba. 17Bə̀ pìì kə̀ə̀d nə́ŋ̀ú, bít bə̀ sɔ̀d wəl nyìgə̀l taànmbìá; bə̀ də́' núù Kapɛrnaum bìlú. Sɛŋ də, tígə́l mà'ì gbòód, bít Yéésù kɔ̀ yaà wə́ə́ bə́ŋ̀ boò səǹ sé. 18Zɔ̀ŋ aa nwul pɛ̀b kə̀ kpɛŋsɛ́l yée gə́, wəl wá' kúnú. 19Bə̀ sàb kə̀ə̀d, bə̀ ɛ̀m zɔ̀ŋ bùúrá, mà'ì kìínmbə̀ kílomɛ́tà núnà, sínkɔ̀ nɔ̀ŋgɔ̀s kíin. Sɛŋ də, bə̀ bé' taà Yéésù ɛ̀m tóò taà gbadǹnà boò səǹ kə̀ə̀d ba, wəl yílú. Bít bə̀ bé' kàangə́, də́dǹ mà' bə̀ yàá. 20Zá Yéésù bàà bə̀: «Aarə máára, ìì nùù də́dǹ sí!»
21Bə̀ í'ù pa'ǹmbə̀ kə̀ə̀rú, bít kə̀ nwɔŋ aa nuù yée kíinní, kə̀ə̀d dáá pig dəŋsə́ gú' yàá, zɔ̀ŋ aa bə̀ tə́ dáàn bərə ba.
Nɛ́b zùúm bəd tə́ Yéésù saanàá
22Nwúndù oòrə, nɛ́b zùúm aa bə̀ kùmà wəl nyìgə̀l naà gúu rə, bə̀ gàb yàá, kə̀ə̀d nə́ŋ̀ní nyɛ́d sə̀n wərà. Bə̀ gàb yàá, Yéésù pìì kə̀ə̀rú wərə̀ kə̀ nɛ́b sáànmbə̀ oò bəd tə́ sé; zá nɛ́b sáànmbə̀ bəd bə̀ ɛ̀m boò ní. 23Kàanyée gə́, kə̀ə̀d Tiberiya bìlú bə̀ kambəd gbád yaà bə̀ wə́ə́ zɔ̀ŋ aa Báátììkpɛ̀ŋ mɔ̀' Vɛnɛ́b, bít nɛ́b zùúm bəd líí bə̀rɛ́d bərə ba. 24Zɔ̀ŋ aa nɛ́b zùúm bərì bé' Yéésù sé, bít bə̀ bé' nɛ́b sáànmbə̀ oò bəd sín yée gə́, bə̀ pìì kə̀ə̀d bəraa rə rú, bít zá' bə̀ ɛ̀m Kapɛrnaum bìlú, Yéésù dáàn saànmbìá.
Yéésù kùmsə̀n bə̀rɛ́d gɔ̀ŋsə́ bìá
25Bə̀ bɔ̀b Yéésù wəl naà gúu gə́, bít bə̀ dɛ̀rə̀: «Nɛ̀ná, yaa ń wə́ə́ zɔ̀ŋə nɛ́mbínì gú?»
26Yéésù kè' í' bə̀ gə́, bít bàà bə̀: «Mə́ tə́ ii kíìn baanàá, aarə nwɔŋ sɔ̀ɔ̀ná, íí líí bə̀rɛ́d də, íí sàà mə́ taá. Bít líí íí wùb yàá. Zá íí sàà mə́ kə̀ inwulubə̀ bəraa íí bé' mə́ mà' rə gá. 27Íí dá tù' ma'ǹ gə́, ìì mà' inlíìnmbə̀ aa yɛɛ̀l dá dugǹ də bə̀ sí, zá ìì mà' inlíìnmbə̀ aa dá kuùm zèd kə̀ zèd, bít dá gɔ̀ŋsə́ aa bɛ́d bə gá rə piìn də bìá. Inlíìnmbə̀ aarə, nɛ́ŋə̀ aa bə̀ dɛ̀rə̀ Nɛ́ŋ Váàndo Wàà rə, dá ii sə̀n piinàá. Kàandə, Báá Vɛnɛ́b gə́, mà'ù tampon bərə, bɔbm̀ i'ǹmbə̀ oò tə́ kə̀ pɛ̀sá.»
28Kàanyée gə́, bə̀ dɛ̀rə̀: «Bá níì ma'nì, bá taà tù' bəraa Vɛnɛ́b í' rə ma'ǹ bɛ́'ǹ gú?»
29Yéésù kè' í' bə̀, bàà: «Tùsaa Vɛnɛ́b tə́ nwáàn ìì mà' rə, ìì bàg nɛ́ŋə̀ aa tùmà roó.»
30Bə̀ bàà: «Níì inwulubə̀, ń dá taà báàn i'ǹmbə̀, bɔ̀b báan taà bagǹ gú? Ń dá níì ma'ǹ gú?» 31Doo bə́ bərì lííà mana fɔ̀gú, kìínmbə̀ nɛɛ̀n aa Núúboòd Gìdń bàà rə kíin: «Pii bà bə̀rɛ́d aa símà lɛgə́ paà roó.»
32Yéésù kè' í' bə̀: «Mə́ tə́ ii kíìn baanàá, aarə nwɔŋ sɔ̀ɔ̀ná' Musa pii iiyà sə̀n bə̀rɛ́d lɛgə́ paà bə̀ gá. Zá aarə, Báá mə́ tə́ ii sə̀n bə̀rɛ́d lɛgə́ paà bə̀ vɛ́nà bə̀ rə piinàá. 33Kə̀ aakíin də, bə̀rɛ́d aa Vɛnɛ́b pii rə, taà kùmsə̀n aa símà lɛgə́ poú, bít pii nɛ́b bəd gɔ̀ŋsə́ zɔ̀ŋə yɛ́b bəroó.»
34Kàanyée gə́, bə̀ bààù: «Báátììkpɛ̀ŋá, m̀ pii bə́ bə̀rɛ́d aarə sɛŋ gə́ kóólé.»
35Yéésù bàà bə̀: «Máára mə́ kùmsə̀n bə̀rɛ́d aa tə́ gɔ̀ŋsə́ aa bɛ́d bə gá rə piìn doó. Màn aa yaà máá səǹ də, kìì gulùm gá, bít màn aa bàg mə́ rə kɔ̀, kìì wəlsúud gá sə́g sə́g. 36Zá máá gə́, mə́ bààiyà yàá. Íí bé' máà yàá, kə̀ núù aí bìá, bít nɛ́ɛ̀m íí bàg mə́ sə̀n sé. 37Nɛ́b bəraa Báá mə́ pii mə́ rə kóólé, bə̀ dáà yaànà máá sunú; máá kɔ̀, màn aa yaà máá səǹ də gə́ kóólé, nìŋ mə́ lɛ́'ù gbaarú gá. 38Kə̀ aakíin də, mə́ símà lɛgə́ paà rə, yaàn ma'ǹmbə̀ màn aa tùm máà rə in aa í' roó, zá ma'ǹmbə̀ in aa mə́ í' rə gá. 39Aa yée, kùmsə̀n in aa màn aa tùm máà rə í' roó' máà bɔ̀' kóó nɛ́ŋə̀ nə́ŋ̀má, nɛ́b bəraa pii máà rə tə́ŋə́ sí. Zá bɔ̀b máà díím bə̀ kíìn valú, boò kóólé, nyàm aa Vɛnɛ́b dá nɛ́b bəd fágǹ bəroó. 40Èè, ìì zɛ̀ŋ in aa Báá mə́ í' roó' Nɛ́b bəraa bé' Wàà oòra, bít bə̀ bàgə̀ rə gə́ kóólé, boò bɔ̀b gɔ̀ŋsə́ aa bɛ́d bə gá roó. Bít máà díím bə̀ kíìn valú, máà pii bə̀ gɔ̀ŋsə́, nyàm aa Vɛnɛ́b dá nɛ́b bəd fágǹ bərə ba.»
41 Yahudu bəd nɛ́b gbàád bəd bə̀ zoòl iná, kə̀ Yéésù nwɔŋ aa bàà: «Máára mə́ kùmsə̀n bə̀rɛ́d aa símà lɛgə́ paà roó.» 42Bít bə̀ dɛ̀rə̀: «Máàn aarə, Yéésù, Yusufu wàà váàndoì? Bə́n gabm̀ báá oò yàá, kə̀ nà'á oò tá. Ééleè dá taà báàn baànmbə̀ bə́ŋyée, bəǹ símà lɛgə́ paà gú?» 43Yéésù kè' í' bə̀: «Ìì dàà in zoòlǹmbə̀ íí bòdba. 44Kóó nɛ́ŋə̀ nə́ŋ̀má bánà yaànmbə̀ máá səǹ gá, Báá mə́ aa tùm máà rə, dɛ̀d ààùwà sə̀n síngə́ roó. Bít máá kɔ̀, máù díìm valú, máù gɔ̀ŋsə́ piìn, nyàm aa Vɛnɛ́b dá nɛ́b bəd fágǹ bərə ba. 45Vɛnɛ́b gbantumsə̀ bəd bə̀ bád nwɔŋ aa yóo: ‹Boò kóólé, Vɛnɛ́b dá bə̀ sə̀ní nwɔŋ oò sánàá.› Kóó nɛ́ɛ̀réè, zɛ̀ŋ Báá nwɔŋ yàá, bít kè' insánke oòì gə́, dáà yaànà máá sunú. 46Aarə í' baànmbə̀, nɛ́ŋə̀ nə́ŋ̀má bé' bèd Báá sé. Nɛ́ŋə̀ aa vúgà Vɛnɛ́b səǹ də, oòra bé' sə̀n Báá, oò nə́ŋ̀ní tə́ŋtə́ŋ. 47Mə́ tə́ ii kíìn baanàá, aarə nwɔŋ sɔ̀ɔ̀ná, màn aa bàg mə́ì rə, bɔ̀b gɔ̀ŋsə́ aa bɛ́d bə gá rə yàá. 48Máára mə́ kùmsə̀n bə̀rɛ́d aa tə́ gɔ̀ŋsə́ aa bɛ́d bə gá rə piìn doó. 49Doo íí bəd bə̀ lííà mana fɔ̀gú, zá val kòd bə̀ yàá. 50Zá bə̀rɛ́d aa vúgà Vɛnɛ́b yiìl lə gə́, màn aa lííù rə, val kò'ù bə gá. 51Máára mə́ kùmsə̀n bə̀rɛ́d aa tə́ gɔ̀ŋsə́ piìn, vúgà Vɛnɛ́b yiìl loó. Nɛ́ŋə̀ aa líí bə̀rɛ́d aarə, dá kuùm kə̀ gɔ̀ŋsá, zèd kə̀ zèrá. Bə̀rɛ́d aa máá ii piìn də, kùmsə̀n gɔ̀g lúgúd mə́ra. Má gɔ̀g lúgúd mə́ piinàá, bɔ̀b nɛ́b bəraa zɔ̀ŋə yɛ́b bərə, boò bɔ̀b kə̀ gɔ̀ŋsá.»
52Nwɔŋ aa yée bòórú, Yahudu bərì nyá' taà nwɔŋ, bít bə̀ dɛ̀d taà ɔ̀dnə́ŋ̀ bəd boò bòdba: «Ééleè Nɛ́ŋ Váàndo aa yée, dá bə́n taà gɔ̀g lúgúd oò piìn, báàn taà fu'ǹ gú?»
53Yéésù bàà bə̀: «Mə́ tə́ ii kíìn baanàá, aarə nwɔŋ sɔ̀ɔ̀ná, íí fù' nɛ́ŋə̀ aa bə̀ dɛ̀rə̀ Nɛ́ŋ Váàndo Wàà rə gɔ̀g lúgúd sé, bít íí nyəə nyɛ̀lə́m oò síngə́, íí bɔ̀b gɔ̀ŋsə́ aí naà gá. 54Màn aa fù' gɔ̀g lúgúd mə́ra, bít nyəə nyɛ̀lə́m mə́ rə, tə́ kə̀ gɔ̀ŋsə́ aa bɛ́d bə gá rə naú. Bít nyàm aa Vɛnɛ́b dá nɛ́b bəd kóólé fágǹ bərə, máù kíìn díìm valú. 55Kàandə, gɔ̀g lúgúd mə́ kùmsə̀n inlíìnmbə̀ sɔ̀ɔ̀n vɛ́nà bìá. Bít nyɛ̀lə́m mə́ kɔ̀, kùmsə̀n innyəə̀nmbə̀ sɔ̀ɔ̀n vɛ́nà bìá. 56Màn aa fù' gɔ̀g lúgúd mə́ra, bít nyəə nyɛ̀lə́m mə́ rə, kùm tə́ máá rú, bít máá kɔ̀ mə́ tə́ oò rú. 57Báá mə́ aa tùm máà rə, kùm tə́ kə̀ gɔ̀ŋsá, bít máá kɔ̀ mə́ kùm tə́ kə̀ gɔ̀ŋsə́ oò bòórú. Kə̀ nɛɛ̀n aarə rú kíin, màn aa líí si' mə́ rə, dá kuùm kə̀ gɔ̀ŋsə́ máá bòórú. 58Aa yée kùmsə̀n bə̀rɛ́d aa vúgà Vɛnɛ́b yiìl loó. Bə̀rɛ́d aarə, kìínmbə̀ aa doo íí bəd bə̀ lííà, bít val kòd bə̀ rə kíin sé. Màn aa líí bə̀rɛ́d aarə, dá kuùm kə̀ gɔ̀ŋsá, zèd kə̀ zèrá.»
59Kə̀ aakíin də, sɛŋ aa Yéésù gám nwɔŋ bəraa rə, bɔ̀b tə́ nɛ́b bəd Vɛnɛ́b nwɔŋ sáàn Yahudu bəd wúlwáàlbə̀ rú, Kapɛrnaum bìlú.
Yéésù tə́ sə̀n kə̀ nwɔŋ bəraa pii sáá gɔ̀ŋsə́ aa bɛ́d bə gá rə naú
60Zɔ̀ŋ aa bə̀ kìì Yéésù nwɔŋ gə́, nɛ́b sáànmbə̀ oò bəd zùúm bàà: «Insánke luùm aa gə́, gbò'ì kiìnmbìá. Nɛ́ɛ̀réè dá sə̀n báàn ke'ǹmbə̀ gú?»
61Yéésù ɛ̀g bé' gə́, nɛ́b sáànmbə̀ oò bəd zoòl in tə́ kə̀ nwɔŋ aa roó. Kə̀ taàbìá, bàà bə̀ taà: «Aarə, mà' bɔ̀' ii tɛ́mbagké tə́ kínì? 62Kàandə, dáà íí bé' nɛ́ŋə̀ aa bə̀ dɛ̀rə̀ Nɛ́ŋ Váàndo Wàà rə tə́ na'ǹ naà zɔ̀ŋ aa nyàam sɔ̀d kùmà bərə gə́, íí dá leè baàn gú? 63Nɛ́ŋə̀ kə̀ yíl oò bə̀ gə́, bán in nə́ŋ̀má ma'ǹmbə̀ gá. Vɛnɛ́b Nwul pii sə̀n gɔ̀ŋsá. Nwɔŋ bəraa mə́ bààiyà, vúgə́là Nwul Gìdńnú rə, boò ra bə̀ pii sə̀n gɔ̀ŋsá. 64Zá nɛ́b kam aí tə́ŋú, bə̀ bàg sé.» (Kə̀ aakíin də, sɛŋ aa sɔ̀d dú rə ní, Yéésù gàb nɛ́b bəraa nɛ́b sáànmbə̀ bəd síndə yàá, bít gàb màn aa dáù ráàn lɛ́bm̀ də yàá.)
65Bàà zəg sɔ̀ŋ: «Kə̀ taàbìá, mə́ bààiyà taà, kóó nɛ́ŋə̀ nə́ŋ̀má bánà yaànmbə̀ máá səǹ gá, Vɛnɛ́b piiùwà sə̀n kpɛŋsɛ́l síngə́ roó.»
66Sɔ̀d sɛŋ də ba, nɛ́b zùúm nɛ́b sáànmbə̀ oò bəd tə́ŋú, kid bə̀ bíd kúnú, bít bə̀ ɛ̀m kə̀ oò tə́ sɔ̀ŋ sé. 67Kàanyée gə́, Yéésù dɛ̀d taà gbantumsə̀ oò bəraa kób zè iirə roó, bàà bə̀: «Aí kɔ̀, íí í'yì ɛɛ̀mbèì?»
68Simon Piyɛr kè' í'ù: «Báátììkpɛ̀ŋá, bá dáàn nɛ́ɛ̀réè səǹ sɔ̀ŋì? Ámda ń tə́ sə̀n kə̀ nwɔŋ bəraa pii sáá gɔ̀ŋsə́ aa bɛ́d bə gá rə naú. 69Bə́ŋyée gə́, bə́ bàg yàá, bít bə́ gàb yàá, ámda ń kùmsə̀n nɛ́ŋə̀ Gìdń aa vúgà Vɛnɛ́b səǹ doó.»
70Yéésù kè' í' bə̀: «Máára sàà mə́ vúŋ iiyà sə̀n nɛ́ŋə̀ íí kób zè iirə, íí kóólé géè? Zá nɛ́ŋə̀ nə́ŋ̀ tə́ aí tə́ŋú, Sámbàŋyɛ́ràá!» 71Yéésù gám nwɔŋ aarə Yudas, Simon Iskariyot wàà yílú. Yudas də, kùmsə̀n nɛ́b sáànmbə̀ oò bəraa kób zè iirə rə nə́ŋ̀ boò ra. Zá kə̀ aarə tə́ kóólé, oòra dá sə̀n Yéésù yaàn lɛ́bàá.
Actualmente seleccionado:
Yohana 6: SLNT98
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Nouveau Testament en Samba Leko © Alliance Biblique du Cameroun, 1998.
