Rkaa̱ 17
17
Bi̱ tsꞌén akóyá Kjisoo̱ kjo̱a̱a̱ xota̱ xi ta̱ngatꞌanii̱ kui nga tsꞌénjé xota̱ xi ngasee̱
(Matioo̱ 18:6-7,21-22; Markoo̱ 9:42)
1Sꞌe̱ Kjisoo̱, bi̱ katsoó nga tsíchji̱a̱jo xota̱ tsi̱ꞌe̱:
Achichí niꞌin kjiꞌi nga jmíjín xi sti̱ngí kjo̱a̱a̱ nga ngo jé sa̱ꞌín, ¡ta̱nga ni̱ma̱ xò xí sa̱ꞌín ngo ni, tsi̱ꞌe̱ nga kje̱ꞌe xí sa̱ꞌínjé! 2Ta̱sá ngo ndi̱jo̱je ngatítꞌa kjásén, sꞌe̱ ngatꞌajmijin yojoo̱ ngi̱jin ndáchíkoón, ta̱bo̱a̱jiín tsi ngo ni sa̱ꞌín, tsi̱ꞌe̱ nga ngo kui jákjíndií sa̱ꞌínjé. 3Kuíni nga, ¡chónjnú ngayeje ni xi si̱ꞌánjnú!
Tsi ngo ntsꞌie sa̱ꞌín ngo jé, ti̱ꞌinxchínje̱ ji, kó tsi sa̱ꞌínkꞌoyà yojoo̱ nga ngiti̱ bo̱a̱jín sa̱ꞌín, ti̱ꞌinjetakíi̱n. 4Tsi yito ndi̱yà sa̱ꞌínjé kondra̱ tse̱ nga ngo ni̱xtjii̱n, kó tsi yito ndi̱yà bi̱ ka̱tso̱o̱: “Sa̱ꞌínkꞌoyà an yojona, ti̱ꞌinjetakínní”, ti̱ꞌinjetakíi̱n.
Bi̱ tsꞌén akóyá Kjisoo̱ kjo̱a̱a̱ kjo̱a̱sꞌijii̱n
5Kó já apostroo̱, bi̱ katsoó:
–Ndi̱a̱, tasíke̱jejne̱ tsi̱ꞌe̱ nga ꞌniú ngase sꞌi̱jinjne̱.
6Sꞌe̱ Kjisoo̱, bi̱ katsó:
–Tsi ndeta̱ chií tsí sꞌijinjnú Néná, xikó má tsꞌén xi̱xi̱ xojmaá mostasaa̱, ka̱ma bi̱ kꞌuínjnúu̱ kui yá sikómoroo̱: “Ngatjoníyá ji, kó ngi̱jin ndáchíkoón ngatamatji̱e̱ ji”. Kó ku̱i̱ntꞌiéꞌénjnú kui yaá.
Bi̱ tsꞌén íjñá chi̱bo̱a̱ Kjisoo̱ kjo̱a̱a̱ moso̱ xi tsꞌénkjátjosón xaá
7ꞌYání jún xi tsi ngo moso̱ tikónjnú xi tjitsꞌénxá ngi̱jin jno̱o̱ ko̱jo tsi cho̱ tsꞌénkoón, kó ngije kjoeꞌeni nga kijítsꞌénxá, bi̱ kꞌuínjnúu̱: “Ti̱tjè, kó tindyintꞌe ji yámíxa̱a̱”. 8A mí tsi ta̱sá bi̱ kꞌuínjnúu̱: “Ti̱ꞌindení nichinie, ko̱jo tꞌínde yojòo̱ kó ti̱ꞌinsénní nga tꞌíyéní ni xi skjíni̱e̱ an ko̱jo ni xi kꞌuí an, kó ngije kamána ka̱ma xi̱ni̱ ji, ko̱jo sꞌi̱ ji”. 9A ko̱e̱ꞌéjnúu̱ ndokꞌóchjì kui mosoo̱ kjo̱a̱a̱ nga je katsꞌén ni xi kiꞌmií. Jmíra̱ xián án. 10Ti̱ bo̱a̱ ti̱ tsꞌén jún, ngije kiniꞌánjnú ngayeje ni xi kiꞌmíjnú, ka̱ma bi̱ kꞌuínjnú: “Moso̱ xi nde jmí ni chjíjiín boá ñá, ngatꞌa̱ ta̱kuítsí ni xi tsoboáná xí kiniꞌán.”
Bi̱ tsꞌén katsꞌéndaya Kjisoo̱ tie já xí tjiín chiꞌin xi tsꞌénkjátsón tji̱xin yojoná
11Nga kijí Kjisoo̱ na̱xi̱ńdáꞌniú Jerusale̱n, kó nga jaꞌa xtji̱e̱e̱n nangi Samaria̱ ko̱jo nangi Ngalilea̱. 12Nga tsꞌasꞌien ngo ndí nangi, jachókoón tie já xí tjiín chiꞌin xi tsꞌénkjátsón tji̱xin yojoná, kó ta̱ kjin kixindyia, 13kó ꞌniú askjandáyà nga bi̱ katsoó:
–¡Ji Kjiso̱, Mostro̱, ngatamani̱ma̱a̱ ji̱n!
14Nga kamábe Kjisoo̱ kui jaá, bi̱ katsoó:
–Tangínjnú, kó takójnúu̱ yojojnú chináꞌmii̱.
Kó tji̱e̱nga ndyi̱fí ngi̱ya ndi̱ya̱à, kamátsjiejón nga katjoꞌóxiín chiꞌii̱n. 15Kósꞌe̱ ngo kui jaá, nga kamábe nga je kamándaya, kijíꞌoyá nginí nínga tikón Kjisoo̱, kó askjandáyà má nga katsjaá kjo̱a̱je Néná, 16kó nga jachókoón Kjisoo̱, asiéntikoó ngaskande nga jachótꞌaa̱ kje̱n tꞌanangii̱ nga katsjaá ndokꞌóchjì, kui nda̱a̱ ki̱a̱ chji̱a̱ni nangi Samaria̱. 17Sꞌe̱ Kjisoo̱, bi̱ katsoó kui nda̱a̱:
–A tiejín májnú xi kamátsjiejón chiꞌinjnú. Kó xi ngi nijaa̱n ñá síndo ki. 18A jmíjín ngase xi kjindibátsjaá kjo̱a̱je Néná, ata̱ kuí tsí nda̱ xi chji̱a̱ni nangi Samaria̱.
19Kó Kjisoo̱, bi̱ katsoó kui nda̱a̱:
–Ti̱sítji̱n, kó tꞌen ꞌne̱, kjo̱a̱sꞌijìi̱n xí je tsꞌaxiéꞌaá ji.
Bi̱ tsꞌén katsóyà Kjisoo̱ kjo̱a̱a̱ ni̱xtjin nga ko̱tíxoma Néná
(Matioo̱ 24:23-28,36-41)
20Já fariseoo̱ asíyaá Kjisoo̱ kjo̱a̱a̱ kjiꞌání nga kji̱ndi̱bá ni̱xtjin nga ko̱tíxoma Néná, kó Kjisoo̱, bi̱ katsoó:
–Jmí tsi tsijen ka̱ma kjiꞌanga ko̱tíxoma Néná, 21jmíjín xi bi̱ ka̱tso̱: “Kꞌi̱e̱ tikón”, ko̱jo tsi “jàn jàn tikón”, ngatꞌa̱ Néná jè tsꞌénbotixómá ngi̱jinjnú.
22Kósꞌe̱ bi̱ katsoó xota̱ tsi̱ꞌe̱:
–Kjo̱chó ngo ni̱xtjin nga ka̱mamejénjnú nga ndeta̱ ngo ni̱xtjin xcha̱jnú ndií nda̱ xi̱ꞌii̱n, kó xcha̱jínjnú. 23Kó tjín xí bi̱ ka̱tso̱jnú: “¡Kꞌi̱e̱ tikón!” Ko̱jo tsi “¡jàn jàn tikón!” Ta̱nga ngata̱ mongínjínjnú, ti̱nde ngata̱ mongíntjíngíjínjnúu̱. 24Ngatꞌa̱ xikó maá nga foaꞌatꞌe nga ꞌna̱ ma ndeskande ngo nga̱nde, ngaskande xi ingo nga̱ndee̱ ndiꞌakꞌajmii̱, bo̱a̱ má ka̱ma ni̱xtjin nga kjo̱e̱ꞌe ndií nda̱ xi̱ꞌii̱n. 25Ta̱nga tjón mára achichí kjo̱a̱ni̱ma̱ kjo̱a̱ꞌatio, kó ngayeje xota̱ xi̱ꞌbi̱ xi sa̱ꞌínchꞌó. 26Kó xikó kamá ni̱xtjin nga kisꞌijña Noee̱, bo̱a̱ má ka̱ma ni̱xtjin nga kjo̱e̱ꞌe ndií nda̱ xi̱ꞌii̱n. 27Xotaa̱ Iskjinie, ko̱jo katsꞌe, ko̱jo ixán, ko̱jo katsꞌénkixan xkjín, ngaskande nga Noee̱ tsꞌasꞌien ngi̱ya tjotso jee̱, sꞌe̱ kjindibá stsé ꞌniuú, kó katsꞌénkjié ngayeje xotaa̱. 28Ti̱ bo̱a̱ ti̱ ka̱ma xikó kamá ni̱xtjin nga kisꞌijña Loo̱t, xotaa̱ iskjinie, ko̱jo katsꞌe, ko̱jo tsꞌatsie, ko̱jo atíñá, ko̱jo ítji̱e̱ ni, ko̱jo katsꞌénda ndiꞌa, 29ta̱nga ni̱xtjin nga jatjo Loo̱t na̱xi̱ńdáꞌniú Sondoma̱, ixó ndiꞌí ko̱jo asufre̱ ndiꞌakꞌajmii̱, kó katsꞌénkjié ngayeje xotaa̱. 30Bo̱a̱ má ka̱ma nga ko̱kó yojoo̱ ndií nda̱ xi̱ꞌii̱n.
31Kui ni̱xtjin jàn, xi tikón nkꞌaa̱ ndiꞌaa̱, kósꞌe̱ nii̱ ngi̱ya ndiꞌaa̱ ndyi̱a̱, ngata̱ fotjajénjín tsi̱ꞌe̱ nga skjíbé, kó xi ngi̱jin jno̱o̱ tsoꞌbá, ngata̱ fíꞌoyájín. 32Ngatjaꞌátsjienjnú ni xi kamaá chjo̱ón Loo̱t. 33Ngatꞌa̱ ngayeje xi mejeén kꞌo̱xiéꞌá kjo̱a̱mindyioo̱n, ta̱sá sa̱ꞌínchaja, kó ngayeje xi sa̱ꞌínchaja kjo̱a̱mindyioo̱n ta̱ngatꞌanii̱ an, kuí boá xi kjo̱tjoꞌa.
34Xiyàjnúꞌun jún nga kui ni̱xtji̱e̱e̱n, tsi jó xota̱ xi kjiyojo ngo nga̱són ṉchan, ngo kongínjo̱, sꞌe̱ ngo kꞌuijñá. 35Tsi jó ínchjín xí nijan kꞌó, ngo kongínjo̱, sꞌe̱ ngo kꞌuijñá. 36Tsi jó já ndyi̱tsꞌènxá ngi̱jin jno̱o̱, ngo kongínjo̱, sꞌe̱ ngo kꞌuijñá.
37Kó bi̱ katsó xota̱a̱ Kjisoo̱:
–Ñání nga bo̱a̱ ka̱ma Ndi̱a̱.
Sꞌe̱ Kjisoo̱, bi̱ katsó:
–Nínga tikón yojo kꞌiee̱n, ki̱a̱ ka̱matikó ríkieé.
Actualmente seleccionado:
Rkaa̱ 17: MAIX
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014