Luki 12
12
Farinsiyɛnŋ kiri wɔ wulufuulibi bi ki
(Matiyu 10.26–27)
1Niŋ ɲaan ki tɛ, konaŋ ki i na amaŋ nakila Yesu sun, nwɔ̀ so wuru koŋ waa dama sun. Kí mwɔka jɛ ki, fɔ kí i tunpa-ri arìmaŋ kanŋ sun. Niŋ waari ru, Yesu i ǹʼbi awɔ kalindaŋ kiri tɛ sun : « Á á yɛri paka tɔ Farinsiyɛnŋ kiri wɔ wulufuulibi bi ki kɛlina, ninwɔ̀ i miŋ tu bwuru tuutuufinŋ. A ǹʼpyaanŋ bo finŋ nu, ŋì i ǹʼbataa tuutuu-ra. 2Sabu, finŋ nadumaan tɔri tenŋ a tu jabali kì. Gonto tɔri a ji nmaŋ, tu nwɔ̀ a tu tɔbali kì. 3Niŋ na, ábɛɛ á radu-i, á i finŋ woo finŋ bi mancinŋ ki ru, cii ki ru, niŋ bataa ra na nama sunŋ kwulu la manisarinŋ tɛ. Ábɛɛ wulutɔtɔɔlaaŋ wɔ̀ bi-i ámaŋ tɔɔnta tɛ fu ki ciiru, niŋ bataa ra na sunjo tanka sun. »
Konaŋ kakan ŋì i kɛni nkɛnŋ jɛŋ?
(Matiyu 10.28–31)
4Niŋ kɔɔtɛ, Yesu tu : « Ńʼwɔ wɔshuru ri, koŋ wɔ̀ri i koŋ firi ki kilɛn-a, nka kí so-a bi tɔri ma-i ǹʼwu kili kì, á fa kɛni nini jɛŋ kì. 5Ábɛɛ kakan-i á i kɛni nwɔ̀ jɛŋ, niŋ i kaa : So i Kirinŋ wɔ̀ gbɛ, ŋì i ábɛɛ kilɛn, niŋ kɔɔtɛ, ŋì i á ɲini ki kee bo jaanama ki ru sɛbɛ, sɛli ki ra, á kɛni niŋ jɛŋ. »
6« Ɲaannaanŋ pyaanŋ taanŋ ju-a tama fuuli la kì wa? Niŋ fa a fɔn na, Kirinŋ ɲakili fɔnimaan i ǹʼtɔri tenŋ tɛ kì. 7Ábɛɛ kɔniŋ, hali ábɛɛ ŋununshinŋ ki bataa tɔnŋ tɔmaan yɛ Kirinŋ gbɛ. Á fa kɛni kì, sabu ábɛɛ bi ki gbɛ-i Kirinŋ gbɛ, ŋì i fwuu ɲaannaanŋ mwɔɔnna kari bi sun. »
Ŋi i ji Yesu tɛ walima ŋi i nʼkaan ǹʼtɛ
(Matiyu 10.32–33; 12.32; 10.19–20)
8« Míŋ i ǹʼbi-a ábɛɛ tɛ, ńʼtu koŋ woo koŋ a tu ǹʼna konaŋ kiri ɲaanna, tu afinŋ mɔ́ɔ́n, Koŋ Danshuru ki yɛrima ki a na tu Kirinŋ wɔ mɛlɛkɛn kiri ɲaanfɛ, ŋì i ǹʼbi tu nintiŋ afɔɔn. 9Nka, nwɔ̀tiŋ i a kaan-na míŋ tɛ konaŋ kiri ɲaanna, Koŋ Danshuru ki yɛrima ki a na a kaan nintiŋ tɛ Kirinŋ wɔ mɛlɛkɛn kiri ɲaanfɛ.
10Konwɔtiŋ Koŋ Danshuru ki tɔ ki li, niŋ bijɛ ki a tu ntiŋ tɛ, nka konwɔtiŋ Ɲiniwɔlinŋ ki tɔ ki li, nintiŋ wɔ bijɛ ki a tu ntiŋ tɛ fyewu kì.
11A kí ábɛɛ pa, tu arì ra ta kiti kwuru ábɛɛ sun kalinfu kiri ru, jɛntɔnŋ kiri fa faantiŋ kiri ɲaanfɛ, á fa á gbɛɛratɛɛ tu ábɛɛ ra ta nfɛnŋ bi, nwɔma á i á mwu kì. 12Sabu ábɛɛ ra ta nwɔ̀ bi niŋ mani nu niŋ waaci ki ru, Ɲiniwɔlinŋ ki yɛrima ki a ta niŋ bataa de ábɛɛ daru. »
Yesu wulusuntalinŋ wɔ̀ bi-i nafulutiŋ ɲakili bali bɛɛ bi ki sun
13Koŋ bɛɛ i tu konaŋ kiri faninmwuŋ, ntiŋ i ǹʼbi Yesu tɛ : « Kalimɔɔ, á ǹʼbi míŋ wɔrinŋ ki tɛ, tu wú ńʼwɔ tiŋ kani lu ki wɔri ńʼtɛ. »
14Yesu i niŋ weŋ ki rupwulu : « Nkɛnŋ míŋ sɔɔ ŋí i ji ábɔɔ kitikwurutɔnŋ i, walima áwɔ kani lutɔnŋ i? »
15Niŋ bataa kɔɔtɛ, Yesu i ǹʼbi konaŋ ki tɛ : « Á á yɛri paka shɔ! Á fa ji nafulu bi ki ru koŋ fyikatiŋ ni i kì. Konanmini wɔ nafulu ki mwɔ woo mwɔ, ŋì so-a ɲaninkulutɔnbi shɔɔrinŋ wɔri-i ntiŋ tɛ kì dɛ! »
16Yesu i wulusuntalinŋ ka bi kí tɛ : « Ka wuru nafulutiŋ bɛɛ ɛ. Wúwɔ bilaŋ kiri i shɔ kusɛbɛ. 17Wú i ǹʼbi a ciiru : ‹ Bilaŋ bomaŋ míŋ gbɛ kì, míŋ a ǹʼji dɔɔkunŋ dɔɔ? Míŋ a ka bilaŋ kari bataa bo da sa? › 18Niŋ kɔɔtɛ, wú i a miiri, wú i ǹʼbi : ‹ Míŋ a nwɔ̀ ma, niŋ i kaa : míŋ a ńʼwɔ cinŋ kiri bataa gwu, ŋí i ǹʼsinaŋ tɔri ri tan, ŋí i ńʼwɔ bilaŋ ki fa ńʼgbɛfɛfinŋ kiri bataa bo nini nu. 19Niŋ kɔɔtɛ, míŋ a ǹʼbi ńʼyɛri tɛ : Sɔɔ, ŋi i nʼwɔ nufinŋ nu-ni, ŋi i nʼwɔ mwunufinŋ mwunu-ni, niŋ fa ŋi i nʼɲaannabyɛ-ri, sabu bilaŋ i miŋ kankantɛ, nwɔ̀ a miŋ nu po jiri mwɔɔnna. › 20Nka Kirinŋ tu niŋ weŋ ki tɛ : ‹ Myɛɛn wee! Jiŋ cii ki ru, miŋ ɲini ki a mwu nʼwu. Niŋ na, miŋ finŋ wɔ̀ri rakɔli-i, nini a na ji nkɛnŋ wɔ ri? › »
21Niŋ kɔɔtɛ, Yesu tu : « Koŋ wɔ̀ i ka juniɲa ka ru nafulu ki rakɔli bo-a a yɛri dintɛ bi jɛ kiri bi tɛ, niŋ i faa nafulu dumiŋ ntiŋ gbɛ Kirinŋ wɔ ki ru kì, nintiŋ i ji-a ka ɲaan ka tɛ. »
Á á gbɛ bili Kirinŋ sun
(Matiyu 6.25–34)
22Yesu i ǹʼbi awɔ kalindaŋ kiri tɛ : « Mìnki i ncin-a, míŋ i ǹʼbi-ri ábɛɛ tɛ, ńʼtu á fa á gbɛɛratɛɛ áwɔ nufinŋ ki, fa á bonsunjuulinŋ kiri kilaka ɲaan bira kì. 23Sabu ɲini ki bi ki gbɛ-i nufinŋ bi ki wu, firi ki bi ki i ji gbɛ juulinŋ bi ki wu.
24Ábɛɛ kaankaan kiri shɛɛli, yìrì finŋ firi-ra kì, yìrì dumiŋ bilaŋ tɛri-ra kì. Hali cinŋ yɛri yìrì gbɛ kì. Nka Kirinŋ i yìrì tɔnnafɛ-a. Ábɛɛ pari nini wu pewu pewu kì wa? 25Ábɛɛ ru, nkɛnŋ tenŋ wɔ gbɛɛratɛɛ so-a pyaanŋ bo-i ntiŋ shi ki sun? 26Ábɛɛ ji so-a niŋ bi pyaanŋ ki ra kì, nfɛnŋ na ábɛɛ i á ciirufɔni-ni bi pyɛ kiri ra?
27Ábɛɛ ɲiŋ foo kiri shɛɛli! Yìrì juu tan-a yìrì i juulinŋ bo-ri kì, nka niŋ fa a fɔn na, hali masa Solomani fa awɔ gbɛbi ki bataa, ńʼtu ntiŋ sunyeka ɲaan ki ka ɲiŋ foo kari ru tenŋ po kì. 28Ábɛɛ ǹʼshɛɛli, a Kirinŋ ji niŋ ɲiŋ ki sunyeka shɔ-a ka ɲaan ka tɛ, ninwɔ̀ i ja-a jiŋ, siri, tuu i ji-a ǹʼpa, sii ǹʼna ǹʼnu kì, ŋì a ábɛɛ sunyeka shɔ kɛ! Ábɔɔ bilinabi ki kuru-i dɛ!
29Ábɛɛ ra finŋ wɔ̀ nu, niŋ fa ábɛɛ ra finŋ wɔ̀ mwunu, á fa á gbɛɛratɛɛ nini kilaka ɲaan na kì. 30Nwɔ̀ri bili Kirinŋ na ka juniɲa ka ciiru kì, nini finŋ tɔri bo-a niŋ finŋ kiri bataa ceeli ki jɛŋ kì. Nka, nwɔ̀ i ábɛɛ, ábɛɛ Tiŋ Kirinŋ ki i ábɛɛ makufinŋ kiri bataa tɔ-a. 31Niŋ ki ra, á Kirinŋ wɔ Masabi ki ceeli sun, a niŋ ma, Kirinŋ yɛri ki a finŋ pyɛ kiri bataa bo ǹʼsun ábɛɛ gbɛ. »
Nafulu wɔ̀ kɔ-a kì
(Matiyu 6.19–21)
32Niŋ kɔɔtɛ, Yesu i ǹʼbi awɔ kalindaŋ kiri tɛ : « Ábɛɛ wɔ̀aŋ ni i ǹʼpa-a míŋ cɛfan, á fa kɛni kì. Sabu ǹʼdi-i ábɛɛ Tiŋ Kirinŋ ki tɛ, kí i arɔɔ Masabi ki wɔri ábɛɛ tɛ.
33Á á gbɛfɛfinŋ kiri bataa ju, á i ǹʼjalinŋ ki wɔri gbɛwɔ kiri tɛ. Á jalinŋ bofinŋ libali li lamɔni bo á jɛŋ Kirinŋ wɔ ki ru, nwɔ̀ ru nafulu kɔ-a kì. Kwunŋ so-a nmaŋ kì, yii ri fani na ǹʼkila nu kì. 34Sabu, ábɔɔ nafulu ki i mani wɔ̀ ru, ábɛɛ ciiru ɲakili ki bataa i niŋ mani ki ru sɛbɛ. »
Bilinatɔnŋ kiri wɔ cɛrukɔli bi ki
35Yesu tu : « Á á cɛrukɔli baara ki tɛ, á i áwɔ lanpaŋ kiri cumaan tu. 36Á ji miŋ tu baaradaŋ wɔ̀ri i arì ŋununtiŋ ki pwulu ki suu-ra, ntiŋ i po awɔ cɛn tan mani nu, nwɔma, a ntiŋ na waarinŋ wɔ̀ ru, ntiŋ i na mani ki tɔnŋ na bwɔ, kí i ǹʼnawwulu shuu. 37Niŋ na, a ŋununtiŋ ki na, ntiŋ i na fa baaradaŋ wɔ̀ri wu arì ɲaanna, nini a ji koŋ fɛrɛmaan ni i. Míŋ a ǹʼbi ábɛɛ tɛ ńʼtu, sɛli ki ra, ŋununtiŋ ki yɛri ki a na a rukɔli, ntiŋ i awɔ baaradaŋ kiri dɔri tu kí na sɔɔ kí i nufinŋ ki nu, ntiŋ yɛri ki gbɛ ki a na ninwɔ̀ sɔɔ kí tɛ. 38Niŋ ki ra, a ŋununtiŋ ki na wɔkila ru woo, a ntiŋ na sisarimaŋ tɔnŋ sun woo, a ntiŋ na fa baaradaŋ wɔ̀ri wu arì ɲaanna, nini a ji koŋ fɛrɛmaan ni i.
39Á ǹʼtɔ tu futiŋ ki ji wuru kwunŋ ki na waari ki tɔ-a, ntiŋ wuru-ra kwunŋ ki suu de ki sun awɔ fu ki ru. 40Mìŋ ɲaan tenŋ ki tɛ, ábɛɛ yɛrima kiri ramɔnimaan i ji waarinŋ bataa ru, sabu ábɛɛ ɲakili waaci wɔ̀ ra kì, Koŋ Danshuru ki a na niŋ waaci ki ru. »
Baaradaŋ sɔbɛ fa baaradaŋ kulinŋ bi ki
(Matiyu 24.45–51)
41Yesu niŋ wulu kiri bi-i waarinŋ wɔ̀ ru, Pyɛɛri i ntiŋ nanɔri tu : « Ŋuntiŋ, ábɛɛ ka wulusuntalinŋ ka bi-a yibɛɛ bantenŋ tɛ daa, walima ábɛɛ ǹʼbi-a koŋ bataa tɛ? »
42Ŋuntiŋ Yesu i Pyɛɛri rupwulu : « A joŋ ɲakilitiŋ wɔ̀ kulumaan ji-i a ŋununtiŋ ki tɛ, ŋununtiŋ ki a ninki sɔɔ awɔ kaniŋ sun bi ki bataa ŋununu, nwɔma ntiŋ i nufinŋ ki wɔri joŋ pyɛ kiri tɛ a wɔri waaci ki ru. 43A ŋununtiŋ ki a pwulu na fa niŋ baaradaŋ ki wu niŋ baara ki ma-a, miŋ tu ǹʼbiye wuru ntiŋ gbɛsun ɲaan wɔ̀ tɛ, niŋ baaradaŋ ki a ji koŋ fɛrɛmaan a. 44Sɛli ki ra, míŋ i ǹʼbi-a ábɛɛ tɛ, ńʼtu ŋununtiŋ ki a na niŋ sɔɔ a gbɛfɛfinŋ kiri bataa ŋununu. 45Nka a niŋ joŋ ki ǹʼbi a ciiru, ‹ míŋ ŋununtiŋ ki na-a farɔn kì. › Niŋ i ŋununbi sɔɔ-ri joŋ pyɛ kiri sun, shuru bili mari sun, ntiŋ i kí bwɔ-ri, ntiŋ i tu nufinŋ sinaŋ nu na, niŋ fa lɔ mwunu-na, fɔ niŋ i ntiŋ kari-ri. 46Niŋ joŋ ki ɲakili jibi wɔ̀ fa waarinŋ wɔ̀ ra kì, ntiŋ ŋununtiŋ ki a na niŋ i. A niŋ ma, ŋununtiŋ ki a niŋ joŋ ki bwɔ, ntiŋ i bo Kirinŋ jɛŋ kɛnibali kiri fan. Ntiŋ a ŋuntan-ni, niŋ fa ntiŋ i a ɲiinnaŋ nataa-ri niŋ mani nu.
47Joŋ wɔ̀ i a ŋununtiŋ ki dintɛ bi ki tɔ-a, ntiŋ dumiŋ a sunfuru-ra, ntiŋ i ǹʼma kì, niŋ joŋ ki a bwɔ mwɔɔnna mwu dɛ! 48Nka joŋ wɔ̀ a ŋununtiŋ ki dintɛ bi kiri tɔ-a kì, a niŋ ja ji a bwɔ bi ma, niŋ a bwɔ pyaanniŋ. Sabu, gbɛ faa wɔri-i nwɔ̀tiŋ tɛ, gbɛ faa ra ceeli nintiŋ gbɛ, mwɔɔnna wɔri-i nwɔ̀tiŋ tɛ, mwɔɔnna mwɔɔnna i ranɔri nintiŋ gbɛ. »
Yesu tu afinŋ bi ki a na konaŋ ki kɔɔye amaŋ na
(Matiyu 10.34–36)
49Niŋ kɔɔtɛ, Yesu i ǹʼbi konaŋ ki tɛ tu : « Míŋ na-i tuu wu pwɔkulinŋ sun. Míŋ i ǹʼtɛ ǹʼcumaan i ji-i dɔɔ kɔ. 50Nka míŋ kakan-i ŋí i wu, ninwɔ̀ i cɔɔri sinaŋ i, nwɔ̀ kakan-i ŋì i míŋ kila sun. Míŋ ciirufɔnimaan yɛ, fɔ ŋì i ta so niŋ cɔɔri ki jibi ki sun. 51Ábɛɛ cirasun tu míŋ na ɲaanfɛfili wu pwɔkulinŋ sun wa? Aayi dɛ! Míŋ bi ki a na konaŋ kiri kɔɔye arìmaŋ na. 52Sabu, koŋ taanŋ i kaniŋ ki bɛɛ sun, míŋ tɔ ki bira, kí a na arì kɔɔye arìmaŋ na. Koŋ byaŋ ki a na koŋ fuuli ki kari-ri, koŋ fuuli ki i koŋ byaŋ ki kari-ri.
53Kaniŋ kiri sun, tiŋ a na a kɔɔye a danshuru ra,
danshuru i a kɔɔye a tiŋ na.
Ɲiŋ i a kɔɔye a danmari ra,
danmari i a kɔɔye a ɲiŋ na.
Shinŋ ɲiŋ i a kɔɔye a danshuru wɔ mari ra,
danshuru wɔ mari i a kɔɔye a shinŋ ɲiŋ na. »
Waaci ki taanmashɛ kiri tɔ bi ki
(Matiyu 16.2–3)
54Yesu wuru ǹʼbi-a konaŋ kiri tɛ sɛbɛ : « Ábɛɛ ja ji kirinŋ ki minimaan ja sunfyirimaŋ ki ru kɔ, ábɛɛ i ǹʼbi-a shuu tu kirinŋ ki a na. Sɛli ki ra, ǹʼyɔ na-a ncinŋ.#12.54 Yawutu kiri wɔ kɛniŋ ki ru, na kirinŋ ki i mini-na sunfyirimwuŋ. 55Á na ǹʼja tu sunŋ kwulu la faa po-a, á i ǹʼbi-ri tu mani ki a kwulu. Niŋ i ji-ri ninkunŋ ncinŋ.
56Wulufuulibitiiri wee! Ábɛɛ i so-a kirinpɔli ki fa fwuniŋ ki sun taanmashɛ kiri tɔ-i, nfɛnŋ na bi wɔ̀ri i ma-a ábɛɛ faninmwuŋ dɔɔ, ábɛɛ so-a nini ɲaantɔ-i kì?
Fu de nʼfa nʼkarishi kiri faninmwuŋ
(Matiyu 5.25–26)
57Nfɛnŋ na, ábɛɛ so-a bi telimaan kiri tɔ-i, á i niŋ ma-ni á yɛrɛtɛ kì? 58A wulu de miŋ fa koŋ faninmwuŋ, a nintiŋ ji ǹʼtɛ a i ta miŋ wu faan nu, nʼbanba fu i de nʼfa ntiŋ faninmwuŋ saa ki fan, nwɔma ntiŋ fa ta nʼcɛɛn de kitikwurutɔnŋ kiri gbɛfɛ, nini i nʼde nkasu ki ɲaannasuutɔnŋ kiri gbɛfɛ, nini i nʼkee bo nkasu ru kì. 59Míŋ a ǹʼbi miŋ tɛ ńʼtu a miŋ de niŋ mani ki ru, ńʼtu kɔni wɔ̀ i miŋ na, a miŋ niŋ bataa sali kɔ pewu kì, ńʼtu miŋ a po san niŋ nkasu ki ru kì. »
Actualmente seleccionado:
Luki 12: JOB
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© Wycliffe Bible Translators, Inc.