San Juan 16
16
1Jesús juhua'a yabonö huo̧juȩtö̧ pä'inödo:
—Pi̧yȩ huȩnȩ ji'äusä ucuturu, yodoji mo̧ro̧ päi'omenä jarocuhui'ätucu juiya pä'ö. 2Judíos ttu̧huo̧jui̧'i̧nodettö i̧mi̧cu̧nä̧ 'quȩ'ȩpö̧ tticuäcuotö ucuturu. Koronö'inä ucuturu cuä'ö tticuomenä, Diosrö pä̧huä̧ rö̧jö̧ jȩpä̧tö̧jä̧ a̧'cua̧ra̧'a̧ pä'ö ttamöcuädäcuotö. 3Chä'orö'inä, ttörö'inä ttieruhua'attö, ja̧'hua̧nö̧ jȩttä̧cuo̧tö̧. 4Ja̧'hua̧nö̧ ji'äusä ucuturu, ja̧u̧nu̧ mo̧ro̧ päi'omenä täcö ji'ähuinösä cuamöcuädätucuäcua'a̧nö̧.
Espíritu Santo aditähuä huȩnȩ
“Pä'äjimä ucutucu chö̧jo̧mȩnä̧, ji'ähuocö pi̧nö̧sä̧. 5Jitämä ttörö hue'inö ö̧ja̧'a̧ chi̧'chä̧cua̧sä̧. Ucutu chi̧'chä̧cua̧'a̧ jä'epocotöjä. 6Ja̧'hua̧nö̧ jidähuomenä, ucutu rö̧ȩnä̧ cua̧'cua̧ tta̧ pä'i'ätöjä. 7Iso päi'önä pä'ösä ucuturu, ttö chi̧'chä̧cua̧'a̧ adihuäcua'a ucuturu. Ttö chi̧'chö̧ juiyöttömä, ucuturu Ppädäcuähuä I̧sa̧ ichocö jä̧cua̧. Ja̧'hua̧nö̧ ja̧'a̧nä̧ chi̧'chö̧ttö̧mä̧, ja̧u̧ru̧ huȩdä̧cua̧sä̧ ucutucu ö̧ja̧ pä'ö. 8Chutä ichomenä, pi̧jä̧ ttö̧ja̧rö̧ suronä jȩtta̧'a̧ u̧huo̧juȩtä̧cua̧. Ja̧'hua̧ta̧nö̧ adihuä jueä̧mä̧ mä̧nä̧ huȩnȩ'i̧nä̧ u̧huo̧juȩtä̧cua̧ jahuätörö. Ja̧'hua̧ta̧nö̧ Dios jahuätörö: “Ucu adiu jȩpö̧jä̧”, “Ucu suronä jȩpö̧jä̧” pä̧cuȩ huȩnȩ u̧huo̧juȩtä̧cua̧. 9Jahuätömä suronä jȩpä̧tö̧, ttörö ttesetoca'attö. 10Chä'o ö̧ja̧'a̧ chi̧'cha̧'a̧ttö̧, adihuä jueä̧mä̧ mä̧nä̧ ttu̧huo̧jui̧'ä̧cuo̧tö̧do. Ucutu'inä juhua'a yabonö topocotö cuäcuotöjä ttörö. 11Ja̧'hua̧ta̧nö̧ Dios pi̧jä̧nä̧ hue'örömä suronä 'cuäopa pä'ö hueina'attö, Dios adihuä pä̧cuȩ huȩnȩ tottäcuotödo.
12“Ucuturu rö̧ȩnä̧ jidähua pädomenä, ucutumä jitämä ä̧ju̧cuo̧co̧tö̧ pajatöjä. 13Iso päi'önä Ppädäcuähuä I̧sa̧ Espíritu Santo ichomenä, ja̧u̧ iso päi'önä huȩnȩ u̧huo̧juȩtä̧cua̧ ucuturu. Chutä amönä amöcuädö ucuocuocö jä̧cua̧. O'ca juiyönä ä̧ju̧cuä̧ji̧tä̧ ji̧ä̧huä̧cua̧ ucuturu. Ja̧'hua̧ta̧nö̧ koronö 'cuäopä̧cuȩ'i̧nä̧ ji̧ä̧huä̧cua̧ ucuturu. 14Ttö jidäu ä̧ju̧cu̧, u̧huo̧juȩtä̧cua̧ ucuturu. Ja̧'hua̧nö̧ u̧huo̧juȩto̧mȩnä̧, ttörö u̧cuo̧tä̧cua̧. 15O'ca juiyönä Chä'o u̧ju̧nä̧rö̧, ttö'inä chöäre ja̧'a̧. Ja̧'hua̧nö̧ ja̧'a̧ttö̧ ja̧u̧ Espíritu Santo, ttö jidäu ä̧ju̧cu̧ u̧huo̧juȩtä̧cua̧ ucuturu, pä'äjisä.
Cua̧'cua̧ tta̧cu̧huȩcuä̧tu̧cu̧ huȩnȩ
16“A̧'u̧cua̧'a̧tä̧ o'ca'a, ucutumä ttörö topocotö cuäcuotöjä. Ja̧'hua̧nö̧ ja̧'a̧nä̧ ja̧u̧nu̧ recuonänö o'ca'a, pä'äji ta'anö ttörö tocu'äcuotöjä Chä'o ö̧ja̧'a̧ chi̧'cha̧'a̧ttö̧, —huo̧juȩti̧nö̧do Jesús.
17Ja̧'hua̧ ja̧'a̧ttö̧ korotö u̧huo̧juȩtä̧u̧ttu̧ ttamönä jä'ecuinätödo:
—A̧'u̧cua̧'a̧tä̧ o'ca'a, ja̧u̧ru̧ topocotö täcuotöjä. Ja̧u̧nu̧ recuonänö o'ca'a, pä'äji ta'anö totäcuotöjä, Jä'o ö̧ja̧'a̧ i̧'cha̧'a̧ttö̧ päomenä, ¿tta̧'a̧nö̧ päa'ajo? 18“A̧'u̧cua̧'a̧tä̧ o'ca'a”, ¿tta̧'a̧nö̧ päa'ajä̧ttö̧? Ja̧u̧ ucuocumä yoröiso jerupätöjä.
19Jesús ja̧'hua̧nö̧ ttucuocua'a huo̧jui̧pö̧, pä'inödo:
—Ttö pä'äjisä ucuturu, a̧'u̧cua̧'a̧tä̧ o'ca'a ttörö topocotö cuäcuotöjä. Ja̧u̧nu̧ recuonänö o'ca'a, pä'äji ta'anö ttörö tocu'äcuotöjä. ¿Ja̧u̧tä̧ cuamönätucutä jä'epäcuähuätöjä tä̧ji̧? 20Iso päi'önä pä'ösä ucuturu, ucutumä ajuäunu cua̧'cua̧ tta̧cu̧huȩcuä̧cuo̧tö̧jä̧. Ja̧'hua̧nö̧ ja̧'a̧nä̧ pi̧jä̧ ttö̧ja̧ ja̧u̧nu̧ ttesehuäcuotö. Ja̧'hua̧nö̧ ja̧'a̧nä̧ ucutu cua̧'cua̧ tta̧cu̧huȩcuä̧tu̧cu̧ pärocuätä pärohuächö cuesehuäcuotöjä. 21Yajutä isaju ku̧mo̧du̧ba̧ ni̧yo̧mȩnä̧, ka̧'cua̧ tta̧'ȩcui̧pä̧ju̧. Ji̧'qui̧cha̧hua̧ uhuäpächö o'ca'a, kesehua'attö, ja̧u̧ ni̧yä̧ja̧'a̧ yoröiso amöcuädocoju ji̧'qui̧cha̧hua̧ pi̧jä̧nä̧ uhuäpächäja'a pä'ö. 22Ja̧'hua̧ta̧nö̧ ja̧'a̧ ucuturu'inä. Jitä cua̧'cua̧ tta̧'ȩcuä̧tö̧jä̧. Ja̧'hua̧nö̧ ja̧'a̧nä̧ ucuturu pä'äji ta'anö to̧chä̧cua̧sä̧. Ja̧u̧nu̧mä̧ ttörö tocu'ätucuomenä, cuami iso'quitucunä suhuädi'önä cuesehuäcuotöjä. Ja̧u̧ eseäcuähuä pi̧jä̧ ttö̧ja̧ yoröiso jȩpö̧ icuocotö.
23“Ja̧u̧nu̧ mo̧ro̧ päi'omenä, yoröiso jä'epocotö cuäcuotöjä ttörö. Iso päi'önä pä'ösä ucuturu, o'ca juiyönä chi̧mi̧nä̧ jäcuhue'ätucumä, Chä'o i̧yä̧cua̧ ucuturu. 24Jitä mo̧ro̧ päi'önä ucutumä yoröiso jä'epocotö pi̧nä̧tö̧jä̧ chi̧mi̧nä̧. Jä'epätucui. Dios i̧yä̧cua̧ ucuturu o'ca juiyönä, cuesehuätucua pä'ö.
Jesucristo pi̧jä̧ttö̧'i̧nä̧ abonänö ju̧ru̧hua̧
25“Pi̧yȩ koro juäi jä̧'i̧nö̧'a̧nö̧ jö̧ huȩnȩ ji'ähuinösä ucuturu. Ja̧'hua̧nö̧ ja̧'a̧nä̧ koronö mo̧ro̧ päi'omenä, ja̧'hua̧nö̧mä̧ ucuocuocö chä̧cua̧sä̧ ucuturu. Chä'o i̧huȩnȩ huäjunä ji̧dä̧huä̧cua̧sä̧. 26Ja̧u̧nu̧ mo̧ro̧ päi'omenä, ttö chi̧mi̧nä̧ jäcuhue'äcuotöjä Diosrö. Ja̧'hua̧ta̧nö̧ ttö'inä “Ucuturu adiu chu̧cuo̧cuä̧cua̧sä̧ Chä'orö”, pä'ocösä. 27Chutä Chä'omä ucuturu repe'ö. Ucutu ttörö repecuhuätucua'attö, repe'ö ucuturu. Ttörö Diosttö ichinö pä'ö cuesetätucua'attö, repe'ö ucuturu. 28Ttömä Chä'ottö rä'opö, pi̧jä̧ra̧'a̧ ichinösä. Jitämä pi̧jä̧ jaropi'ö, pä'äji ta'anö Chä'o ö̧ja̧'a̧ chi̧'chä̧cua̧sä̧, —pä'inödo Jesús.
29Ja̧'hua̧ ja̧'a̧ttö̧ u̧huo̧juȩtä̧u̧ pä'inätödo Jesúsru:
—Jitämä huäjunä ucuocujä, koro juäi jä̧'i̧nö̧'a̧nö̧ jö̧ huȩnȩ cucuocuoca'a. 30Jitä huo̧juä̧tö̧jä̧, ucumä o'ca juiyönä huo̧jua̧jä̧. Ja̧'hua̧nö̧ ja̧'a̧ttö̧ ucuru yoröiso jättepö juiyö'a̧nö̧ ja̧'a̧. Ucu Diosttö ichinöjä esetätöjä.
31Jesús jahuätörö ädätinödo:
—¿Jitämä esetätöjä tä̧ji̧? 32Ucutu o'ca toi'önä döcuhuecuächätucuometä päi'äcua'a jitämä. Ttörö katä päi'önä jarocuhuipäcuotöjä. Ja̧'hua̧nö̧ jarocuhuipätucuomenä, katämä pä'i'ocösä, Chä'o ttöcu ö̧ja̧'a̧ttö̧. 33Ucuturu ji'äusä pi̧yȩ, ttörö esetö cuesehuätucua pä'ö. Pi̧jä̧nä̧ kä̧nö̧ ubara ttucuhuäcuotöjä. Ja̧'hua̧nö̧ ja̧'a̧nä̧ cujuruhuätucuaja. Ttömä pi̧jä̧ttö̧'i̧nä̧ abonänö ju̧ru̧hua̧sä̧, —pä'inödo Jesús.
Actualmente seleccionado:
San Juan 16: PIDNT86
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Nuevo Testamento en Piaroa © Sociedades Biblicas Unidas, 1986.