San Juan 14
14
Jesús huo̧juȩti̧nö̧do mo̧ro̧jä̧ra̧'a̧ 'chä̧cuä̧huä̧ huȩnȩ
1Jesús pä'inödo:
—Cua̧'cua̧ tta̧cu̧huȩcuä̧tu̧cuä̧' cuami iso'quitucunä. Diosrö esetätucui. Ttörö'inä esetätucui. 2Chä'o ojusodemä rö̧ȩnä̧ oduhuiyä ja̧'a̧. Ja̧'hua̧nö̧ jö̧ juiyöttömä, ucuturu ji'ähuocö pajisä. Ttö chi̧'chä̧cua̧sä̧ cuoduhuiyätucu aditö cädäda. 3Cä'ädäcuähui'ö'ca̧ chi̧chä̧cua̧sä̧ pä'äji ta'anö ucuturu ȩmö̧ ttö chö̧jo̧mȩ cu̧ja̧cuä̧tu̧cua̧. 4Ucutu huo̧juä̧tö̧jä̧ ttö chi̧'cha̧'a̧mä̧. Ja̧'hua̧ta̧nö̧ mä̧nä̧'i̧nä̧ huo̧juä̧tö̧jä̧.
5Jesús ja̧'hua̧nö̧ päomenä, pä'inödo Tomás:
—Tu̧ru̧hua̧, jerupätöjä cui̧'cha̧'a̧mä̧. Ja̧'hua̧nö̧ ja̧'a̧mä̧ ¿tta̧'a̧nö̧ tu̧huo̧jua̧'a̧jä̧ttö̧ mä̧nä̧mä̧?
6Jesús ädätinödo:
—Ttötäsä mä̧nä̧mä̧, iso päi'önämä, kä̧cuä̧huä̧ i'comä. Ttörötä esetömä Chä'o ö̧ja̧'a̧mä̧ rȩbȩä̧cuä̧hua̧'a̧. 7Ttörö cu̧huo̧juä̧tu̧cu̧ttu̧mä̧, Chä'orö'inä huo̧jua̧ja̧tö̧jä̧. Jitä mo̧ro̧ päi'önä ja̧u̧ru̧ tocu'ätucua'attö, huo̧juä̧tö̧jä̧ ja̧u̧ru̧.
8Ja̧'hua̧ ja̧'a̧ Felipe pä'inödo:
—Chu̧ru̧hua̧, Cuä'orö tota pä'ätöjä. Ja̧u̧ru̧ totöttömä adihuäcua'a.
9Jesús ädätinödo:
—Felipe ucutucu recuo chö̧jo̧mȩnä̧, ¿ji̧nä̧ jȩru̧pa̧jä̧ tä̧ji̧ ttörö? Ttörö topömä, Chä'orö'inä topö. Ja̧'hua̧nö̧ ja̧'a̧ttö̧ Cuä'orö tota pä'ätöjä, ¿tta̧'a̧nö̧ päcuhuäjättö? 10Ttöcu, Chä'ocu ji̧nä̧ ya̧tȩtä̧ ja̧'a̧ ¿esetocöjä tä̧ji̧? Ucuturu jidäumä, ttörötä pä̧huä̧ rö̧jo̧mȩnä̧ ji'ähuocösä. Chä'o, ttöcu kö̧mä̧, churutä pä̧huä̧ rö̧jo̧mȩnä̧ adita'a. 11Ttöcu, Chä'ocu ji̧nä̧ ya̧tȩtä̧ ja̧'a̧ esetätucui. Ja̧'hua̧nö̧ cuesetätucu juiyöttömä, ttö jȩchö̧mä̧ tocu'ätucumä esetätucui. 12Iso päi'önä pä'ösä ucuturu, ttörö esetömä, ttö jȩchö̧'a̧nö̧ jȩä̧cua̧. Ja̧'hua̧ta̧nö̧ ttö Chä'o ö̧ja̧'a̧ chi̧'cha̧'a̧ttö̧, ttö jȩchö̧ttö̧'i̧nä̧ abonänö adihuä juäi jȩä̧cua̧ ttörö esetömä. 13O'ca juiyönä chi̧mi̧nä̧ jäcuhue'ätucumä iyösä, I̧tti̧ Jä'o öadihuä i̧jȩpä̧cua̧'a̧nö̧. 14Ttö chi̧mi̧nä̧ jäcuhue'ätucumä o'ca juiyönä iyösä.
Espíritu Santorö hueinö huȩnȩ
15“Ttörö repecuhuätucuttumä, jȩpä̧tu̧cui̧ ttö huedömä. 16Ja̧'hua̧nö̧ ja̧'a̧ttö̧ Chä'orö jä̧dȩpä̧cua̧sä̧ ucuturu huea pä'ö ka̧ra̧ Ppädäcuähuä I̧sa̧rö̧. Ja̧u̧ ö̧jä̧cua̧'a̧nö̧ ucutucu 'cuäopönä. 17Ja̧u̧tä̧ Espíritu Santo iso päi'önä ji'äudo. Pi̧jä̧ ttö̧ja̧ ja̧u̧ru̧ ȩmo̧co̧tö̧. Jahuätö ja̧u̧ru̧ tottoca'attö, ttieruhuäcu. Ja̧'hua̧nö̧ ja̧'a̧nä̧ ucutucu ö̧ja̧'a̧ttö̧, täcö huo̧juä̧tö̧jä̧ ja̧u̧ru̧. Ucutucu 'cuäopönä ö̧jä̧cua̧. 18Ucutumä katä jarochi'oco̧u̧jä̧. Ucutucu chö̧ja̧ pä'ö ppa̧dä̧chä̧cua̧sä̧. 19A̧'u̧cua̧'a̧tä̧ o'ca'a pi̧jä̧ ttö̧ja̧ ttörö topocotö ttäcuotö. Ja̧'hua̧nö̧ ja̧'a̧nä̧ ucututä ttörö tocu'äcuotöjä. Ttö chö̧ja̧'a̧ttö̧, ucutu cu̧ja̧cuä̧cuo̧tö̧jä̧. 20Ja̧u̧nu̧ mo̧ro̧ päi'omenä ttöcu, Chä'ocu ji̧nä̧ ya̧tȩtä̧ ja̧'a̧ pä'ö cu̧huo̧jui̧'ä̧cuo̧tö̧jä̧. Ja̧'hua̧ta̧nö̧ ucutucu, ttöcu ji̧nä̧ yotöte ja̧'a̧ pä'ö cu̧huo̧jui̧'ä̧cuo̧tö̧jä̧. 21Ttö huedinö u̧huo̧jua̧'a̧ttö̧ jȩpö̧mä̧, iso päi'önä ttörö repe'ö. Ttörö repe'örö, Chä'o'inä rȩpȩä̧cua̧ ja̧u̧ru̧. Ttö'inä ja̧u̧ru̧ rȩpȩdä̧cua̧sä̧. Ja̧'hua̧ta̧nö̧ ja̧u̧cu̧ chö̧jä̧cua̧sä̧, —pä'inödo Jesús.
22Ja̧'hua̧ ja̧'a̧ ka̧ra̧ Judas, Judas Iscariotemäcö̧, pä'inödo:
—Chu̧ru̧hua̧ ¿dä̧bö̧ cui̧jȩpä̧cua̧'a̧jä̧ttö̧ ujuturutä, pi̧jä̧ ttö̧ja̧rö̧ cui̧jȩpo̧ca̧'a̧nä̧?
23Jesús ja̧u̧ru̧ ädätinödo:
—Ttörö repe'ömä, ttö pädömä esetö ä̧ju̧cu̧. Chä'o ja̧u̧ru̧ rȩpȩä̧cua̧. Ja̧'hua̧ta̧nö̧ ttöcu, Chä'ocu ja̧u̧ru̧ ichö, tö̧ja̧cuä̧cuo̧tö̧jä̧. 24Ttörö repe'ocömä, ttö pädömä esetö ä̧ju̧cuo̧cö̧. Jitä ucuturu jidäumä, ttötä chamönä ji'ähuocösä. Chä'o ttörö hueinö huȩnȩ ji'äusä.
25“Ucutucu chö̧ja̧'a̧nä̧ pi̧yȩ o'ca juiyönä ji̧'ä̧huä̧rö̧sä̧ ucuturu. 26Ja̧'hua̧nö̧ ja̧'a̧nä̧ Espíritu Santomä, Ppädäcuähuä I̧sa̧mä̧, Chä'o ttö chi̧mi̧nä̧ huȩä̧cua̧mä̧ o'ca juiyönä u̧huo̧juȩtä̧cua̧ ucuturu. Ja̧'hua̧ta̧nö̧ o'ca juiyönä ucuturu jidähuinömä cuamöcuädätucua pä'ö ji̧ä̧huä̧cua̧ ucuturu.
27“Chami iso'quinä eseunu röji ucuocusä ucuturu. Ucuturu eseäcuähuä iyösä. Ja̧'hua̧nö̧ ja̧'a̧nä̧ pi̧jä̧ ttö̧ja̧ eseäcuähuä ttiyö'a̧nö̧ iyocösä. Cua̧'cua̧ tta̧cu̧huȩcuä̧tu̧cuä̧'. Ja̧'hua̧ta̧nö̧ yecuhuecuätucuä'. 28Ttö chi̧'chä̧cua̧sä̧. Pä'äji ta'anö ucutucu chö̧ja̧ pä'ö chi̧chä̧cua̧sä̧ pädomenä ä̧ju̧cuä̧jä̧tö̧jä̧. Iso päi'önä ttörö repecuhuätucuttumä, Chä'o ö̧ja̧'a̧ chi̧'chä̧cua̧'a̧ huo̧jui̧pö̧, esehuajatöjä. Ja̧u̧ ttöttö'inä abonänö ju̧ru̧hua̧. 29Pi̧yȩ ä'canä ji̧'ä̧huä̧rö̧sä̧ ucuturu, ja̧'hua̧nö̧ 'cuäopomenä, cuesetätucua pä'ö.
30-31“Jitämä rö̧ȩnä̧ ucuocuocösä ucuturu, pi̧jä̧nä̧ hue'ömä icha'attö. Chutä ttörö ujuruhuoca'anä, ja̧'hua̧nö̧ 'cuäopäcua'a, pi̧jä̧ ttö̧ja̧ Chä'orö repeda'a ttu̧huo̧jua̧ pä'ö. Ja̧'hua̧ta̧nö̧ Chä'o ttörö hue'inö hueö'inä jȩpö̧sä̧ ttu̧huo̧jua̧ pä'ö. Ä̧rä̧mi̧'ä̧tu̧cui̧. Ti̧'chä̧tu̧cua̧, —pä'inödo Jesús.
Actualmente seleccionado:
San Juan 14: PIDNT86
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Nuevo Testamento en Piaroa © Sociedades Biblicas Unidas, 1986.