Rkaa̱ 16
16
Bi̱ tsꞌén íjñá chi̱bo̱a̱ Kjisoo̱ kjo̱a̱a̱ énkjiín moso̱ xi májín ꞌniátakoón
1Kjisoo̱, bi̱ katsoó xota̱ tsi̱ꞌe̱:
–Ngo ndi̱yà kisꞌijña ngo nda̱ cho̱n xi kisꞌiee̱ ngo moso̱ xi askoo̱n ngayeje nii̱, ko̱jo xi katsꞌénxájo̱ to̱o̱n, kó kui nda̱ cho̱o̱n tsintꞌié nga mosoo̱ katsꞌénkjién to̱o̱n. 2Kó kui nda̱ cho̱o̱n tsíchji̱a̱a̱, kó bi̱ katsoó: “Míkjo̱a̱a̱ nga bi̱ kjiꞌi ni xi tsꞌéntꞌie an kjo̱a̱a̱ ji. Ti̱ꞌinkꞌasꞌinní xki̱ kjo̱a̱a̱ ngayeje ni, ko̱jo to̱n xi tjínna, ngatꞌa̱ jè ngiti̱ ka̱májín nga moso̱na ka̱ma ngase ji.” 3Kósꞌe̱ nda̱ mosoo̱, bi̱ tsꞌén katsꞌénkjó: “Mí xí sa̱ꞌin an. Ngatꞌa̱ ngije ngiti̱ tsja̱axájínna ndi̱a̱na, ka̱májínna tsi tꞌanangi kokjan an, kó achichí soboána nga to̱nchji̱e̱ kuíꞌá an. 4Áa̱n, jè be an mí ni xi sa̱ꞌin an tsi̱ꞌe̱ nga ngije ko̱ngatji̱ngina ndi̱a̱na kjo̱a̱a̱ xá moso̱ xi tjítsꞌen an, ngayeje xotaa̱ skjíxꞌána nga̱ntjo̱a̱ ndiꞌaa̱.” 5Kó tsíchji̱a̱a̱ ngayeje xota̱ xi tjitjieén to̱o̱n ndi̱a̱a̱, kó bi̱ katsoó xi tjoón: “Kótjín tjitjiée̱n tsi̱ꞌe̱ ndi̱a̱na.” 6Bi̱ katsó kui nda̱a̱: “Úchán barri̱ isti̱.” Sꞌe̱ bi̱ katsó mosoo̱: “Jiꞌín chjábé jí xo̱jo̱n nínga kjitꞌa xki̱i̱, kó ichítié tsí tꞌíjñíi̱.” 7Sꞌe̱ bi̱ katsoó kje̱ꞌe xí tjitjiée̱n nga: “Kó jí, kótjín tjitjiée̱n.” Sꞌe̱ bi̱ katsó kui nda̱a̱: “Tie mi̱ koxta̱ to ndso̱ko̱a̱n ṉño̱pan.” Kó bi̱ katsó mosoo̱: “Jiꞌín chjábé jí xo̱jo̱n nínga kjitꞌa xki̱i̱, kó jin mi̱ koxta̱ tꞌíjñíi̱.” 8Nga kamábe kui nii̱ nda̱ xi tsi̱ꞌe̱ xaá, achichí katsꞌéntsjajo̱ kui moso̱ xi ndajiín, ngatꞌa̱ ta̱nisién kjínkón kamá nga katsꞌén kui nii̱. Ngatꞌa̱ xota̱ xi tjín kuí nga̱sondiee̱, maña̱ ngase tsꞌénjo̱ xota̱ xkjín, ta̱bo̱a̱jiín ni xi tsꞌén xota̱ xi chji̱a̱ni Néná.
9Kó an bi̱ xiánjnúꞌun jún: Ti̱ꞌankjiénjnú kjo̱a̱cho̱n xi tjín kuí nga̱sondiee̱ nga ko̱si̱ko̱jójnú xotaa̱, tsi̱ꞌe̱ nga kjín ngase amingo̱ kꞌuiéjnú, ki̱a̱ ka̱maa̱ nga kju̱i̱e̱ kui kjo̱a̱cho̱o̱n, Néná tsja̱ajnú ngi̱ndie xi tikón ngatsjéni̱xtjii̱n.
10Xota̱ xi nda maꞌniátakón nga skoón ni xi chiboa, ti̱ ka̱maꞌniátakón nga skoón ni xi tsie, kó xota̱ xi kixi̱jín tsꞌénkjátjosón ni xi chiboaa̱, ti̱ bo̱a̱ ti̱ tsꞌén ni xi tsiee̱ kixi̱jín ka̱ma nga. 11Ja̱ tsi kamáꞌniátakónjínjnú nga kichonjnúu̱ kjo̱a̱cho̱o̱n kui nga̱sondie jeé, ꞌyá xí tsja̱ajnú nga xchindàjnú kjo̱a̱cho̱n xi ndaa̱. 12Kó tsi ni xi tsi̱ꞌe̱ kje̱ꞌe xota̱ kamáꞌniátakónjínjnú nga kamájínjnú kichonjnúu̱, ꞌyá xí tsja̱ajnú ni xi tsa̱jún.
13Nde ngojín moso̱ xi jó ndi̱a̱ sa̱ꞌínseén, ngatꞌa̱ ngo chꞌo ka̱maa̱, kó xi ingoo̱ tjó ka̱maa̱, ko̱jo tsi ngo ndasen ka̱maa̱, kó xi ingoo̱ ndasénjín ka̱maa̱. Ka̱májín mosoo̱ Néná ko̱jo mosoo̱ kjo̱a̱cho̱o̱n ka̱majnú.
14Kó tsintꞌié kuí nii̱ já fariseoo̱, kui xota̱ xi achichí tsjá kamaá to̱o̱n, kó tsajnókie Kjisoo̱. 15Kó Kjisoo̱, bi̱ katsoó kui jaá:
–Jún ngindyi̱ko̱n xotaa̱ kixi̱ májnú yojojnú, ta̱nga Néná be kókjiꞌi ini̱ma̱jnú. Ngatamakjínjnú nga ni xi achichí bendikón xotaa̱, ngindyi̱ko̱n Néná ni xi ta̱nisién ꞌniú chꞌokjiꞌi boá.
Bi̱ tsꞌén akóyá Kjisoo̱ kjo̱a̱a̱ kjo̱a̱kitii̱ ko̱jo nínga botixómá Néná
16Kjo̱a̱kitii̱ ko̱jo ni xi katsꞌénꞌindó já chji̱ni̱e̱ꞌe̱én Néná jetꞌani ngaskande nga kisꞌijña Jua̱ xi botíndaá, kó ndeskande koó kjiꞌa tjíꞌbíni̱jmì éntjatsi̱e̱e̱ nínga botixómá Néná, kó ngayeje xotaa̱ xi tsꞌén ngo kjo̱a̱ꞌniú, tsi̱ꞌe̱ nga kꞌo̱sꞌien kui ngi̱ndiee̱.
17Ta̱nga nde chií niꞌínjín tsi kju̱i̱e̱ ndiꞌakꞌajmii̱ ko̱jo tꞌanangii̱, ta̱bo̱a̱jiín nga xcha̱jatꞌa chií ni xi kjitꞌa xo̱jo̱n kjo̱a̱kitii̱ Néná.
Bi̱ tsꞌén akóyá Kjisoo̱ kjo̱a̱a̱ xota̱ xi je ixán kó ꞌbíndo xkjín
(Matioo̱ 19:1-12; Markoo̱ 10:1-12)
18Ta̱ ꞌyání xi ku̱i̱ꞌíjñá chjo̱ón, kó tsi kje̱ꞌe chjo̱on ku̱i̱xanjo̱, tsꞌén bendikónjín kjo̱a̱bixaa̱n, kó xi ku̱i̱xanjo̱ chjo̱on xí je ikꞌíjñaá, ti̱ tsꞌén bendikónjín kjo̱a̱bixaa̱n kui nga.
Bi̱ tsꞌén íjñá chi̱bo̱a̱ Kjisoo̱ kjo̱a̱a̱ nda̱ cho̱o̱n ko̱jo Laá
19Ngo nda̱ cho̱n kisꞌijña, xi achichí tsjakon ńjño tsajá, kó ndyiojón ndyiojón katsꞌén sꞌué, nga katsjá nichinie xi chjí. 20Nga̱ntjo̱a̱ ndiꞌaa̱ kui nda̱ cho̱o̱n, kisꞌijña ngo nda̱ ni̱ma̱ xi tsíꞌá chji̱e̱ xi ꞌmí Lá, xi tsajaá ṉdo, 21kó achichí bojó kamaá kui nda̱a̱, kó kamámején maá iskjinie ni xi ixóngií yámíxa̱a̱ nda̱ cho̱o̱n, kó ngaskande ńñaá katomájón má ṉdoo̱ Laá. 22Ti̱chaa̱n jachó ni̱xtjin nga kꞌien Laá, kó ndítsjiee̱ Néná kijíjo̱ ngi̱ndie nínga tikón Abraa̱n, kó ti̱ kꞌien nda̱ cho̱o̱n nga, kó akjanijín kuí. 23Kó nda̱ cho̱o̱n ndo̱bo̱a̱ṉkꞌi̱e̱e̱n kiniꞌánkjí, kó achichí kjo̱a̱ni̱ma̱ kiniꞌánkjaꞌa ki̱a̱a̱, sꞌe̱ ti̱chaa̱n kamábe nínga tikón Abraa̱n, kó nga Laá ki̱a̱ tikóntꞌaa̱. 24Kósꞌe̱ nda̱ cho̱o̱n tsíchji̱a̱a̱ Abraa̱n, nga bi̱ katsoó: “Na̱ꞌmi Abraa̱n, ngatamani̱ma̱a̱ an, kó nangíyé ji Laá tsi̱ꞌe̱ nga ku̱i̱ꞌíngandá ndáfoa to̱ko̱tsja kósꞌe̱ ngatsꞌénkꞌándyi̱ chií najén án, ngatꞌa̱ achichí kjo̱a̱ni̱ma̱ tsꞌénfoaꞌatio an ngi̱jin kui ndiꞌií.” 25Ta̱nga Abraa̱n, bi̱ katsoó: “Ji ndí, ngatjaꞌátsjiee̱n nga kjiꞌanga kixindyin ji nga̱sondie achichí ni katseꞌeé, kó Laá achichí ni xi ndajín xi katseꞌeé kui, ta̱nga ngotꞌe̱ ꞌne̱ Laá achichí tjíniꞌándajoo̱n kꞌi̱e̱e̱, kó ji achichí tsie kjo̱a̱ni̱ma̱ tibitjatí. 26Kó kjo̱a̱a̱ ngayeje kui nii̱, ngo ti̱xa̱na̱nga̱ tikón ngamasienná, kó achichí kjin tindyionñáa xingi̱, kó májín tsi ngo xi kꞌi̱e̱ ko̱e̱je̱ni jàn jàn, ko̱jo tsi ngo xi jàn jàn kji̱ndi̱báni nga kji̱ndi̱bá kꞌi̱e̱e̱.” 27Sꞌe̱ bi̱ katsó kui nda̱ cho̱o̱n: “ꞌNiú míꞌaá na̱ꞌmi, tsi̱ꞌe̱ nga ko̱na̱ngíyé ji Laá ndiꞌaa̱ na̱ꞌmina, 28ngatꞌa̱ ún má ntsꞌié án xi ka̱tso̱yaa̱, tsi̱ꞌe̱ nga ti̱ kꞌi̱e̱jín kji̱ndi̱bá kꞌi̱e̱ kui ngi̱ndie nínga tsie kjo̱a̱ni̱ma̱ bitjatioó.” 29Sꞌe̱ Abraa̱n, bi̱ katsoó: “Jè tikoón kjo̱a̱kitii̱ Moisee̱, ko̱jo ni xi katsꞌénꞌindó já chji̱ni̱e̱ꞌe̱én Néná, ¡Ngatintꞌièꞌeén ni xi ítꞌa kui jaá!” 30Sꞌe̱ bi̱ katsó nginí kui nda̱ cho̱o̱n: “Jmí na̱ꞌmi Abraa̱n, ta̱nga tsi tjín xota̱ xi je kꞌien xi ko̱e̱je̱koo̱n kui jaá, sa̱ꞌínkꞌoyà yojoo̱ kjo̱a̱a̱ ni xi ndajínkjiꞌi xi ndyi̱tsꞌèn.” 31Ta̱nga bi̱ katsó Abraa̱n: “Tsi ntꞌiéjiín kjo̱a̱kiti xi ítꞌa Moisee̱, ko̱jo ni xi katsꞌénꞌindó já chji̱ni̱e̱ꞌe̱én Néná, ti̱ bo̱a̱ ti̱ tsꞌén nde sꞌi̱jinjiín nga tjín xota̱ xi je kꞌien xi kjo̱a̱ꞌáꞌyaá.”
Actualmente seleccionado:
Rkaa̱ 16: MAIX
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014