San Juan 13
13
Jesús u̧huo̧juȩtä̧u̧ ttö̧jä̧pi̧yä̧ ötöquinö huȩnȩ
1Pascua fiesta jȩttä̧cua̧'a̧ ä'canä mo̧ro̧ ji̧na̧'a̧do. Jesús pi̧jä̧ jaroi'a pä'ö, Jä'o ö̧ja̧'a̧ i̧'cho̧mȩ päi'a'a huo̧jui̧nö̧do. Chutä i̧tti̧mö̧rö̧, pi̧jä̧nä̧ ka̧cuä̧tö̧rö̧, 'cuäopönä repe'inödo. Iso päi'önä 'corupäi'ome jubö päi'önä repe'inödo jahuätörö.
2Ähuettämä Judas Iscariote, Simón i̧tti̧rö̧, ami iso'quinä hue'inö Jesúsru suronä jȩpä̧tö̧rö̧ iya pä'ö. 3Chutä Jesús, Dios ö̧jo̧mȩttö̧ ichina'a pä'ö huo̧jui̧nö̧do. Ja̧'hua̧ta̧nö̧ Dios ö̧ja̧'a̧cu̧ ppa̧huä̧chä̧cua̧ huo̧jui̧nö̧do. Ja̧'hua̧ta̧nö̧ Dios o'ca juiyönä ujuru iyinäcu huo̧jui̧nö̧do Jesús. 4Ja̧'hua̧nö̧ ja̧'a̧ttö̧ ttu̧cuȩ ttucua'a, Jesús mesa isodättö ä̧rä̧mi̧'ö̧, ö̧'ca̧tä̧huä̧ta̧ huäme i̧sä̧ta̧ ko̧'ä̧dö̧ icuipö, korota̧ pö̧jä̧ta̧ äcänä juä'ocuinödo. 5Ja̧u̧nu̧ o'ca'a, ajiya sä̧rä̧bä̧ rö̧ä̧bä̧nä̧ da'epö, u̧huo̧juȩtä̧u̧ ttö̧jä̧pi̧yä̧ töquinödo. Töcäji'ca̧ pö̧jä̧ta̧nä̧ äcänä juäocuä̧ta̧nä̧ 'ca̧'i̧nö̧do.
6Simón Pedro ö̧jä̧pö̧ ötöca päomenä, Pedro pä'inödo Jesúsru:
—Chu̧ru̧hua̧, ¿ttö chö̧jä̧pö̧ cu̧tö̧cä̧cua̧jä̧ tä̧ji̧?
7Jesús ädätinödo:
—Jitä jȩchö̧mä̧ jȩru̧pa̧jä̧. Yodojitä adiu cu̧huo̧juä̧cua̧jä̧.
8Ja̧'hua̧ ja̧'a̧ Pedro pä'inödo:
—Ttö chö̧jä̧pö̧mä̧ yoröiso töcocöjä.
Jesús päinäcudo:
—Cu̧jä̧pö̧ chötöcö juiyöttömä, ttöcu cue'ächocöjä juhua'a yabonömä.
9Ja̧'hua̧ ja̧'a̧ Simón Pedro pä'inödo:
—Ja̧'hua̧ ja̧'a̧ttö̧, Chu̧ru̧hua̧, chö̧jä̧pö̧tä̧ cutöcä'. Chu̧mö̧'i̧nä̧, chu'inä o'ca juiyönä töquittö.
10Ja̧'hua̧ ja̧'a̧nä̧ Jesús päinäcudo:
—Ya̧tȩ mo̧ro̧ji̧nä̧nö̧ töcähuäjirömä, ö̧jä̧pö̧tä̧ ötöcö'a̧nö̧ ja̧'a̧ koro idicuoca'attö. Ucututtu ya̧tȩtä̧ idicumä, korotö ttiditoca'anä.
11Jahuätöttö ya̧tȩ churutä suronä jȩpä̧tö̧rö̧ iyäcua'a u̧huo̧jua̧'a̧ttö̧: “Ucututtu ya̧tȩtä̧ idicumä, korotö ttiditoca'anä,” pä'inödo.
12Ttö̧jä̧pi̧yä̧ töcö cä'ädö, chutä ö̧'ca̧tä̧huä̧ta̧ pä'äji ta'anö 'ca̧tä̧u̧, mesa isodänä pä̧mä̧di̧nö̧do. Jahuätörö pä'inödo:
—¿Jȩchä̧ji̧mä̧ jȩru̧pä̧tö̧jä̧ tä̧ji̧ ucutumä? 13Ucutumä, Huo̧juȩcuä̧ I̧sa̧'i̧nä̧, Tu̧ru̧hua̧'i̧nä̧ pä'ätöjä ttörö. Ja̧'hua̧nö̧ päcuhuätucuomenä, ttötäsä. Adiu pä'ätöjä ja̧'hua̧nö̧mä̧. 14Ja̧'hua̧nö̧ ja̧'a̧ttö̧ ttömä, Huo̧juȩcuä̧ I̧sa̧'i̧nä̧, Cu̧ru̧hua̧'i̧nä̧ cha'anä, ucutu cu̧jä̧pi̧yä̧ chötöcöttömä, ucutu'inä ka̧ra̧rö̧'i̧nä̧, ka̧ra̧rö̧'i̧nä̧ chötöcäji ta'anö ttö̧jä̧pi̧yä̧ cutöcätucuäcua'a̧nö̧. 15Ttö jȩchä̧ji̧ ta'anö jȩcu̧'ä̧tu̧cua̧ pä'ö jȩpä̧ji̧sä̧. 16Iso päi'önä pä'ösä ucuturu, ya̧tȩ adicuä i̧sa̧mä̧ u̧ru̧hua̧ttö̧'i̧nä̧ abonänö juruhuocö. Ja̧'hua̧ta̧nö̧ ya̧tȩ huȩ'ä̧hua̧mä̧, chutä hue'inöttö'inä abonänö hue'ocö. 17Pi̧yȩ pädö ä̧ju̧cu̧ jȩcu̧'ä̧tu̧cu̧ttu̧mä̧, eseunu cu̧ja̧cuä̧cuo̧tö̧jä̧.
18“Ucutu o'ca toi'önärö ji'ähuocösä. Odipinä̧u̧ru̧ huo̧jua̧sä̧ ttömä. Ja̧'hua̧nö̧ ja̧'a̧nä̧ Huȩyu̧cuä̧ Huȩnȩ päö'a̧nö̧ 'cuäopäcua'a pä'ösä. Ja̧u̧ huȩnȩ päa'a: “Ya̧tȩ ttöcu cumä, cha̧bo̧i̧ya̧ pä'i'äji.” 19Pi̧yȩ ä'canä ji̧'ä̧huä̧rö̧sä̧ ja̧'hua̧nö̧ 'cuäopa'a tocu'ätucuomenä, iso päi'önä ttörö cu̧huo̧juä̧tu̧cuä̧cua̧'a̧nö̧. 20Iso päi'önä pä'ösä ucuturu, ya̧tȩ ttö huȩdä̧cua̧rö̧ ppä'ädömä, ttörö'inä ppä'ädö. Ja̧'hua̧ta̧nö̧ ya̧tȩ ttörö adiu ppä'ädömä, ttörö hue'inörö'inä ppä'ädö, —pä'inödo Jesús.
Jesúsru suronä jȩpä̧tö̧rö̧ i̧yä̧cuȩ huȩnȩ
21Ja̧'hua̧nö̧ ucuocuäji o'ca'a, Jesús ami iso'quinä rö̧ȩnä̧ a̧'cua̧ tta̧'ȩcui̧nö̧do. Ja̧u̧ jahuätörö adiunä ucuocu pä'inödo:
—Iso päi'önä pä'ösä ucuturu, ya̧tȩ ucututtu ttörö i̧yä̧cua̧ suronä jȩpä̧tö̧rö̧.
22Ja̧'hua̧nö̧ päomenä, u̧huo̧juȩtä̧u̧ ka̧ra̧rö̧'i̧nä̧, ka̧ra̧rö̧'i̧nä̧ topäcuähuinätödo, Jesús ucuocuäcuru ttieruhua'attö. 23Ya̧tȩ Jesús u̧huo̧juȩtä̧u̧ttu̧ i̧sa̧, Jesús rö̧ȩnä̧ repeäcumä, Jesús ippeyänä pä̧nö̧ cuinödo mesa isodänä. 24Simón Pedro Jesús ippeyänä pö̧rö̧ udo'chenä tȩ'o̧pä̧rö̧ jȩpi̧nö̧do Jesús ucuocuäcuru ttu̧huo̧juä̧chi̧'a̧ pä'ö jä'epö ä̧ju̧cua̧ pä'ö. 25Ja̧'hua̧ ja̧'a̧ttö̧ Jesúsru tö'cönänö pä̧nö̧ jä'epinödo:
—Chu̧ru̧hua̧, ¿dijä̧ttö̧ ucuru i̧yä̧cua̧mä̧?
26Jesús ja̧u̧ru̧ ädätinödo:
—I̧ri̧si̧ ji̧'qui̧cha̧nö̧tä̧ ajiyanä pötädo'ö chiyäcu, ja̧u̧tä̧do.
Ja̧'hua̧nö̧ pä'äji'ca̧ i̧ri̧si̧ ji̧'qui̧cha̧nö̧tä̧ ȩmo̧po̧'ö̧, ajiyanä pötädo'ö iyinödo Judas Iscarioterö, Simón i̧tti̧rö̧. 27Judas juhuä̧si̧ ȩmo̧mȩnä̧, ähuettämä ami iso'quinä do'ächi'inödo. Ja̧'hua̧ ja̧'a̧ Jesús päinäcudo:
—Jȩcu̧'ä̧cuȩmä̧, jurunä jȩcu̧'a̧ja̧.
28Ja̧'hua̧nö̧ päomenä, mesa isodänä cuä̧nö̧ pȩjä̧tö̧mä̧, yoröiso ä̧ju̧cuo̧co̧tö̧ pi̧nä̧tö̧do. 29Chutä Judas, ttöäre pärätä tta̧huä̧ra̧'a̧ttö̧: “Koro juäi fiesta jȩttä̧cua̧'a̧ juäi ȩma̧ pä'ö pä'äjicö̧”, amöcuädinätödo. Ja̧'hua̧ta̧nö̧: “Koro juäi ȩmö̧ usurä isotörö iya pä'öcö̧”, amöcuädinätödo. 30Judas i̧ri̧si̧ ȩmä̧ji̧ o'ca'a, rä'opächinödo. Täcö yodo ji̧na̧'a̧do.
Jareönä hueähuä huȩnȩ
31Judas räopächäji o'ca'a, Jesús pä'inödo:
—Jitä Ubo I̧tti̧ öadihuä tottäcuotö. Ja̧'hua̧ta̧nö̧ ja̧u̧ru̧ topö Dios öadihuä'inä tottäcuotö. 32Ubo I̧tti̧mä̧ Dios öadihuä i̧jȩpö̧ttö̧mä̧, Dios Ubo I̧tti̧ öadihuä'inä i̧jȩpä̧cua̧. Jitä a̧'u̧cua̧'a̧tä̧ o'ca'a ja̧'hua̧nö̧ i̧jȩpä̧cua̧. 33Chi̧tti̧mö̧, ttömä ucutucu recuomä ko̧cö̧sä̧. Ucutu ttörö cusäcuotöjä. Ja̧'hua̧nö̧ ja̧'a̧nä̧ judíos ttö̧ja̧rö̧ pädinö ta'anö, ucuturu'inä pä'ösä jitä: Ttö chi̧'chä̧cua̧'a̧ 'cho̧co̧tö̧jä̧. 34Ucuturu jareönä hueähuä huȩnȩ iyösä jitä. Korotö korotönörö repe'ätucui. Ucuturu repedinö ta'anö ucutu'inä korotö korotönörö repecuhuätucuäcua'a̧nö̧. 35Korotö korotönörö repecuhuätucuttumä, o'ca toi'önä pi̧jä̧ ttö̧ja̧ ttu̧huo̧juä̧cuo̧tö̧ ucutumä ttö chu̧huo̧juȩtä̧u̧jä̧ pä'ö.
Pedro Jesúsru ä̧ppö̧tä̧rä̧cuȩ huȩnȩ
36Simón Pedro jä'epinödo Jesúsru:
—Chu̧ru̧hua̧, ¿to cui̧'chä̧cua̧'a̧jä̧ttö̧?
Jesús ja̧u̧ru̧ ädätinödo:
—Ttö chi̧'chä̧cua̧'a̧, jitä 'cho̧cö̧jä̧. Yodojitä ttö chi̧'chä̧cua̧'a̧ cui̧'chä̧cua̧jä̧.
37Ja̧'hua̧ ja̧'a̧ Pedro pä'inödo Jesúsru:
—Chu̧ru̧hua̧, ¿dä̧bö̧ chichö juiyäcua'ajä̧ttö̧ jitä'inä? Ucuru esetö jitä'inä 'corupädi'ö'a̧nö̧ ja̧'a̧.
38Ja̧'hua̧nö̧ päomenä, Jesús ädätinödo:
—Iso päi'önä ¿ttörö esetö 'corupäcuhui'ö'a̧nö̧ ja̧'a̧ tä̧ji̧? Iso päi'önä pä'ösä ucuru, äcärä huoäcua'a ä'canä, ucumä huäbodäcuä jo̧mȩnä̧ cuä̧ppö̧tä̧rä̧cua̧jä̧ ttörö, —pä'inödo Jesús.
Actualmente seleccionado:
San Juan 13: PIDNT86
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
Nuevo Testamento en Piaroa © Sociedades Biblicas Unidas, 1986.