Mak 13
13
Nyala asiu tinan ta Kindrei ato-oh
(Metiu 24:1-2; Luk 21:5-6)
1Eme Jises udu asiu tinan ta Kindrei eme len le badeh, lau tan ari tiye i tan i buku doh, “Ou anyolom ndramak ta leheya, asiu amekes na bek tinan kede-eh, mwasin handru labai ma asiu mari kede-eh konen handru.”
2Eme Jises tiye tan i buku doh, “Ou anyolom asiu tinan tinan kede-eh deh? Ari ndruwi asiu bek kameh winiyan bales bareu loken bwe. Iri marakon kameh ato-oh iu i andri.”
Sahou tanan ta wendreya ma sisi-in kameh asahan
(Metiu 24:3-28; Luk 21:7-24)
3Ya eme Jises manyah udu bwele-e mandrei Olip bilisiu ta asiu tinan ta Kindrei. Iy le ari udu ndra ndrahun, eme Pita ma Jemis hawe Jon uru Enduru ala ndremenya iy anya, 4“Ou tiye keme taso, na saba len handru kameh iri lakou doh kasahan? Ya saba kalem kameh kasahan bwena ta leheya lakou mari doh buku ndrame bakep?”
5Eme Jises tiye i toro i buku doh, “Ado kanyolom kamwenen, ya ari ndramak sawendreyani ado, ndri-iy. 6Iri lau solo-an kameh ame anya iri asehek sahou tek ma anya, ‘Jo dah Krais’ Ya iri kameh wendreyani lau solo-an. 7Ya i buku none ado anuhun kurutuwe bahun ereu mirihik, ma yoyou ta bahun ereu len, budon tado sandra-i, ndri-iy. Iri lakou doh kameh asahan bwena op, arile lakou mari ta ano kameh kahis le. 8Tasah, kon munyak tinan ari kameh amekes bahun i ta kon tinan ari, ya kabin badu kon rakon kameh amekes bahun i ta kabin badu kon rakon ja. Ma idah kameh kon ari ari kameh ndroi asahan aliy, ma son kameh asahan bolo kon. Iri lakou mari doh anya kasahan buku none sisi-in ta badih anya kato-ou nah.
9“Arile, bale aha ki-in taha, tasah iri kameh ateu ado ma adeu aha a mine iri kansol ma atehei aha a ta sahou. Ya iri kameh ubwi aha an bolo asiu ta atukum tiri Juwis, ma aha kameh ales are mada iri lau ta atondrok ma hawe iri kabin. Iri amekes doh ta ado katiye sahou tek mwasin ki tiri ya iri marakon kanuhun ma katanan. 10Eme ma sahou mwasin badeh, katiye mwena op, ki tiri kon marakon. 11Ya, i buku none iri atehei aha ka ta sahou, aha sabwerei ta saba sahou kameh aha kasehek. Arile, i buku none len ta aliy asahan, aha kameh asehek sahou Kindrei edeu ewek taha, tasah sahou aha asehek kameh sahou taha bwe, sahou ta Malawin Ndrabun labai. 12Ya na len doh kameh ndramak atehei nadu tinen amwenen ili ta mada sahou, ya iy kameh edeu sa-oh tan. Ya tama iri ra-on ale kameh amekes buku aliy ili ta nadu iri. Ma iri nah ra-on kameh asahan lau ta bahun ili ta tama ma tine iri, ma iri kameh atehei iri ala mada iri lau tinan ta kadai iri kamak. 13Ya iri lau mari kameh baseken aha bwe, tasah aha badeh, an hamon tek. Arile, are lau tawi iy ili isos munyak ano, Kindrei kameh winiyan akohok iy i hamon ja.
14“Idah kameh aha anyolom
‘lakou munya-un ndra-in’ Daniyel 9:27; 11:31; 12:11
ales udu kon ndrabun ta iy sare aliy. (Are lau anyolom sahou dah iy kabudon kamwenen.) Are lau iri are kon Judiya katobwak kala bolo mandrei. 15Ya are lau ereu bwele-e asiu loken sala hamon sala bolo asiu sakohok ari lakou tan ja, ndri-iy. 16Ya are lau ereu bolo bilin sala hamon sala sakohok kolau tan ja, ndri-iy. 17Len doh kameh len ndra-in labai tiri badih nah ereu tiri, ma badih nah ma nyandren! 18Ado kasolom ki ta Kindrei ta ado satobwak na len ta jor ma ur. 19Tasah, len ndra-in doh eme kameh, kon mari kameh andra-i mara-ei, sakalawi ja iri len ndra-in mene kabatana Kindrei bwidi munyak eme taku dah. Ya ari ja hamon winiyan basakalawiy bwai. 20Arile, Laban ndrasani kane len doh. Ya, i buku none iy basaniy bwe, ari ndramak winiyan basakalawiy bwe. Arile, toro lau le nane Kindrei ndranyowonyani oro, iy kameh sani len doh kameh a mo-on.
21“Ya buku none ari ndramak katiye taha, ‘Krais asah idah!’ deh, ‘Laban asah in kenoh!’ Aha sanuhun, ndri-iy labai. 22Tasah, idah kameh krais ta wendreya ma hawe propet ta wendreya kameh asahan. Ya iri kameh amekes iri lahou tinan ma kalem ta wendreya iri lau, ma ale anya kanone iri lau ala budon ta Kindrei udu tiri badeh, kataku.
23“Bale aha kudu aliy! Lakou mari doh kameh barasahan hamon, eme ya jo ndratiye taha ereu bwena.”
Kalem ta Nadu Ndramak Awas eme hamon ja
(Metiu 24:29-31; Luk 21:25-28)
24“Arile, hamon ta len ndra-in ano, ya udu bolo len doh kameh,
‘An kameh ilik, ma bun kameh winiyan banya bwe.
25Ya ndrau udu kandrah kameh taku ereu kandrah eme andri, ma boto-on mari badu kandrah kameh nyukunyok.’ Aisaya 13:10; 34:4
26Ano iri lau kameh anyolom Nadu Ndramak Awas asahan ereu bwele-e asi kandrah, ma boto-on tan ma lomadan tinan labai. 27Eme ya iy kameh suni iri angelo tan au ala kati jor ma hahuw ereu bolo munyak dah, ta atukum iri lau tan, ala budon tan udu tiri, ereu kon ranah ili taku ranah ame hawen.
Tanan ta kei pik
(Metiu 24:32-35; Luk 21:29-33)
28“Ya aha kanyolom kei pik, ya iy kameh tiye tado. Buku none andran irek ta gwa ma nyabun asahan, aha tana aha, idah kameh kon ndra an le ai. 29Ya, buku none aha anyolom iri lakou nane jo ndrasehek, aha atana aha len ndrame bakep ai. 30Jo tiye tado handru! Iri lau rebesem areu kede-eh kahis na len dah kameh bamak bwe le, iri lakou mari doh kameh asahan. 31Kandrah hawe kon munyak dah kameh ano iu, arile sahou tek le kameh winiyan bano bwe.
Mada aha kaleu!
(Metiu 24:36-44)
32“Ari ndramak bala tanan len, deh, mada an ta Laban eme hamon bwe. Iri angelo badu kandrah ma nadun ale tanan bwe, taman le ari badeh, tanan ai. 33Bale aha kudu aliy! Aha kanyolom kamwenen, tasah aha tanan bwe, saba len handru, kameh iy eme hamon ja. 34Ya idah kameh, i buku none ndramak ari anya kedek kili kon ari leheleh, ya iy atehei iri lohowan tan atondrok ai, iy ari ari in ta lahou tan labai, iy ari ari in ta lahou tan labai. Ma iy tiye ta ndramak ta madasan badeh, madan kaleu. 35Ya aha kanyolom kamwenen, tasah aha tanan saba len tama asiu kameh eme bwe. Iy kameh asahan na beyeh, deh bwe, iy kameh asahan na ben alih deh, bwe na boho len deh, bwe na ma ndraben an eme loken. 36Koro-an iy keme i le mani tur, ya iy kameh kasilahei aha amadin kahis le. 37Lakou jo asehek nyala ado badeh, jo asehek nyala aha mari ya mada aha kaleu!”
Actualmente seleccionado:
Mak 13: lidNTpo
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2001, Wycliffe Bible Translators, Inc. All rights reserved.