Mak 12
12
Sahou sokek ta nyala salibah ndra-in atondrok bilin waen
(Metiu 21:33-46; Luk 20:9-19)
1Eme ya Jises asehek sahou sokek i tiri i buku doh, “Ndramak ari badeh, bwidi bilin ari ta waen, ma iy bwidi kou awudiy. Ma udu bolo bilin tan nane doh, iy ihi lek ari ta atik ma apis buwa waen, ano iy tahi asiu ra-em ta atondrok bilin doh. Eme iy ruwani bilin ili mine iri lau salibah ta atondrok. Ma iy iu i kon rakon ja.
2Eme ya len ta abwe-eh buwa waen asahan, iy eme suni lohowan tan ari ili hawe oro salibah atondrok bilin waen nane dah, anya kakohok rayah buwa waen ki minen. 3Eme oro salibah ta bilin tawi iy ma adai iy, eme ma oro tikahei iy iu na luka minen ma luka katin. 4Ano ja, iy suni lohowan tan ari ili hawe oro ja. Eme oro adai iy i batun, ma abolei iy andra-i labai. 5Ano ja, iy suni lohowan tan ari ili ja. Eme oro adai iy imek, ma hawe iri rayah ja ale oro ubwiy, ma rayah badeh, oro adai imek. 6Ano, ari le badu bolo oro erah ya idoh nadun amwenen, ya iy badeh, aseken iy labai. Eme tama bilin nane abudon buku doh, ‘Sebwe oro kameh anuhun boho naduk.’ 7Arile oro salibah ta bilin suburuk i toro ari ari i buku doh, ‘Ei, nadun eme, to kadai iy, ma to kakuhi iri lakou tan mari.’ 8Eme oro tawi iy, ma adai iy imek, ma oro akahei iy iu i len ta bilin.
9“Ya idah kameh tama bilin kamekes saba lakou handru? Iy kameh idi oro lau doh amak, ma iy kameh atehei bilin ili mine iri lau rayah ja katondrok ma kabo gok ta aliy. 10Handru labai, sebwe ado banyolom sahou doh ereu bolo buk ndrabun ta Kindrei bwe nadeh, sahou i buku doh,
‘Bek ale iri lau ta atah asiu bwale iri, na dah, iy ndrasahan kati ndru ta ka-u asiu bek. 11Idah san ta Laban amekes, ma mwasin labai ta mada taha.’ ” Wari 118:22-23
12Eme iri tinan tiri pris hawe iri lau ta leheya kandriyen tiri Juwis hawe iri lau-en nane anya ja Jises asehek sahou sokek doh i bada iri. Eme ma iri anya kateu iy. Arile iri winiyan bwe, tasah iri anoh iri lau solo-an nane dah. Eme iri ruwani iy ma iri au.
Ndremenya ta akeh takis
(Metiu 22:15-22; Luk 20:20-26)
13Ano oro suni iri Parasi rayah hawe lau rayah ta Herot a hawe Jises ma ndremenya ta none iy na sahou. 14Eme iri ame hawen ma anya, “Ndramak ta leheya, ahi tanan, ou lau ta asehek sahou handru, ma ou banoh are ndramak bwe. Ya ou asehek sahou ari le ili tiri lau mari, buku ndramak nyaran tinan, deh, ndramak iy nyaran bwe, ya ou badeh, leheya san handru ta Kindrei. Ou abudon i buku sah? Mwasin ta taha kadeu takis ki ta Sisa, deh, ndri-iy?” 15Arile Jises badeh, ndratanan iri asehek sahou na boho iri le, eme ma iy tiye i tiri, “Buku sah handru aha anya kanone jo? Aha kaleheya keme tek ari luk bororoh ya jo kanyolom.”
16Eme iri andrei ari ili minen, ya eme iy ndremenyani iri i buku doh, “Malawi ndramak ma nyaran kede-eh are lau handru?”
Eme iri anya, “Ta Sisa.”
17Eme Jises tiye i tiri, “Mwasin, saba lakou ta Sisa, aha kadeu ki ta Sisa. Ya saba lakou ta Kindrei, aha kadeu ki ta Kindrei.” Ya eme boho iri asak.
Ndremenya ta nyala tasou ma amak ja ta imek
(Metiu 22:23-33; Luk 20:27-40)
18Eme iri Sadusi ame hawe Jises anya kanone iy. Oro anya, iri lau ale ndramak bwena mene, iri kameh winiyan bamak ja bwe. 19Eme oro ndremenyani Jises i buku doh, “Ndramak ta leheya, Moses bwena mene torowenei nyala taha anya,
‘Buku none ari ndramak imek, ya udun erah ya iy nadun bwe, nadu tinen kameh kandrei nyau tan ki udun, ya iy katehei nah ki tan, ma nah doh ki nyara nadu tinen, ya nyara nadu tinen sa-au, ndri-iy.’ Dutoronomi 25:5
20Len ari bwena, oro lau ma ndro taloh, oro badeh, nadu tine oro. Eme kadok toro i tasou ta badih ari, eme ya iy imek ma iy nadun bwe. 21Ano iy bwaneh sudi udun ja, ano bwaneh imek ma uru nah bwe le. Ano ja silih sudi iy ja eme i le buku aliy, iy imek ma uru nadu uru bwe le. 22Ya eme oro ma ndro taloh amak, nah bwe le i buku aliy. Ano, udu hamon badeh, ma iy badih ale imek. 23Ya, ou tiye taso. Na len hamon ta iri lau mari amak ame loken ja, badih doh kameh ili udu are lau handru? Ou tanam, iy i tasou ili toro ma ndro taloh nane doh.”
24Eme Jises tiye i tiri anya, “Aha ndrandra-i labai, tasah aha bala tanan tarou ereu bolo buk ndrabun ta Kindrei bwe. Ma aha tana aha boto-on ta Kindrei bwe ale. Eme ya ado asehek sahou laleyah. 25Na len iri lau ndramak kameh amak ame awas ja, ya iri kameh winiyan bala tasou ja bwe. Iri kameh asahan buku iri angelo areu kandrah. 26Handru labai. Iri lau ndramak bwena, hamon kameh iri amak ja. Sebwe aha banyolom ta tarou ta Moses bwe nadeh? Idoh asehek ta nyala len mene Moses atou jih anya udu ta kei. Eme ma Kindrei tiye i ta Moses i buku doh,
‘Jo Kindrei ta Abraham, ta Aisik, ma ta Jekop.’ Eksodus 3:6
27Aha ndrandra-i kede-eh! Sahou doh leheya taha i buku doh: Kindrei atondrok koha oro ma taloh, ma oro ado awas ado hawen kahis le. Eme ma, Kindrei batiye anya iy mene Kindrei tiri lau ndramak, arile na dah, bwe. Bwe! Iy badeh, Kindrei tiri lau koha iri udu aliy kahis le. Eme ma aha andra-i kede-eh, tasah aha abudon anya, iri lau ale ndramak bwena mene, iri kameh winiyan bamak ja bwe.”
Nyala batanau udu bwele-e batanau mari
(Metiu 22:34-40; Luk 10:25-28)
28Eme ma ndramak ari ta leheya kandriyen tiri Juwis eme bolo iri ma iy anuhun iri andres iri. Eme iy anuhun Jises asehek sahou i tiri ndra mwasin le ai. Eme ma iy ndremenya Jises i buku doh, “Saba sahou batanau badeh, tinan handru ma udu bwele-e iri sahou batanau mari?”
29Eme Jises anya, “Lakou laba tinan handru asah idoh,
‘Aha kanuhun, aha lau badu Isra-el, Laban badeh, iy le ari, iy Kindrei tataha. 30Ya ou aseken Laban tam Kindrei na ndrinem mari, ma na koham handru mari, ma na budon tam mari, ma na boto-on tam mari.’ Dutoronomi 6:4-5
31Ya la-uh ta aliy ja asah idoh,
‘Ou aseken iri lau ari ari badu hawen, i le buku ou aso-ok ou le.’ Lebitikus 19:18
Ya ari batanau ja badeh, winiyan basakalawi uru batanau ma la-uh dah bwai. Uru le badeh, maha-an ma udu bwele-en labai.”
32Eme ma iy ndramak nane dah tiye i ta Jises, “Handru labai, ndramak ta leheya, ou nane tiye handru. Ari Kindrei udu kede-eh ja bwai, iy le ari. 33Ma ou aseken iy na ndrinem mari, ma na budon tam mari, ma na boto-on tam mari. Ma ou aseken iri lau ari ari badu hawem, i le buku ou aseken ou le, idoh mwasin handru, sakalawi kandriyen ta asun lakou i buku salom i ta Kindrei, ma lakou adai i buku salom i ta Kindrei.”
34Eme Jises anuhun ma iy asehek mwasin handru, eme iy tiye i tan, “Ou badeh, are mirihik labai ta tondrok ta Kindrei.” Ano, hamon ta aliy iri anoh ma iri bandremenya ari ndremenya bala tan ja bwai.
Krais nadu Debit ma iy ale Laban tan
(Metiu 22:41-46; Luk 20:41-44)
35Jises udu ndra bolo asiu tinan ta Kindrei kahis, eme ma iy leheya iri mwan ma badih ta kandriyen ta Kindrei. Iy tiye tiri anya, “Ya aha kanuhun. Debit badeh, ndramak ndra bwena, arile, bolo len mari lundriyen oro badeh, asahan kahis. I buku sah handru iri lau ta leheya kandriyen tiri Juwis anya ja, Krais badeh, nadu Debit? 36Taha ndratanan, bwena mene Malawin Ndrabun atehei budon i ta Debit le tiye i buku doh,
‘Laban Kindrei tiye i ta Laban tek i buku doh:
“Ou ame manyah ado loboho minek salin
winiya jo le baratehei iri lau ta amekes budon ndra-in i tam barado bahandra katim.”’ Wari 110:1
37Ado kanuhun. Debit amwenen aloh ndramak nane Laban tan. Ya ki buku sah handru kameh iy ndramak nane ja ki nadu Debit?”
Sahou batanau ta nyala iri lau ta leheya kandriyen
(Metiu 23:1-36; Luk 11:37-54; Luk 20:45-47)
Eme iri lau solo-an handru anuhun ma iri sekesek. 38Jises leheya iri mwan ma badih kahis ma iy tiye tiri udu bolo leheya tan anya, “Mada aha kaleu tiri lau ta leheya kandriyen tiri Juwis. Iri aseken adek ala ame na kolau moroyan lawe tiri, eme iri anya lau mari kasumon iri na len ta baen. 39Ya iri anya kamanyah kareu le bwabwai mwasin badu tukum tiri Juwis, ma ndrahu kon ta atudun ta nyamon tinan. 40Iri bene-ei asiu ta badih nyau, ya iri wendreya ta aliu salom lawe-en lawe-en. Idah kameh iri lau buku doh kameh akohok maha-an laba tinan labai.”
Nyala badih nyau akeh luk handru i ta Kindrei
(Luk 21:1-4)
41Eme Jises manyah udu mirihik ta ndrahune luk udu asiu tinan ta Kindrei, eme ma iy anyolom lau ala ame akeh luk i bolo lakou ta ndrahu luk nane dah. Iri lau tiri lakou solo-an badeh, akeh luk solo-an handru en. 42Eme ya badih nyau ari tan se lakou bwe badeh, eme akahei luk bororoh saraman ma la-uh le. 43Eme Jises luhi oro lau tan ame ma iy asehek i toro, “Jo katiye tado handru en! I badih nyau tan lakou bwe kede-eh, akeh luk solo-an labai ja tiri lau rayah kede-eh ja. 44Tasah iri lau mari kede-eh akahei rayah le badu bolo luk tiri solo-an, arile iy badih nyau tan lakou bwe badeh, ndrakahei luk mari ta sukunyan ndrala.”
Actualmente seleccionado:
Mak 12: lidNTpo
Destacar
Compartir
Copiar
¿Quieres tener guardados todos tus destacados en todos tus dispositivos? Regístrate o inicia sesión
© 2001, Wycliffe Bible Translators, Inc. All rights reserved.