Rkaa̱ 15
15
Bi̱ tsꞌén íjñá chi̱bo̱a̱ Kjisoo̱ kjo̱a̱a̱ énkjiín cho̱tsa̱nga̱ xi kichajaá
(Matioo̱ 18:10-14)
1Achichí xota̱ xi foaꞌáꞌyá to̱n xi machjítjé ni, ko̱jo xota̱ jé kijíkóntiñaa̱ Kjisoo̱, tsi̱ꞌe̱ nga tsintꞌieé ni xi tsíchji̱a̱, 2kó já fariseoo̱ ko̱jo já chji̱ni̱e̱kjo̱a̱kitii̱, bi̱ katsó nga tsíchji̱a̱taꞌin Kjisoo̱:
–Kui nda̱a̱ achichí nda yaꞌa xota̱ jé, kó ngaskande ṉño̱ kjiniejo̱.
3Kósꞌe̱ Kjisoo̱ katsóyaà kui énkjiín:
4–ꞌYá nda̱ xi tsi úchán má cho̱tsa̱nga̱ xi tjiín, kó tsi ngo xcha̱jaa̱, nga ku̱i̱ꞌíjñámasienjín xi ngi ichítié ko̱jo yichán nijaa̱n nangi kixií, tsi̱ꞌe̱ nga ko̱e̱je̱ngase xi ngoo̱, ngaskande nga sa̱ko̱ó. 5Kó ngije sa̱ko̱ó, ngaskande tsjá má ka̱maa̱ nga nga̱són tjiaa̱ ku̱i̱ꞌíjñasón, 6kó nga kjo̱chó ndiꞌaa̱, ku̱i̱ꞌítikó xota̱ xi nda yaꞌa ko̱jo xota̱ tꞌa ndiꞌaa̱, kó bi̱ ka̱tso̱o̱: “Tsja ngatamajnú, ngatꞌa̱ jè kasakona cho̱tsa̱nga̱ xi kichajána.” 7Ja̱ bo̱a̱ tꞌíxián an nga tsie ngase kjo̱a̱tsja kꞌuié ndiꞌakꞌajmi jàn, ta̱ngatꞌanii̱ nga ngo xota̱ jé sa̱ꞌínkꞌoyà yojoo̱, ta̱bo̱a̱jiín xi ngi ichítié ko̱jo yichán nijan xi kixi̱i̱, xi chjiénjiín nga sa̱ꞌínkꞌoyà yojoo̱.
Bi̱ tsꞌén íjñá chi̱bo̱a̱ Kjisoo̱ kjo̱a̱a̱ énkjiín to̱n xi kichajaá
8Axa̱ ꞌyá xota̱chjo̱on xí tsi tie to̱n tikoón, kó tsi ngo xcha̱jaa̱, nga ku̱i̱ꞌítíjín ngo ndiꞌíxò ko̱jo ko̱tíchá ndiꞌaa̱, kó ko̱ngase cha̱n cha̱n ngaskande nga sa̱ko̱ó. 9Kó ngije sa̱ko̱ó, ku̱i̱ꞌítikó xota̱ xi nda yaꞌa ko̱jo xota̱ tꞌa ndiꞌaa̱, kó bi̱ ka̱tso̱o̱: “Tsja ngatamajnú, ngatꞌa̱ jè kasakona to̱n xi kichajána.” 10Ja̱ bo̱a̱ xian an nga, nga ꞌbé kjo̱a̱tsja ngindyi̱ko̱n ndítsjiee̱ Néná, nga ngo xota̱ jé sa̱ꞌínkꞌoyà yojoo̱.
Bi̱ tsꞌén íjñá chi̱bo̱a̱ Kjisoo̱ kjo̱a̱a̱ énkjiín ngo ndí xi katsꞌénkjié ni xi katsjaá na̱ꞌmii̱
11Ti̱ bi̱ ti̱ katsó Kjisoo̱ nga:
–Ngo nda̱ kisꞌijñaa̱ jó jáxíꞌín. 12Kó nda̱ xi kjindií, bi̱ katsoó na̱ꞌmii̱: “Na̱ꞌmi, te̱ꞌéní ni xi tsoboána, ni xi tjiín ji.” Kó na̱ꞌmii̱ katsjaá ni xi tsoboaá kui ndií. 13Kó ngije jaꞌa chiboa ni̱xtjin, kui nda̱a̱ ítikó ngayeje ni xi katseꞌeé, sꞌe̱ kijí kje̱ꞌe na̱xi̱ńdá kjin, kó ki̱a̱ kisꞌijña nga ta̱xkiya katsꞌénkjié ngayeje to̱o̱n nga katsꞌéntsjajo̱ yojoo̱. 14Ngije katsꞌénkjié ngayeje to̱o̱n, kjindibá ngo kjindiá kuí ngi̱ndiee̱, kó kui nda̱a̱, ítsꞌi̱yanii̱ nga jaꞌa kjindiá ndatsa kui nga. 15Kó kijí, sꞌe̱ tsangasexaá ngo nda̱ xi chji̱a̱ni kui ngi̱ndiee̱, xi katsꞌénkjí nínga choo̱n chi̱nga̱. 16Kó kui nda̱a̱ kamámején maá iskjinie nichiniee̱ chi̱nga̱a̱, ta̱nga jmíjín xi katsjaá. 17Sꞌe̱ ti̱chaa̱n kamákjiín kui nii̱, kó bi̱ katsó: “¡Achichí kjín mosoo̱ na̱ꞌmina xi tjiín nichinie ndiꞌana, kó an, kjiꞌme kjindiá án! 18Ta̱sá kjuín ngiñá an ndiꞌana, kó bi̱ xiáa̱n na̱ꞌmina: Na̱ꞌmi, jè katsꞌenjé án kondraa̱ ndiꞌakꞌajmii̱, ko̱jo katsꞌenjé án ngindyikin ji. 19Ngaskande ngiti̱ ka̱májín ndíi̱ sení, te̱ꞌéxéní xikoó ngo mosoo̱.” 20Sꞌe̱ kijí nginí ndiꞌaa̱ na̱ꞌmii̱.
Ti̱ sꞌe̱ kjin tsꞌéndibání nga kamábe na̱ꞌmii̱, kó ni̱ma̱ kamaá, sꞌe̱ kijíkjaꞌáyíndi̱yà, janíkjá, kó ngo ndsó katsjaá tꞌanijon. 21Kó kui nda̱a̱, bi̱ katsó: “Na̱ꞌmi, jè katsꞌenjé án kondraa̱ ndiꞌakꞌajmii̱, ko̱jo katsꞌenjé án ngindyikin ji, kó ngaskande ngiti̱ ka̱májín ndíi̱ sení.” 22Ta̱nga na̱ꞌmii̱, bi̱ katsoó mosoo̱: “ꞌNa̱xiéjnú ngo ńjño xi tsjakjiꞌi, kó ti̱ꞌankajájnú ndína, kó tꞌíyájnúu̱ ngo sti̱ngaro tsja, ko̱jo tjayàjnúu̱ tji̱xíndié. 23Kó ndibájo̱jnú cho̱yojo xi ꞌniú jee̱, sꞌe̱ ti̱ꞌankꞌiènjnú, xi̱ni̱e̱ kó tsjangatꞌiéná, 24ngatꞌa̱ kui ndína xi̱ꞌbi̱ kꞌien katsaki, kó jaꞌáꞌyaá, kichajá katsaki, kó je kasakona.” Kó ítsꞌi̱yanii̱ nga katsꞌén sꞌué.
25Nda̱ xi xchaá xingaá ngi̱jin jno̱ tjitsꞌénxá, kó nga jachó tiña ndiꞌaa̱ tsintꞌieé só, kó kamábe nga tjíchá, 26kó tsíchji̱a̱a̱ ngo mosoo̱ na̱ꞌmii̱, kó asíyaá mí ni xi kjima. 27Sꞌe̱ bi̱ katsó kui mosoo̱: “Ntsꞌie jeꞌe, kó na̱ꞌmíi̱ ngo cho̱yojo xi ꞌniú je katsꞌénkꞌién, kjo̱a̱ xoò nga nda jeꞌe ndií, kó nga jmí chiꞌinjín xoò.” 28Kósꞌe̱ katsꞌénxchán kuí nda̱ xi xchaá, kó kamámejénjiín tsꞌasꞌien. Sꞌe̱ jataxie na̱ꞌmii̱, kó índasee̱n tsi̱ꞌe̱ nga tsꞌasꞌien. 29Ta̱nga kui nda̱ xi xchaá, bi̱ katsoó na̱ꞌmii̱: “Tsitsíjin na̱ꞌmi, kótjín nónií nga tjítsꞌénxájoo̱, kó ngatsjéni̱xtjin tjítsꞌenkjatjosoón, kó nde ngo ndí cho̱tsa̱nga̱ boeꞌéjínní tsi̱ꞌe̱ nga sa̱ꞌin an ngo sꞌué, kó skjíni̱e̱jo an já amingo̱na. 30Ta̱nga nga jeꞌe ndíi̱, xi je katsꞌénkjié ngayeje to̱n xi katseꞌée̱ ndo̱bo̱a̱ ínchjínmasién, kiniꞌínkꞌíi̱n ngo cho̱yojo xi ꞌniú je.” 31Sꞌe̱ bi̱ katsó na̱ꞌmii̱: “Ji ndí, ngatsjéni̱xtjin tindyinje̱ní, kó ngayeje ni xi tjínna jè jí tse̱. 32Ta̱nga chjiéngá katsꞌen an kui sꞌueé, tsi̱ꞌe̱ nga tsja kamána, ngatꞌa̱ ntsꞌie, jè kꞌien katsaki, ta̱nga ngotꞌe̱ ꞌne̱ jè jaꞌáꞌyaá, kichajá katsaki, ta̱nga ngotꞌe̱ ꞌne̱ jè kasakona.”
Actualmente seleccionado:
Rkaa̱ 15: MAIX
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014