San Juan 15
15
Koro dau ä̧na̧juä̧ huȩnȩ
1Jesús huo̧juȩti̧nö̧do:
—Ttö koro dau, adihuä uva dau jä̧'i̧nö̧'a̧nö̧ hua̧sä̧. Chä'omä dau tta̧huä̧rä̧cuä̧huä̧ i̧sa̧ jä̧'i̧nö̧'a̧nö̧ hua̧. 2Koro ttöttö ä̧na̧juä̧ u̧huä̧ju̧ juiyömä 'cui'opö icu. Koro u̧huä̧ju̧ ka̧cu̧mä̧ adiunätä aditö tta̧'ä̧rö̧, juhua'a yabonö rö̧ȩnä̧ u̧huä̧ju̧ huȩja̧ pä'ö. 3Ucuturu chu̧huo̧juȩti̧nö̧ cuesetätucua'attö, adiunä ka̧cuä̧tö̧jä̧ jitämä. 4Ucutucu cuedächö ta'anö, ttöcu cue'ächätucui ucutu'inä. Dau ä̧na̧juä̧ ja̧'a̧tä̧ katämä u̧huä̧ju̧ juiya'a. Dau kada'canä todehuomenätä, ja̧u̧ ä̧na̧juä̧nä̧ huȩjä̧cua̧'a̧ u̧huä̧ju̧. Ucutu'inä ttörö todeunä cu̧ja̧cuä̧tu̧cu̧ juiyöttömä, yoröiso u̧huä̧ju̧ juiyäcua'a.
5“Ttömä kada'ca hua̧sä̧. Ucutumä ä̧na̧jui̧yä̧ huotöjä. Ttörö todeunä cue'ächömä, ttö'inä ja̧u̧ru̧ todeunä chö̧ja̧'a̧ttö̧, rö̧ȩnä̧ u̧huä̧ju̧ u̧ju̧nä̧rä̧cua̧. Ucutumä ttörö toönä yoröiso jȩpo̧co̧tö̧jä̧. 6Koro ä̧na̧jui̧yä̧ do'opö tticu joipö o'ca'a, ca̧ca̧tö̧ ocuränä ku tticua'a jä̧'i̧nö̧'a̧nö̧, 'cuä̧o̧pä̧cua̧ ttörö todeunä ko̧cö̧mä̧.
7“Ttörö todeunä cu̧ja̧cuä̧tu̧cuo̧mȩnä̧, chu̧huo̧juȩti̧nö̧ cunichi'ätucu juiyöttömä, ucuturu pä̧huä̧ rö̧jö̧ jäcuhue'ätucuomenä, Chä'o i̧yä̧cua̧ ucuturu. 8Ucutu u̧huä̧ju̧ rö̧ȩnä̧ cu̧ju̧nä̧rä̧tu̧cuo̧mȩnä̧, Chä'orö ucuotönö jȩpä̧tö̧jä̧. Ja̧'hua̧nö̧ jȩpö̧, iso päi'önä chu̧huo̧juȩtä̧u̧ pä'i'ätöjä. 9Ttö Chä'o ttörö repeö'a̧nö̧, repe'ösä ucuturu. Ucuturu repeda'attö, ttöcu cue'ächätucui. 10Chä'o hueömä jȩcha̧'a̧ttö̧ ttörö repeö'a̧nö̧, ttö huedömä jȩcu̧'ä̧tu̧cu̧ttu̧mä̧, ucuturu rȩpȩdä̧cua̧sä̧.
11“Ucuturu pa̧'a̧nö̧ ji'äusä ttörö cuesehuätucuäcua'a̧nö̧. Ja̧'hua̧nö̧ cuesehuätucuttumä, adihuä juäinätä cuesehuäcuotöjä. 12Pi̧yȩtä̧ ttö huedömä: ucuturu repedö'a̧nö̧, repe'ätucui ucutu'inä korotö korotönörö. 13Ya̧tȩ a̧hua̧ru̧hua̧rö̧ repe'ö a̧hua̧ru̧hua̧ toei'ö juiya pä'ö 'corupäi'öttömä, korotö ttahuaruhuärö repettöttö'inä abonänö repe'ö a̧hua̧ru̧hua̧rö̧. 14Ucuturu o'ca juiyönä huedömä jȩcu̧'ä̧tu̧cu̧ttu̧mä̧, ttö chahuaruhuäjä. 15“Ucutumä adicuä ttö̧ja̧jä̧” pä'ocösä. Ya̧tȩ adicuä i̧sa̧mä̧, u̧ru̧hua̧ jȩö̧mä̧ yoröiso jȩru̧pa̧. Chä'o o'ca juiyönä ttörö jiähuinömä ucuturu jidähuina'attö, “Ucutumä chahuaruhuäjä” pä'ösä. 16Ucutumä ttörö o'ipocotö pi̧nä̧tö̧jä̧. Ttömä ucuturutä o'ipinösä. Ja̧'hua̧ta̧nö̧ ucuturu hue'inösä rö̧ȩnä̧ u̧huä̧ju̧, beipächocö juäittö cu̧ju̧nä̧rä̧tu̧cua̧ pä'ö. Ja̧'hua̧nö̧ cu̧ju̧nä̧rä̧tu̧cu̧ttu̧mä̧, o'ca juiyönä chi̧mi̧nä̧ jäcuhue'ätucumä, Chä'o i̧yä̧cua̧ ucuturu. 17Ja̧'hua̧ ja̧'a̧ttö̧ pi̧yȩtä̧ hue'ösä ucuturu: korotö korotönörö repe'ätucui, —pä'ö huo̧juȩti̧nö̧do Jesús.
Pi̧jä̧ ttö̧ja̧ Jesúsru kö'cocotödo
18Juhua'a yabonö huo̧juȩti̧nö̧do Jesús:
—Pi̧jä̧ ttö̧ja̧ ucuturu ttöjö'cö juiyöttömä, ttörö'inä ä'canä kö'cocotö pi̧nä̧tö̧do cunichi'ätucuä'. 19Ucutu pi̧jä̧ ttö̧ja̧ jȩttö̧'a̧nö̧ jȩcu̧'ä̧tu̧cu̧ttu̧mä̧, ucuturu repe'ajatö jitörötä ttamönä repettö'a̧nö̧. Ja̧'hua̧nö̧ ja̧'a̧nä̧ jahuätöttö o'ipinösä ucuturu. Ja̧'hua̧nö̧ ja̧'a̧ttö̧ ucutu pi̧jä̧ ttö̧ja̧ cu'ätucuoca'attö, ucuturu kö'cocotö. 20Ucuturu pa̧'a̧nö̧ jidähuinömä amöcuädätucui: “Ya̧tȩ adicuä i̧sa̧mä̧ u̧ru̧hua̧ttö̧'i̧nä̧ abonänö juruhuocödo.” Ttörö suronä jȩtti̧nö̧ ta'anö, ucuturu'inä suronä jȩttä̧cuo̧tö̧. Ja̧'hua̧ta̧nö̧ korotö ttö chu̧huo̧juȩti̧nö̧ ttesetinö ta'anö, ucutu cu̧huo̧juȩtä̧tu̧cu̧'i̧nä̧ ttesetäcuotö. 21Ttörö cuesetätucua'attö, ja̧'hua̧nö̧ o'ca juiyönä jȩttä̧cuo̧tö̧ ucuturu, ttörö hue'inörö ttieruhua'attö.
22“Jahuätörö ucuocu chichinö juiyöttömä, yoröiso jerupö jȩttö̧'a̧nö̧ ja̧'a̧. Ja̧'hua̧nö̧ ja̧'a̧nä̧ jitämä suronä jȩttömä̧ huo̧juä̧tö̧. 23Ttörö kö'cocotömä, Chä'orö'inä kö'cocotödo. 24Jahuätö ttö̧'quȩtȩnä̧ korotö jȩtto̧cö̧ ji̧nö̧ juäi jȩchi̧nö̧ juiyöttömä, jerupö jȩttö̧'a̧nö̧ ja̧'a̧. Ja̧'hua̧nö̧ ja̧'a̧nä̧ ja̧u̧ totta'anä'inä, ttörö'inä, Chä'orö'inä kö'cocotödo. 25Jitörötä hueähuä huȩnȩ päö'a̧nö̧ 'cuäopa pä'ö, ja̧'hua̧nö̧ jȩpä̧tö̧. Ja̧u̧ huȩnȩ päa'a: “Jȩcho̧ca̧'a̧nä̧, ttörö yoröiso kö'cocotö”, päa'a.
26“Ucuturu Ppädäcuähuä I̧sa̧, iso päi'önä Espíritu, Chä'ottö huȩdä̧cua̧mä̧ ichomenä, ttörö adiu u̧cuo̧cuä̧cua̧. 27Ucutumä äcuomenä chichina'a ttöcu cu̧ja̧cui̧nä̧tu̧cua̧'a̧ttö̧, ttörö adiu cucuocuäcuotöjä ucutu'inä, —huo̧juȩti̧nö̧do Jesús.
Actualmente seleccionado:
San Juan 15: PIDNT86
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Nuevo Testamento en Piaroa © Sociedades Biblicas Unidas, 1986.